Read Dagara, Northern Yel-wula 14 Bible Online

Yel-wula 14 - Dagara, Northern bible

Yel-wula 14

¹Ɩ̃ tɩ nyɛ̃ nɩ a Pele ʋ àr a Sɩyɔ̃ tãw zu, ʋlɛ nɩ a nɩbɛ tùr-lɩz'a ayopõi dɔwlɩ túr anaar (144 000), a ʋ yúor nɩ a ʋ Sãà yúor na tɩ sɛb a bɛ gbẽé a.

²Ɩ̃ tɩ wõ n kɔkɔr na ƴɛ̀rɛ yire a salom zu, ɩ mɛ̃ kʋ̃ɔ-kpɛ̃ɛ kʋ̃ɔnɩ na damnɛ a, mɛ̃ saa na tanɛ kpɛ̃w kpɛ̃w za a. A kɔkɔr ɩ̃ na tɩ wõ a tɩ ɩ na mɛ̃ korijom ŋmɩɛrbɛ na ŋmɩɛr a bɛ korijom a.

³A nɩ-yaga bɛ ŋa za tɩ yiele nɩ yiel-paala a naalʋ-dà-kɔw niŋé, a dʋn anaar nɩ a nɩ-kore niŋé. Nɩr za bɛ tɩ tʋɔr zanɛ a yielu ŋa, a bɛ ɩ a nɩbɛ tùr-lɩz'a ayopõi dɔwlɩ túr anaar (144 000) bɛl bɛ na ya de a tẽw zu a ɩ.

⁴Bɛ bɛ tɔ pɔwbɛ dɛw bɛ tʋɔra ɩ, bɛ bɛ tɛr dɛwr kãw za ɩ. Bɛ tuur'ɩ a Pele zie nɛ za ʋ na cere a. Bɛ ya na de bɛ a nɩsaalbɛ pʋɔ, kɛ́ bɛ tʋ̃ɔ́ ɩ a dãw-niwn dem bɛ na na de kʋ̀ a Naaŋmɩn nɩ a Pele a.

⁵Ziri bɛ dãw yi a bɛ nʋɔrɩ́ ɛ. Bɛ bɛ tɛr sãwna ɩ.

⁶Al pùorí, ɩ̃ tɩ nyɛ̃ nɩ malkɩ yũo ʋ laarɛ a saa-zu za. Ʋ tɩ tɛr'ɩ Yel-nʋ̃ɔ̀ na be kʋralɛ a na yel kʋ̀ a bɛlɩ dem na kpɩɛr a tẽw zu a: tẽw za, dɔwlʋ za, ƴɛ̀r-pɛ-bʋʋrɛ za nɩ nɩ-bʋʋrɛ za.

⁷Ʋ tɩ yere na nɩ kɔkɔ-kpɛ̃w: «Nyɩ zɔrɛ a Naaŋmɩn ɛ́ íre a ʋ yúor, bʋ̃ʋ n'ʋ vɛ̃, a ʋ ƴɛ̀rʋ-maalʋ daar ta na. Nyɩ lore gbine dume puore a salom nɩ a tẽw Íre, a kʋ̃ɔ-kpɛ̃ɛ nɩ a kʋl-bɔwrɩ Íre.»

⁸Malkɩ ayi sob tɩ tu n a dãw-niwn sob, ɛ́ yere: «A Babɩlɔn tẽ-kpɛ̃ɛ lo na, ʋ lo na! Ʋl na ƴãw a ten za nyũ a ʋ pɩ̃ɔ ɩ-ɩrɩ na bɛ maal'ɩ wob a divɛ̃ a.»

⁹Malkɩ ata sob tɩ tu bɛ na, ɛ́ yere nɩ kɔkɔ-kpɛ̃w: «Nɩr wa lore gbine dume puore a dʋ̃w nɩ a ʋ dasule a, ɛ́ wa ƴãwnɛ a dʋ̃w bãwfʋ a ʋ gbẽé bɩɩ a ʋ nũú a,

¹⁰ʋ mɩ̀ na nyũ n a Naaŋmɩn suur divɛ̃, divɛ̃ bɛ na bɛ pili ɛ́ cir ƴãw a ʋ suur koli-nyúura pʋɔ a, ɛ́ a nɩbɛ bɛ ŋa taabɛ na wone nɩ tuo a vũu nɩ a cirbi pʋɔ, a malkɩ son nɩ a Pele niŋé.

