Read Dagara, Northern 1 Samɩɛl 22 Bible Online

1 Samɩɛl 22 - Dagara, Northern bible

1 Samɩɛl 22

¹A Daviir tɩ yi n a be, ɛ́ zɔ cen tɩ sɔwlɩ a Adulam tãw bɔw pʋɔ. A ʋ yɛbr nɩ a ʋ sãà yir nɩbɛ tɩ wõ a na, ɛ́ siw tɩ páw ʋ a be.

²Lɛ n'a a nɩbɛ bɛl za a na tɩ fɛrɛ a, tɩ ɓã taa a ʋ zie, bɛl za na tɩ tɛr samɛ a, bɛl za nʋ̃ɔ̀ na bɛ tɩ kpɩɛr a, bɛ tɩ faar'a na ta nɩbɛ kɔbr anaar (400). Bɛ tɩ ɓã n taa a ʋ zie, ɛ́ ʋ ɩ a bɛ nɩ-kpɛ̃ɛ.

³A Daviir tɩ yi n a Adulam, ɛ́ cen Mowab tẽw Misɩpe. Ʋ tɩ yel'ɩ a Mowab tẽw nãà: «Sàw a ɩ̃ sãà nɩ a ɩ̃ mã wa kpɩɛr a fʋ zie, ɛ́ gù ɩ̃ tɩ bãw bom nɛ a Naaŋmɩn na bɔbr k'ʋʋ ɩ m a.»

⁴Ʋ tɩ tɛr bɛ na cen nɩ a Mowab tẽw nãà zie, bɛ tɩ kpɩɛr a ʋ zie, a lɛn daar za a Daviir na tɩ be a ʋ sɔwlʋ zie a.

⁵Bibir kãw, a naaŋmɩn-ƴɛ̀r-manɛ Gadɩ tɩ yel'ɩ a Daviir: «Ta cãà be a fʋ sɔwlʋ zie ɩ, lɛb cen a Zuda tẽw.» Lɛ n'a a Daviir tɩ yi a be cen tɩ be a Hɛrɛtɩ tuw pʋɔ.

⁶A Sawul tɩ wõ na kɛ́ bɛ nyɛ̃ nɩ a Daviir nɩ a ʋ taabɛ. Givea tãw zu n'a ʋ tɩ be a lɛn daar, zɩ̃ tamarisɩ tɩɛ ɓaarʋ́, ɛ́ ƴãw a ʋ kafin a nũú, ɛ́ a ʋ tõ-tõ-biir za àr kɔw ʋ.

⁷A Sawul tɩ yel'ɩ a ʋ tõ-tõ-biir na tɩ àr kɔw ʋ a: «Nyɩ bɛrɛ wone vla, Bɛ̃zamɛ nɩbɛ ɛ! A Zese bidɛb[36] mɩ̀ na tʋ̃ɔ́ na kʋ̀ nyɩ za wɛrʋ nɩ divɛ̃ tɩɩr póru mɛ̃ a mãa a? Ʋ na sàw na ƴãw nyɩ za ɩ sojarɩ túre bɩɩ sojarɩ-kɔbr nɩ-bɛrɛ ɛ?

⁸Ɛ́ bʋ̃ʋ n'ʋ so nyɩ bʋ taa nyɩ za a ɩ̃ ƴãw? A ɩ̃ bidɛb nɩ a Zese bidɛb na maalɩ báalʋ wõ-taa a, nɩr za bɛ yel yel kʋ̀ m ɛ, a ɩ̃ bidɛb na bɛlɩ a ɩ̃ tõ-tõ-bie ƴãw ʋ ƴãwnɛ mɛ̃ bɛrɩ, mɛ̃ a dɩ̃a a, nyɩ kãw za bɛ nɔnɛ k'ʋʋ ƴɛ̀r ƴɛ̀rʋ kʋ̀ m ɛ.»

⁹A Edɔm tẽw dɔɔ Dowɛgɩ na tɩ pʋɔ a Sawul tõ-tõ-biir pʋɔ àr a, tɩ sɔw na: «Bibir kãw ɩ̃ tɩ nyɛ̃ nɩ a Zese bidɛb ʋ ta a Nɔvʋ tẽw, a Ahituvʋ bidɛb Ahimelɛkɩ zie.

¹⁰A Ahimelɛkɩ tɩ sowr'ɩ a Sore kʋ̀ ʋ, ɛ́ kʋ̀ ʋ bʋ̃-dɩrɩ, ɛ́ de a Filisɩtɛ̃ dɔɔ Golɩatɩ zɛbr-sɔ-kpɛ̃ɛ kʋ̀ ʋ.»

¹¹Lɛ n'a a nãà tɩ ƴãw bɛ tɩ bʋɔlɩ a Ahituvʋ bidɛb Ahimelɛkɩ na ɩ a bàwr-maalɛ a, nɩ a ʋ yir dem za na tɩ ɩ bàwr-maalbɛ a Nɔvʋ tẽw a. Bɛ za tɩ wa n a nãà zie.

