Read Dagara, Northern Ƴɛ̀r-dɩrbɛ 3 Bible Online

Ƴɛ̀r-dɩrbɛ 3 - Dagara, Northern bible

Ƴɛ̀r-dɩrbɛ 3

¹Ʋ tɩ bɛr bɛ nɩ a tẽw pʋɔ, k'ʋʋ ɩ a Ɩsɩrayɛl nɩbɛ kaa, a bɛl na bɛ tɩ zɛb a Kanãa tẽw deb zɛbr a.

²Ʋ tɩ bɔbr'a k'aa Ɩsɩrayɛl bibiir na dɔwr lɩɛrɛ taa a, a bɛl na bɛ tɩ bãw a zɛbr sɛr a, zanɩ a zɛbr.

³A bɛl a Sore na tɩ bɛr a tẽw pʋɔ a n'ɩ bɛ ŋa: a na-mɩnɛ anũu bɛl na tɩ so a Filisɩtɛ̃ mɩnɛ a, a Kanãa tẽw dem za, a Sɩdɔ̃ tẽw dem, nɩ a Hivitɩ mɩnɛ na kpɩɛr a Libã tan pʋɔ a, a na tĩ a Báàl-Hɛrmɔ̃ tãw ɛ́ tɩ tɔ a Lebo-Hamatɩ a.

⁴A Sore tɩ bɔbr'a k'ʋʋ de bɛ ɩ n a Ɩsɩrayɛl nɩbɛ kaa nyɛ̃, bɛ na sàw nɩ a nɛ-ƴãwnɩ ʋ na tɩ ƴãw a Moyiir kʋ̀ a bɛ sãàkʋm-kore a bɩɩ.

⁵À ŋá n'a a Ɩsɩrayɛl nɩbɛ tɩ kpɛ a nɩ-bʋʋrɛ bɛ ŋa sɔgɔ: a Kanãa tẽw dem, a Hititɩ mɩnɛ, a Amoritɩ mɩnɛ, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ.

⁶Bɛ tɩ kul'ɩ a nɩbɛ bɛ ŋa pɔwyaar, ɛ́ mɩ̀ kʋ̀ a bɛ pɔwyaar a nɩbɛ bɛ ŋa bidɛbr bɛ kul, ɛ́ puore a bɛ ŋmɩmɛ.

⁷A Ɩsɩrayɛl nɩbɛ tɩ ɩ na a bɛ pɛlɩ a Sore pʋɔ ɩ: bɛ tɩ yiir'ɩ a Sore bɛ Naaŋmɩn bɛr, ɛ́ puore a Báàl mɩnɛ nɩ a Asera mɩnɛ.

⁸A Sore suur tɩ ìr'ɩ a Ɩsɩrayɛl nɩbɛ ƴãw, ʋ de bɛ ƴãw a Mezopotami nãà, Kusan-Iriseatayim, nuru pʋɔ yome ani.

⁹Lɛ n'a a Ɩsɩrayɛl nɩbɛ tɩ kõ bʋɔlɩ a Sore k'ʋʋ wa faa bɛ, a Sore tõ Kenaazɩ na ɩ a Kalɛb yɛ-bile a bidɛb, Otɩnɩɛl, k'ʋʋ tɩ faa bɛ.

¹⁰A Sore Vʋʋrʋ tɩ siw nɩ a ʋ zu, ʋ ɩ a Ɩsɩrayɛl nɩbɛ ƴɛ̀r-dɩrɛ. Ʋ tɩ yi n a zɛbr, a Sore ɩ ʋ zɛb tʋ̃ɔ́ a Mezopotami nãà Kusan-Iriseatayim.

¹¹A tẽw tɩ tɛr'ɩ ƴã-ɓaarʋ yome lɩz'a ayi. Al pùorí a Kenaazɩ bidɛb Otɩnɩɛl kpi.

¹²A Ɩsɩrayɛl nɩbɛ tɩ lɛb'a maal tĩ ɩrɛ a bɛ pɛlɛ a Sore pʋɔ ɩ, a Sore ƴãw Mowab nãà, Egɩlon, ìr a bɛ ƴãw, bɛ na tɩ ɩrɛ a bɛ pɛlɛ a Sore pʋɔ a ƴãw.

¹³A Egɩlon tɩ bʋɔl'ɩ a Amɔ̃ tẽw dem nɩ a Amalesitɩ mɩnɛ, bɛ wa pʋɔ a ʋ ƴãw, ʋ ŋmãa nɩ a Ɩsɩrayɛl a zɛbr. Bɛ tɩ zɛb'a tʋ̃ɔ́ a Ɩsɩrayɛl, ɛ́ de a Kpãkparmɛ tɩɩr tẽw.[3]

¹⁴A Mowab tẽw nãà, Egɩlon, tɩ dɩ n naalʋ a Ɩsɩrayɛl nɩbɛ zu yome pie nɩ ani.

¹⁵Lɛ n'a a Ɩsɩrayɛl nɩbɛ tɩ kõ bʋɔlɩ a Sore k'ʋʋ wa faa bɛ, ɛ́ a Sore tõ faarɛ a bɛ ƴãw, Bɛ̃zamɛ dɔwlʋ pʋɔ, Geera bidɛb, Ehudɩ, na tɩ ɩ gʋba a. A Ɩsɩrayɛl nɩbɛ tɩ tõ n a Ehudɩ k'ʋʋ cen nɩ bome tɩ kʋ̀ a Mowab tẽw nãà Egɩlon.

