Read Dagara, Northern 1 Samɩɛl 16 Bible Online

1 Samɩɛl 16 - Dagara, Northern bible

1 Samɩɛl 16

¹A Sore tɩ yel'ɩ a Samɩɛl à ŋá: «Debor'a fʋ na kõ a Sawul tɩ ta? Mãa zawr'ʋ na bɛr, ʋ bɛ cãà ɩ a Ɩsɩrayɛl nãà ɩ. De a fʋ ɩɩl, ɩ kãá paalɩ yi lo n a sɔ́r. Ɩ̃ tone fʋ nɩ Bɛtɩlɛm tẽw, Zese zie, bʋ̃ʋ n'ʋ vɛ̃, ɩ̃ nyɛ̃ nɩ a nãà ʋl na pɛlɩ a ɩ̃ pʋɔ a, a ʋ bidɛbr pʋɔ.»

²A Samɩɛl tɩ sowr'a: «Ŋmɩŋmɩn n'a ɩ̃ na ɩ cen? A Sawul wa wõ a a, ʋ na kʋ m a.» A Sore tɩ yel ʋ na: «Tɛr nále cen nɩ tɩ yel à ŋá: “Bàwr'a ɩ̃ waar k'ɩ̃ɩ wa maalɩ kʋ̀ a Sore.”

³Ɛ́ bʋɔlɩ a Zese a bàwr ƴãw. A lɛn daar a, mãa mɩŋa na wul fʋ nɩ a ʋlɩ bom nɛ a na fɛr kɛ́ fʋ ɩ a. Fʋ na cir'ɩ a kãá ƴãw a sob nɛ ɩ̃ na na wul fʋ a kʋ̀ m.»

⁴A Samɩɛl tɩ ɩ n a lɛ a Sore na tɩ yel a, ɛ́ tɩ cen a Bɛtɩlɛm. Dɛ̃bɩ̃ɛ tɩ ɩrɛ nɩ a tẽw nɩ-kore bɛ zɔ tuor'ʋ sowr'ʋ: «Ɓaarʋ n'a fʋ wa a ka a?»

⁵Ʋ tɩ sɔw na: «Ʋ̃ʋ, ɓaarʋ n'a. Bàwr'a ɩ̃ wa k'ɩ̃ɩ wa maalɩ kʋ̀ a Sore. Nyɩ so a nyɩ dɛwr bɛr, ɛ́ wa lãwnɩ mɛ̃.» Ʋ mɩ̀ tɩ so n a Zese nɩ a ʋ bidɛbr dɛwr bɛr bɛ, ɛ́ bʋɔlɩ bɛ a bàwr ƴãw.

⁶Bɛ na tɩ ta a, a Samɩɛl tɩ nyɛ̃ nɩ a Zese bidɛb-kpɛ̃ɛ, Eliyaavʋ, ɛ́ tɩɛr ʋ pʋɔ: «Bʋnʋ bɛ ka be ɩ, a Sore nɩ-kabra tɔr za n'ɩ à ŋà.»

⁷Ɛcɛ a Sore tɩ yel ʋ na: «Ta jɩ́rɛ a ʋ ŋmɛ̃a nɩ a ʋ kɛrʋ ɛ, ʋlɛ bɛ n'ʋ ɩ̃ kaa ír ɛ. A ka a, lɛ nɩsaalbɛ na mɩ́ nyɛ̃ a yele a bɛ n'a ɩ: nɩsaalbɛ mɩ́ nyɛ̃ nɩ a al na sãá a, ɛcɛ mãa a, a tɩɛrʋ n'ʋ ɩ̃ mɩ́ nyɛ̃.»

⁸Al pùorí, a Zese tɩ bʋɔl'ɩ Abinadab wa ɩ ʋ tɔl a Samɩɛl niŋé, ɛcɛ a Samɩɛl tɩ yel'a: «Ŋa mɩ̀ bɛ n'ʋ ɛ, a Sore bɛ kaa ír ʋ ɛ.»

⁹A Zese tɩ ɩ na Sama tɔl, ɛcɛ a Samɩɛl tɩ yel'a: «Ŋa mɩ̀ bɛ n'ʋ ɛ, a Sore bɛ kaa ír ʋ ɛ.»

¹⁰À ŋá n'a a Zese tɩ ɩ a ʋ bidɛbr ayopõi tɔl a Samɩɛl niŋé, ɛcɛ a Samɩɛl tɩ yel'a: «A Sore bɛ kaa ír a bɛ been kãw za ɩ.»

