Read Dagara, Northern Ƴɛ̀r-dɩrbɛ 2 Bible Online

Ƴɛ̀r-dɩrbɛ 2 - Dagara, Northern bible

Ƴɛ̀r-dɩrbɛ 2

¹A Sore malkɩ tɩ yi n a Gilgal wa a Bokim wa yel a Ɩsɩrayɛl nɩbɛ à ŋá: «Ɩ̃ ɩ na nyɩ yi a Eziptɩ tẽw, ɩ̃ɩ ɩ nyɩ kpɛ a tẽw ʋl pʋɔ ɩ̃ na tɩ pɔ yel, k'ɩ̃ɩ na kʋ̀ n a nyɩ sãàkʋm-kore a. Ɩ̃ tɩ yel'a: “Ɩ̃ bɛ be za na sãw a wõ-taa ɩ̃ na maal'ɩ nyɩ a bɛr ɛ.

²Ɛ́ a nyɩɩm a, nyɩ kʋ̃ maalɛ nɩ a tẽw ŋa nɩbɛ wõ-taa ɩ. Nyɩ na ŋmɛr'ɩ a bɛ bàwr-maal-kube bɛr.” Ɛcɛ nyɩ bɛ bɛr wõ m ɛ! Bʋ̃ʋ n'ɩ à à ŋá nyɩ na ɩ a!

³Lɛ n'a ɩ̃ tɩ yel: “Ɩ̃ bɛ diwr a tẽw nɩbɛ bɛrɛ a nyɩ niŋé ɩ: bɛ na ƴãw nyɩ nɩ bɛra, ɛ́ nyɩ na puore nɩ a bɛ ŋmɩmɛ lo a bɛ bɛra pʋɔ.”»

⁴A Sore malkɩ na tɩ ƴɛ̀r a ƴɛ̀r-bie á ŋá za kʋ̀ a Ɩsɩrayɛl nɩbɛ za baar'a, bɛ tɩ ŋmɩɛrɩ cɛlsɩ kone nɩ.

⁵Bɛ tɩ por'ɩ a zie nɛ yúor kɛ́ Bokim, a pɛr lɛ kɛ́ “A Kõ-konbɛ”, ɛ́ tɩ maalɩ bagɛ kʋ̀ a Sore a be.

⁶A Zozue na tɩ bɛr a lãw nɩbɛ a, a Ɩsɩrayɛl nɩbɛ tɩ lɛb'a cen ŋa za a zie bɛ na kʋ̀ ʋ ʋ so a pʋɔ. À ŋá n'a bɛ tɩ so a tẽw.

⁷Bɛ tɩ tõ n a Sore tome a Zozue cãafʋ daar za nɩ a ʋ kũu pùorí mɩ̀, a lɛn daar za a nɩ-kore na vʋʋrɩ a, bɛl na tɩ nyɛ̃ a yel-bɛrɛ a Sore na maalɩ a Ɩsɩrayɛl ƴãw a.

⁸A Nun bidɛb Zozue, a Sore tõ-tõ-bie, tɩ tɛr'ɩ yome kʋba nɩ pie (110), ɛ́ kpi.

⁹Bɛ tɩ ũù ʋ nɩ a zie ʋl pʋɔ bɛ na tɩ kʋ̀ ʋ ʋ so ʋ a, a Tɩmɩnatɩ-Hɛrɛsɩ, a Efarayim tan vuo pʋɔ, a Gaasɩ tãw saa-pɛrɩ́-gʋba-lowr.

¹⁰Al pùorí, a ʋ daar nɩbɛ mɩ̀ tɩ kpi na. A nɩbɛ bɛl na tɩ dɔw lɩɛrɩ tu a bɛ tɩ bãw a Sore nɩ a tõ-bɛrɛ ʋ na tɩ tõ a Ɩsɩrayɛl nɩbɛ ƴãw a ɩ.

¹¹Lɛ n'a a Ɩsɩrayɛl nɩbɛ tɩ ɩ bom nɛ na bɛ pɛlɩ a Sore pʋɔ a, ɛ́ puore a Báàl mɩnɛ.

¹²Bɛ tɩ zawr'ɩ a Sore bɛr, a bɛ sãàkʋm-kore Naaŋmɩn na ɩ bɛ yi a Eziptɩ tẽw a, ɛ́ tu a nɩ-bʋʋrɛ bɛl na kpɩɛr viiri koli bɛ a ŋmɩmɛ. Bɛ tɩ gbĩ n dume a ŋmɩmɛ á ŋá niŋé, ɛ́ lɛ n'a bɛ tɩ ɩ a Sore suur ír.

