Read Dagara, Northern 1 Samɩɛl 2 Bible Online

1 Samɩɛl 2 - Dagara, Northern bible

1 Samɩɛl 2

¹A Ana tɩ puor'a yel à ŋá: «A Sore n'ʋ so nʋ̃ɔ̀ ɩrɛ mɛ̃ yaga. A Sore n'ʋ so ɩ̃ zɛw zu, ɩ̃ na tʋ̃ɔ́ na ɩrɛ a ɩ̃ dɔ̃ dem laar. Ɩ̃ cɩlɛ na: a Naaŋmɩn sõw mɛ̃ na.

²A Sore bɛ tɛr ʋ tɔ ɩ, a tɩ Naaŋmɩn yõ n'ʋ ɩ Pìir. Naaŋmɩn bɛ be, a bɛ ɩ a ʋl yõ ɩ.

³Nyɩ ta ƴɛ̀rɛ pɔ̀l-ƴɛ̀rʋ pilpile nɩ ɛ, nyɔka-ƴɛ̀rʋ ta yi a nyɩ nʋɔrɩ́ ɛ, bʋ̃ʋ n'ʋ vɛ̃, a Sore ɩ n Naaŋmɩn na bãw bom za a, ʋ mɩ́ jɛl'ɩ a nɩsaalbɛ ɩ-ɩrɩ za.

⁴A gãdaar tamɛ kár'a, ɛ́ a bãbàalbɛ sɛ a kpɛnʋ mɛ̃ kpàwr a.

⁵A bɛlɩ dem na mɩ́ tɩ tɩw a dier'ɩ tome dipɛ̃-ŋmale ƴãw, ɛ́ a kɔ̃ dem pɩ̃ɛnɛ. A pɔw-ãan dɔwr'ɩ gb'a ayopõi, ɛ́ a bi-yaga mã bɛ cãà tɛr dɔwfʋ ɛ.

⁶A Sore n'ʋ ɩrɛ a nɩsaalbɛ kpiir ɛ́ ʋlɛ n'ʋ ɩrɛ bɛ vʋʋrɛ, ʋlɛ n'ʋ ɩrɛ bɛ siwr a kpɩmɛ tẽw, ɛ́ ʋlɛ n'ʋ ɩrɛ bɛ lɛb yire a be dúor waar.

⁷A Sore n'ʋ tɩrɛ a nã́w nɩ a naalʋ, ʋlɛ n'ʋ siwre, ɛ́ ʋlɛ n'ʋ mɩ̀ zɛwr.

⁸Ʋ mɩ́ nyɔw nɩ a bãbàal a tanɛ pʋɔ ʋ lɛb ìr, ɛ́ ír a nã́w sob a sagɛ pʋɔ, k'ʋʋ zɩɩlɩ bɛ na-mɩnɛ dà-kɔwr zu, bɛlɛ nɩ a nɩ-yée. A Sore so a tẽw za, ʋlɛ n'ʋ dɔwl'ʋ a ʋ kpule zu.

⁹A bɛlɩ dem na ƴãwnɛ ʋ a, ʋ mɩ́ gù n a bɛ nyɔ-vʋʋrʋ, ɛ́ a ɩ-fa-maalbɛ kpiir a lige pʋɔ. Bʋ̃ʋ n'ʋ vɛ̃, fãw bɛ n'a mɩ́ so a nɩsaal zɛb tʋ̃ɔ́ ɩ.

¹⁰A Sore dɔ̃ dem a, bɛ na ƴɛ́r bɛ na ŋmɛr, a bɛl ƴãw a, a Sore na be n a salom zu, ɛ́ gbiwre mɛ̃ saa a, bʋ̃ʋ n'ʋ vɛ̃, ʋlɛ n'ʋ dɩrɛ nɩ a tẽ-daa za a ƴɛ̀rʋ. Ʋ na ɩ n a ʋ nãà ʋ kpɛmɛ, ʋ na ɩ n a ʋ nɩ-kabra kpɛmɛ dɔwlɩ.»

