Read Dagara, Northern 1 Samɩɛl 26 Bible Online

1 Samɩɛl 26 - Dagara, Northern bible

1 Samɩɛl 26

¹A Zifɩ tẽw nɩbɛ tɩ cen na tɩ páw a Sawul a Givea, yel ʋ à ŋá: «Fʋ nɔ̃w bɛ bãw k'aa Daviir sɔwl'ɩ a Hakila tãw zu, a ʋl na tori a zi-tɩ̃tal-kpalɛ a ɩ?»

²Lɛ n'a a Sawul tɩ ír sojarɩ túr ata (3 000) na ɩ gãdaar a, a Ɩsɩrayɛl sojarɩ pʋɔ, cen nɩ a Zifɩ wɛja-kpalɛ pʋɔ, k'ʋʋ tɩ bɔ n a Daviir.

³A Sawul laɩ tɩ be n a Hakila tãw zu, tori a tɩ̃tal, a sɔ́r nʋɔr. A Daviir tɩ be n a wɛja-kpalɛ pʋɔ, ɛ́ wõ k'aa Sawul waar'ɩ a be, k'ʋʋ wa diw nyɔw ʋ.

⁴A Daviir tɩ tõ n nɩbɛ bɛ tɩ sowri a yele bãw, à ŋá n'a ʋ tɩ sɩrɩ bãw k'aa Sawul ta na.

⁵A Daviir tɩ ìr'a cen a be a Sawul laɩ na tɩ be a. Ʋ tɩ jɩ́r'a nyɛ̃ a be tɔr za a Sawul nɩ a ʋ sojarɩ nɩ-kpɛ̃ɛ, a Nɛɛr bidɛb, Avɩnɛɛr, na tɩ gã a. A Sawul tɩ gã nɩ a laɩ sɔwlɩsɔw, ɛ́ a sojarɩ za ŋmãa viiri koli ʋ.

⁶A Daviir tɩ bʋɔl'ɩ a Hititɩ dɔɔ, Ahimelɛkɩ, nɩ Avɩsaɩ na ɩ Zowab yɛb ɛ́ a mã tɩ dɩ kɛ́ Seruya a, tɩ sowri bɛ: «A nyɩ buor sob'ʋ na páw mɛ̃ tɩ siw a Sawul laɩ pʋɔ?» A Avɩsaɩ tɩ sɔw na: «Mãa na páw fʋ na tɩ siw.»

⁷A tɩ̃ɩsɔw a, a Daviir nɩ a Avɩsaɩ tɩ ta n a Sawul sojarɩ laɩ pʋɔ: a Sawul tɩ gã nɩ a laɩ sɔwlɩsɔw gúre, ɛ́ a ʋ kafin ba a tẽw a ʋ zu-sɔw. A Avɩnɛɛr nɩ a sojarɩ tɩ ŋmãa na viiri koli ʋ gúre.

⁸A Avɩsaɩ tɩ yel'ɩ a Daviir à ŋá: «A dɩ̃a tɩ̃ɩsɔw a, a Naaŋmɩn ƴãw nɩ a fʋ dɔ̃ sob a fʋ nuru pʋɔ. Sàw ɩ̃ cɔ̀r ʋ gbem'ɩ a tẽw gb'a-been nɩ a ʋ kafin, ɩ̃ bɛ cɔ̀rɛ ʋ gb'a ayi ɛ.»

⁹A Daviir tɩ sɔw nɩ a Avɩsaɩ: «Taa kʋrɛ ʋ ɛ! Ãa n'ʋ na tʋ̃ɔ́ zɛw nũu tɔ n a Sore nɩ-kabra ɛ́ bɛ nyɛ̃ dɔwrʋ?

¹⁰A Sore na vʋʋrɛ a yúor ƴãw, ɩ̃ yere na kʋ̀rɛ fʋ, a Sore mɩŋa n'ʋ na ɩ a ʋ nyɔ-vʋʋrʋ baarɩ, a ʋ daar wa ta a, bɩɩ zɛbr zie n'a ʋ na kpi.

¹¹Ɛcɛ a Sore taa sàwr ɩ̃ wa zɛwr nũu tʋɔr'ɩ a ʋ nɩ-kabra ɩ! Ɩ tɩ de a kafin a ʋ zu-sɔw, nɩ a kʋ̃ɔ kʋɔr cere nɩ, ɛ́ bɛr ʋ.»

¹²A Daviir tɩ ɓáw nɩ a kafin nɩ a kʋ̃ɔ kʋɔr na tɩ be a Sawul zu-sɔw a, bɛ tɔl cen nɩ. Nɩr bɛ tɩ nyɛ̃ bom ɛ, nɩr bɛ tɩ bãw kɛ́ bom ɩ na ɩ, nɩr bɛ tɩ zaw ìr ɛ, bɛ za tɩ gúre na. A Sore tɩ ɩ na bɛ gúr kpalɩtam.

