Read Dagara, Northern 1 Samɩɛl 18 Bible Online

1 Samɩɛl 18 - Dagara, Northern bible

1 Samɩɛl 18

¹A Daviir na dɛ tɩ ƴɛ̀rɛ a Sawul zie wa báarɛ a, a Sawul bidɛb, Zonatã, tɩ de nɩ a ʋ yele, ɛ́ nɔ̃w ʋ mɛ̃ a ʋl mɩŋa a.

²A ʋlɩ bibir nɛ a, a Sawul bɛ tɩ sàw a Daviir lɛb kul a ʋ sãà zie ɩ.

³Lɛ n'a a Zonatã tɩ maal'ɩ a Daviir báalʋ wõ-taa, ʋ na tɩ nɔnɛ ʋ yaga za a ƴãw.

⁴A Zonatã tɩ yaa nɩ a ʋ kpar-kpɛ̃ɛ kʋ̀ a Daviir. Ʋ mɩ̀ tɩ kʋ̀ ʋ nɩ a ʋ sojarɩ bʋ̃-suuri, tɩ lãwnɩ a ʋ zɛbr-sɔ-kpɛ̃ɛ nɩ a ʋ tam nɩ a ʋ kpàwr.

⁵Zie nɛ za a Sawul na mɩ́ tɩ tõ a Daviir a zɛbr a, ʋ mɩ́ tɩ zɛb'a tʋ̃ɔ́. Lɛ so a Sawul tɩ ƴãw ʋ ɩ a zɛbr-nɩbɛ nɩ-kpɛ̃ɛ. A sojarɩ za tɩ lãwnɩ a sojarɩ nɩ-bɛrɛ tɩ nɔnɛ ʋ na.

⁶A Daviir na tɩ zɛb tʋ̃ɔ́ a Filisɩtɛ̃ dɔɔ baarɩ, ɛ́ bɛ lɛb waar a, a pɔwbɛ tɩ yi n a Ɩsɩrayɛl ten za pʋɔ, yiele ƴawr tuore nɩ a nãà Sawul. Gãgali nɩ bʋ̃-ŋmɩɛrɩ a mɩnɛ n'a bɛ tɩ ŋmɩɛr cáarɛ nɩ nʋ̃ɔ̀ cáarʋ.

⁷A pɔwbɛ na tɩ lore nuru a, tɩ cɩɛr'a ɛ́ sɔwr yere nɩ: «Sawul kʋ n dɔ̃ dem túre túre, ɛ́ Daviir kʋ tùr-piir piir.»

⁸A nuru ŋa bɛ tɩ pɛlɩ a Sawul pʋɔ ɩ, ʋ nyɛ̃ suur yaga za yel à ŋá: «Bɛ kʋ̀ n a Daviir tùr-piir piir, ɛ́ kʋ̀ a mãa túre túre. A naalʋ tɛwr'a cɛ ʋ!»

⁹A lɛn daar a, a Sawul bɛ mɩ́ tɩ cãà jɩ́r a Daviir nɩ mimi-vla ɩ.

¹⁰A bio daarɩ́ a, vʋʋr-faa kãw na yi a Naaŋmɩn zie a tɩ siw nɩ a Sawul, ʋ ɩrɛ yãya-ɩb a ʋ yir. A Daviir tɩ ŋmɩɛr'ɩ a ʋ korijom mɛ̃ a kʋralɛ a, ɛ́ a Sawul tɩ ƴãw a ʋ kafin a nũú.

¹¹Bɛ wa bere na ʋ zɛw a ʋ kafin ɛ́ yel: «Ɩ̃ na cɔ̀r ʋ na gbem'ɩ a dacin!» Ɛcɛ gb'a ayi za, a Daviir tɩ nɩɩr'a bɛr.

¹²A Sawul tɩ zɔ n a Daviir dɛ̃bɩ̃ɛ, bʋ̃ʋ n'ʋ vɛ̃, ʋ tɩ nyɛ̃ na k'aa Sore bɛr ʋ na, ɛ́ be a Daviir zie.

¹³Lɛ so ʋ tɩ ƴãw a Daviir ɩ sojarɩ túr (1 000) nɩ-kpɛ̃ɛ, k'ʋʋ tʋ̃ɔ́ zãá nɩ ʋ. Lɛ n'a a Daviir mɩ́ tɩ de a ʋ sojarɩ niwn, bɛ cen a zɛbr,

¹⁴ɛ́ kʋralɛ ʋ na mɩ́ tɩ yi a zɛbr a, ʋ mɩ́ zɛb'a tʋ̃ɔ́, bʋ̃ʋ n'ʋ vɛ̃, a Sore tɩ be n a ʋ zie.

¹⁵A Sawul na tɩ nyɛ̃ a Daviir ʋ mɩ́ zɛb tʋ̃ɔ́ a, dɛ̃bɩ̃ɛ mɩ́ tɩ lɛb'a bãw nyɔw ʋ a ʋ ƴãw.

¹⁶Ɛcɛ a Ɩsɩrayɛl nɩbɛ nɩ a Zuda nɩbɛ za tɩ nɔnɛ nɩ a Daviir, bʋ̃ʋ n'ʋ vɛ̃, ʋlɛ n'ʋ mɩ́ tɩ de bɛ niwn a zɛbr ƴãw.