¹⁶A Ehudɩ tɩ maal'ɩ zɛbr-sɔ-kpɛ̃ɛ na dɩrɛ a loge a za ayi, ɛ́ wõwme ta mɛtɩr ŋmãa a, sɛ a ʋ dʋrʋ gbɛkpɛ̃ɛ ƴãw, ɛ́ su a bome pàw.

¹⁷Al pùorí, ʋ cen nɩ a bome k'ʋʋ tɩ kʋ̀ a Mowab tẽw nãà Egɩlon. Zɩ̃ k'aa Egɩlon tɩ kpɛ n bɛ́rʋ bɛ dɩ vuo ɩ.

¹⁸Ʋ na dɛ wa tɩr a bome baar'a, a Ehudɩ tɩ bɩɛl'ɩ a nɩbɛ na tɩ tuo a bome wa n a, lɛb cen nɩ.

¹⁹Ɛcɛ ʋ na tɩ ta a kʋsɛbɛ tɩbɛ pɛr, na pɩɛlɩ a Gilgal a, ʋ lɩɛb'ɩ pùor wa yel a nãà: «Nãà a, ɩ̃ tɛr'ɩ ƴɛ̀r-sɔwla na ƴɛ̀r kʋ̀ b.» A nãà tɩ ƴãw nɩ a ʋ tõ-tõ-biir yi, ɛ́ bɛr ʋ.

²⁰Ʋ tɩ zɩ̃ n a ʋ bɔwpɩ-ɓaar pʋɔ, a garʋ́ a lɛn daar. A Ehudɩ tɩ yel ʋ na: «Naaŋmɩn tõ m'ɩ a fʋ zie nɩ ƴɛ̀rʋ.» Lɛ n'a a nãà tɩ ìr a ʋ bʋ̃-zɩna zu.

²¹A Ehudɩ tɩ vʋ̃ɔ nɩ a zɛbr-sɔ-kpɛ̃ɛ na tɩ be a dʋrʋ gbɛkpɛ̃ɛ ƴãw a nɩ a ʋ gʋba nũu, cɔr'ɩ a nãà a púorí ʋ kpɛ.

²²A sʋɔ tɩ kpɛ n ʋ za, tɩ lãw nɩ a nyɔwfʋ zie, ɛ́ a kãá lɛb fɩ̃ɩnɩ pàw a sɔ-bir, bʋ̃ʋ n'ʋ vɛ̃, a Ehudɩ bɛ tɩ lɛb vʋ̃ɔ a sʋɔ a nãà púorí ɛ.

²³Al pùorí, a Ehudɩ tɩ pàw nɩ a bɔwpɩɛ pamɛ ɛ́ kpa, ɛ́ tu a pùorí yi.

²⁴A Ehudɩ na wa cen baar'a, a nãà tõ-tõ-biir tɩ wa na wa nyɛ̃ a pamɛ pàw, bɛ manɛ k'aa nãà kpɛ n bãjɩra.

²⁵Bɛ tɩ àr'a gù tɩ bàl, ɛ́ a nãà cãà bɛ yuore a dĩo pamɛ ɩ. Bɛ tɩ de nɩ a pime bɛl mɩŋa yuo nɩ a pamɛ, nyɛ̃ a bɛ nɩ-kpɛ̃ɛ ʋ kpi gã a tẽw.

²⁶Bɛ na tɩ àr gùre a, a Ehudɩ tɩ zɔ na. Ʋ tɩ zuo nɩ a tɩbɛ kʋsɛbɛ bɛr, ɛ́ zɔ tu Seira lowr.

²⁷Ʋ na tɩ tarɛ wa báarɛ a, ʋ pɛbl'ɩ wɩ̀ɛ a Efarayim tan vuo pʋɔ, bʋɔlɩ a Ɩsɩrayɛl nɩbɛ ɓã taa, ɛ́ de bɛ niwn bɛ yi a tãw zu siwr.

²⁸Ʋ tɩ yel bɛ na: «Nyɩ tuur mɛ̃, bʋ̃ʋ n'ʋ vɛ̃, a Sore de nɩ a nyɩ dɔ̃ dem, a Mowab tẽw dem, ƴãw a nyɩ nuru pʋɔ.» Bɛ tɩ tu n a Ehudɩ siw tɩ faa a Zurdɛ̃ man gãwfʋ ziir a Mowab tẽw dem zie, ɛ́ bɛ bɛr nɩr za gãw a man ɛ.

²⁹A ʋlɩ bibir nɛ a, bɛ tɩ kʋ n a Mowab tẽw dem ta nɩbɛ tùr-pie (10 000), nɩ-kpɛn kpɛn na kpɛ socie a. Nɩr kãw za bɛ tɩ cɛ ɩ.

³⁰A na tɩ tĩ a lɛn daar a n'a a Ɩsɩrayɛl nɩbɛ dɩ a naalʋ a Mowab tẽw dem zu, ɛ́ a tẽw tɛr ƴã-ɓaarʋ yome lɩz'a anaar.

³¹Anatɩ bidɛb Samgaar'ʋ lɩɛrɩ a Ehudɩ a pùorí. Nĩi dà-ɓɩlɓɩl'ʋ[4], ʋ tɩ kʋ n Filisɩtɛ̃ mɩnɛ kɔbr ayʋɔb (600). Ʋ mɩ̀ tɩ faa nɩ a Ɩsɩrayɛl nɩbɛ.