Read Dagara, Northern Urutɩ 2 Bible Online

Urutɩ 2 - Dagara, Northern bible

Urutɩ 2

¹A Nowemi tɩ tɛr'ɩ a ʋ nɩr kãw a ʋ sɩr Elimelɛkɩ nɩbɛ pʋɔ. A nɩr nɛ tɩ ɩ n nɩ-yúor, ʋ tɩ kpɛ n naalʋ ɛ́ dɩ kɛ́ Bowaazʋ.

²Bibir kãw, a Mowab tẽw Urutɩ tɩ yel'ɩ a Nowemi: «Ɩ̃ bɔbr'a k'ɩ̃ɩ nãá cen a póru pʋɔ tɩ yiire a ɔɔzʋ tuur'ɩ sob nɛ pʋɔ nãà pɛlɩ a ɩ̃ ƴãw a[3].» A Nowemi tɩ sɔw na: «Cen, ɩ̃ pɔwyaa!»

³Lɛ n'a a Urutɩ tɩ cen púo kãw pʋɔ tɩ yiire a ɔɔzʋ tuur'ɩ a ɔɔzʋ cɩɛrbɛ. Zɩ̃ kɛ́ a Elimelɛkɩ nɩr Bowaazʋ pu-pʋɔ tɩ n'a.

⁴Blã na wa pʋɔ a, a Bowaazʋ tɩ yi n a Bɛtɩlɛm wa ta. Ʋ tɩ puor'ɩ a ɔɔzʋ cɩɛrbɛ yel: «A Sore, ʋ be a nyɩ zie!» Bɛ sɔw: «A Sore, ʋ maalɩ fʋ!»

⁵A Bowaazʋ tɩ sowr'ɩ a ɔɔzʋ cɩɛrbɛ nɩ-kpɛ̃ɛ: «Ãa so a pɔw pɔl ŋa?»

⁶A ɔɔzʋ cɩɛrbɛ nɩ-kpɛ̃ɛ sɔw: «A Mowab tẽw pɔw pɔl ʋl na bɩɛlɩ a Nowemi yi n a Mowab tẽw lɛb wa n a n'ʋ.

⁷Ʋ zɛlɩ nɩ sɔ́r k'ʋʋ tuure a ɔɔzʋ zuru al a cɩɛr-cɩɛrbɛ na ɩrɛ a lore, a ɔɔzʋ bɛ na mɩ́ ŋma ɓã taa a cara pʋɔ a. Biɓaara za n'a ʋ wa wa àr'ɩ gbɛ́ɛ tɩ tɔ a ka ɛ́ bɛ tuli zɩ̃ pɩ̃ɛnɩ ɛ.»

⁸Lɛ n'a a Bowaazʋ tɩ yel a Urutɩ: «Ɩ̃ pɔwyaa a, cɛlɛ vla: taa cere tɩ yiire po-yũo pʋɔ ɩ. Taa cere zãánɛ nɩ a ka ɩ, tuur a ɩ̃ tõ-tõ-bi-pɔwbɛ.

⁹Jɩ́rɛ a be bɛ na cɩɛr a, ɛ́ tuur bɛ. Ɩ̃ yel'ɩ a ɩ̃ tõ-tõ-biir kɛ́ bɛ taa tʋɔr fʋ ɛ. Kʋ̃ɔ-nyúur wa kpɩɛr fʋ a, fʋ̃ʋ cen tɩ nyũ a kʋ̃ɔ a tõ-tõ-biir na 'wɔ̃w paalɩ a yee a.»

¹⁰Lɛ n'a a Urutɩ tɩ lo gbĩ dume ɛ́ gũu tɩ tɔ a tẽw ɛ́ yel a Bowaazʋ à ŋá: «Bʋ̃ʋ ƴãw n'a fʋ maalɛ mɛ̃ sɛw à ŋá, ɛ́ nɔnɛ a ɩ̃ yele, mãa na ɩ nɩ-bʋʋr-yoru nɩr a?»

¹¹A Bowaazʋ sɔw yel: «Bɛ manɩ na kʋ̀ m a lɛ fʋ na ɩ a fʋ sɩr-mã zie a fʋ sɩr kũu pùorí a. A lɛ fʋ na bɛr a fʋ sãà nɩ a fʋ mã nɩ a fʋ tẽ-dɔwra, ɛ́ wa kpɩɛr nɩ-bʋʋr-yoru sɔgɔ fʋ na bɛ tɩ dãw bãw a.

¹²A Sore, ʋ ya fʋ à á ŋá za fʋ na maalɩ a! A fʋ sã-ya, ʋ ɩ ɓil ʋ za a Sore Ɩsɩrayɛl Naaŋmɩn zie, ʋl naayir fʋ na zɔ wa kpɛ a.»

