Read Dagara, Northern Yel-wula 19 Bible Online

Yel-wula 19 - Dagara, Northern bible

Yel-wula 19

¹Al pùorí, ɩ̃ tɩ wõ n kɔkɔ-kpɛ̃w na ɩ mɛ̃ zu-sɛbla na bɛ dɩ vuo a kɔkɔr a, a salom zu. Ʋ tɩ yere na: «Aleluya! A tɩ Naaŋmɩn so a faafʋ, a danʋ nɩ a kpɛnʋ.

²A ƴɛ̀rʋ ʋ na maalɩ a ɩ n sɩza ɛ́ tu yel-mɩnʋ. Bʋ̃ʋ n'ʋ vɛ̃, a pɔw-yɛm-kpɛ̃ɛ ʋl na tɩ sãwnɛ a tẽw nɩ a ʋ pɩ̃ɔ ɩ-ɩrɩ a, ʋ ƴãw ʋ nɩ dɔwrʋ. A ʋ tõ-tõ-biir a pɔw ŋa na kʋ a, ʋ yáa nɩ a san a ʋ zu.»

³Ɛ̀ bɛ lɛb tɩ maal yel: «Aleluya! A tẽ-kpɛ̃ɛ kpɛ̃ɛ ʋl na dɩrɛ a zʋ̀ʋ́r ìre na dúor yome yome za!»

⁴A nɩ-kore lɩzɛr'ɩ anaar nɩ a bʋ̃-vʋʋrɩ anaar tɩ gbĩ n dume puori a Naaŋmɩn na zɩ̃ a naalʋ-dà-kɔw zu a, nɩ bɛ tʋɔra-siwru ɛ́ yel: «Amɛn! Aleluya!»

⁵Kɔkɔr kãw tɩ yi n a naalʋ-dà-kɔw pɛr yere: «Nyɩ danɛ a tɩ Naaŋmɩn, nyɩɩm ʋ tõ-tõ-biir za a, nyɩɩm na ƴãwnɛ ʋ a, a pʋrpʋr lãwnɩ a bɛrɛ!»

⁶Ɩ̃ lɛb tɩ wõ na, a ɩ mɛ̃ nɩ-yaga yaga kɔkɛɛ na yire mɛ̃ kʋ̃ɔnɩ yaga na damnɛ a, mɛ̃ saa na tanɛ kpɛ̃w kpɛ̃w za a. A tɩ yere na: «Aleluya! Bʋ̃ʋ n'ʋ vɛ̃, a Sore, a tɩ Naaŋmɩn na ɩ kpɛnʋ-za-sob a, ʋ zɩɩl'ɩ a ʋ naalʋ.

⁷Nyɩ ɩ tɩ cɩlɛ, ɛ́ nʋ̃ɔ̀ ɩrɛ tɩ, nyɩ ɩ tɩ zɛwr a ʋ yúor! Bʋ̃ʋ n'ʋ vɛ̃, a Pele kul-taa maalʋ ta na, a ʋ pɔw cɔbr'ɩ ʋ tʋɔra.

⁸Pɛn-pla saala na vɩɛl nyɩwrɛ a kparʋ n'ʋ bɛ kʋ̀ ʋ ʋ su.» A pɛn-pla saala wule nɩ a Naaŋmɩn nɩ-bʋʋrɛ ɩ-ɩrɩ na tori a.

⁹A malkɩ tɩ yel mɛ̃ na: «Sɛb yel: zu-nʋ̃ɔ̀ dem'ɩ a bɛl bɛ na bʋɔlɩ kɛ́ bɛ wa a Pele kul-taa cuw dɩb zie a.» Ʋ tɩ lɛb'a yel mɛ̃: «A ƴɛ̀rʋ á ŋá ɩ n Naaŋmɩn ƴɛ̀rʋ tɛɛ za.»

¹⁰Lɛ n'a ɩ̃ tɩ lo gbĩ dume a ʋ pile k'ɩ̃ɩ puor'ʋ nɩ ɩ̃ tʋɔra-siwru, ɛcɛ ʋ tɩ yel mɛ̃ na: «Taa wa nanɩ ɩrɛ a lɛ ɩ! Ɩ̃ ɩ n tõ-tone mɛ̃ fʋ̃ʋ nɩ a fʋ yɛbr na maal tɛr a Yeezu yel-mɩŋa ƴɛ̀rʋ a. Naaŋmɩn n'ʋ a fɛr kɛ́ fʋ puore nɩ fʋ tʋɔra-siwru.» A Yeezu yel-mɩŋa ƴɛ̀rʋ n'a kʋ̀rɛ a naaŋmɩn-ƴɛ̀r-manɛ a tɩɛrʋ.

