Read Dagara, Northern Ƴɛ̀r-dɩrbɛ 21 Bible Online

Ƴɛ̀r-dɩrbɛ 21 - Dagara, Northern bible

Ƴɛ̀r-dɩrbɛ 21

¹A Ɩsɩrayɛl nɩbɛ na tɩ ɓã taa a Misɩpa a, bɛ tɩ pɔ na kɛ́ bɛ kãw za bɛ kʋ̀rɛ a ʋ pɔwyaa Bɛ̃zamɛ dɔwlʋ dɛb ʋ kule ɩ.

²A Naaŋmɩn nɩ-bʋʋrɛ tɩ cen nɩ a Betɛl tɩ zɩ̃ a be tɩ ta a zaanʋɔra, a Naaŋmɩn niŋé. Bɛ tɩ ŋmɛ n cɛlsɩ kõ cir'ɩ mʋta-kʋ̃ɔ ɓarɓarɓar.

³Bɛ tɩ yere na: «Sore, Ɩsɩrayɛl Naaŋmɩn i, ŋmɩŋmɩn za n'a a dɩ̃a a Ɩsɩrayɛl dɔwlʋ kãw bɛ ka be?»

⁴A bio daarɩ́ biɓaar-pipi a, a Naaŋmɩn nɩ-bʋʋrɛ tɩ mɛ n bàwr-maal-kuur a be, maalɩ nyɩw-a-za-bagɛ nɩ ƴã-ɓaarʋ bagɛ.

⁵Al pùorí, a Ɩsɩrayɛl nɩbɛ tɩ sowre nɩ taa: «A Ɩsɩrayɛl dɔwlʋ za pʋɔ a, buor sob'ʋ bɛ cen a ɓã taa zie, a Sore niŋé a Misɩpa?» Bʋ̃ʋ n'ʋ vɛ̃, bɛ tɩ pɔ na kɛ́ bɛ na kʋ n sob nɛ za nãà bɛ wa cen a Misɩpa a.

⁶Lɛb waar, a Bɛ̃zamɛ dɔwlʋ nɩbɛ na ɩ a Ɩsɩrayɛl dɔwlʋ nɩbɛ yɛbr a, tɩ ɩrɛ nɩ a Ɩsɩrayɛl nɩbɛ nɩbaalʋ. Bɛ tɩ yere na: «A dɩ̃a a, dɔwlʋ kãw bɔrɛ nɩ a Ɩsɩrayɛl nɩbɛ dɔwlʋ pʋɔ.

⁷Bʋ̃ʋ n'ʋ tɩ na ɩ, bɔ pɔwbɛ kʋ̀ a Bɛ̃zamɛ dɔwlʋ nɩbɛ na cɛ a, tɩ na faa pɔ n a Sore, kɛ́ tɩ kʋ̃ kʋ̀ bɛ a tɩ pɔwyaar bɛ kul a?»

⁸Lɛ n'a bɛ tɩ sowri: «A Ɩsɩrayɛl dɔwlʋ pʋɔ a, dɔwlʋ kãw be n be, bɛ tɩ cen a Sore niŋé a Misɩpa bɩɩ?» Bɛ tɩ nyɛ̃ na kɛ́ Galaadɩ tẽw Yavɛsɩ nɩr za bɛ tɩ cen a laɩ pʋɔ, a be a nɩbɛ na tɩ ɓã taa a ɩ.

⁹Bɛ na tɩ sɔ́r a nɩbɛ a, bɛ tɩ sɩrɩ na nyɛ̃ kɛ́ a Galaadɩ tẽw Yavɛsɩ nɩr za bɛ tɩ pʋɔ ɩ.

¹⁰Lɛ n'a a lãw tɩ tõ soja-gãdaar tùr-pie nɩ ayi (12 000), ɛ́ yel kʋ̀ bɛ à ŋá: «Nyɩ cen tɩ kʋ a Galaadɩ tẽw Yavɛsɩ nɩbɛ, tɩ lãwnɩ a pɔwbɛ nɩ a bibiir.

¹¹À ŋá n'a nyɩ na tɩ ɩ: Nyɩ tɩ kʋ a dɛbr bɛ za pàw pɛr, ɛ́ kʋ pɔw za na tɛr sɩr a.»

¹²A Galaadɩ tẽw Yavɛsɩ nɩbɛ pʋɔ a, bɛ tɩ nyɛ̃ nɩ powli kɔbr anaar (400) na bɛ tɩ bãw dɛb bʋ̃-gana sɛr a. Bɛ tɩ tɛr bɛ na wa n a laɩ pʋɔ a Silo, a Kanãa tẽw.

¹³Al pùorí, a lãw nɩbɛ za tɩ tõ n nɩbɛ a Bɛ̃zamɛ nɩbɛ zie na tɩ zɔ sɔwlɩ a Irimon pìir lowr a, kɛ́ bɛ tɩ yel kʋ̀ bɛ kɛ́ bɛ bɛr bɛ na nɩ ƴã-ɓaarʋ.

