Read Dagara, Northern Ƴɛ̀r-dɩrbɛ 4 Bible Online

Ƴɛ̀r-dɩrbɛ 4 - Dagara, Northern bible

Ƴɛ̀r-dɩrbɛ 4

¹A Ehudɩ kũu pùorí a, a Ɩsɩrayɛl nɩbɛ tɩ lɛb'a maal ɩrɛ a bɛ pɛlɛ a Sore pʋɔ ɩ.

²A Sore tɩ de bɛ na ƴãw a Kanãa tẽw nãà, Yavin, na tɩ kpɩɛr Hasɔɔr a, nuru pʋɔ. A ʋ zɛbr-nɩbɛ nɩ-kpɛ̃ɛ tɩ n'ɩ Sɩsera na kpɩɛr Harɔsɛtɩ-Goyim a.

³A Sɩsera tɩ tɛr'ɩ kure zɛbr-torkori túr vʋ̃ɔ kʋba (900), ɛ́ tɩ dɔwrɩ a Ɩsɩrayɛl nɩbɛ yaga yaga yome lɩzɛr. Lɛ n'a a Ɩsɩrayɛl nɩbɛ tɩ kõ bʋɔlɩ a Sore k'ʋʋ wa faa bɛ.

⁴Pɔw-naaŋmɩn-ƴɛ̀r-manɛ kãw, Debora, na ɩ Lapidɔtɩ pɔw a n'ʋ tɩ dɩrɛ a ƴɛ̀rʋ a Ɩsɩrayɛl tẽw, a lɛn daar.

⁵Kpãkparmɛ tɩɛ kãw bɛ na wa por a pùorí kɛ́ Debora kpãkparmɛ tɩɛ a pile n'a ʋ mɩ́ tɩ zɩ̃, a Arama nɩ a Betɛl ten cará, a Efarayim tan vuo pʋɔ, ɛ́ a Ɩsɩrayɛl nɩbɛ cere a ʋ zie, ʋ tɩ dɩrɛ a ƴɛ̀rʋ kʋ̀rɛ bɛ.

⁶Bibir kãw, ʋ tɩ ƴãw na bɛ bʋɔlɩ Avinowam bidɛb, Barakɩ, na yi Kedɛsɩ, Nɛfɩtali tẽw a, wa yel ʋ: «À ŋá n'a a Sore, a Ɩsɩrayɛl Naaŋmɩn, yere kʋ̀rɛ fʋ: “Cen tɩ bɔ nɩbɛ tùr-pie (10 000) a Nɛfɩtali nɩ a Zabulɔ̃ dɔwlʋ pʋɔ, ɛ́ tɛr bɛ do n a Tabɔɔr tãw zu.

⁷Ɩ̃ na ɩ na a Yavin zɛbr-nɩbɛ nɩ-kpɛ̃ɛ, Sɩsera, wa a fʋ ƴãw a Kison bà-fʋɔla pʋɔ, ʋlɛ nɩ a ʋ zɛbr-torkori nɩ a ʋ zɛbr-nɩbɛ, ɩ̃ɩ na ƴãw ʋ nɩ a fʋ nuru pʋɔ.»

⁸A Barakɩ tɩ sɔw nɩ a Debora: «Fʋ̃ʋ wa páwr mɛ̃ cere a, ɩ̃ na cen a, ɛ́ fʋ̃ʋ bɛ wa páwr mɛ̃ cere a, ɩ̃ bɛ cere ɩ.»

⁹A Debora lɛb yel ʋ: «A na ɩ à ŋá a, ɩ̃ na páw fʋ na cen, ɛcɛ fʋ bɛ páwr yúor a zɛbr ŋa pʋɔ ɩ, bʋ̃ʋ n'ʋ vɛ̃, pɔw nũú n'a a Sore na de a Sɩsera ƴãw.» A Debora tɩ ìr'a páw a Barakɩ cen a Kedɛsɩ.

¹⁰A Barakɩ tɩ bʋɔl'ɩ a Zabulɔ̃ nɩ a Nɛfɩtali dɔwlʋ nɩbɛ ɓã taa a Kedɛsɩ. Nɩbɛ tùr-pie (10 000) tɩ tu ʋ na, lãwnɩ a Debora tɔr za.

¹¹A Kenitɩ nɩr Ebɛɛr, tɩ kpɩɛr'a pɩɛlɩ a Kedɛsɩ. Ʋ tɩ bʋ́r'a yi a Kenitɩ mɩnɛ pʋɔ, a Moyiir dɩɛm-sãà Hobab[5] yir Kenitɩ mɩnɛ, ɛ́ cen tɩ maalɩ a ʋ pɛn-sɛw pɩɛlɩ a Saanayim sɛn tɩɛ.

¹²Bɛ tɩ yel'a kʋ̀ a Sɩsera k'aa Avinowam bidɛb, Barakɩ, do n a Tabɔɔr tãw zu.