¹¹A yele á ŋá pùorí, a Ɛlkana tɩ lɛb'a kul a ʋ yir a Arama. Ɛcɛ a bie tɩ tone nɩ a Sore tome a bàwr-maalɛ Eli niŋé.

¹²A Eli bidɛbr bɛ tɩ tɛr pɛr towtow ɛ, bɛ bɛ tɩ ŋmɛlɛ kaar a Sore ɩ.

¹³Bɛ na saa tɩ ɩ bàwr-maalbɛ a, nyɛ̃ lɛ bɛ na mɩ́ tɩ ɩrɛ a nɩbɛ zie a: nɩr mɩ́ wa cen bàwr maalʋ a, a bàwr-maalɛ tõ-tõ-bie mɩ́ tɩ tɛr'ɩ tɩr-jajaa na tɛr nyɩmɛ ata a, ƴãw a nũú taw ta n a nɛn na dʋwlɩ a pɛr.

¹⁴Ʋ mɩ́ tɩ tõ n a tɩr-jajaa a nɛn pʋɔ -- a sɩlba pʋɔ n'a o, a ziduwle pʋɔ n'a o, bɩɩ a lale pʋɔ n'a a -- ɛ́ bom nɛ za a tɩr-jajaa na cɔ̀r páw a, ʋ mɩ́ de ʋ na kʋ̀ a bàwr-maalɛ. À ŋá n'a a Eli bidɛbr tɩ ɩrɛ a Ɩsɩrayɛl nɩbɛ za na mɩ́ tɩ wa a Silo a zie.

¹⁵A mɩnɛ kãw mɩ̀, bɛ bɛ mɩ́ tɩ nyɩw[4] a nɛn-kãánɩ sɛr ɛ, ɛ́ a bàwr-maalɛ tõ-tõ-bie cen tɩ yel a sob nɛ na maalɛ a bàwr a: «Tɩr nɛn bɛ tɩ cɩ̃ɩ kʋ̀ a bàwr-maalɛ. Ʋ bɛ bɔbr a fʋ nɛn-bɩ̃ɩ ɛ, nɛn-kɛr'ʋ ʋ bɔbr.»

¹⁶A sob nɛ na maalɛ a bàwr a, wa yel: «Vɛ̃ bɛ nyɩw a nɛn-kãánɩ baarɩ, ɛ́ fʋ de al za fʋ na bɔbr a», ʋ mɩ́ yel'a: «Ʋ̃ʋ'hʋ̃! Kʋ̀ m a ƴɛrɛŋa, alɛ bɛ ɩ lɛ ɩ̃ na ír'a nɩ fãw!»

¹⁷À ŋá n'a a Eli bidɛbr yel-bier tɩ ɩ kpɛ̃ɛ bɛ tɛr tɛwr ɛ, a Sore niŋé, bʋ̃ʋ n'ʋ vɛ̃, bɛ bɛ tɩ ƴãwnɛ a bàwr de-kʋ̀b bome a nɩbɛ na tɩ kʋ̀rɛ a Sore a ɩ.

¹⁸A Samɩɛl na tɩ cãà ɩ pɔlbile a tɩ tone nɩ a ʋ tome a Sore niŋé. Lɛ̃ pɛn kparʋ n'ʋ ʋ mɩ́ tɩ su.

¹⁹Yome za, a Samɩɛl mã mɩ́ tɩ sɛ n kpar-kpɛ̃ɛle tɩ kʋ̀ a ʋ bidɛb, a lɛn daar ʋlɛ nɩ a ʋ sɩr na mɩ́ tɩ cen a Silo kɛ́ bɛ tɩ maalɩ a yome-za-bàwr kʋ̀ a Sore a.

