Read Dagara, Northern Yel-wula 22 Bible Online

Yel-wula 22 - Dagara, Northern bible

Yel-wula 22

¹A malkɩ mɩ̀ tɩ wul mɛ̃ nɩ a nyɔ-vʋʋrʋ kʋ̃ɔ man na tɩ yire a Naaŋmɩn nɩ a Pele naalʋ-dà-kɔw ƴãw, ɛ́ tɩ nyɩwrɛ mɛ̃ kʋ̃ɔ-kuur a.

²Ʋ tɩ zɔrɛ nɩ a tẽw laɩ sɔwlɩsɔw. A nyɔ-vʋʋrʋ tɩɛ tɩ àr'ɩ a man kõkowe ƴãw, mɩ́ wɔ̃ gb'a a pie nɩ ayi yũon za, cuw za ʋ mɩ́ wɔ̃ na, ɛ́ a ʋ váar ɩ tɩ̃ɩ sanɛ a ten ten nɩbɛ.

³Naaŋmɩn ŋmɛ-ƴãw kãw za kʋ̃ lɛb cãà a be ɩ. A Naaŋmɩn nɩ a Pele naalʋ-dà-kɔw na be n a tẽw pʋɔ, ɛ́ a Naaŋmɩn tõ-tõ-biir na puore ʋ na.

⁴Bɛ na nyɛ̃ nɩ a ʋ niwn, ɛ́ a ʋ yúor sɛb a bɛ gbẽé.

⁵Tɩ̃ɩsɔw kʋ̃ lɛb cãà be ɩ, bɛ kʋ̃ cãà tɛr fɩ̃tɩlɛ cãà nɩ mʋ̃tɔ̃w cãà yel-ɩra ɩ, a Sore Naaŋmɩn na na caalɛ bɛ nɩ a ʋ cãà a ƴãw, ɛ́ bɛ na dɩrɛ nɩ naalʋ yome yome za.

⁶Al pùorí, a malkɩ tɩ yel mɛ̃ na: «A ƴɛ̀rʋ á ŋá ɩ n sɩza ɛ́ bɛ tɛr bʋnʋ ɛ. A Sore Naaŋmɩn na mɩ́ kʋ̀ a tɩɛrʋ a ʋ ƴɛ̀r-manbɛ a, ʋlɛ n'ʋ tõ a ʋ malkɩ ʋ wa wul a ʋ tõ-tõ-biir a yele na kʋ̃ yaa kɛ́ ta a.»

⁷A Yeezu yel'a: «Nyɛ̃, ɩ̃ kʋ̃ yaa kɛ́ wa ɩ! Zu-nʋ̃ɔ̀ sob'ɩ a sob nɛ na maal tɛr a naaŋmɩn-ƴɛ̀r-manɛ ƴɛ̀rʋ na be a sɛbɛ ŋa pʋɔ a!»

⁸A mãa Zã, ɩ̃ wõ na ɛ́ nyɛ̃ a yele á ŋá. Ɩ̃ɩ na tɩ wõ ɛ́ nyɛ̃ a baar'a, ɩ̃ lo na gbĩ dume a malkɩ na wul mɛ̃ a yele á ŋá a pile k'ɩ̃ɩ puor'ʋ.

⁹Ɛcɛ, ʋ tɩ yel mɛ̃ na: «Taa wa nanɩ ɩrɛ a lɛ ɩ! Ɩ̃ ɩ n tõ-tone mɛ̃ a fʋ̃ʋ nɩ a fʋ yɛbr naaŋmɩn-ƴɛ̀r-manbɛ a, nɩ a bɛlɩ dem za na maal tɛr a sɛbɛ ŋa ƴɛ̀rʋ a. Naaŋmɩn n'ʋ a fɛr kɛ́ fʋ puore nɩ fʋ tʋɔra-siwru!»

¹⁰Ʋ tɩ lɛb'a yel mɛ̃: «Taa sɔwlɛ a naaŋmɩn-ƴɛ̀r-manɛ ƴɛ̀rʋ na be a sɛbɛ ŋa pʋɔ a bɛrɛ ɩ, bʋ̃ʋ n'ʋ vɛ̃, a daar ʋl a Naaŋmɩn na ƴãw a pɩɛl'a.

