Read Dagara, Northern 1 Samɩɛl 20 Bible Online

1 Samɩɛl 20 - Dagara, Northern bible

1 Samɩɛl 20

¹A Daviir tɩ yi n a Arama tẽw Nayɔtɩ, wa páw a Zonatã sowr'ʋ: «Bʋ̃ʋ n'ʋ ɩ̃ ɩ, a ɩ̃ sãwna n'ɩ buor, bɩɩ bʋ̃ʋ yel-bier'ʋ ɩ̃ maalɩ a fʋ sãà zie, ʋ bɔbr a ɩ̃ kʋb?»

²A Zonatã tɩ sɔw ʋ na: «A lɛ bɛ be za na ɩ ɛ! Fʋ kʋ̃ kpi ɛ. A ɩ̃ sãà bɛ ɩrɛ bom, ɛ́ bɛ dãw de niwn yel kʋ̀ m ɛ. Bʋnʋ ƴãw n'a ʋ na sɔwlɩ mɛ̃ a yel ŋa? A lɛ kʋ̃ ɩ ɛ!»

³A Daviir tɩ lɛb'a yel ʋ: «Mãa yel fʋ, à ŋá tɔr za n'a. A fʋ sãà bãwnɩ a nɩ vla vla fʋ na nɔnɛ mɛ̃ a, lɛ so ʋ tɩɛrɩ ʋ pʋɔ à ŋá: “A Zonatã, ʋ ta bãwnɩ a ɩ, alɛ bɛ ɩ lɛ, a na ɩ n kpɩɛrʋ a ʋ zie.” Ɛcɛ, ɩ̃ pɔ n nɩ a Sore na vʋʋrɛ a, nɩ a fʋ̃ʋ mɩŋa nyɔ-vʋʋrʋ, kũu bɔw nʋɔrɩ́ n'a ɩ̃ be!»

⁴A Zonatã tɩ yel'ɩ a Daviir: «Bom nɛ fʋ na bɔbr a, ɩ̃ na ɩ ʋ na kʋ̀ b.»

⁵A Daviir tɩ sɔw ʋ na: «Nyɛ̃, bio n'a a cuw-paala cuw dɩrɛ, a na fɛr k'ɩ̃ɩ zɩ̃ kɔw a nãà dɩ. Ɛcɛ kʋ̀ m sɔ́r, ɩ̃ na cen na tɩ sɔwlɩ a wɩ̀ɛ pʋɔ tɩ ta a zaanʋɔra.

⁶A fʋ sãà wa nyɛ̃ ɩ̃ bɛ ka be a, fʋ̃ʋ yel ʋ: “Daviir zɛlɩ nɩ sɔ́r k'ʋʋ siw a ʋ tẽw Bɛtɩlɛm, bʋ̃ʋ n'ʋ vɛ̃, bɛ maalɛ nɩ a yũon bàwr a ʋ dɔwlʋ za ƴãw.”

⁷A nãà wa yel: “A vɩɛl'a!” Fʋ̃ʋ bãw k'ɩ̃ɩ cɩ̃ɛ na. Ɛ́ ʋlɛ wa nyɛ̃ suur a, fʋ̃ʋ bãw k'ʋʋ bɔbr'ɩ a ɩ̃ kʋb.

⁸A lɛn daar a, fʋ̃ʋ ɩ a fʋ nɔ̃wfʋ ɩb na bɛ lɛbr pùor a, a ɩ̃ zie, bʋ̃ʋ n'ʋ vɛ̃, tɩ maal'ɩ báalʋ wõ-taa a Sore yúor ƴãw. Mɔ̃ mɩ̀, mãa wa sãw yel kãw ƴãw a, a fʋ̃ʋ mɩŋa, fʋ̃ʋ kʋ m, alɛ sa fʋ na na de m ƴãw a fʋ sãà nuru pʋɔ a.»

⁹A Zonatã tɩ yel'a: «A lɛ bɛ be za na ɩ ɛ! Mãa wõ k'aa ɩ̃ sãà sɩrɩ na bɔbr a fʋ kʋb a, ɩ̃ pɔ na k'ɩ̃ɩ na yel'a kʋ̀ b.»

¹⁰A Daviir tɩ sowr'ɩ a Zonatã: «A fʋ sãà wa sɔw nɩ kɔkɔr-kpɛ̃w a, ãa n'ʋ fʋ na tõ k'ʋ yel kʋ̀ m?»

¹¹A Zonatã tɩ sɔw ʋ na: «Wa tɩ yi yẽw!» Lɛ n'a bɛ tɩ tu taa yi a wɩ̀ɛ pʋɔ.