²⁰A Eli mɩ́ tɩ ƴɛ̀r'ɩ nɔ-vla kʋ̀ a Ɛlkana nɩ a ʋ pɔw. Ʋ mɩ́ tɩ yel'a: «A Sore, ʋ sàw a pɔw ŋa dɔw nɩbɛ kʋ̀ b, lɩɛr'ɩ a ʋl ʋ na de kʋ̀ ʋ a.» Al pùorí, bɛ mɩ́ tɩ lɛb'a kul a Ɛlkana yir.

²¹A Sore tɩ maal'ɩ a Ana: ʋ tɩ tɛr'ɩ pʋɔ dɔw bidɛbr ata nɩ pɔwyaar ayi. A Samɩɛl ʋl na tɩ cãà ɩ pɔlbile a tɩ kɛrɛ nɩ a Sore niŋé.

²²A Eli tɩ kor'a tɩ kor. Ʋ tɩ wone na bɛ manɛ a lɛ a ʋ bidɛbr na tɩ ɩrɛ a Ɩsɩrayɛl nɩbɛ za zie a, ɛ́ mɩ̀ tɩ wõ kɛ́ bɛ ganɛ nɩ nɩ a pɔwbɛ na mɩ́ ɓã taa a tuor-taa pɛn-sɛw dɩ̃dɔrɩ́ a.

²³Lɛ n'a ʋ tɩ yel bɛ à ŋá: «Bʋ̃ʋ n'ʋ so nyɩ ɩrɛ à à ŋá? Ɩ̃ wone nɩ a faa a nɩbɛ za na yere a nyɩ ƴãw a.

²⁴Ɩ̃ bibiir i, nyɩ ta cãà ɩrɛ a lɛ ɩ! A nyɩ ƴɛ̀rʋ a Naaŋmɩn nɩ-bʋʋrɛ na ƴɛ̀rɛ ɩ̃ wone a, a bɛ maal'ɩ wob ɛ!

²⁵Nɩsaal wa sãw ʋ nɩsaal-tɔ a, Naaŋmɩn na bãw nɩ a sãwna sob. Ɛcɛ nɩsaal wa sãw Naaŋmɩn a, ãa n'ʋ na tʋ̃ɔ́ bãw a sãwna sob?» Ɛcɛ, bɛ bɛ tɩ bɛr wõ a bɛ sãà ƴɛ̀rʋ ɛ. A Sore tɩ sɩrɩ na yel k'aa fɛr'a kɛ́ bɛ kpi.

²⁶A Samɩɛl ʋl na tɩ cãà ɩ pɔlbile a, ʋ tɩ kɛrɛ na, ɛ́ ɩrɛ a pɛlɛ a Sore pʋɔ nɩ a nɩsaalbɛ pʋɔ.

²⁷Naaŋmɩn nɩr kãw tɩ wa na wa páw a Eli yel ʋ à ŋá: «À ŋá n'a a Sore yere: Ɩ̃ wul'ɩ ɩ̃ tʋɔra a fʋ sãàkʋm-kore, a lɛn daar bɛ na tɩ be a Faarawɔ̃ nuru pʋɔ a Eziptɩ a:

²⁸Ɩ̃ kaa na ír a fʋ sãàkʋm, a Ɩsɩrayɛl dɔwlʋ za pʋɔ, k'ɩ̃ɩ ɩ ʋ ɩ a ɩ̃ bàwr-maalɛ, maalɛ a bagɛ kʋ̀rɛ mɛ̃ a ɩ̃ bàwr-maal-kuur zu, nyɩwr a tɩ-suur-zɔ̃-na-nyùur-vla-vla-a, suur a bàwr-maal-kara nyãa-kpale[5] a ɩ̃ niŋé. Ɩ̃ kʋ̀ n a fʋ sãàkʋm a Ɩsɩrayɛl nɩbɛ de-kʋ̀b bome za.