¹⁴Daadaalɛ, a Bɛ̃zamɛ dɔwlʋ nɩbɛ tɩ lɛb'a kul. Bɛ tɩ kʋ̀ bɛ nɩ a pɔwbɛ bɛl bɛ na bɛ tɩ kʋ a Galaadɩ tẽw Yavɛsɩ nɩbɛ pʋɔ a, ɛcɛ a pɔwbɛ bɛ tɩ ta bɛ za ɩ.

¹⁵A Bɛ̃zamɛ nɩbɛ tɩ ɩrɛ nɩ a Ɩsɩrayɛl nɩbɛ nɩbaalʋ, bʋ̃ʋ n'ʋ vɛ̃, a Sore tɩ ɩ na vuo gã a Ɩsɩrayɛl dɔwlʋ pʋɔ.

¹⁶Lɛ n'a a lãw nɩ-kore tɩ yel à ŋá: «Pɔwbɛ bɛ cãà a Bɛ̃zamɛ dɔwlʋ pʋɔ ɩ, bʋ̃ʋ n'ʋ tɩ na ɩ, bɔ pɔwbɛ kʋ̀ a dɛbr bɛl na cãà vʋʋrɛ a?

¹⁷A fɛr'a k'aa Bɛ̃zamɛ dɔwlʋ nɩbɛ na cɛ a dɔw bibiir, a Ɩsɩrayɛl dɔwlʋ kãw ta bɔr ɛ.

¹⁸Ɛcɛ, tɩ kʋ̃ tʋ̃ɔ́ kʋ̀ bɛ a tɩ pɔwyaar bɛ kul ɛ, tɩ pɔ na, kɛ́ tɩ na ŋmɛ na ƴãw Ɩsɩrayɛl nɩr nɛ za na na kʋ̀ a ʋ pɔwyaa Bɛ̃zamɛ dɔwlʋ nɩr a.»

¹⁹Lɛ n'a bɛ lɛb tɩ bãwnɩ yome za, bɛ na mɩ́ maalɩ a Sore cuw a Silo a. A Silo be n a Betɛl saa-pɛrɩ́-gʋba-lowr, ɛ́ be a Levona saa-pɛrɩ́-dʋrʋ-lowr, nɩ a sɔ́r ʋl na yi a Betɛl ɛ́ dúor a Sɩsɛm a saa-pɛrɩ́.

²⁰Lɛ n'a bɛ tɩ wul yã a Bɛ̃zamɛ dɔwlʋ nɩbɛ à ŋá: «Nyɩ cen tɩ sɔwlɩ a divɛ̃ tɩɩr pʋɔ

²¹ɛ́ jɩ́rɛ. A Silo tẽw powli wa ɓã taa a bɛ bɩnɛ ƴãw a, nyɩɩm ƴawrɩ yi a divɛ̃ tɩɩr pʋɔ, ŋa za mɩ́ nyɔw kãw zɔ kul'ɩ a Bɛ̃zamɛ tẽw, ʋ tɩ ɩ a ʋ pɔw.

²²A bɛ sãà mɩnɛ bɩɩ a bɛ yɛ-dɛbr wa bɔbr tɩ nɔhaarʋ a, tɩ na yel bɛ na: “Nyɩ bãw a Bɛ̃zamɛ dɔwlʋ nɩbɛ ɩb ŋa pɛr, bʋ̃ʋ n'ʋ vɛ̃, a Yavɛsɩ zɛbr daar a, tɩ bɛ tʋ̃ɔ́ nyɔw pɔwbɛ kʋ̀ a bɛ za ɩ. Nyɩmɛ na bɛ nɛbɛ kʋ̀ bɛ a nyɩ pɔwyaar a, nɩr kʋ̃ tʋ̃ɔ́ yel kɛ́ nyɩ bɛ tu a pɔb nyɩ na pɔ a ɩ.”»

²³A Bɛ̃zamɛ dɔwlʋ nɩbɛ tɩ ɩ n a lɛ bɛ na tɩ wul bɛ a: ŋa za tɩ nyɔw nɩ pɔw a Silo tẽw powli bɩn-ƴawrbɛ pʋɔ. Al pùorí, bɛ tɩ lɛb'a kul a bɛ tẽw, tɩ lɛb mɛ a bɛ tẽ-bɛrɛ kpɩɛr a be.

²⁴A lɛ n'a a Ɩsɩrayɛl nɩbɛ ŋmãa na tɩ cɛ a, tɩ yaarɩ, ŋa za mɩ́ lɛb cen a ʋ dɔwlʋ pʋɔ, a ʋ sãà yir pʋɔ, nɩ a ʋ zi-sóra pʋɔ.

²⁵Nãà bɛ tɩ ka a Ɩsɩrayɛl tẽw pʋɔ a lɛn daar ɛ, ɛ́ ŋa za mɩ́ tɩ ɩrɛ lɛ na pɛlɩ a ʋ pʋɔ a.