Read Dagara, Northern Yel-wula 1 Bible Online

Yel-wula 1 - Dagara, Northern bible

Yel-wula 1

¹A yel-wula a Yeezu Kɩrɩta na páw a, a sɛbɛ ŋa pʋɔ n'a ʋ be. Naaŋmɩn wul ʋ nɩ a yel ŋa, k'aa Yeezu Kɩrɩta ɩ a Naaŋmɩn tõ-tõ-biir bãw a yel ʋl na kʋ̃ yaa kɛ́ ta a. A Kɩrɩta tõ n a ʋ malkɩ a ʋ tõ-tone Zã zie, k'ʋʋ tɩ ɩ ʋ bãw a yel ŋa.

²A Zã dɩ n a dãsɩɛ k'aa al za ʋ na nyɛ̃ a ɩ n Naaŋmɩn ƴɛ̀rʋ nɩ yel-mɩŋa a Yeezu Kɩrɩta na wul a.

³Zu-nʋ̃ɔ̀ sob'ɩ sob nɛ na kanɛ a sɛbɛ ŋa a, zu-nʋ̃ɔ̀ dem'ɩ a bɛlɩ dem na bɛrɛ wone a naaŋmɩn-ƴɛ̀r-manɛ ƴɛ̀rʋ, ɛ́ maal tɛr a yele al na sɛb a sɛbɛ ŋa pʋɔ a vla a! Bʋ̃ʋ n'ʋ vɛ̃, a daar pɩɛl'a a na na ta a.

⁴Mãa Zã, mãa n'ʋ puore a Lãw-yie ayopõi na be a Azi tẽw vuo pʋɔ a nɩbɛ: a Naaŋmɩn na be, dãw be ɛ́ waar a, ʋ kʋ̀ nyɩ a maalʋ nɩ a ƴã-ɓaarʋ. A vʋʋrʋ ayopõi na be a ʋ naalʋ-dà-kɔw niŋé a, a kʋ̀ nyɩ a maalʋ nɩ a ƴã-ɓaarʋ.

⁵A Yeezu Kɩrɩta na ɩ dãsɩ-dɩrɛ na ŋmɛ̃ ʋ ŋmɛ̃a a, Bi-dãw-dɔwra na de niwn lɛb yi a kũuni pʋɔ a, a tẽw zu na-mɩnɛ za nãà, ʋ kʋ̀ nyɩ a maalʋ nɩ a ƴã-ɓaarʋ. A Kɩrɩta nɔnɛ tɩ na, ɛ́ cir a ʋ zɩ̃ɩ ír tɩ bɛr a tɩ yel-bebe pʋɔ.

⁶Ʋ ɩ na tɩ ɩ na-mɩnɛ nɩ-bʋʋrɛ, bàwr-maalbɛ a Naaŋmɩn ʋ Sãà ƴãw. Ʋlɛ so yúor-vɩɛlʋ-danʋ nɩ kpɛnʋ a yome yome za. Amɛn.

⁷Nyɛ̃, ʋ be n a zũzuge pʋɔ waar, nɩsaal za na nyɛ̃ ʋ na, lãwnɩ a bɛlɩ dem na cɔ̀r ʋ col a[1]. A tẽw zu yie dɔwlʋ za na kone nɩ a ʋ kuor. Sɩza n'a. Amɛn.

⁸A Sore Naaŋmɩn yere na: «Mãa n'ɩ a Alfa nɩ a Omega[2], a sob nɛ na be, dãw be, ɛ́ waar a, a Kpɛnʋ-za-sob.»

⁹Mãa n'ɩ a nyɩ yɛb Zã. Ɩ̃ na lãw nɩ a Yeezu mɛ̃ a nyɩɩm a, ɩ̃ ɩ n a nyɩ tɔ sob a kpɩɛrʋ pʋɔ, a naalʋ-dɩb pʋɔ nɩ a kanyir dɩb pʋɔ. Bɛ diw mɛ̃ na ɩ̃ tɩ be a kʋ̃ɔ-kpɛ̃ɛ-sɔgɔ-tẽw ʋl bɛ na bʋɔlɛ Patɩmɔsɩ a, a Naaŋmɩn ƴɛ̀rʋ ɩ̃ na tɩ hieri a ƴãw, nɩ a yel-mɩŋa a Yeezu na wul ɩ̃ sàw de a ƴãw.