¹¹A Samɩɛl tɩ yel'ɩ a Zese: «A pɔ́lɛ́ za n'ɩ a bɛ ŋa bɩɩ?» A Zese sɔw: «A bile za n'ʋ cãà cɛ: ʋ àrɛ nɩ nɩ a dʋn.» Lɛ n'a a Samɩɛl tɩ yel a Zese: «Tõ bɛ tɩ bʋɔl'ʋ. Ʋlɛ bɛ wa ta a, tɩ kʋ̃ tĩ a bàwr bʋ̃-dɩrɩ dɩb ɛ.»

¹²A Zese tɩ tõ na bɛ tɩ tɛr ʋ wa n. Ʋ tɩ ɩ n zɩɛ, cɩ niwn ɛ́ pɔl yaga. A Sore tɩ yel'a: «Ʋlɛ n'ʋ, cir a kãá ƴãw ʋ a zũú.»

¹³A Samɩɛl tɩ de nɩ a kãá nɩ a ɩɩl cir ƴãw Daviir zũú, a ʋ yɛbr sɔgɔ, ɛ́ a Sore vʋʋrʋ tɩ siw ʋ, ɛ́ tĩ a ʋlɩ bibir nɛ ɛ́ be a ʋ zie. A Samɩɛl tɩ ìr'a lɛb lo a sɔ́r kul a Arama.

¹⁴A Sore vʋʋrʋ tɩ yi na ɛ́ bɛr a Sawul, ɛ́ vʋʋr-faa kãw yi a Sore zie wa damnɛ ʋ.

¹⁵A Sawul tõ-tõ-biir tɩ yel ʋ na: «Tɩ nyɛ̃ a na, vʋʋr-faa kãw yi n a Naaŋmɩn zie wa damnɛ fʋ.

¹⁶Tɩɩm n'ɩ bɛ ŋan, yel ʋlɩ bom nɛ fʋ na bɔbr a, tɩ na ɩ na. Tɩ na bɔ n nɩr na bãw korijom ŋmɛb a wa n. A vʋʋr-faa na yi a Naaŋmɩn zie a mɩ́ wa damnɛ fʋ a, ʋ na mɩ́ ŋmɛ n a korijom a ɓaalɩ fʋ.»

¹⁷A Sawul tɩ sɔw na: «Ɩ̃ sàw na. Nyɩ bɔ ŋmɩɛrŋmɩɛr-vla wa kʋ̀ m.»

¹⁸A tõ-tõ-bie kãw tɩ yel'a: «Ɩ̃ bãw nɩ nɩr kãw na ŋmɩɛr a, Bɛtɩlɛm tẽw Zese bidɛb'ʋ. Ʋ ŋmɩɛr'ɩ vla, nɩr'ʋ, ɛ́ ɩ soja-vla. Ʋ bãw nɩ ƴɛ̀rʋ vla vla, ɛ́ pɔl. Ɛ́ lɛb waar, a Sore be n a ʋ zie.»

¹⁹A Sawul tɩ tõ n nɩbɛ bɛ tɩ yel a Zese à ŋá: «Tɩr a fʋ bidɛb Daviir kʋ̀ m, a ʋl na àrɛ nɩ a dʋn a.»

²⁰A Zese tɩ nyɔw nɩ bõw ƴãw ʋ tuo dipɛ̃, nɩ divɛ̃ nɩ wɔ-gbãw, nɩ bʋle, ʋ tõ n a ʋ bidɛb Daviir k'ʋʋ tɩ kʋ̀ a Sawul.

²¹A Daviir tɩ ta n a Sawul zie tĩ tone ʋ. A Sawul tɩ nɔ̃w ʋ nɩ yaga, de ʋ ƴãw ʋ mɩ́ tɛr a ʋ zɛbr bome.

²²Al pùorí, a Sawul tɩ tõ na bɛ tɩ yel a Zese à ŋá: «Ɩ̃ bɔbr'a k'aa Daviir be a ɩ̃ zie tone mɛ̃. Ɩ̃ pʋɔ pɛlɩ nɩ a ʋ ƴãw.»

²³Lɛ n'a, a vʋʋr-faa na yi a Naaŋmɩn zie a, na mɩ́ wa damnɛ a Sawul a, a Daviir mɩ́ tɩ de nɩ a korijom ŋmɩɛr. A mɩ́ tɩ ɓaal'ɩ a Sawul, ʋ lɛb nyɔw ʋ tʋɔra, ɛ́ a vʋʋr-faa mɩ́ tɩ yi ɛ́ bɛr ʋ.