Read Dagara, Northern Urutɩ 4 Bible Online

Urutɩ 4 - Dagara, Northern bible

Urutɩ 4

¹A Bowaazʋ tɩ do na tɩ zɩ̃ a ƴɛ̀rʋ-dɩb zie a tẽw dɩ̃dɔr nʋɔr, ɛ́ wa nyɛ̃ a sob nɛ na tɛr sɔ́r a bɩ́ɛrʋ ƴãw a, a ʋl ƴɛ̀rʋ ʋ na tɩ ƴɛ̀r a, ʋ tɔlɛ. A Bowaazʋ tɩ yel ʋ na: «Bón i! Alɛ ka! Wa zɩ̃ ka!» Ʋ tɩ tɛw na àr ɛ́ taw ta zɩ̃.

²Lɛ n'a a Bowaazʋ tɩ ír nɩbɛ pie a tẽw nɩ-kore pʋɔ ɛ́ yel à ŋá: «Nyɩ wa zɩ̃ a ka!» Ɛ̀ bɛ zɩ̃.

³Al pùorí ʋ yel a sob nɛ na tɛr sɔ́r a bɩ́ɛrʋ ƴãw a: «Fʋ bãwnɩ a na a Nowemi na yi a Mowab tẽw lɛb wa a. Ʋ kʋɔrɛ nɩ a tɩ yɛb Elimelɛkɩ púo.

⁴Ɩ̃ yel k'ɩ̃ɩ por a yúor fʋ bãwnɩ a ɛ́ yel kʋ̀ b: “Da a púo a nɩbɛ na be ka a niŋé nɩ a ɩ̃ nɩ-bʋʋrɛ nɩ-kore niŋé.” Fʋ̃ʋ wa bɔbr kɛ́ fʋ lɛb de a, fʋ̃ʋ lɛb de, ɛcɛ fʋ̃ʋ bɛ wa bɔbr kɛ́ fʋ lɛb de a, fʋ̃ʋ yel kʋ̀ m ɩ̃ bãwnɩ a, bʋ̃ʋ n'ʋ vɛ̃, nɩr bɛ ka be na tʋ̃ɔ́ lɛb de ʋ, a bɛ ɩ a fʋ̃ʋ ɛ, mãa tu n a fʋ zu.» A sob nɛ yel: «Ɩ̃ bɔbr'a k'ɩ̃ɩ lɛb de a púo.»

⁵A Bowaazʋ tɩ lɛb'a yel à ŋá: «A ʋlɩ bibir fʋ nãà wa daar a púo a Nowemi zie a, fʋ mɩ̀ na tɛr'ɩ a Mowab tẽw Urutɩ a dɛb-kũu pɔw, k'aa kũu yúor cãà pore a ʋ bʋ̃-sora zu.»

⁶Lɛ n'a a sob nɛ na tɛr sɔ́r a bɩ́ɛrʋ ƴãw a, sɔw: «Alɛ wa ɩ à ŋá n'a a, ɩ̃ kʋ̃ tʋ̃ɔ́ ɩ, alɛ bɛ ɩ lɛ ɩ̃ na sãw nɩ a ɩ̃ yele bɛr. Fʋ̃ʋ a, lɛb de a ɩ̃ deb zie, ɩ̃ na kʋ̃ tʋ̃ɔ́ lɛb de a ƴãw.»

⁷A koro za, a Ɩsɩrayɛl tẽw pʋɔ a, a nɩbɛ wa daar bome bɩɩ tɛwr bome a, kãw mɩ́ yaa nɩ a ʋ nafawr kʋ̀ a ʋ tɔ sob, a ɩ a wõ-taa n'a maalɩ a lɛ. À ŋá n'a a dãsɩɛ mɩ́ dɩ a Ɩsɩrayɛl tẽw pʋɔ.

⁸Alɛ n'a so a sob nɛ na tɩ tɛr sɔ́r a bɩ́ɛrʋ ƴãw a tɩ yel a Bowaazʋ: «Da a púo so ʋ!» Ɛ́ tɩ yaa a ʋ nafawr kʋ̀ ʋ.