¹⁰A Naaŋmɩn Vʋʋrʋ tɩ siw mɛ̃ nɩ a Sore bibir[3], ɩ̃ɩ tɩ wõ kɔkɔr na yire kpɛ̃w kpɛ̃w za a ɩ̃ pùorí mɛ̃ wɩ́ɛ na pɛblɛ a.

¹¹Ʋ tɩ yere na: «Sɛb a ʋlɩ bom fʋ na nyɛrɛ a ƴãw sɛbɛ pʋɔ tɩr kʋ̀ a Lãw-yie ayopõi á ŋá: Efɛɛzɩ, Sɩmɩɩr, Pɛrgam, Tɩatɩɩr, Sardɩ, Fɩladɛlfɩ nɩ Lawdise.»

¹²Ɩ̃ tɩ lɩɛb'a k'ɩ̃ɩ nyɛ̃ a sob nɛ na ƴɛ̀rɛ a ɩ̃ zie a. Ɩ̃ na tɩ lɩɛbɩ a, ɩ̃ nyɛ̃ nɩ salm-zɩɛ fɩ̃tɩlɩ ayopõi.

¹³Nɩr kãw tɩ àr'ɩ a fɩ̃tɩlɩ sɔgɔ, ɩ mɛ̃ nɩsaal bie a. Ʋ tɩ su n kparʋ ʋ siw tɩ tɔ a gbɛ́ɛ, ʋʋ ŋmãa nɩ salm-zɩɛ kpàwr a nyãa zu.

¹⁴A ʋ zukɔbɛ tɩ pɛlɩ na mɛ̃ pi-kɔbl-pɛlɛ a, mɛ̃ gon a, ɛ́ a ʋ mimie ɩ mɛ̃ vũu-'lera a.

¹⁵A ʋ gbɛ́ɛ tɩ nyɩwrɛ na mɛ̃ kur-zɩɛ bɛ na zuw ʋ mʋ̃ɔ a, ɛ́ a ʋ kɔkɔr yire kpɛ̃w za mɛ̃ a kʋ̃ɔ-kpɛ̃ɛ gɔmɛ a.

¹⁶Ŋmar-bie ayopõi tɩ be n a ʋ dʋrʋ nũú, ɛ́ zɛbr-sɔ-kpɛ̃ɛ na dɩrɛ a loge a za ayi ɛ́ a nʋɔr ɩ ɓɩlɓɩl a yire a ʋ nʋɔrɩ́. A ʋ niwn tɩ nyɩwrɛ na mɛ̃ mʋ̃tɔ̃w na pur ʋ za a.

¹⁷Ɩ̃ na tɩ nyɛ̃ ʋ a, ɩ̃ lo na gã a ʋ gbɛ́ɛ ƴãw mɛ̃ ɩ̃ kpi na a. Ɛcɛ, ʋ tɩ dɔwl'ɩ a ʋ dʋrʋ nũu a ɩ̃ zu ɛ́ yel: «Ta zɔrɛ dɛ̃bɩ̃ɛ ɩ: mãa n'ɩ a niw-diere nɩ a po-pàwrɛ,

¹⁸a sob nɛ na vʋʋrɛ a. Ɩ̃ tɩ kpi na, ɛ́ mãa n'ɩ ŋan vʋʋrɛ kʋralɛ. Ɩ̃ dɩrɛ nɩ naalʋ a kũu nɩ a kpɩmɛ tẽw zu.

¹⁹A na ɩ à ŋá a, sɛb a yele fʋ na nyɛ̃ a, a al na ɩrɛ a ƴɛrɛŋa a, nɩ a al a na fɛr k'aa ɩ a pùorí a.

²⁰A ŋmar-bie ayopõi fʋ na nyɛ̃ a ɩ̃ dʋrʋ nũú a, nɩ a salm-zɩɛ fɩ̃tɩlɩ ayopõi pɛr na sɔwlɩ a n'ɩ ŋa: a ŋmar-bie ayopõi ɩ n a Lãw-yie ayopõi malkɩ mɩnɛ, ɛ́ a fɩ̃tɩlɩ ayopõi ɩ a Lãw-yie ayopõi.»