Read Dagara, Northern 1 Samɩɛl 14 Bible Online

1 Samɩɛl 14 - Dagara, Northern bible

1 Samɩɛl 14

¹Bibir kãw, a Sawul bidɛb, Zonatã, tɩ yel'ɩ a ʋ tõ-tõ-bi-pɔl na mɩ́ tɛr a ʋ zɛbr bome a: «Wa, ɩ tɩ cen tɩ ta a Filisɩtɛ̃ mɩnɛ sojarɩ na be a ka lowr a zie.» Ɛcɛ ʋ bɛ tɩ yel kʋ̀ a ʋ sãà ɩ.

²A Sawul tɩ zɩ̃ n a Givea tẽw tʋr-bɔw nʋɔr, a Migiron tẽw girenadɩ tɩɛ pile. Ʋ tɩ tɛr'ɩ sojarɩ bɛ faar na ta kɔbr ayʋɔb (600).

³Ikavɔdɩ yɛb Ahituvʋ bidɛb, Ahiya, n'ʋ tɩ ɩ a bàwr-maalɛ, su a bàwr-maal-kara nyãa-kpale[26]. A Ikavɔdɩ tɩ ɩ n Pɩnasɩ bidɛb, ɛ́ ɩ Eli na tɩ ɩ a bàwr-maalɛ a Silo a yãw. Nɩr za bɛ tɩ bãwnɩ a Zonatã cenu ɛ.

⁴Tɔlʋ zie kãw na tɛr pì-nyɩmɛ ayi, a kãw dɩ Bosɛsɩ, ɛ́ a kãw dɩ Sene a cara n'a a Zonatã tɩ tu, k'ʋʋ ta zɛb'ɩ a Filisɩtɛ̃ mɩnɛ sojarɩ.

⁵A pìir nyɩɩm kãw tɩ àr'ɩ a saa-pɛrɩ́-gʋba-lowr tori a Mikɩmasɩ, ɛ́ a kãw àr a saa-pɛrɩ́-dʋrʋ-lowr tori a Geva.

⁶A Zonatã tɩ yel'ɩ a ʋ zɛbr bʋ̃-tɛrɛ: «Wa, tɩ cen tɩ ta a yɔ-ɓile[27] dem bɛ ŋa zie. A mɩnɛ kãw, a Sore na sõw tɩ na. Yel-mɩŋa n'a, tɩ yãwmɛ na bɩɩ tɩ ɩ n pʋrɩlɛ a, a Sore na tʋ̃ɔ́ na ɩ tɩ zɛb tʋ̃ɔ́.»

⁷A ʋ zɛbr bʋ̃-tɛrɛ tɩ yel ʋ na: «Ɩrɛ lɛ za na pɛlɩ a fʋ pʋɔ a. Ɩ tɩ cen, ɩ̃ tuur fʋ na mɛ̃ a fʋ dasule a.»

⁸A Zonatã tɩ lɛb'a yel: «Tɩ na tu n a nɩbɛ bɛ ŋa lowr, ɛ́ ɩ bɛ nyɛ̃ tɩ.

⁹Bɛlɛ wa yel tɩ: “'Hei! Nyɩ àr a be, ɛ́ gù tɩ wa ta a nyɩ zie” a, tɩ na àr'a, tɩ kʋ̃ do a bɛ zie ɩ.

¹⁰Ɛcɛ bɛlɛ wa yel tɩ: “Nyɩ do wa a tɩ zie” a, tɩ na do na, a na ɩ n a bãwfʋ k'aa Sore de bɛ na ƴãw a tɩ nuru pʋɔ.»

¹¹Lɛ n'a bɛ tɩ bɛr a Filisɩtɛ̃ mɩnɛ sojarɩ nyɛ̃ bɛ. A Filisɩtɛ̃ mɩnɛ tɩ yel'a: «Ebre nɩbɛ n'ɩ a bɛ ŋan na yire a bɔwrɩ pʋɔ bɛ na tɩ sɔwlɩ a.»

¹²Bɛ tɩ gbanɩ na bʋɔlɩ a Zonatã nɩ a ʋ zɛbr bʋ̃-tɛrɛ, yel bɛ: «Nyɩ do wa a tɩ zie tɩ wa manɩ yel kãw kʋ̀ nyɩ.» A Zonatã tɩ yel'ɩ a ʋ zɛbr bʋ̃-tɛrɛ: «Tu m tɩ do, a Sore de bɛ na ƴãw a Ɩsɩrayɛl nɩbɛ nuru pʋɔ.»

