Read Dagara, Northern Yel-wula 8 Bible Online

Yel-wula 8 - Dagara, Northern bible

Yel-wula 8

¹A Pele na wa 'law a sɩ-suur ayopõi sob a, a zie tɩ ŋmãa nɩ vʋʋrʋ a salom zu tɩ faar na ta tɛm ŋmãa.

²Al pùorí ɩ̃ nyɛ̃ a malkɩ mɩnɛ ayopõi bɛl na mɩ́ àr a Naaŋmɩn niŋé a. Bɛ tɩ kʋ̀ bɛ nɩ wɩɩr ayopõi.

³Malkɩ ƴen sob tɩ wa na wa àr a bàwr-maal-kuur pɛr. Ʋ tɩ tɛr'ɩ tɩ-suur-zɔ̃-na-nyùur-vla-vla-a nyɩwfʋ-kole na ɩ salm-zɩɛ a. Bɛ tɩ kʋ̀ ʋ nɩ tɩ-suur-zɔ̃-na-nyùur-vla-vla-a bɛ dɩ vuo ɩ, k'ʋʋ de a lãwnɩ a Naaŋmɩn nɩ-bʋʋrɛ puoru tɩr a salm-zɩɛ bàwr-maal-kuur na be a naalʋ-dà-kɔw niŋé a zu.

⁴A tɩ-suur-zɔ̃-na-nyùur-vla-vla-a zʋ̀ʋ́r lãwnɩ a Naaŋmɩn nɩ-bʋʋrɛ puoru tɩ yi n a malkɩ nũú do a Naaŋmɩn niŋé.

⁵Lɛ n'a a malkɩ tɩ de a tɩ-suur-zɔ̃-na-nyùur-vla-vla-a bʋ̃-nyɩ̀wrá mʋ̃ɔ a vũu a bàwr-maal-kuur zu paalɩ ɛ́ lɔb bɛr a tẽw zu. A tɩ ɩ n saa tanʋ, kɔkɛɛ gɔmɛ, saa-nyɩwrʋ nɩ tẽsɔw kɔbr damnʋ.

⁶A malkɩ ayopõi na tɩ tɛr a wɩɩr a ayopõi a tɩ cɔbrɩ na gùre a pɛblʋ.

⁷A dãw-niwn sob tɩ pɛbl'ɩ a ʋ wɩ́ɛ. Sa-bi-kube nɩ vũu na jɛr zɩ̃ɩ a tɩ lo n a tẽw zu. A tẽw na põ ziir ata a zi-been tɩ dɩ n vũu. A tɩɩr na põ ziir ata a zi-been mɩ̀ tɩ dɩ n vũu, lãwnɩ a mɔ̃-ɓaar za.

⁸A malkɩ ayi sob tɩ pɛbl'ɩ a ʋ wɩ́ɛ. A tɩ ɩ na mɛ̃ tã-kpɛ̃ɛ na nyɔw vũu dɩrɛ a n'ʋ bɛ lɔb ƴãw a kʋ̃ɔ-kpɛ̃ɛ pʋɔ a. A kʋ̃ɔ-kpɛ̃ɛ na põ ziir ata a zi-been tɩ lɩɛb'ɩ zɩ̃ɩ.

⁹A bʋ̃-íri na vʋʋrɛ a kʋ̃ɔ-kpɛ̃ɛ pʋɔ ɛ́ põ ziir ata a, a zi-been dem tɩ kpi na, ɛ́ a gbee na põ ziir ata a, a zi-been dem tɩ sãw na.

¹⁰A malkɩ ata sob tɩ pɛbl'ɩ a ʋ wɩ́ɛ. Ŋmar-bi-kpɛ̃ɛ na tɩ dɩrɛ mɛ̃ mɔ̃-'lena vũu a tɩ yi n a salom zu wa lo. Ʋ tɩ lo n a mamɛ nɩ a bul-nɛ́ɛ na põ ziir ata a zi-been zu.

¹¹A ŋmar-bir nɛ yúor dɩ na kɛ́ Lɔw. A kʋ̃ɔnɩ na põ ziir ata a, a zi-been tɩ tome na, ɛ́ nɩ-yaga na tɩ nyũ a a, tɩ kpi na, a kʋ̃ɔ na tɩ tome a ƴãw.

¹²A malkɩ anaar sob tɩ pɛbl'ɩ a ʋ wɩ́ɛ. Bɛ tɩ ŋmɛ n[11] a mʋ̃tɔ̃w na põ ziir ata a zi-been, nɩ a cuw na põ ziir ata a zi-been, lãwnɩ a ŋmar-bie na põ ziir atarɩ a zi-be-ƴeni, a ɩ lɛ a põ ziir-atarɩ á ŋá zi-be-ƴeni tɩ liw. A bibir cãà na põ ziir ata a, a zi-been cãà bɛ tɩ cãà caalɛ ɩ, ɛ́ lɛ n'a a mɩ̀ tɩ ŋmɛ̃ a tɩ̃ɩsɔw ƴãw.

¹³Ɩ̃ tɩ nyɛ̃ na ɛ́ wõ sɩla na laarɛ a saa-zu za a, ʋ yere kpɛ̃w kpɛ̃w za: «Zu-bio! Zu-bio! Zu-bio n'a a tẽw zu dem ƴãw, a lɛn daar a malkɩ mɩnɛ ata na cɛ a nãà wa pɛblɩ a bɛ wɩɩr a!»