¹²A Zonatã tɩ yel'ɩ a Daviir: «A Sore, a Ɩsɩrayɛl Naaŋmɩn yúor ƴãw, mãa n'ʋ yere kʋ̀rɛ fʋ, a bio à ŋá tɔ won a, ɩ̃ na sowr'a bãw a ɩ̃ sãà pʋ-tɩɛrʋ a gb'a ata sob ƴãw. Ʋlɛ wa tɛr tɩɛr-vla a fʋ ƴãw, ɩ̃ɩ bɛ tõ bɛ yel kʋ̀ b a,

¹³a Sore, ʋ dɔwrɩ mɛ̃, ɛ́ lɛb dɔwrɩ ƴãw pʋɔ. A ɩ̃ sãà wa tɩɛrɩ a fʋ faa a, ɩ̃ na yel'a kʋ̀ b, ɛ́ fʋ na tɔl a cen zoomlɛ. A Sore, ʋ be a fʋ zie mɛ̃ ʋ na tɩ be a ɩ̃ sãà zie a.

¹⁴A pùorí, mãa wa cãà vʋʋrɛ a, fʋ̃ʋ ɩ a Sore nɔ̃wfʋ ɩb a ɩ̃ zie, ɩ̃ taa kpiir ɛ.

¹⁵Al pùorí a, cãà tɛr a nɔ̃wfʋ ɩb a ɩ̃ bʋ̃-dɔwrɩ zie, a Sore saa wa ɩ a fʋ dɔ̃ dem za bɔr been been a tẽw zu a.»

¹⁶Lɛ n'a a Zonatã tɩ maal'ɩ a Daviir nɩ a ʋ yir dem wõ-taa, yel: «A Sore na sowr'ɩ bom a Daviir, bɩɩ a ʋ dɔ̃ dem a yel ŋa ƴãw!»

¹⁷A Zonatã na tɩ nɔnɛ a Daviir a zũú, ʋ tɩ ƴãw na ʋ pɔ, bʋ̃ʋ n'ʋ vɛ̃, a Daviir tɩ nɔnɛ ʋ na mɛ̃ a ʋl mɩŋa a.

¹⁸A Zonatã tɩ yel ʋ na: «Bio n'ɩ a cuw-paala cuw dɩb. A fʋ zɩma zie na gã nɩ zawla, bɛ nyɛ̃ fʋ na bɛ ka be a.

¹⁹A deyere a, fʋ na siw nɩ fɔ̃w a be fʋ na daar sɔwlɩ a, tɩ zɩ̃ pɩɛlɩ a Ezɛl kʋsɩɛr.

²⁰Mãa a, ɩ̃ na jɩɛr'ɩ bʋ̃-kãw a be lowr, ɛ́ tɛ a pime ata á ŋá,

²¹al pùorí, ɩ̃ na tõ n dɛble, yel ʋ: “Cen tɩ bɔ a pime.” Ɛ́ mãa wa yel ʋ: “A pime n'ɩ al a fʋ niŋé, wob a wa n!” a, fʋ̃ʋ bãw kɛ́ bom bɛ ɩrɛ fʋ ɛ, fʋ̃ʋ ìr ɓãá ƴãw wa, ɩ̃ pɔ n nɩ a Sore na vʋʋrɛ a.

²²Ɛcɛ mãa wa yel ʋ: “A pime cãà na zãá nɩ fʋ” a, fʋ̃ʋ ìr cere, bʋ̃ʋ n'ʋ vɛ̃, a Sore n'ʋ na ƴãw fʋ cere.

²³Ɛ́ a báalʋ wõ-taa tɩ na maalɩ, mãa nɩ a fʋ̃ʋ a, a Sore be n a mãa nɩ a fʋ̃ʋ cará kʋralɛ.»

²⁴Lɛ n'a a Daviir tɩ cen a wɩ̀ɛ pʋɔ tɩ sɔwlɩ. A cuw-paala cuw bibir tɩ vɩɛ na, a nãà zɩ̃ a dɩb ƴãw.

²⁵Mɛ̃ a lɛ ʋ na ɩrɛ a kʋralɛ a, a nãà tɩ zɩ̃ n a ʋ da-kɔw zu, gbab a dacin. A sojarɩ nɩ-kpɛ̃ɛ, Avɩnɛɛr, tɩ zɩ̃ na kɔwlɩ ʋ, ɛ́ a Zonatã zɩ̃ tori ʋ, ɛcɛ a Daviir zɩma zie tɩ gã nɩ zawla.

²⁶A ʋlɩ bibir a, a Sawul bɛ tɩ ƴɛ̀r ƴɛ̀rʋ ɛ, ʋ tɩ tɩɛrɛ nɩ ʋ pʋɔ: «Yel-ura páw ʋ na. Bʋnʋ bɛ ka be ɩ, ʋ tɛr'ɩ dɛwr.»

²⁷Ɛcɛ a bio daarɩ́ a, a cuw-paala cuw bibie ayi sob, a Daviir zɩma zie tɩ cãà na gã zawla. A Sawul tɩ sowr'ɩ a ʋ bidɛb Zonatã: «Bʋ̃ʋ n'ʋ so a Zese bidɛb bɛ wa a dɩb zie, a zãa nɩ a dɩ̃a za?»

²⁸A Zonatã tɩ sɔw na: «A Daviir zɛlɩ mɛ̃ nɩ gb'aa ŋmɩn za, k'ʋʋ tʋ̃ɔ́ siw a Bɛtɩlɛm.

