Read Dagara, Northern 1 Samɩɛl 24 Bible Online

1 Samɩɛl 24 - Dagara, Northern bible

1 Samɩɛl 24

¹A Daviir tɩ yi n a be, ɛ́ cen tɩ be a Ɛɩn-Gedi pie pʋɔ.

²A Sawul na tɩ diw a Filisɩtɛ̃ mɩnɛ baarɩ, ɛ́ lɛb wa a, bɛ tɩ yel'ɩ à ŋá kʋ̀ ʋ: «Ƴɛrɛŋa a, a Daviir be n a Ɛɩn-Gedi wɛja-kpalɛ pʋɔ.»

³A Sawul tɩ kaa na ír nɩbɛ túr ata (3 000) na ɩ gãdaar a, a Ɩsɩrayɛl zɛbr-nɩbɛ za pʋɔ, cen nɩ a Daviir nɩ a ʋ nɩbɛ na tɩ be zie kãw na tori a tan pʋɔ bʋʋr pìir a bɔb.

⁴A Sawul na tɩ tɔlɛ a píir zawr al na lanɩ a sɔ́r a ƴãw a, ʋ tɩ nyɛ̃ nɩ tãw bɔw kãw kpɛ a ʋ pʋɔ k'ʋʋ dɔm bãjɩra. Zɩ̃ k'aa Daviir nɩ a ʋ nɩbɛ tɩ be n a tãw bɔw pʋ̃ɔmɩ za.

⁵A Daviir nɩbɛ tɩ yel ʋ na: «A Sore tɩ yel'a kʋ̀ b à ŋá: “Ɩ̃ na ƴãw nɩ a fʋ dɔ̃ sob a fʋ nuru pʋɔ, fʋ na ɩ ʋ nɩ lɛ za fʋ na bɔbr a.” A bibir ʋl n'ɩ ŋa a dɩ̃a.» A Daviir tɩ ìr'a sɔwlɩ cen tɩ ŋmãa a Sawul kpar-kpɛ̃ɛ nʋɔr zie kãw.

⁶Ɛcɛ ʋ na tɩ ŋmãa a kparʋ nʋɔr wa baarɩ a, pʋ̀lá tɩ vʋ̃ɔ ʋ nɩ yaga.

⁷Ʋ tɩ yel'ɩ a ʋ nɩbɛ: «A Sore taa sàwr ɩ̃ wa tʋɔr a ɩ̃ nɩ-kpɛ̃ɛ, mɛ̃ a lɛ nyɩ na yere kʋ̀rɛ mɛ̃ a ɩ, bʋ̃ʋ n'ʋ vɛ̃, a Sore nɩ-kabra n'ʋ.»

⁸À ŋá n'a ʋ tɩ ƴɛ̀r piw nɩ a ʋ nɩbɛ sɔ́r, bɛ bɛ lo nyɔw a Sawul ɛ. A Sawul tɩ ìr'a yi a tãw bɔw pʋɔ lo ʋ sɔ́r cere.

⁹A bɛ tɩ kɔwrɩ ɛ, ɛ́ a Daviir mɩ̀ ìr yi tu ʋ, ɛ́ cɩɩrɩ yel ʋ à ŋá: «Nãà ɩ̃ sore e!» A Sawul tɩ lɩɛb'a jɩ́r kaa. A Daviir tɩ gũu na tɩ tɔ tẽw nɩ ƴãwfʋ,

¹⁰ɛ́ yel a Sawul: «Bʋ̃ʋ n'ʋ so fʋ bɛrɛ wone a nɩbɛ bɛl na yere k'ɩ̃ɩ bɔbr fʋ nɩ faa a?

¹¹A dɩ̃a a, fʋ mɩŋa za nyɛ̃ a na nɩ fʋ mimir, k'aa Sore tɩ de b'a ƴãw a ɩ̃ nuru pʋɔ a tãw bɔw ŋa pʋɔ. Bɛ tɩ yel k'ɩ̃ɩ kʋ b, ɛcɛ ɩ̃ zɔ n fʋ nɩbaalʋ ɛ́ yel: “Ɩ̃ bɛ zɛwr nũu tʋɔr'ɩ a ɩ̃ nãà ɩ, bʋ̃ʋ n'ʋ vɛ̃, a Sore nɩ-kabra n'ʋ.”