¹³A Zonatã gbɛ́ɛ nɩ a nuru tɩ sõw ʋ na ʋ do, ʋlɛ nɩ a ʋ zɛbr bʋ̃-tɛrɛ. A Zonatã tɩ pɔbr'ɩ a Filisɩtɛ̃ mɩnɛ lɔbr, ɛ́ a ʋ zɛbr bʋ̃-tɛrɛ baa cɔ̀rɛ bɛ kʋrɛ tuur'ɩ ʋ.

¹⁴A zɛb-dãw-niwn sob ŋa pʋɔ a, a Zonatã nɩ a ʋ zɛbr bʋ̃-tɛrɛ tɩ zɛb'a tʋ̃ɔ́ a Filisɩtɛ̃ mɩnɛ, kʋ nɩbɛ ta lɩzɛr, zi-fɩɩra pʋɔ.

¹⁵Dɛ̃bɩ̃ɛ tɩ n'a a Filisɩtɛ̃ mɩnɛ bɛl na tɩ cãà be a laɩ pʋɔ a zie, nɩ a kura pʋɔ nɩbɛ nɩ a nɩbɛ za zie. Dɛ̃bɩ̃ɛ mɩ̀ tɩ nyɔw nɩ a soja-zi-gùrbɛ nɩ a soja-zi-sãwnbɛ. A tẽsɔw tɩ dam'a, a dɛ ɩ dɛ̃bɩ̃-kpɛ̃ɛ.

¹⁶A Sawul zi-piwrbɛ tɩ be n a Bɛ̃zamɛ tẽw Givea ɛ́ jɩ́rɛ. Bɛ tɩ nyɛ̃ nɩ a nɩbɛ na zɔ tu a ziir za a.

¹⁷A Sawul tɩ yel'ɩ a ʋ sojarɩ: «Nyɩ bʋɔlɩ a nɩbɛ yée nyɛ̃, ãa n'ʋ yi a ka cen zie.» Bɛ tɩ bʋɔl'ɩ a yée nyɛ̃ a ɩ a Zonatã nɩ a ʋ zɛbr bʋ̃-tɛrɛ nɛbɛ bɛ tɩ ka be ɩ.

¹⁸A Sawul tɩ yel'ɩ a bàwr-maalɛ Ahiya: «Ƴãw bɛ taw pɩɛl'ɩ a Naaŋmɩn wõ-taa daga a ka.» — A ʋlɩ bibir nɛ a, a Naaŋmɩn wõ-taa daga tɩ be n a Ɩsɩrayɛl nɩbɛ zie. —

¹⁹A Sawul na tɩ ƴɛ̀rɛ a bàwr-maalɛ zie a, a damnʋ tɩ lɛb'a bãw dɔwlɛ a Filisɩtɛ̃ mɩnɛ laɩ pʋɔ. A lɛ n'a a Sawul tɩ yel a bàwr-maalɛ: «Ta dɩ tuo sowre a Naaŋmɩn ɛ.»

²⁰A Sawul nɩ a ʋ zɛbr-nɩbɛ za tɩ ɓã n taa cen tɩ ta a zɛbr zie. Bɛ tɩ nyɛ̃ nɩ a Filisɩtɛ̃ mɩnɛ bɛ lɛb ŋmɛlɩ cɔ̀rɛ taa kʋrɛ, a dɛ tɩ bʋnɩ ɩ nyãbʋnʋʋlɛ.

²¹Ebre nɩbɛ bɛ mɩnɛ na tɩ dãw ɩ a Filisɩtɛ̃ mɩnɛ tõ-tõ-biir, ɛ́ tɩ páw bɛ do a zɛbr a tɩ lɩɛb'a pʋɔ a Ɩsɩrayɛl nɩbɛ pʋɔ lãwnɩ a Sawul nɩ a Zonatã.

²²A Ɩsɩrayɛl nɩbɛ bɛl za na tɩ sɔwlɩ a Efarayim tan vuo pʋɔ a tɩ wõ na k'aa Filisɩtɛ̃ mɩnɛ nyɔw nɩ zɔba. Lɛ n'a bɛ mɩ̀ tɩ ta tu bɛ zɛbr'ɩ bɛ.

