Read Dagara, Northern Urutɩ 1 Bible Online

Urutɩ 1 - Dagara, Northern bible

Urutɩ 1

¹A ƴɛ̀r-dɩrbɛ[1] daar, kɔ̃ tɩ lo n a Ɩsɩrayɛl tẽw pʋɔ. Lɛ n'a dɛb kãw na tɩ yi Bɛtɩlɛm na be Zuda tẽw a, tɩ ìr, ʋlɛ nɩ a ʋ pɔw nɩ a ʋ bidɛbr ayi, zɔ kpɛ Mowab tẽw kura pʋɔ.

²A dɛb nɛ yúor tɩ dɩ na kɛ́ Elimelɛkɩ, ɛ́ a pɔw dɩ kɛ́ Nowemi, ɛ́ a ʋ bidɛbr ayi dɩ kɛ́ Maalon nɩ Kiliyon. Efarata dɔwlʋ nɩbɛ na yi Bɛtɩlɛm na be Zuda tẽw a tɩ nɛbɛ. Bɛ tɩ ta n a Mowab tẽw kura pʋɔ kpɩɛr a be,

³a Nowemi sɩr Elimelɛkɩ wa kpi ɛ́ cɛ ʋ bɛr, ʋlɛ nɩ a ʋ bidɛbr ayi.

⁴Bɛ tɩ kul'ɩ a Mowab tẽw pɔwbɛ. A kãw tɩ dɩ na kɛ́ Ɔrpa ɛ́ a kãw dɩ kɛ́ Urutɩ. Bɛ tɩ kpɛ n a be tɩ ta yome pie,

⁵al pùorí, a Maalon nɩ a Kiliyon mɩ̀ tɩ kpi n bɛ za ayi, ɛ́ a Nowemi cɛ ʋ yõ bɛ tɛr bibiir ɛ, bɛ tɛr sɩr ɛ.

⁶A Mowab tẽw kura pʋɔ be a, a Nowemi tɩ wõ na bɛ yel k'aa Sore kaa nɩ a ʋ nɩ-bʋʋrɛ zie, ɩ a bɛ bʋ̃-kʋ́ɔrɩ maalɩ vla.

⁷Lɛ n'a ʋ tɩ bɛr a zie ʋl ʋlɛ nɩ a ʋ biir-pɔwbɛ ayi na tɩ kpɩɛr a, ɛ́ yi lo a sɔ́r lɛb kule a Zuda tẽw.

⁸Ɛcɛ a Nowemi tɩ yel'ɩ a ʋ biir-pɔwbɛ ayi à ŋá: «Nyɩ lɛb kul, ŋa za a ʋ mã zie. A Sore, ʋ maalɩ nyɩ, mɛ̃ a lɛ nyɩ na maalɩ a bɛl na kpi a, nɩ a mãa mɩŋa za a.

⁹A Sore, ʋ sàw kɛ̀ ŋa za mɩ́ lɛb nyɛ̃ sɩr kul ɛ́ wone nʋ̃ɔ̀ a ʋ sɩr yir.» Al pùorí, ʋ tɩ weri bɛ na puori bɛ, kɛ́ bɛ tʋ̃ɔ́ bɛr taa. Ɛcɛ a biir-pɔwbɛ tɩ vaa nɩ kɔkɛɛ kone,

¹⁰ɛ́ yel ʋ à ŋá: «Ʋ̃ʋ'hʋ̃! Tɩ na páw fʋ na kul a fʋ nɩbɛ zie!»

¹¹Ɛcɛ a Nowemi tɩ lɛb'a yel bɛ: «Ɩ̃ pɔwyaar i, nyɩ lɛb kul, bʋnʋ ƴãw n'a nyɩ bɔbr kɛ́ nyɩ páw mɛ̃? Ɩ̃ na tʋ̃ɔ́ na lɛb dɔw bidɛbr bɛ wa kul nyɩ bɩɩ?[2]

¹²Ɩ̃ pɔwyaar i, nyɩ lɛb kul ɛ́ bɛr mɛ̃. Ɩ̃ kor'a zuo a sɩr lɛb kulu ƴãw. Ɛ́ mãa mɩ̀ saa na yel: “A cãà na tɛr mɛ̃ ɩb, a tɩ̃ɩsɔw ŋa tɔr za ɩ̃ na tɛr'ɩ sɩr ʋ kʋ̀ m bidɛbr”,

¹³nyɩ na gù na bɛ tɩ baa a? Nyɩ na zawr'ɩ nɩ-yũo kulu bɩɩ? Ʋ̃ʋ'hʋ̃, ɩ̃ pɔwyaar i! Mãa n'ʋ a Sore ír mimir ƴãw. A yele na do m'a kpɛmɛ na zuo nyɩ.»