¹¹Sob nɛ ɩb na bɛ tu sɔ́r a, ʋ cãà ɩrɛ a ta tu a sɔ́r ɛ, ɛ́ a nɩ-faa cãà ɩrɛ a nɩ-fa-ɩb. A nɩ-mɩŋa, ʋ cãà ɩrɛ a nɩ-mɩŋa ɩb, ɛ́ a nɩ-sõw cãà ɩrɛ a nɩ-sõw ɩb.»

¹²A Yeezu yel'a: «Ɩ̃ kʋ̃ yaa kɛ́ wa ɩ! Ɩ̃ɩ na tɛr'ɩ a sã-ya wa n, mɩ́ wa ya ŋa za manɩ nɩ a ʋ tome.

¹³Mãa n'ɩ a Alfa nɩ a Omega, a niw-diere nɩ a po-pàwrɛ, a pɛr-tib nɩ a baarʋ.»

¹⁴Zu-nʋ̃ɔ̀ dem'ɩ a bɛlɩ dem na pɛ́wr a bɛ kparɩ, kɛ́ bɛ tʋ̃ɔ́ tɛr sɔ́r dɩ a nyɔ-vʋʋrʋ tɩɛ wɔmɛ, ɛ́ tu a dɩ̃dɛɛ ƴãw kpɛ a tẽw pʋɔ a.

¹⁵Ɛcɛ, a nɩ-faar na bɛ tɛr ŋmɛ̃a a, a tɩtɩlbɛ, a pɩ̃ɔ-yel-maalbɛ, a nɩ-kʋrbɛ, a bɛl na maalɛ a tɩbɛ a, a bɛlɩ dem na nɔnɛ a ziri ŋmab ŋmarɛ a ziri a, bɛ be yẽw!

¹⁶«A mãa Yeezu, ɩ̃ tõ n a ɩ̃ malkɩ k'ʋʋ wa dɩ a yele á ŋá dãsɩɛ a nyɩ zie a Lãw-yie ƴãw. Mãa n'ɩ a Daviir bie nɩ a ʋ bʋʋrɛ, a zi-vɩɛ-ŋmara na nyɩwrɛ a.»

¹⁷A Naaŋmɩn Vʋʋrʋ nɩ a Pɔw-sãan yere na: «Wa!» Sob nɛ na wone à à ŋá a, ʋ mɩ̀ yel: «Wa!» Sob nɛ kʋ̃ɔ-nyúur na kpɩɛr a, ʋ wa. Sob nɛ na bɔbr a, ʋ páw a nyɔ-vʋʋrʋ kʋ̃ɔ, mɔlɛ.

¹⁸A mãa Zã, yel-mɩŋa n'a ɩ̃ yere kʋ̀rɛ nɩr za na wone a naaŋmɩn-ƴɛ̀r-manɛ ƴɛ̀rʋ na be a sɛbɛ ŋa pʋɔ a: nɩr wa dɔwlɛ bom a, Naaŋmɩn na dɔwl'ʋ nɩ a bʋ̃-faar al bɛ na manɛ a sɛbɛ ŋa pʋɔ a.

¹⁹Ɛ́ nɩr wa ír bom bɛr a naaŋmɩn-ƴɛ̀r-manɛ ƴɛ̀rʋ pʋɔ na be a sɛbɛ ŋa pʋɔ a, a nyɔ-vʋʋrʋ tɩɛ wɔmɛ nɩ a tẽ-sõw yele bɛ na manɩ a sɛbɛ ŋa pʋɔ a, Naaŋmɩn mɩ̀ na ír'ɩ a ʋ dem bɛr.

²⁰A sob nɛ na dɩrɛ a yele á ŋá dãsɩɛ a yere na: «Ʋ̃ʋ, ɩ̃ kʋ̃ yaa kɛ́ wa ɩ!» Amɛn! Sore Yeezu u, wa!

²¹A Sore Yeezu maalʋ, ʋ be a bɛ za zie.