²³À ŋá n'a a Sore tɩ ɩ a Ɩsɩrayɛl nɩbɛ zɛb tʋ̃ɔ́ a ʋlɩ bibir nɛ. A zɛbr tɩ zɛb'a tɩ zuo nɩ a Bɛtɩ-Awɛn bɛr.

²⁴A ʋlɩ bibir nɛ a, a Ɩsɩrayɛl nɩbɛ tɩ wõ n tuo, bʋ̃ʋ n'ʋ vɛ̃, a Sawul tɩ ŋmɛ na ƴãw bɛ yel: «Mãa bɛ wa tɩ tʋ̃ɔ́ a ɩ̃ dɔ̃ dem baar, ɛ́ nɩr wa dɩ bom, ɛ́ a zaanʋɔra bɛ ta a, ŋmɛ-ƴãw, a páw ʋ.» Lɛ so, nɩr za bɛ tɩ dɩ bom za ɩ.

²⁵Bɛ za tɩ ta n tuw kãw pʋɔ, sɩwr na ʋr a, a tẽsɔw tɔr za zu a, a sɩwr tɩ gã na.

²⁶Bɛ na tɩ kpɛ a tuw pʋɔ a, a sojarɩ tɩ nyɛ̃ nɩ a sɩwr na gbɔlɛ a, ɛcɛ bɛ been kãw za bɛ tɩ dɩ a ɩ, a ŋmɛ-ƴãw dɛ̃bɩ̃ɛ tɩ be n a bɛ zie.

²⁷Ɛcɛ a Zonatã bɛ tɩ wõ a ʋ sãà na ŋmɛ ƴãw a nɩbɛ za ɩ. Ʋ tɩ de nɩ a dabɔl ʋ na ƴãw a nũú a, tõ a sɩwr pʋɔ, ɛ́ ír lɛnɩ: lɛ n'a ʋ tɩ lɛb tɛr fãw.

²⁸A soja kãw tɩ yel ʋ na: «A fʋ sãà fɛr tɩ na ƴãw tɩ pɔ à ŋá: “Nɩr wa dɩ bom a dɩ̃a a, ŋmɛ-ƴãw, a páw ʋ!” Alɛ n'a so a nɩbɛ za na bàl a.»

²⁹A Zonatã tɩ yel'a: «A ɩ̃ sãà ƴãw nɩ kpɩɛrʋ a tẽw za. Nyɩ nyɛ̃ ɩ̃ na lɛb kpɛmɛ, a sɩwr á ŋá blã ɩ̃ na lɛm kaa a ƴãw a.

³⁰A sojarɩ za tɩ tʋ̃ɔ́ dɩ a bɛ dɔ̃ dem bome bɛ na fa a dɩ̃a a, ŋmɩŋmɩn n'a a nãá tɩ ŋmɛ̃ a Filisɩtɛ̃ mɩnɛ?»

³¹A ʋlɩ bibir nɛ a, a Ɩsɩrayɛl nɩbɛ tɩ zɛb'a tʋ̃ɔ́ a Filisɩtɛ̃ mɩnɛ, yi n a Mikɩmasɩ tɩ sãá nɩ a Ayalon, ɛ́ pãa ɓɛl bɛ za,

³²lɛ n'a bɛ tɩ za a bɛ dɔ̃ dem bome. Bɛ tɩ nyɔw nɩ píir, nĩi nɩ nadeli ŋmaarɩ a kɔkɛɛ a pɛr nɛ pʋɔ, 'wɔb a nɛnɛ a be tɔr za a zɩ̃ɩ na tɩ cir a.

³³Bɛ tɩ manɩ na kʋ̀ a Sawul, yel ʋ à ŋá: «A nɩbɛ maalɛ nɩ yel-bier sãwnɛ a Sore, bɛ na 'wɔbr a nɛnɛ a be tɔr za a dʋn zɩ̃ɩ na cir a.» A Sawul tɩ yel'a: «Nyɩ zawr'ɩ a Naaŋmɩn nʋɔr! Nyɩ bili kʋsɛ-kpɛ̃ɛ kʋ̀ m a ƴɛrɛŋa!