¹⁴Lɛ n'a a biir-pɔwbɛ ayi lɛb tɩ maal vaa kɔkɛɛ kone. A Ɔrpa wa nyɔw nɩ a ʋ sɩr-mã weri puor'ʋ a ɩ a bɛr-taa, ɛcɛ a Urutɩ tɩ zawr'a, ɛ́ sɛ mɛr ʋ.

¹⁵A Nowemi tɩ yel'ɩ a Urutɩ: «Nyɛ̃, a fʋ yẽtaa lɛb'a cen a ʋ nɩ-bʋʋrɛ nɩ a ʋ ŋmɩmɛ zie. Tu a fʋ yẽtaa lɛb kul.»

¹⁶Ɛcɛ a Urutɩ tɩ sɔw na: «Ta fɛrɛ mɛ̃ k'ɩ̃ɩ zawrɩ fʋ bɛr ɛ́ lɛb kul a ɩ̃ yir zãá nɩ fʋ ɛ. A be fʋ na na cen a, bɛ n'a ɩ̃ na cen, a be fʋ na na kpɩɛr a, be n'a ɩ̃ na kpɩɛr. A fʋ nɩ-bʋʋrɛ na ɩ n a ɩ̃ nɩ-bʋʋrɛ, ɛ́ a fʋ Naaŋmɩn ɩ a ɩ̃ Naaŋmɩn.

¹⁷A be fʋ na na kpi a, be n'a ɩ̃ mɩ̀ na kpi, ɛ́ a be n'a bɛ na ũù mɛ̃. A Sore, ʋ dɔwrɩ mɛ̃ ɛ́ lɛb dɔwrɩ ƴãw pʋɔ, a kũu yõ bɛ wa n'ʋ bʋ́r mãa nɩ a fʋ̃ʋ a!»

¹⁸A Nowemi na tɩ nyɛ̃ a Urutɩ ʋ bɔbr a ʋ tub tuotuo a, ʋ bɛr'a bɛ cãà ƴɛ̀rɛ a ƴɛ̀rʋ a ʋ zie ɩ.

¹⁹Lɛ n'a bɛ tɩ lãw cen bɛ za ayi tɩ ta a Bɛtɩlɛm tẽw. Bɛ na tɩ ta a, a tɩ ɩ n damnʋ a tẽw za pʋɔ a bɛ ƴãw. A pɔwbɛ tɩ yere na: «Alɛ! Nowemi n'ʋ bɩɩ?»

²⁰Ɛcɛ a Nowemi tɩ yel bɛ na: «Nyɩ ta cãà bʋɔlɛ mɛ̃ Nowemi ɛ, a pɛr lɛ kɛ́ Zu-nʋ̃ɔ̀ sob ɛ, nyɩ bʋɔlɛ mɛ̃ Maara, a pɛr lɛ kɛ́ Baw-bio sob. Bʋ̃ʋ n'ʋ vɛ̃, a Kpɛnʋ-za-sob ɩ na ɩ̃ wõ tuo bɛ dɩ vuo ɛ.

²¹Ɩ̃ tɩ tɛr a na yi n a ka cen nɩ, ɛ́ nũ-zawlɛ n'a a Sore ɩ ɩ̃ lɛb waar. A na ɩ à ŋá a, nyɩ ta cãà bʋɔlɛ mɛ̃ Nowemi ɛ, bʋ̃ʋ n'ʋ vɛ̃, a Sore Kpɛnʋ-za-sob ír'ɩ mimir ƴãw mɛ̃ ɛ́ ɩ m a kpɛ.»

²²À ŋá n'a a Nowemi tɩ yi a Mowab tẽw lɛb wa, ʋlɛ nɩ a ʋ bie-pɔw Urutɩ na yi a Mowab tẽw a. Bɛ tɩ ta n a Bɛtɩlɛm a lɛn daar bɛ na tĩ cɩɛr a ɔɔzʋ a.