¹³Lɛ n'a a Sɩsera tɩ ɓã a ʋ kure zɛbr-torkori túr vʋ̃ɔ kʋba (900) taa, nɩ a ʋ nɩbɛ, yi n a Harɔsɛtɩ-Goyim, cen nɩ a Kison bà-fʋɔlá.

¹⁴A Debora tɩ yel'ɩ a Barakɩ: «Ìr lo a sɔ́r! A dɩ̃a n'a a Sore de a Sɩsera ƴãw a fʋ nuru pʋɔ! A Sore mɩŋa de fʋ nɩ niwn!» A Barakɩ tɩ yi n a Tabɔɔr tãw zu siw de niwn, ɛ́ a ʋ nɩbɛ tùr-pie (10 000) tuur ʋ.

¹⁵Ʋ tɩ ŋmãa nɩ a zɛbr, ɛ́ a Sore ɩ a Sɩsera lɩɛbɩ zɔ a Barakɩ niŋé, ʋlɛ nɩ a ʋ zɛbr-torkori za nɩ a ʋ zɛbr-nɩbɛ za. A Sɩsera tɩ siw nɩ a ʋ zɛbr-torko zu, zɔ n gbɛ́ɛ.

¹⁶A Barakɩ tɩ diw nɩ a Sɩsera zɛbr-torkori nɩ a ʋ zɛbr-nɩbɛ tɩ sãá nɩ a Harɔsɛtɩ-Goyim. Ʋ tɩ kʋ n a Sɩsera zɛbr-nɩbɛ za pàw pɛr, nɩ-been bɛ tɩ cɛ ɩ.

¹⁷A Sɩsera tɩ zɔrɛ nɩ nɩ a gbɛ́ɛ tu a Kenitɩ nɩr Ebɛɛr pɔw, Yayɛl, pɛn-sɛw sɔ́r, bʋ̃ʋ n'ʋ vɛ̃, ƴã-ɓaarʋ tɩ be n a Hasɔɔr nãà Yavin nɩ a Kenitɩ nɩr Ebɛɛr yir dem pʋɔ.

¹⁸A Yayɛl tɩ yi na tuori a Sɩsera yel ʋ: «Tɛw a ka, ɩ̃ sore e, kpɛ a ɩ̃ yir. Ta zɔrɛ dɛ̃bɩ̃ɛ ɩ.» Ʋ tɩ tɛw na àr a ʋ zie, a ʋ pɛn-sɛw pʋɔ, ʋʋ de gãw pili pàw ʋ.

¹⁹A Sɩsera tɩ yel ʋ na: «Yãayãa, kʋ̀ m kʋ̃ɔ blã ɩ̃ nyũ, kʋ̃ɔ-nyúur kpɩɛr mɛ̃ na.» A Yayɛl tɩ yuo nɩ a bʋ̀rʋ wɔ-gbãw, ɩ ʋ nyũ ʋʋ lɛb nyɔw a gãw pàw ʋ.

²⁰A Sɩsera tɩ yel'a ƴãw pʋɔ: «Àr a pɛn-sɛw dɩ̃dɔr nʋɔr, nɩr wa sowre: “Nɩr be n a ka a?” fʋ̃ʋ sɔw kɛ́: “Ʋ̃ʋ'hʋ̃!”»

²¹A Sɩsera na tɩ ɓɛl ʋ za a, tɩ gúr'ɩ kpalɩtam. Lɛ n'a a Ebɛɛr pɔw Yayɛl tɩ de a pɛn-sɛw kpawbir kãw nɩ 'hama a nũú, kpɛ n zoomlɛ tɩ àr kɔw nɩ ʋ, ɛ́ ŋmɛ̃ ʋ a tacɩɩl puo, a kpawbir siw kpɛ a tẽw, a Sɩsera kpi.

²²A Barakɩ na tɩ ta tu a Sɩsera a, tɩ ta na. A Yayɛl tɩ yi na tuori ʋ yel ʋ: «Wa, ɩ̃ na wul fʋ nɩ a nɩr ʋl fʋ na bɔbr a.» Ʋ tɩ kpɛ n a pɔw pɛn-sɛw pʋɔ tɩ nyɛ̃ a Sɩsera ʋ kpi gã, a kpawbir cãà ba a tacɩɩlɩ́.

²³A ʋlɩ bibir nɛ a, a Naaŋmɩn tɩ siwr'ɩ a Kanãa tẽw nãà Yavin, a Ɩsɩrayɛl nɩbɛ niŋé.

²⁴A Ɩsɩrayɛl nɩbɛ tɩ lɛb'a bãw ƴãw fãw zɛbr'ɩ a Kanãa tẽw nãà Yavin, zɛbr'ɩ ʋ lɛɛɛ tɩ kʋ ʋ.