¹²Ɩ̃ sãà a, nyɛ̃, jɩ́r nyɛ̃ bom nɛ ɩ̃ na ƴãw a ɩ̃ nũú a: a fʋ kparʋ nʋɔr zie kãw n'ʋ! Ɩ̃ na tʋ̃ɔ́ ŋmãa a fʋ kparʋ nʋɔr zie kãw, ɛ́ bɛ kʋ b a, pãa bãw k'ɩ̃ɩ bɛ tɩɛrɛ faa a fʋ ƴãw ɛ, mɩ̀ bɛ lɛb gaarɛ a fʋ zie ɩ. Fʋ mɩŋa za nyɛ̃ a na, ɩ̃ bɛ sãw fʋ yel kãw za ƴãw ɛ. Fʋ̃ʋ n'ʋ diwr mɛ̃ bɔbr a ɩ̃ kʋb.

¹³A Sore, ʋ bãw mãa nɩ a fʋ̃ʋ yele. Ʋ dɔwrɩ fʋ yáa a dɔwrʋ fʋ na dɔwrɩ mɛ̃ a san, ɛcɛ mãa a, ɩ̃ bɛ zɛwr nũu tʋɔr'ɩ fʋ ɛ.

¹⁴Mɛ̃ a lɛ a koro za zʋkpar na yel a: “Nɩ-faar zie n'a a nɩ-fa-ɩb yire.” Ɛcɛ mãa a, ɩ̃ bɛ zɛwr nũu tʋɔr'ɩ fʋ ɛ.

¹⁵Ãa ƴãw n'a a Ɩsɩrayɛl nãà ŋmãa a wɩ̀ɛ? Ãa n'ʋ fʋ diwr? Mãa n'ʋ, mãa na ɩ mɛ̃ bà-kũu a, mɛ̃ ciib a!

¹⁶A na ŋmɛ̃ à ŋá a, a Sore n'ʋ na bãw mãa nɩ a fʋ̃ʋ dem. Ʋ jɛl bãw, ɛ́ kpɛ m, ʋ faa mɛ̃ a fʋ nuru pʋɔ wul a ɩ̃ yel-mɩnʋ.»

¹⁷A Daviir na tɩ ƴɛ̀r a Sawul zie à à ŋá baar'a, a Sawul tɩ sowr'ʋ na: «Ɩ̃ bie Daviir i, fʋ̃ʋ n'ʋ sɩrɩ ƴɛ̀rɛ a ɩ̃ zie e?» Ɛ́ tɩ vaa kɔkɔr kone.

¹⁸Al pùorí, ʋ tɩ yel'ɩ a Daviir: «A fʋ dem de na zuo a mãa dem, bʋ̃ʋ n'ʋ vɛ̃, mãa maalɩ fʋ nɩ faa, ɛ́ fʋ̃ʋ nɩ̃ɛ maalɩ mɛ̃ vla.

¹⁹Fʋ wul mɛ̃ nɩ a fʋ nɔ̃wfʋ ɩb a dɩ̃a. Sɩza n'a, a Sore tɩ ƴãw mɛ̃ nɩ a fʋ nũú, ɛcɛ fʋ bɛ kʋ m ɛ.

²⁰Ãa dãw ùr a ʋ dɔ̃ sob, ɛ́ bɛr ʋ ʋ cere nɩ ƴã-ɓaarʋ? A Sore, ʋ kʋ̀ b bʋ̃-kãw a ɩ-vla ŋa fʋ na ɩ kʋ̀ m a dɩ̃a a ƴãw.

²¹Ƴɛrɛŋa a, ɩ̃ pãa bãwnɩ a na, bibir kãw, fʋ na ɩ n a nãà, ɛ́ a Ɩsɩrayɛl naalʋ-dɩb na be n a fʋ nũú.

²²Ƴɛrɛŋa a, pɔ n a Sore kɛ́ fʋ kʋ̃ kʋ a ɩ̃ bʋʋrɛ pàw pɛr, ƴãw bɛ yiiri mãa nɩ a ɩ̃ yir dem yele a ɩ̃ kũu pùorí ɛ.»

²³A Daviir tɩ pɔ na. Al pùorí, a Sawul tɩ lɛb'a kul, ɛ́ a Daviir nɩ a ʋ nɩbɛ lɛb do a bɛ sɔwlʋ zie.