¹³Bɛ tɩ zawr'ɩ a Sore bɛr, ɛ́ puore a Báàl mɩnɛ nɩ a Asɩtarte mɩnɛ.

¹⁴A Sore suur tɩ ìr'ɩ a Ɩsɩrayɛl nɩbɛ ƴãw. Ʋ tɩ bɛr bɛ na kʋ̀ nɩ-farbɛ bɛ fa bɛ, ɛ́ de bɛ ƴãw a bɛ dɔ̃ dem na viiri koli bɛ a nuru pʋɔ, bɛ kʋ̃ tʋ̃ɔ́ bà gbɛ́r a bɛ niŋé ɩ.

¹⁵Kʋralɛ, bɛlɛ wa yi a zɛbr ƴãw a, a Sore mɩ́ ɩ na a bɛ dɔ̃ dem zɛb tʋ̃ɔ́ bɛ, mɛ̃ a lɛ ʋ na tɩ yel kʋ̀ bɛ ɛ́ pɔ a. Lɛ n'a kpɩɛrʋ na bɛ dɩ vuo a tɩ páw bɛ.

¹⁶Lɛ n'a a Sore tɩ ɩ ƴɛ̀r-dɩrbɛ yi, faa bɛ a nɩ-farbɛ nuru pʋɔ.

¹⁷Ɛcɛ bɛ mɩ̀ cãà bɛ bɛr wõ a bɛ ƴɛ̀r-dɩrbɛ ɩ. Bɛ lɩɛb'a tu ŋmɩn yoru, gbine dume a ŋmɩmɛ á ŋá niŋé. A bɛ sãàkʋm-kore tɩ tu n a Sore nɛ-ƴãwnɩ, ɛcɛ bɛl bɛ cɔwrɩ a bɛ sãàkʋm-kore ɩ, bɛ zawr'ɩ a bɛ sɔ́r bɛr fɔ̃wlɛ.

¹⁸A Sore na mɩ́ tɩ ɩ ƴɛ̀r-dɩrɛ yi a bɛ ƴãw a, ʋ mɩ́ tɩ be n a ƴɛ̀r-dɩrɛ ʋl zie, ɛ́ a ƴɛ̀r-dɩrɛ ʋl mɩ́ faa bɛ a bɛ dɔ̃ dem nuru pʋɔ a ʋ cãafʋ daar za, bʋ̃ʋ n'ʋ vɛ̃, a Sore mɩ́ tɩ zɔ n bɛ nɩbaalʋ, a lɛ a bɛ dɔ̃ dem na mɩ́ tɩ dɔwrɛ bɛ bɛ kone a.

¹⁹Ɛcɛ a ƴɛ̀r-dɩrɛ wa kpi a, bɛ mɩ́ lɛb'a tĩ ɩrɛ a ɩ-faar, a nɩ̃ɛ zuo a bɛ sãàkʋm-kore dem. Bɛ mɩ́ tɩ puore nɩ ŋmɩn yoru, ɛ́ gbine dume a niŋé. Bɛ bɛ mɩ́ tɩ zawrɩ a bɛ ɩ-faar ɛ, ɛ́ cãà zawrɛ a Naaŋmɩn nʋɔr cere nɩ.

²⁰A Sore suur tɩ ìr'ɩ a Ɩsɩrayɛl nɩbɛ ƴãw, ʋ yel à ŋá: «A nɩ-bʋʋrɛ bɛ ŋa na faa sãw a ɩ̃ wõ-taa bɛr a, a wõ-taa ʋl ɩ̃ na ƴãw a bɛ sãàkʋm-kore tuur a, bɛ na bɛ bɛr wõ m'a,

²¹a mãa mɩ̀ a, ɩ̃ kʋ̃ lɛb diw nɩ-bʋʋr-yoru nɩ-been kãw za bɛr a bɛ niŋé ɩ, a nɩ-bʋʋrɛ bɛl a Zozue na bɛ diw bɛr ɛ́ kpi a.

²²Bɛlɛ nɛbɛ ɩ̃ na ɩ n a Ɩsɩrayɛl nɩbɛ kaa nyɛ̃, bɛ na tu n a ɩ̃ pʋ-tɩɛrʋ, ɛ́ sàw a ɩ̃ nʋɔr, mɛ̃ a bɛ sãàkʋm-kore na tɩ ɩ a, bɩɩ bɛ kʋ̃ tu.»

²³Lɛ n'a a Sore tɩ bɛr a nɩ-bʋʋrɛ bɛl ʋ na bɛ tɩ ƴãw a Zozue nuru pʋɔ a, bɛ kpɩɛr a tẽw pʋɔ, ʋ bɛ tɩ páwr a bɛ diwfʋ ƴãw ɛ.