³⁴Ɛ́ cen tɩ yel a nɩbɛ, kɛ́ ŋa za mɩ́ wa n a ʋ náab bɩɩ a ʋ pɛrʋ. Nyɩ na wa ŋmaar'a nɩ kɔkɛɛ a ka 'wɔb, lɛ n'a nyɩ kʋ̃ maalɩ yel-bier sãw a Naaŋmɩn ɛ, nyɩ na na 'wɔb a, a be a zɩ̃ɩ na cir a.» A ʋlɩ tɩ̃ɩsɔw nɛ a, ŋa za mɩ́ tɩ wa n nɩ a ʋ dʋ̃w bɛ wa ŋmaarɩ a kɔkɛɛ a be.

³⁵À ŋá n'a a Sawul tɩ mɛ bàwr-maal-kuur a Sore ƴãw: a bàwr-maal-kuur dãw-niwn-sob tɩ n'ɩ a ʋl ʋ na mɛ kʋ̀ a Sore a.

³⁶Al pùorí, a Sawul tɩ yel'a: «Nyɩ ɩ tɩ siw a tɩ̃ɩsɔw tɩ diw a Filisɩtɛ̃ mɩnɛ, tɩ tɩ za a bɛ bome tɩ vɩɛ nɩ zie, ɛ́ ta bɛr been kãw za ʋ cãà vʋʋrɛ ɩ.» A sojarɩ tɩ sɔw na: «Ɩrɛ a lɛ za na pɛlɩ a fʋ pʋɔ a.» Ɛcɛ a bàwr-maalɛ tɩ yel'a: «Tɩ de niwn sowri a Naaŋmɩn kaa[28].»

³⁷Lɛ n'a a Sawul tɩ sowri a Naaŋmɩn à ŋá: «Ɩ̃ siw tɩ diw a Filisɩtɛ̃ mɩnɛ ɛ? Fʋ na de bɛ na ƴãw a Ɩsɩrayɛl nuru pʋɔ ɔ?» Ɛcɛ a ʋlɩ bibir nɛ a, a Naaŋmɩn bɛ tɩ sɔw ʋ ɛ.

³⁸Lɛ n'a a Sawul tɩ bʋɔlɩ a Ɩsɩrayɛl nɩbɛ nɩ-bɛrɛ wa yel bɛ: «Nyɩ bɔ vla nyɛ̃, bʋ̃ʋ n'ɩ a dɩ̃a yel-bier.

³⁹Ɩ̃ pɔ n nɩ a Sore na vʋʋrɛ a, a Ɩsɩrayɛl faarɛ, a sãwna sob saa ɩ a ɩ̃ bidɛb Zonatã a, ʋ na kpi na.» A sojarɩ za pʋɔ a, nɩr bɛ tɩ cɩr cɩrʋ sɔw ʋ ɛ.

⁴⁰Lɛ n'a a Sawul tɩ yel a Ɩsɩrayɛl nɩbɛ za: «A nyɩɩm Ɩsɩrayɛl nɩbɛ, nyɩ àr ka lowr, mãa nɩ a ɩ̃ bidɛb Zonatã mɩ̀ na àr'ɩ ka lowr.» A nɩbɛ tɩ sɔw ʋ na: «Ɩrɛ a lɛ za na pɛlɩ a fʋ pʋɔ a.»

⁴¹A Sawul tɩ puor'ɩ a Sore yel à ŋá: «Ɩsɩrayɛl Naaŋmɩn i, bʋ̃ʋ n'ʋ so fʋ bɛ sɔw mɛ̃ a dɩ̃a? Sore e, sɔw mɛ̃ nɩ a bi-son[29] bɛ na mɩ́ bãw nɩ a fʋ pʋ-tɩɛrʋ a: a Zonatã bɩɩ a mãa mɩŋa wa n'ʋ sãw a, fʋ̃ʋ sɔw nɩ a Uurim, a zɛbr-nɩbɛ wa n'a sãw a, fʋ̃ʋ sɔw nɩ a Tumim.» A bie tɩ wul'ɩ a Sawul nɩ a Zonatã, ɛ́ bɛr a zɛbr-nɩbɛ.