¹²A Sawul tɩ yel'ɩ a Ahimelɛkɩ: «Ahituvʋ bidɛb i, bɛrɛ wone vla.» Ʋ sɔw: «Mãa n'ɩ ŋan, ɩ̃ nãà a.»

¹³A Sawul tɩ lɛb'a yel: «Bʋ̃ʋ n'ʋ so, fʋ̃ʋ nɩ a Zese bidɛb bʋ taa a ɩ̃ ƴãw? Fʋ kʋ̀ ʋ nɩ bʋ̃-dɩrɩ nɩ zɛbr-sɔ-kpɛ̃ɛ, fʋ sowr'ɩ a Naaŋmɩn kʋ̀ ʋ, k'ʋʋ tʋ̃ɔ́ ìr a ɩ̃ ƴãw ƴãwnɛ mɛ̃ bɛrɩ, mɛ̃ a dɩ̃a a.»

¹⁴A Ahimelɛkɩ tɩ sɔw nɩ a nãà: «A fʋ tõ-tõ-biir za pʋɔ a, kãw be n be fʋ de a ʋ yele man a Daviir i? Fʋ dɩɛm'ʋ, ʋʋ lɩɛb'ɩ a soja ʋl na gùre fʋ bɛ yire pùor a. A fʋ yir pʋɔ a, nɩr za ƴãwnɛ ʋ na.

¹⁵A ʋlɩ bibir yõ bɛ n'a ɩ̃ sowri a Naaŋmɩn[37] kʋ̀ ʋ ɛ. Ɩ̃ na na bʋ taa nɩ nɩr a fʋ ƴãw a, a tɩɛrʋ ŋa, ʋ zãá nɩ mɛ̃. Ta tɩ́ɛrɛ kɛ́ tɩɩm so yel ɛ, a mãa bɩɩ a ɩ̃ yir nɩr kãw ɛ. Ɩ̃ sɩrɩ bɛ tɩ bãw kɛ́ yel ɩrɛ na ɩ.»

¹⁶A nãà tɩ yel'a: «Ahimelɛkɩ i, fʋ na kpi na, fʋ̃ʋ nɩ a fʋ yir dem za.»

¹⁷Al pùorí, a nãà tɩ yel'ɩ a sojarɩ na gùre ʋ ɛ́ tɩ àr kɔw ʋ a: «Nyɩ lɩɛb kʋ a Sore bàwr-maalbɛ, bʋ̃ʋ n'ʋ vɛ̃, a bɛl mɩ̀ sõw nɩ a Daviir. Bɛ tɩ bãwnɩ a na ʋ na zɔrɛ a, ɛ́ bɛ yel yel kʋ̀ m ɛ.» Ɛcɛ a sojarɩ na tɩ gùre a nãà a bɛ tɩ sàw zɛw nũu tɔ n a Sore bàwr-maalbɛ ɩ.

¹⁸Lɛ n'a a nãà tɩ yel a Edɔm tẽw dɔɔ Dowɛgɩ: «A fʋ̃ʋ, lɩɛb kʋ a bàwr-maalbɛ bɛ ŋa.» A Edɔm tẽw dɔɔ Dowɛgɩ tɩ lɩɛb'a kʋ a bàwr-maalbɛ. A ʋlɩ bibir a, ʋ tɩ kʋ na ta nɩbɛ lɩz'a anaar'ɩ anũu na tɩ tɛr sɔ́r suur a bàwr-maalbɛ kpar-son a.

¹⁹A bàwr-maalbɛ bɛ ŋa tẽw a Nɔvʋ a, a Sawul tɩ ƴãw na bɛ kʋ a nɩbɛ bɛ dɩ vuo ɩ, a dɛbr, a pɔwbɛ, a bibiir, a bi-pɩɩlɛ, tɩ lãwnɩ a nĩi, a bòn, a píir nɩ a bʋʋr.

²⁰A Ahituvʋ bidɛb Ahimelɛkɩ bidɛb-been kãw yõ n'ʋ tɩ zɔ cɩ̃ɛ. Ʋ tɩ dɩ na kɛ́ Abɩataar. Ʋ tɩ zɔ na cen tɩ páw a Daviir.

²¹Ʋ tɩ yel'a kʋ̀ a Daviir k'aa Sawul kʋ n a Sore bàwr-maalbɛ.

²²A Daviir tɩ yel'ɩ a Abɩataar: «Ɩ̃ daar bãwnɩ a na a Edɔm tẽw dɔɔ Dowɛgɩ na be a be a, ɛ́ bãwnɩ a ʋ na na tɩ manɩ a za kʋ̀ a Sawul a. A na ɩ à ŋá a, mãa n'ʋ so a fʋ nɩbɛ za kũu.

²³Ƴɛrɛŋa a, be a ɩ̃ zie ka, bɛr dɛ̃bɩ̃ɛ: nɩr wa bɔbr fʋ kʋb a, a ʋ sob bɔbr'ɩ a ɩ̃ kʋb. A ɩ̃ zie ka a, bom bɛ damnɛ fʋ ɛ.»