Read Dagara, Northern 1 Samɩɛl 11 Bible Online

1 Samɩɛl 11 - Dagara, Northern bible

1 Samɩɛl 11

¹A Amɔ̃ tẽw dem nãà, Nahasɩ, tɩ ìr'a cen tɩ piw a Yavɛsɩ tẽw na be a Galaadɩ a. A Yavɛsɩ tẽw dem za tɩ yel'ɩ a Nahasɩ: «Ɩ tɩɩm nɩ fʋ̃ʋ wõ taa, ɛ́ tɩ na tone fʋ.»

²A Amɔ̃ tẽw dem nãà, Nahasɩ, tɩ yel bɛ na: «À ŋá n'a mãa nɩ a nyɩɩm wõ-taa na ŋmɛ̃: ɩ̃ na kpol'ɩ nyɩ za been been dʋrʋ mimir, k'ɩ̃ɩ ɩ vĩ kpɛ a Ɩsɩrayɛl nɩbɛ za.»

³A Yavɛsɩ nɩbɛ nɩ-kore tɩ lɛb'a yel ʋ: «Kʋ̀ tɩ bibie ayopõi. Tɩ na tõ n nɩbɛ a Ɩsɩrayɛl tẽw za pʋɔ, ɛ́ nɩr bɛ wa be be na wa sõw tɩ a, tɩ na bɛr'ɩ tɩ tʋɔra kʋ̀ b.»

⁴A nɩbɛ bɛ na tõ a tɩ ta n a Sawul tẽw Givea, manɩ a yel ŋa kʋ̀ a nɩbɛ. Lɛ n'a a nɩbɛ tɩ nyɔw kon.

⁵A tɩ man na taa nɩ a Sawul na yi a pu-pʋɔ tuur a ʋ nĩi kule waar a. Ʋ tɩ sowr'a: «Bʋ̃ʋ n'ʋ tɛr a nɩbɛ bɛ kone?» Bɛ tɩ manɩ nɩ a lɛ a Yavɛsɩ tẽw dem na tɩ yel a kʋ̀ ʋ.

⁶A Sawul na wa wõ a ƴɛ̀r-bie á ŋá a, a Naaŋmɩn Vʋʋrʋ tɩ siw nɩ a ʋ zu daadaalɛ, ɛ́ suur ír ʋ bɛ dɩ vuo ɩ.

⁷Ʋ tɩ nyɔw nɩ nĩi ayi kʋ, sɩ, ŋma pʋrpʋr, tõ n nɩbɛ a Ɩsɩrayɛl tẽw za pʋɔ, kɛ́ bɛ tɩ yel à ŋá: «Nɩr bɛ wa yi tu a Sawul nɩ a Samɩɛl pùor, cen a zɛbr a, à ŋá n'a bɛ na ɩ a ʋ nĩi.» A Sore tɩ ɩ na dɛ̃bɩ̃ɛ nyɔw a nɩbɛ, bɛ za yi mɛ̃ nɩ-been a.

⁸A Sawul tɩ ɓã bɛ nɩ taa Bezɛkɩ, sɔr bɛ kaa: a saa-pɛrɩ́-gʋba-lowr dɔwlʋ nɩbɛ tɩ ɩ n tùr-kɔbr ata (300 000), ɛ́ a Zuda dɔwlʋ nɩbɛ ɩ tùr-lɩzɛr'ɩ pie (30 000).

⁹Bɛ tɩ tõ n a nɩbɛ na tɩ yi a Yavɛsɩ wa a: «À ŋá n'a nyɩ na tɩ ƴɛ̀r a Yavɛsɩ nɩbɛ zie: bio, a na manɛ mʋ̃tɔ̃-tuo a, nyɩ na nyɛ̃ nɩ sõwfʋ.» A nɩbɛ bɛ na tõ a tɩ cen na tɩ yel kʋ̀ a Yavɛsɩ tẽw dem. Nʋ̃ɔ̀ tɩ kpɛ bɛ nɩ yaga.

¹⁰A Yavɛsɩ nɩbɛ tɩ yel'ɩ a Amɔ̃ tẽw dem: «Bio, tɩ na bɛr'ɩ tɩ tʋɔra kʋ̀ nyɩ, ɛ́ nyɩ na ɩ tɩ nɩ a lɛ nyɩ na bɔbr a.»

¹¹Lɛ n'a a bio daarɩ́ a Sawul tɩ nyɔw a nɩbɛ bʋ́r ziir ata. Bɛ tɩ kpɛ n a Amɔ̃ tẽw dem laɩ pʋɔ zi-lige, zɛb tʋ̃ɔ́ bɛ tɩ ta n a mʋ̃tɔ̃-tuo. A bɛl na tɩ cɛ a tɩ zɔ na yaarɩ, ɛ̀ nɩbɛ ayi bɛ mɩ́ tɩ cãà lãw be zi-been ɛ.

¹²Lɛ n'a a Ɩsɩrayɛl nɩbɛ tɩ yel a Samɩɛl: «Tẽbowle nɛbɛ tɩ yel k'aa Sawul kʋ̃ dɩ naalʋ a tɩ zu a[21]? Nyɩ tɛr a nɩbɛ bɛ ŋa wa n tɩ wa kʋ.»

¹³Ɛcɛ a Sawul tɩ yel'a: «Nɩr bɛ kʋrɛ nɩr a bibir ŋa tɔ ɩ, bʋ̃ʋ n'ʋ vɛ̃, a dɩ̃a a, a Sore ɩ na a Ɩsɩrayɛl zɛb tʋ̃ɔ́.»

¹⁴Al pùorí a Samɩɛl tɩ yel'ɩ a Ɩsɩrayɛl nɩbɛ: «Nyɩ wa tɩ cen a Gilgal lɛb tɩ zɩɩlɩ a Sawul naalʋ a be.»

¹⁵Lɛ n'a a nɩbɛ za tɩ cen a Gilgal. A Gilgal be a, bɛ tɩ zɩɩl'ɩ a Sawul, ʋ ɩ a nãà a Sore niŋé, bɛ tɩ maal'ɩ ƴã-ɓaarʋ bàwr kʋ̀ a Sore. A Sawul nɩ a Ɩsɩrayɛl nɩbɛ za tɩ nyɔw nɩ cuw maalʋ a be.