¹³Lɛ n'a a Urutɩ tɩ yel: «Zu-sob i, fʋ sɩrɩ na ɩ nɩ-vla a ɩ̃ zie. Fʋ mɔwlɩ mɛ̃ na ɛ́ mɩ̀ ƴɛ̀r a ɩ̃ zie nɩ nɔ̃wfʋ, mãa na bɛ zɛ̃ taa nɩ a fʋ tõ-tõ-bi-pɔw kãw za a.»

¹⁴A bʋ̃-dɩrɩ dɩb daar na wa ta a, a Bowaazʋ tɩ yel'ɩ a Urutɩ: «Wa tɩ dɩ. Ír a dipɛ̃ kãw suw nɩ a zɛ-miiru.» Lɛ n'a a Urutɩ tɩ zɩ̃ kɔw a ɔɔzʋ cɩɛrbɛ. A Bowaazʋ tɩ kʋ̀ ʋ nɩ ɔɔzʋ-cɩ̃ɩna, ʋ 'wɔb tɩ tɩw ɛ́ a guu ʋ tɛr.

¹⁵Ʋ na tɩ lɛb yi a ɔɔzʋ yiiru a, a Bowaazʋ tɩ yel'ɩ a ʋ tõ-tõ-biir: «Nyɩ bɛr ʋ, ʋ mɩ̀ mɩ́ yiiri a ɔɔzʋ bɛ na cɛ ɓã bã taa a carɩ pʋɔ ɛ́ taa tʋʋr ʋ ɛ.

¹⁶Mɔ̃ mɩ̀, nyɩ na mɩ́ fór'ɩ a ɔɔzʋ zuru a mɩnɛ nyɩ na cɛ ɓã taa a nũú a, lɔb bɛr a tẽw ʋ tuure, ɛ́ nyɩ taa yere ʋ ɛ.»

¹⁷A Urutɩ tɩ yiir'ɩ a ɔɔzʋ a Bowaazʋ pu-pʋɔ tɩ ta n zaanʋɔra. Al pùorí ʋ va a ɔɔzʋ ʋ na yiiri a paalɩ vʋɔr-kpɛ̃ɛ.

¹⁸Ʋ tɩ tuo nɩ a vʋɔra kul'ɩ a tẽw pʋɔ, tɩ wul a ʋ sɩr-mã a al za ʋ na yiiri páw a. Ʋ tɩ ír'ɩ a bʋ̃-dɩ-ŋmãa al ʋ na tɩ dɩ tɩw ɛ́ a guu a kʋ̀ a ʋ sɩr-mã.

¹⁹A Nowemi tɩ sowr'ʋ na: «Nyɩnɛ n'a fʋ yiiri a ɔɔzʋ á ŋá za a dɩ̃a? Po-buor pʋɔ n'a fʋ tõ? A Naaŋmɩn, ʋ maalɩ a sob nɛ zie fʋ na tõ a.» Ʋ tɩ yel'a: «A dɛb ʋl zie ɩ̃ na tõ a yúor dɩ na kɛ́ Bowaazʋ.»

²⁰Lɛ n'a a Nowemi tɩ yel a ʋ bie-pɔw: «A Sore, ʋ maalɩ a sob ŋa na bɛ tawr yire pùor ɛ́ bɛrɛ a tɩɩm na cãà vʋʋrɛ a, nɩ a bɛlɩ dem na kpi a.» Al pùorí a Nowemi tɩ yel ʋ na: «A dɛb ŋa ɩ n a tɩ nɩr tɩ na pɩɛlɩ taa a. A bɛlɩ dem na na tʋ̃ɔ́ bɩɛrɩ tɩ a kãw n'ʋ.»

²¹Lɛ n'a a Urutɩ tɩ lɛb yel: «Ʋ mɩ̀ cãà na yel mɛ̃: “Tuur a ɩ̃ tõ-tõ-biir ɛ́ gù bɛ tɩ cɛ a ɩ̃ ɔɔzʋ za”.»

²²A Nowemi tɩ yel'ɩ a ʋ bie-pɔw Urutɩ: «A vɩɛl'ɩ yaga, ɩ̃ pɔwyaa a, cãà lãw tone nɩ a Bowaazʋ tõ-tõ-bi-pɔwbɛ. Fʋ̃ʋ ɩ mɛ̃ fʋ cen nɩ nɩ-yũo pu-pʋɔ a, bɛ nãà dɔwrɛ fʋ na.»

²³Lɛ n'a a Urutɩ tɩ tuur a Bowaazʋ tõ-tõ-bi-pɔwbɛ yiire a ɔɔzʋ ɛ́ gù a ɔɔzʋ nɩ a ble za tɩ cɛ baarɩ. Ʋlɛ nɩ a ʋ sɩr-mã tɩ lãw na kpɩɛr.