Read Dagara, Northern Yel-wula 5 Bible Online

Yel-wula 5 - Dagara, Northern bible

Yel-wula 5

¹Ɩ̃ tɩ nyɛ̃ nɩ sɛbɛ na pili a, a sob nɛ na tɩ zɩ̃ a naalʋ-dà-kɔw zu a dʋrʋ nũú. Bɛ tɩ sɛb'a ƴãw a pʋ̃ɔmɩ nɩ a zikurí, ɛ́ mɛr a nʋɔr pàw ziir ayopõi nɩ sɩ-suur.

²Ɩ̃ɩ tɩ nyɛ̃ nɩ malkɩ na kpɛmɛ a, ʋ hiere yere nɩ kɔkɔr-kpɛ̃w: «Ãa n'ʋ sɛwnɩ na 'lawrɩ a sɩ-suur bɛr ɛ́ yuo a sɛbɛ?»

³Ɛcɛ, nɩr za bɛ tɩ ka be, a salom zu, a tẽw zu nɩ a tẽw pile, na tʋ̃ɔ́ yuo a sɛbɛ ɛ́ jɩ́r kaa a ʋ pʋɔ ɩ.

⁴Ɩ̃ tɩ kone nɩ yaga, bɛ na bɛ tɩ nyɛ̃ nɩr ʋ sɛw taa nɩ na yuo a sɛbɛ ɛ́ jɩ́r a ʋ pʋɔ a.

⁵Lɛ n'a a nɩ-kore ƴen sob tɩ yel mɛ̃: «Ta kone ɩ. Nyɛ̃, a Zuda dɔwlʋ gbẽw, a nãà Daviir bie zɛb'a tʋ̃ɔ́, ʋ na 'lawr'ɩ a sɩ-suur ayopõi ɛ́ yuo a sɛbɛ.»

⁶Lɛ n'a ɩ̃ tɩ nyɛ̃ Pele ʋ àr a naalʋ-dà-kɔw sɔwlɩsɔw, ɩ mɛ̃ bom bɛ na ŋmaarɩ a kɔkɛɛ a, ɛ́ a bʋ̃-vʋʋrɩ anaar nɩ a nɩ-kore jil koli ʋ. Ʋ tɩ tɛr'ɩ ɩ́lɛ́ ayopõi nɩ mimie ayopõi na ɩ a Naaŋmɩn Vʋʋrʋ ayopõi ʋ na tõ a tẽw za zu a.

⁷Ʋ tɩ taw na ta de a sɛbɛ a sob nɛ na zɩ̃ a naalʋ-dà-kɔw zu a dʋrʋ nũú.

⁸A Pele na tɩ dier a sɛbɛ wa báarɛ a, a bʋ̃-vʋʋrɩ anaar nɩ a nɩ-kore lɩzɛr'ɩ anaar tɩ lo na gbĩ dume a ʋ niŋé. Ŋa za mɩ́ tɩ tɛr'ɩ korijom nɩ salm-zɩɛ koli-nyúuri, a paalɩ tɩ-suur-zɔ̃-na-nyùur-vla-vla-a ɛ́ ɩ a Naaŋmɩn nɩ-bʋʋrɛ puoru a.

⁹Bɛ tɩ yiele nɩ yiel-paala yere nɩ: «Fʋ sɛw na na de a sɛbɛ, ɛ́ 'lawrɩ a sɩ-suur bɛr. Bʋ̃ʋ n'ʋ vɛ̃, bɛ ŋmaarɩ fʋ nɩ a kɔkɛɛ, fʋ ya de dɔwlʋ bʋʋrɛ za, ƴɛ̀r-pɛ-bʋʋrɛ za, nɩ-bʋʋrɛ za nɩ ten bʋʋrɛ za nɩbɛ nɩ a fʋ zɩ̃ɩ kʋ̀ a Naaŋmɩn.

¹⁰Fʋ ɩ na bɛ ɩ na-mɩnɛ nɩ-bʋʋrɛ nɩ bàwr-maalbɛ a tɩ Naaŋmɩn ƴãw, ɛ́ bɛ na dɩrɛ nɩ naalʋ a tẽw zu.»

¹¹Ɩ̃ tɩ nyɛ̃ na ɛ́ wõ malkɩ yaga kɔkɔr, malkɩ yaga yaga na viiri koli a naalʋ-dà-kɔw, a bʋ̃-vʋʋrɩ nɩ a nɩ-kore a. Bɛ tɩ ɩ n tu-tu-túre túre túre.

¹²Bɛ tɩ yere na nɩ kɔkɔr-kpɛ̃w: «A Pele bɛ na ŋmaarɩ a kɔkɛɛ a, ʋ sɛwnɩ nɩ kpɛnʋ, naalʋ, yã-bãwfʋ, fãw, ƴãwfʋ, yúor-zɛwfʋ nɩ danʋ!»

¹³Ɩ̃ mɩ̀ tɩ wõ n a bʋ̃-íri za a salom zu, a tẽw zu, a tẽw pile nɩ a kʋ̃ɔ-kpɛ̃ɛ pʋɔ, a tẽ-daa bʋ̃-íri za a yere: «A sob nɛ na zɩ̃ a naalʋ-dà-kɔw zu a, nɩ a Pele, bɛlɛ so danʋ, ƴãwfʋ, yúor-zɛwfʋ nɩ kpɛnʋ a yome yome za!»

¹⁴A bʋ̃-vʋʋrɩ anaar mɩ́ tɩ sɔw na kɛ́: «Amɛn!» A nɩ-kore mɩ́ tɩ gbĩ n dume ɛ́ puori nɩ bɛ tʋɔra-siwru.