¹⁷A Sawul tɩ yel'ɩ a Daviir à ŋá: «A ɩ̃ pɔwya-dãw Meravʋ n'ɩ ŋan, ʋlɛ n'ʋ ɩ̃ na kʋ̀ b fʋ kul. Ɛcɛ ƴãw fãw tʋlɛ a ɩ̃ tome ƴãw, ɛ́ zɛbr a Sore zɛbr.» A Sawul tɩ tɩɛrɛ nɩ ʋ pʋɔ à ŋá: «Mãa mɩŋa bɛ íre nũu tʋɔr'ɩ ʋ ɛ, Filisɩtɛ̃ mɩnɛ nɛbɛ na bãw ʋ yele.»

¹⁸A Daviir tɩ sɔw nɩ a Sawul à ŋá: «Nãà a, ãa nɛ m? A ɩ̃ yir nɩ a ɩ̃ sãà yir dɔwlʋ za bɛ zɛ̃ bom a Ɩsɩrayɛl ka ɩ, ŋmɩŋmɩn za n'a ɩ̃ na tʋ̃ɔ́ ɩ a nãà dɩɛm?»

¹⁹Ɛcɛ, a lɛn daar a Sawul nãá de a Meravʋ kʋ̀ a Daviir ʋ kul a, ʋ tɩ de ʋ na kʋ̀ Mehola[33] tẽw Adɩrɩɛl.

²⁰Ɛcɛ a Sawul pɔwyaa kãw na dɩ kɛ́ Mɩkal a tɩ nɔnɛ nɩ a Daviir. Bɛ tɩ yel'a kʋ̀ a Sawul, nʋ̃ɔ̀ kpɛ ʋ,

²¹ʋ tɩ tɩɛrɛ na: «Ɩ̃ na kʋ̀ ʋ nɩ a ɩ̃ pɔwyaa, ʋ ɩ ʋ bɛra, a Filisɩtɛ̃ mɩnɛ tʋ̃ɔ́ ƴãw ʋ nũú.» Lɛ n'a gb'a ayi za, a Sawul tɩ yel a Daviir: «Fʋ na ɩ n a ɩ̃ dɩɛm.»

²²A Sawul tɩ yel'ɩ a ʋ tõ-tõ-biir: «Nyɩ sɔwlɩ ƴɛ̀r a Daviir zie. Nyɩ yel ʋ: “A nãà bɔbr'ɩ a fʋ vla, ɛ́ a ʋ tõ-tõ-biir za nɔnɛ fʋ. A na ɩ à ŋá a, sàw ɩ a nãà dɩɛm.”»

²³A Sawul tõ-tõ-biir tɩ ƴɛ̀r'ɩ a ƴɛ̀rʋ á ŋá a Daviir wõ. Ʋ tɩ yel'a: «Nyɩ manɛ k'aa nãà dɩɛm ɩb ɩ n yel-pʋrɩ bɩɩ? Ɛcɛ mãa n'ɩ ŋan bɛ tɛr bom ɛ, ɛ́ bɛ lɛb tɛr pɛr ɛ.»

²⁴A Sawul tõ-tõ-biir tɩ lɛb'a cen tɩ manɩ kʋ̀ ʋ a lɛ a Daviir na sɔw a.

²⁵A Sawul tɩ yel'a: «À ŋá n'a nyɩ na tɩ ƴɛ̀r a Daviir zie: “Filisɩtɛ̃ mɩnɛ yɔnɔgamɛ kʋba (100) tɛwr'a a nãà bɔbr, a na ɩ n a ʋ pɔwyaa bome. Lɛ n'a ʋ na dɔwrɩ a ʋ dɔ̃ dem yáa a san”.» A Sawul tɩ tɩɛrɛ kɛ́ lɛ n'a ʋ na ɩ, ƴãw a Daviir a Filisɩtɛ̃ mɩnɛ nuru pʋɔ.

²⁶A Sawul tõ-tõ-biir tɩ lɛb'a cen tɩ manɩ a ƴɛ̀r-bie á ŋá kʋ̀ a Daviir. A Daviir tɩ nyɛ̃ na ʋ na tʋ̃ɔ́ ɩ a nãà dɩɛm. A dàa a nãà na tɩ ƴãw a bɛ tɩ ta sɛr ɛ,

²⁷ɛ́ a Daviir nɩ a ʋ nɩbɛ ìr cen tɩ zɛb'ɩ a Filisɩtɛ̃ mɩnɛ, kʋ nɩbɛ kɔbr ayi (200) a bɛ pʋɔ. A Daviir tɩ ŋma n a bɛ yɔnɔgamɛ wa ƴãw bɛ sɔr kʋ̀ a nãà, k'ʋʋ tʋ̃ɔ́ ɩ a ʋ dɩɛm. Lɛ n'a a Sawul tɩ kʋ̀ ʋ a ʋ pɔwyaa Mɩkal ʋ kul.

²⁸A Sawul na tɩ nyɛ̃ a sãá k'aa Sore be n a Daviir zie, nɩ k'aa ʋ pɔwyaa Mɩkal nɔnɛ nɩ a Daviir a,

²⁹ʋ tɩ lɛb'a bãw zɔrɛ a Daviir, ɛ́ tɩ lɩɛb'ɩ a ʋ dɔ̃ sob a nʋɔr kʋ.

³⁰A lɛn daar a, a Filisɩtɛ̃ mɩnɛ nɩ-bɛrɛ tɩ yi na kɛ́ bɛ zɛb'ɩ a Ɩsɩrayɛl nɩbɛ. Zɩ̃ k'aa zɛbr za pʋɔ a, a Daviir mɩ́ tɩ zɛb'a tʋ̃ɔ́ zuo a Sawul sojarɩ nɩ-bɛrɛ za na cɛ a, lɛ n'a a Daviir yúor tɩ yi yaga za.