Read Dagara, Northern 1 Samɩɛl 1 Bible Online

1 Samɩɛl 1 - Dagara, Northern bible

1 Samɩɛl 1

¹A Efarayim tan vuo pʋɔ a, Aramatayim-Sofim tẽw nɩr kãw tɩ be n be, a yúor dɩ kɛ́ Ɛlkana. Efarata dɔwlʋ nɩr tɩ n'ʋ, ɛ́ tɩ ɩ Yeroham bidɛb. A Yeroham tɩ ɩ n Elihu bidɛb, a Elihu ɩ Tohu bidɛb, a Tohu ɩ Sufʋ bidɛb.

²A Ɛlkana tɩ tɛr'ɩ pɔwbɛ ayi: a dãw-niwn sob dɩ kɛ́ Ana, ɛ́ a ayi sob dɩ kɛ́ Penina. A Penina tɩ tɛr'ɩ bibiir, ɛ́ a Ana bɛ tɩ tɛr ɛ.

³Yũon za, a Ɛlkana mɩ́ tɩ yi n a ʋ tẽw Arama, ɛ́ do a Silo[1] zi-sõw k'ʋʋ tɩ puori a Sore, a Kpɛnʋ-za-sob, ɛ́ maalɩ bàwr kʋ̀ ʋ. A Eli bidɛbr ayi, Hɔfɩnɩ nɩ Pɩnasɩ nɛbɛ tɩ ɩ a Sore bàwr-maalbɛ a be.

⁴A bibir nɛ a Ɛlkana na mɩ́ tɩ maalɩ a bàwr a, ʋ mɩ́ ŋmãa nɩ a nɛn kʋ̀ a Penina, ɛ́ mɩ̀ ŋma põ a Penina bidɛbr nɩ a ʋ pɔwyaar.

⁵Ɛcɛ ʋ mɩ́ tɩ kʋ̀ n a Ana a nɛn-vla zie, bʋ̃ʋ n'ʋ vɛ̃, ʋ tɩ nɔnɛ ʋ nɩ yaga, a Sore na saa bɛ tɩ kʋ̀ ʋ dɔwfʋ a.

⁶A ʋ yẽtaa Penina ʋl a, kʋralɛ n'a ʋ bɛ mɩ́ tɩ bɛrɛ nɩ ʋ a zʋmɛ ɩ, k'ʋʋ ƴãw ʋ vĩ, a Sore na bɛ kʋ̀ ʋ a dɔwfʋ a ƴãw.

⁷À ŋá n'a a Ɛlkana tɩ ɩrɛ yome za, bɛ na mɩ́ do a Sore yir a Silo a, ɛ́ lɛ n'a a Penina mɩ̀ mɩ́ tɩ tɛr'ɩ a Ana a zʋmɛ. Lɛ n'a a Ana wa tɩ nyɔw kon, ɛ́ zawrɩ a bʋ̃-dɩrɩ.

⁸A ʋ sɩr Ɛlkana tɩ sowr'ʋ na: «Ana a, bʋ̃ʋ n'ʋ tɛr fʋ fʋ kone? Bʋ̃ʋ n'ʋ so fʋ bɛ dɩrɛ? Bʋ̃ʋ n'ʋ so pʋ-sãwna tɛr fʋ? Ɩ̃ bɛ zuo bidɛbr pie a fʋ zie ɩ?»

⁹Bɛ na tɩ dɩ ɛ́ nyũ baarɩ a Silo be a, a Ana tɩ ìr'a. A bàwr-maalɛ Eli tɩ zɩ̃ n a ʋ dà-kɔw zu a Sore yir dɩ̃dɔrɩ́.

¹⁰Pʋ-sãwna tɩ tɛr'ɩ a Ana bɛ dɩ vuo ɩ. Ʋ tɩ puore nɩ a Sore kone nɩ marmarmar.

¹¹Ʋ tɩ kõ n nʋɔr à ŋá: «Sore Kpɛnʋ-za-sob i, fʋ̃ʋ wa sàw nyɛ̃ a fʋ tõ-tõ-bi-pɔw kpɩɛrʋ a, fʋ̃ʋ wa sàw tɩɛrɛ a ɩ̃ yele, bɛ yiiri a fʋ tõ-tõ-bi-pɔw bɛr, ɛ́ sàw kʋ̀ ʋ dɛble a, ɩ̃ na de ʋ na kʋ̀ fʋ, a ʋ cãafʋ daar za, ɛ́ bʋra[2] kʋ̃ tɔ a ʋ zu ɛ.»

¹²A Ana tɩ puor'a kɔwrɩ. A Eli tɩ jɩ́rɛ ʋ na,

¹³ʋ tɩ nyɛ̃ na k'aa Ana nɔgbãbie damnɛ na, ɛcɛ a Eli bɛ tɩ wone bom za ɩ. Lɛ n'a ʋ tɩ tɩɛr k'aa Ana kuol'a,

¹⁴ɛ́ yel ʋ: «Debor'a a dãa na cɩ b? Yi cen zi-yũo tɩ ɩ a fʋ dãa a cɩ!»