¹¹Al pùorí, ɩ̃ tɩ nyɛ̃ nɩ a salom ʋ yuo, ɛ́ wur-pla sãá. A ʋ zɔmnɛ dɩ na kɛ́ Pùor-bɛ-lɛbrɛ nɩ Mɩŋa sob. Ʋ maalɛ nɩ a ƴɛ̀rʋ ɛ́ zɛbr a zɛbr nɩ mɩnʋ.

¹²A ʋ mimie tɩ ɩ na mɛ̃ vũu-'lera a, ʋʋ tɩ vɔblɩ nãà-kpawɔ-yaga a ʋ zũú. Yúor tɩ sɛb'ɩ a ʋ zu nɩr za na bɛ bãw a bɛ ɩ a ʋl yõ a ɩ.

¹³Ʋ tɩ su n kpar-kpɛ̃ɛ na ɩ zɩ̃ɩ ʋ za a. A ʋ yúor dɩ na kɛ́: «Naaŋmɩn ƴɛ̀rʋ.»

¹⁴A saa-zu zɛbr-nɩbɛ tɩ tuur ʋ na, zɔm wur-pɛlɛ ɛ́ su pɛn-pla saala na vɩɛl ʋ za a kparɩ.

¹⁵Zɛbr-sɔ-kpɛ̃ɛ na dɩrɛ a tɩ yire nɩ a ʋ nʋɔrɩ́, a nɩ-bʋʋrɛ gɔ́rʋ ƴãw. Ʋlɛ n'ʋ na ɩ a bɛ cɩ̃ɩnɛ, cɩ̃ɩnɛ bɛ nɩ gãdaalʋ, ɛ́ nɛb a divɛ̃ tɩ-wɔmɛ a Naaŋmɩn kpɛnʋ-za-sob suur bɔw-kpɛ̃ɛ pʋɔ.

¹⁶Yúor ŋa n'ʋ tɩ sɛb a ʋ kpar-kpɛ̃ɛ zu nɩ a ʋ gbɛkpɛ̃ɛ zu: «Na-mɩnɛ za Nãà nɩ sorbɛ za Sore.»

¹⁷Lɛ n'a ɩ̃ tɩ nyɛ̃ malkɩ kãw ʋ àr a mʋ̃tɔ̃w zu. Ʋ tɩ cɩɩr'a nɩ kɔkɔ-kpɛ̃w yel a lili za na laarɛ a salom zu a: «Nyɩ wa wa ɓã taa a Naaŋmɩn cuw-kpɛ̃ɛ dɩb ƴãw!

¹⁸Nyɩ wa dɩ na-mɩnɛ, sojarɩ nɩ-bɛrɛ nɩ sojarɩ ƴã-gã-nɛnɛ, wie nɛnɛ nɩ a bɛ zɔmnbɛ ƴã-gã-nɛnɛ, nɩbɛ za ƴã-gã-nɛnɛ, a bɛl na so bɛ tʋɔra a nɩ a gbãgbaar, a nɩ-pʋrmɛ lãwnɩ a nɩ-bɛrɛ.»

¹⁹Ɩ̃ɩ tɩ nyɛ̃ nɩ a wɛ-dʋ̃w, a tẽw zu na-mɩnɛ nɩ a bɛ sojarɩ bɛ ɓã taa na zɛb'ɩ a sob nɛ na zɔm a wur a, nɩ a ʋ sojarɩ.

²⁰Bɛ tɩ nyɔw nɩ a wɛ-dʋ̃w, lãwnɩ a ƴɛ̀r-man-bɛlɛbɛlɛ na tɩ maalɩ nɔ-ɓãa-yele a ʋ niŋé, bɛ̀lɩ nyɔw nɩ a bɛlɩ dem na tɩ tɛr a wɛ-dʋ̃w bãwfʋ a bɛ zu, ɛ́ gbĩ dume puori a ʋ dasule a. Bɛ tɩ lɔb'ɩ bɛ za ayi a mimir ƴãw a cirbi vũu gbãtar-kpɛ̃ɛ pʋɔ.

²¹A zɛbr-sɔ-kpɛ̃ɛ na yire a sob nɛ na zɔm a wur a nʋɔrɩ́ a, tɩ kʋ n a bɛl na baa cɛ a, a lili za dɩ a bɛ ƴã-gã-nɛnɛ tɩw.