¹¹A bɛ dɔwrʋ vũu zʋ̀ʋ́r ìre na dúor kʋralɛ. Bɛ bɛ bãw pɩ̃ɛnʋ mʋ̃tɔ̃w nɩ tɩ̃ɩsɔw ɛ, a bɛlɩ dem na gbine dume puore a dʋ̃w nɩ a ʋ dasule a, nɩ sob nɛ za bɛ na ƴãwnɛ a dʋ̃w yúor bãwfʋ a.»

¹²A Naaŋmɩn nɩ-sori, a bɛl na sàwr a ʋ nɛ-ƴãwnɩ ɛ́ tɛr a Yeezu sàw-deb a, a bɛ kanyir dɩb daar'a ta.

¹³Al pùorí, ɩ̃ tɩ wõ n kɔkɔr a salom zu ʋ yere a ɩ̃ zie: «Sɛb yel: “Zu-nʋ̃ɔ̀ dem'ɩ a bɛl na tĩ kpiir a ƴɛrɛŋa ɛ́ lãw nɩ a Sore a!” A Naaŋmɩn Vʋʋrʋ yere na: “Sɩza n'a, bɛ na tʋ̃ɔ́ na pɩ̃ɛnɛ nɩ a bɛ bàlʋ bɛ na nyɛ̃ a, bʋ̃ʋ n'ʋ vɛ̃, a bɛ tome sã-ya tuur bɛ na.”»

¹⁴Lɛ n'a ɩ̃ tɩ nyɛ̃ zũzuw-pla, nɩ nɩr na zɩ̃ a ʋ zu ɩ mɛ̃ nɩsaal bie a. Ʋ tɩ vɔbl'ɩ nãà salm-zɩɛ kpawʋɔ, ɛ́ tɛr ci-ŋma-sɔ-nɔ-goraa na dɩrɛ a a ʋ nũú.

¹⁵Malkɩ ƴen sob tɩ yi n a Ŋmɩn-yir pʋɔ, ɛ́ cɩɩrɩ nɩ kɔkɔ-kpɛ̃w yel a sob nɛ na tɩ zɩ̃ a zũzuwr zu a: «Ɓaw a fʋ sʋɔ de nɩ a bʋ̃-dieri, a bʋ̃-dieri deb daar ta na, bʋ̃ʋ n'ʋ vɛ̃, a tẽ-daa bʋ̃-kʋ́ɔrɩ bɩ na.»

¹⁶Lɛ n'a a sob nɛ na zɩ̃ a zũzuwr zu a tɩ ɓaw a ʋ sʋɔ a tẽw bʋ̃-kʋ́ɔrɩ ƴãw, ɛ́ bɛ de a tẽw bʋ̃-kʋ́ɔrɩ.

¹⁷Malkɩ ƴen sob tɩ yi n a Ŋmɩn-yir na be a salom zu a pʋɔ. Ʋ mɩ̀ tɩ tɛr'ɩ sɔ-nɔ-goraa na dɩrɛ a.

¹⁸Malkɩ ƴen sob na ɩ a vũu nɩ-kpɛ̃ɛ a tɩ yi n a bàwr-maal-kuur pɛr wa. Ʋ tɩ cɩɩr'a nɩ kɔkɔ-kpɛ̃w yel a sob nɛ na tɛr a sɔ-nɔ-goraa na dɩrɛ a: «Lɔb a fʋ sɔ-nɔ-goraa na dɩrɛ a, ŋma a tẽw divɛ̃ tɩɩr púo wɔmɛ: a mʋ̃ɔ na.»

¹⁹A malkɩ tɩ lɔb'ɩ a ʋ sɔ-nɔ-goraa a tẽw zu, ŋma a tẽw divɛ̃ tɩɩr púo wɔmɛ, lɔb ƴãw a Naaŋmɩn suur bɔw-kpɛ̃ɛ ʋl pʋɔ bɛ na mɩ́ nɛb a a.

²⁰Bɛ tɩ nɛb'ɩ a divɛ̃ tɩ-wɔmɛ a bɔw-kpɛ̃ɛ pʋɔ na bɛ tɩ be a tẽ-kpɛ̃ɛ pʋɔ ɛ́ be yẽw a. Zɩ̃ɩ tɩ yi n a bɔw pʋɔ do tɩ ta a wie nɔ-bamɛ, ɛ́ gbɔlɩ tɩ ta kilo[13] kɔbr ata (300).