⁹Lɛ n'a a Bowaazʋ tɩ yel a nɩ-kore nɩ a nɩbɛ bɛl za na tɩ be a be a: «Nyɩ dɩrɛ nɩ a dãsɩɛ a dɩ̃a, ɩ̃ na daar a Elimelɛkɩ nɩ a ʋ bidɛbr Kiliyon nɩ Maalon bome za a Nowemi zie a.

¹⁰Ɩ̃ mɩ̀ dier'ɩ a Mowab tẽw Urutɩ a Maalon pɔw-kʋɔr, k'ʋʋ ɩ a ɩ̃ pɔw, a kũu yúor cãà pore a ʋ bʋ̃-sori zu, a ʋ yúor taa kpiire a ʋ yɛbr sɔgɔ nɩ a ʋ tẽw yele maalʋ zie ɩ. Nyɩ ɩ n a yele á ŋá dãsɩɛ dem a dɩ̃a.»

¹¹A nɩ-kore nɩ a bɛlɩ dem za na tɩ be a ƴɛ̀rʋ-dɩb zie a, tɩ sɔw na: «Sɩza, tɩ dɩ n a dãsɩɛ! A Sore, ʋ maalɩ a pɔw na waar a fʋ yir a, ʋ ŋmɛ̃ taa nɩ a Arasɛl nɩ a Leya[6] na mɛ a Ɩsɩrayɛl yir a bɛ ayi a. A fʋ nũu, ʋ kpɛmɛ a Efarata dɔwlʋ pʋɔ, ɛ́ a fʋ yúor yi a Bɛtɩlɛm tẽw za pʋɔ.

¹²A Sore, ʋ ɩ a pɔw pɔl ŋa dɔw bibiir yaga kʋ̀ b, a fʋ yir tʋ̃ɔ́ ŋmɛ̃ taa nɩ a Zuda nɩ Tamaar bidɛb Perɛsɩ yir.»

¹³Lɛ n'a a Bowaazʋ tɩ de a Urutɩ ʋ ɩ a ʋ pɔw. A Sore tɩ maal'ʋ na ɩ k'ʋ tɛr pʋɔ dɔw dɛble.

¹⁴A Bɛtɩlɛm tẽw pɔwbɛ tɩ yere nɩ a Nowemi zie: «A Sore tɛr'ɩ danʋ! A dɩ̃a a, ʋ ɩ na bɛ dɔw a sob nɛ na na kaarɛ a fʋ zie a. A fʋ yãw a, bɛ wa pore a ʋ yúor a Ɩsɩrayɛl bʋʋrɛ pʋɔ!

¹⁵Ʋ na lɛb'a maalɩ a fʋ nyɔ-vʋʋrʋ ƴãw, ɛ́ tɩɛ fʋ a fʋ koru daar, bʋ̃ʋ n'ʋ vɛ̃, a fʋ bie-pɔw na nɔnɛ fʋ a, ʋlɛ n'ʋ dɔw ʋ kʋ̀ b, a fʋ bie-pɔw zuo nɩ bidɛbr ayopõi a fʋ zie.»

¹⁶Lɛ n'a a Nowemi tɩ de a bie dɔwlɩ a ʋ gbɛ́ɛ zu ɛ́ lɩɛbɩ a ʋ guole.

¹⁷A sɩman pʋɔ pɔwbɛ tɩ yel'a: «Nowemi tɛr'ɩ bidɛb!» Ɛ́ tɩ bʋɔlɩ a bie yúor kɛ́ Ovɛdɩ. A Ovɛdɩ n'ɩ a Zese sãà ɛ́ a Zese ɩ a Daviir sãà.

¹⁸Nyɩ nyɛ̃ a Daviir sãàkʋm-kore na tĩ a Perɛsɩ zie ɛ́ tu taa a: a Perɛsɩ tɩ dɔw nɩ Ɛsɩron,

¹⁹Ɛsɩron dɔw Aram, Aram dɔw Aminadab,

²⁰Aminadab dɔw Nason, Nason dɔw Salma,

²¹Salma dɔw Bowaazʋ, Bowaazʋ dɔw

²²Ovɛdɩ, Ovɛdɩ dɔw Zese, Zese dɔw Daviir.