⁴²A Sawul tɩ yel'a: «Nyɩ lɔb a bie mãa nɩ a ɩ̃ bidɛb Zonatã cará.» A bie tɩ wul'ɩ a Zonatã.

⁴³Lɛ n'a a Sawul tɩ yel a Zonatã: «Yel a ʋlɩ bom nɛ fʋ na ɩ a kʋ̀ m.» A Zonatã tɩ manɩ na kʋ̀ ʋ. Ʋ tɩ yel'a: «Sɩza n'a, ɩ̃ tõ n a dabɔl ɩ̃ na tɩ ƴãw a nũú a nyʋɔr a sɩwr pʋɔ, lɛm kaa blã. Mãa n'ɩ ŋan, ɩ̃ gù n a kũu.»

⁴⁴A Sawul tɩ yel'a: «Zonatã a, a Naaŋmɩn, ʋ dɔwrɩ mɛ̃, ɛ́ lɛb maal dɔwrɩ, fʋ̃ʋ bɛ wa kpi a!»

⁴⁵Ɛcɛ a sojarɩ tɩ yel'ɩ a Sawul: «A Zonatã na ɩ a Ɩsɩrayɛl zɛb tʋ̃ɔ́ sɛw à ŋá a na kpi na ya a? Bɛlɛ! A Sore na vʋʋrɛ a bɛ wa n'ʋ a n'a! A Zonatã zukɔbr-been bɛ lore tẽw ɛ, bʋ̃ʋ n'ʋ vɛ̃, Naaŋmɩn n'ʋ sõw ʋ, ʋ ɩ à à ŋá a dɩ̃a bibir.» À ŋá n'a a zɛbr-nɩbɛ tɩ faa a Zonatã, ʋ bɛ kpi ɛ.

⁴⁶A Sawul tɩ bɛr'ɩ a Filisɩtɛ̃ mɩnɛ diwfʋ, ɛ́ bɛ lɛb kul a bɛ tẽw.

⁴⁷A Sawul na tɩ dɩ a naalʋ a Ɩsɩrayɛl zu baarɩ a, ʋ tɩ zɛb'ɩ nɩ a ʋ dɔ̃ dem na tɩ jil koli ʋ a: a Mowab tẽw dem, a Amɔ̃ tẽw dem, a Edɔm tẽw dem, a Sova naalʋ-ten nɩ a Filisɩtɛ̃ mɩnɛ, ɛ́ zie za ʋ na mɩ́ tɩ lɩɛbɩ a, ʋ mɩ́ tɩ zɛb'a tʋ̃ɔ́.

⁴⁸Bibir kãw, ʋ tɩ wul'ɩ a ʋ gãdaalʋ, zɛb tʋ̃ɔ́ Amalɛkɩ. À ŋá n'a ʋ tɩ faa a Ɩsɩrayɛl, a sob nɛ na tɩ fárɛ bɛ a nuru pʋɔ.

⁴⁹A Sawul bidɛbr tɩ n'ɩ bɛ ŋa: Zonatã, Yisevi nɩ Malki-Suwa. A ʋ pɔwyaar ayi yée tɩ n'ɩ Meravʋ na ɩ a pɔwya-kpɛ̃ɛ a nɩ Mɩkal na ɩ a bile a.

⁵⁰A Sawul pɔw tɩ dɩ na kɛ́ Ahinowam, Ahimaasɩ pɔwyaa. A ʋ zɛbr-nɩbɛ nɩ-kpɛ̃ɛ tɩ dɩ na kɛ́ Avɩnɛɛr na ɩ Nɛɛr bidɛb, ɛ́ a Nɛɛr ɩ a Sawul sãà kãw a.

⁵¹Kisɩ tɩ n'ɩ a Sawul sãà, ɛ́ Nɛɛr ɩ a Avɩnɛɛr sãà. A Kisɩ nɩ a Nɛɛr tɩ ɩ n Avɩɛl bidɛbr.

⁵²A Sawul naalʋ-dɩb daar za a, ʋ tɩ zɛb'ɩ nɩ a Filisɩtɛ̃ mɩnɛ yaga za. Lɛ so, ʋ na mɩ́ tɩ nyɛrɛ dɛb na kpɛmɛ bɩɩ tɛr kanyir a, ʋ mɩ́ tɩ de ʋ na ƴãw a ʋ sojarɩ pʋɔ.