²⁹Ɛ́ bʋ̃ʋ n'ʋ so nyɩ bɛ ƴãwnɛ a bàwr nɩ a de-kʋ̀b bome ɩ̃ na yel kɛ́ bɛ kʋ̀rɛ mɛ̃ a ɩ̃ kpɛb zie a? Bʋ̃ʋ n'ʋ so nyɩ 'wɔbr a ɩ̃ nɩ-bʋʋrɛ Ɩsɩrayɛl de-kʋ̀b bome nɛn-vɩɛlɩ 'wɔrɛ nɩ? Bʋ̃ʋ n'ʋ so fʋ ƴãwnɛ a fʋ bidɛbr zuo a mãa tɔr za?

³⁰A na ɩ à ŋá a, a mãa Sore, a Ɩsɩrayɛl Naaŋmɩn, à ŋá n'a ɩ̃ yere kʋ̀rɛ fʋ: ɩ̃ tɩ yel'a k'aa fʋ yir nɩbɛ nɩ a fʋ dɔwlʋ nɩbɛ mɔ̃ mɩ̀ na ɩ n a ɩ̃ bàwr-maalbɛ kʋralɛ. Ɛcɛ ƴɛrɛŋa a, mãa n'ʋ yere: lɛ bɛ cãà n'a ɩ. Bʋ̃ʋ n'ʋ vɛ̃, ɩ̃ ƴãwnɛ nɩ bɛlɩ dem na ƴãwnɛ mɛ̃ a, ɛ́ bɛlɩ dem na bɛ ƴãwnɛ mɛ̃ a, bɛ mɩ̀ kʋ̃ nyɛ̃ ƴãwfʋ ɛ.

³¹Ɩ̃ kʋ̃ yaa kɛ́ ír a fʋ yir nɩ a fʋ dɔwlʋ nɩ-kpɛn za ɩ, lɛ n'a dɛb-nyãw kʋ̃ cãà a fʋ yir pʋɔ ɩ.

³²Kʋralɛ n'a pʋl-vʋ̃ɔ na mɩ́ tɛr fʋ. Bom za na ɩrɛ nɩ vla a Ɩsɩrayɛl nɩ-bʋʋrɛ ƴãw, ɛcɛ a fʋ yir pʋɔ a, dɛb-nyãw kʋ̃ bãw be be ɩ.

³³Ɛcɛ, ɩ̃ na cãà na ƴãw a fʋ nɩr kãw ʋ pɩɛlɩ a ɩ̃ bàwr-maal-kuur, k'aa nyuur nɩ a tɩɛrʋ kʋ b. Ɛ́ a fʋ yir nɩbɛ za na cɛ a, bɛ na kpi n a bɛ pɔ̀lʋ daar.»

³⁴«A bãwfʋ n'ɩ a bom nɛ na na ta a fʋ bidɛbr ayi a, a Pɩnasɩ nɩ a Hɔfɩnɩ: bibi-been, bɛ na kpi n bɛ za ayi.

³⁵Al pùorí, ɩ̃ na kaa na ír bàwr-maalɛ na bɛ lɛbr pùor a, a ɩ̃ ƴãw. Ʋ na ɩrɛ nɩ lɛ za ɩ̃ na bɔbr a. Ɩ̃ na kʋ̀ ʋ nɩ nɩbɛ na ɩrɛ bàwr-maalbɛ lɩɛrɛ taa bɛ tɛr bɛ́rʋ a, bɛ pɩɛlɩ a ɩ̃ nɩ-kabra.

³⁶Lɛ n'a a fʋ yir nɩr na na cɛ a na mɩ́ cen tɩ lo gbĩ dume a bàwr-maalɛ pile, k'ʋʋ páw libi-cãpile bɩɩ dipɛ̃-ŋmale, ɛ́ yel ʋ à ŋá: “Ɩ̃ zɛlɛ fʋ na, kʋ̀ m tõ-nʋɔr kãw za, a bàwr-maalbɛ zie, ɩ̃ tʋ̃ɔ́ mɩ́ páw bʋ̃-dɩra dɩ”.»