¹⁵A Ana tɩ sɔw ʋ na: «Pɔw-zu-kpɛ̃w sob bɛ nɛ m ɛ, ɩ̃ bɛ nyũ divɛ̃ bɩɩ dã-kpɛ̃w kãw za na kuole a ɩ, a Sore n'ʋ ɩ̃ kone a ɩ̃ kpɩɛrʋ kʋ̀rɛ.

¹⁶Ta ɩrɛ a fʋ tõ-tõ-bi-pɔw mɛ̃ pɔwli-bɛ-tɛr-bir'ʋ a ɩ, a tɩɛrʋ nɩ a kpɩɛrʋ na zuo mɛ̃ a n'a so ɩ̃ puori wa tɔ a ka.»

¹⁷Lɛ n'a a Eli tɩ yel ʋ: «Cere nɩ ƴã-ɓaarʋ, ɛ́ a Ɩsɩrayɛl Naaŋmɩn, ʋ kʋ̀ b a bom nɛ fʋ na zɛlɩ a ʋ zie a.»

¹⁸A Ana tɩ sɔw ʋ na: «Tɛr pʋ-pɩɛlʋ a ɩ̃ ƴãw.» A Ana tɩ tɔl'a cen, ʋ tɩ dɩ na ɛ́ a ʋ niwn bɛ tɩ cãà ŋmɛ̃ a lɛ ɩ.

¹⁹A bio daarɩ́ biɓaar-pipi, a Ɛlkana nɩ a ʋ yir dem tɩ cen na tɩ puori a Sore, ɛ́ lɛb kul a bɛ yir a Arama. A Ɛlkana tɩ páw nɩ a ʋ pɔw Ana, ɛ́ a Sore sàw de a Ana puoru.

²⁰A Ana tɩ tɛr'ɩ pʋɔ, ɛ́ a daar na wa ta a, ʋ dɔw nɩ dɛble, ɛ́ yel à ŋá: «Ɩ̃ na zɛlɩ ʋ a Sore zie a, ɩ̃ na por ʋ na kɛ́ Samɩɛl[3].»

²¹A Ana sɩr Ɛlkana tɩ lɛb'a do a Silo, ʋlɛ nɩ a ʋ yir dem za, k'ʋʋ tɩ maalɩ a bàwr ʋl ʋ na mɩ́ maalɩ kʋ̀ a Sore a yome za a, ɛ́ ír a nʋɔr ʋ na tɩ kõ a.

²²Ɛcɛ a Ana bɛ tɩ páw a ʋ sɩr do ɩ, ʋ tɩ yel ʋ na: «Tɩ gù a bie tɩ kpɩr a bɩr, a lɛn daar a, ɩ̃ na tɛr ʋ na do n tɩ wul a Sore, ʋʋ be a be daadaa.»

²³A ʋ sɩr Ɛlkana tɩ yel ʋ na: «A vɩɛl'a. Be n ʋ a ka, ɛ́ gù fʋ tɩ kpɩr ʋ. A Sore, ʋ tu a lɛ ʋ na yel a, a tɛwr'a.» Lɛ n'a a Ana tɩ be a Arama, ƴɛnɩ a ʋ bidɛb tɩ ta n a ʋ kpɩr-bɛrʋ.

²⁴Ʋ na wa kpɩr ʋ a, ʋ tɩ tɛr ʋ na bɛ do a Sore yir a Silo, ʋ na saa tɩ cãà ɩ pʋrɩ a. Ʋ tɩ lãw na tɛr'ɩ yome ata nadɛr, zɔ̃ nɩ vʋɔra, nɩ divɛ̃ nɩ wɔ-gbãw.

²⁵Bɛ tɩ kʋ n a nadɛr kʋ̀ a Sore, ɛ́ tɛr a bie cen nɩ a Eli zie.

²⁶A Ana tɩ yel'ɩ a Eli: «Fʋ gaafara! Ɩ̃ pɔ na kɛ́ mãa n'ɩ a pɔw ʋl na tɩ sɔwrɩ nɛ àr kɔw fʋ a ka puore a Sore a.

²⁷A bie ŋa páwfʋ ƴãw n'a ɩ̃ tɩ puore, ɛ́ a Sore kʋ̀ m'ɩ a bom nɛ ɩ̃ na zɛlɩ a ʋ zie a.

²⁸A mãa mɩ̀ a, ɩ̃ dier ʋ na kʋ̀rɛ a Sore. A ʋ cãafʋ daar za a, ʋ na ɩ n a Sore sób.» Bɛ tɩ gũu na tɩ tɔ tẽw a be, a Sore niŋé.