²⁹Ʋ yel mɛ̃ na: “Ɩ̃ zɛlɛ fʋ na, bɛr mɛ̃ ɩ̃ kul, bʋ̃ʋ n'ʋ vɛ̃, tɩ tɛr'ɩ yir bàwr-maal a tẽw pʋɔ, ɛ́ a ɩ̃ yɛb yel mɛ̃ k'ɩ̃ɩ ƴãw fãw wa. Fʋ̃ʋ wa nɔnɛ mɛ̃ a, fʋ̃ʋ sàw ɩ̃ zɔ cen tɩ nyɛ̃ a ɩ̃ nɩbɛ.” Alɛ n'a so ʋ na bɛ wa a nãà dɩb zie a.»

³⁰Lɛ n'a a Sawul tɩ nyɛ̃ nɩ a Zonatã suur ɛ́ yel ʋ: «Pɔw-yʋɔra bie ŋa! Ɩ̃ bãwnɩ a na fʋ na nɔnɛ a Zese bidɛb a, fʋ̃ʋ nɩ a fʋ mã vĩ n'a!

³¹Bʋ̃ʋ n'ʋ vɛ̃, a lɛn daar za a Zese bidɛb na na vʋʋrɛ a tẽw zu a, fʋ kʋ̃ tʋ̃ɔ́ tɛr fãw ɛ, ɛ́ a fʋ naalʋ mɩ̀ kʋ̃ àr ɛ. Lɛ so, ƴãw bɛ nyɔw ʋ wa kʋ̀ m, ʋ sɛwnɩ nɩ kũu.»

³²A Zonatã tɩ sɔw nɩ a ʋ sãà: «Bʋ̃ʋ n'ʋ so a na fɛr k'ʋʋ kpi? Bʋ̃ʋ n'ʋ ʋ ɩ?»

³³A Sawul tɩ zɛw nɩ a kafin k'ʋʋ cɔr'ɩ ʋ. Lɛ n'a a Zonatã tɩ bãw k'aa ʋ sãà sɩrɩ na bɔbr a Daviir kʋb.

³⁴A Zonatã tɩ nyɛ̃ nɩ suur pi kɔkɛɛ, ìr'ɩ a dɩb zie. A cuw-paala bibie ayi sob ŋa a, ʋ bɛ tɩ dɩ bom za ɩ, bʋ̃ʋ n'ʋ vɛ̃, pʋ-sãwna tɩ tɛr ʋ nɩ yaga za, a Daviir ƴãw, a ʋ sãà na tɩ tʋ a Daviir zʋm-faa a zũú.

³⁵A bio daarɩ́ biɓaara a, a Zonatã tɩ cen nɩ a wɩ̀ɛ pʋɔ, a be ʋlɛ nɩ a Daviir na tɩ wõ taa a. Dɛble kãw tɩ bɩɛlɛ ʋ na.

³⁶Ʋ tɩ yel'ɩ a dɛble: «Zɔ cen tɩ bɔ a pime ɩ̃ na na tɛ a.» A dɛble tɩ zɔ na cen, ɛ́ a Zonatã tɛ a pĩi ʋ tɩ zuo ʋ bɛr.

³⁷A dɛble tɩ ta n a be a Zonatã na tɛ a pĩi ʋ tɩ lo a, ɛ́ a Zonatã tanɩ a pùorí yel ʋ: «A pĩi bɛ cãà be fʋ nidaa a ɩ?

³⁸Paw fɔ̃w, taa àrɛ ɩ!» A Zonatã dɛble tɩ ɓáw nɩ a pĩi lɛb wa n a ʋ nɩ-kpɛ̃ɛ zie.

³⁹Ʋ bɛ tɩ bãw kɛ́ yel ɩrɛ na ɩ, ɛcɛ a Zonatã nɩ a Daviir tɩ bãwnɩ a na.

⁴⁰A Zonatã tɩ kʋ̀ n a ʋ tam nɩ a pime a ʋ dɛble, ɛ́ yel ʋ: «De a kul'ɩ a tẽw pʋɔ.»

⁴¹Lɛ n'a a dɛble tɩ lɛb kul, ɛ́ a Daviir yi a ʋ sɔwlʋ zie, a saa-pɛrɩ́-dʋrʋ-lowr. Ʋ tɩ gũu na tɩ tɔ tẽw gb'aa ata a Zonatã niŋé. Bɛ tɩ nyɔw nɩ taa weri kone nɩ marmarmar.

⁴²Al pùorí, a Zonatã tɩ yel'ɩ a Daviir: «Cere nɩ ƴã-ɓaarʋ. Tɩ pɔ n a Sore yúor ƴãw baarɩ yel à ŋá: “A Sore, ʋ be mãa nɩ a fʋ̃ʋ cara pʋɔ, ʋ be a fʋ bʋ̃-dɔwrɩ nɩ a ɩ̃ bʋ̃-dɔwrɩ cara pʋɔ kʋralɛ.”»