¹³A Daviir tɩ gãw nɩ a fʋɔla gãwn ŋa lowr, tɩ do àr a tãw nyʋɔrɩ́, zãá. Ʋlɛ nɩ a Sawul laɩ tɩ zãá nɩ taa yaga.

¹⁴A Daviir tɩ lɩɛb'ɩ a niwn cɔw a sojarɩ nɩ a Nɛɛr bidɛb, Avɩnɛɛr, ɛ́ cɩɩrɩ yel à ŋá: «Avɩnɛɛr i, sɔw mɛ̃!» A Avɩnɛɛr tɩ sɔw na: «Ãa n'ʋ sàw kpole a nãà tobe à ŋá?»

¹⁵A Daviir lɛb yel a Avɩnɛɛr: «Mɛ̃ dɛb taa nɛ b, ɛ́ fʋ bɛ tɛr fʋ tɔ a Ɩsɩrayɛl tẽw ɛ. Bʋ̃ʋ n'ʋ so fʋ bɛ gù a nãà, a fʋ nɩ-kpɛ̃ɛ, vla? Nɩr kãw tɩ wa n a nãà na ɩ a fʋ nɩ-kpɛ̃ɛ a kʋb.

¹⁶A lɛ fʋ na ɩ a, a bɛ vɩɛl ɛ. A Sore na vʋʋrɛ a yúor ƴãw, nyɩ sɛwnɩ nɩ kũu, nyɩ na bɛ gù a nyɩ nɩ-kpɛ̃ɛ vla a, a Sore nɩ-kabra. Jɩ́r nyɛ̃, a nãà kafin nɩ a kʋ̃ɔ kʋɔr na tɩ be a ʋ zu-sɔw a, a ɩ n ŋmɩn?»

¹⁷A Sawul tɩ wõ n a Daviir kɔkɔr bãw, ɛ́ yel: «Ɩ̃ bie Daviir i, fʋ̃ʋ n'ʋ sɩrɩ ƴɛ̀rɛ nɩ mɛ̃ ɛ?» A Daviir sɔw: «Ɩ̃ sore, ɩ̃ nãà a, mãa mɩŋa n'ʋ.»

¹⁸Ʋ tɩ yel'a ƴãw pʋɔ: «Bʋ̃ʋ n'ʋ so a ɩ̃ sore diwr mɛ̃? Bʋ̃ʋ n'ʋ ɩ̃ pãa ɩ a? Ɛ́ bʋ̃ʋ n'ʋ ɩ̃ sãw?

¹⁹Ƴɛrɛŋa a, ɩ̃ zɛlɛ na k'aa nãà, ɩ̃ sore, sàw bɛr wõ a ɩ̃ ƴɛ̀rʋ: a Sore wa n'ʋ ƴãw fʋ ìr a ɩ̃ ƴãw a, ʋ sàw de-kʋ̀b bom na nyuur vla vla a. Ɛ́ alɛ wa ɩ nɩbɛ nɛbɛ a, a Sore ʋ ŋmɛ ƴãw bɛ, bɛ na diw mɛ̃ a dɩ̃a, ɛ́ ír mɛ̃ bɛr a tẽw a Sore na kʋ̀ a ʋ nɩ-bʋʋrɛ a pʋɔ a. A ɩ na mɛ̃ bɛ yel mɛ̃ na: “Cen tɩ maalɛ ŋmɩn-yoru!” a

²⁰Ɛcɛ mãa a, ɩ̃ bɛ bɔbr k'ɩ̃ɩ kpi zãá nɩ a Sore ɩ. Bʋ̃ʋ n'ʋ so, a Ɩsɩrayɛl nãà ìr'a ŋmãa wɩ̀ɛ a ɩ̃ ƴãw, mãa ciib tɔtɔ? Bʋ̃ʋ n'ʋ so ʋ diwr mɛ̃, mɛ̃ a lɛ bɛ na mɩ́ diwr kɔrnyɛ̃ tan pʋɔ a?»

²¹A Sawul tɩ yel'a: «Ɩ̃ maal'ɩ yel-bier! Ɩ̃ bie Daviir i, lɛb wa, ɩ̃ bɛ lɛb be za na maalɩ fʋ faa ɩ, fʋ na nyɛ̃ a ɩ̃ nyɔ-vʋʋrʋ ʋ ɩ bʋ̃-sɩza a dɩ̃a a ƴãw. Dãbol-ɩb'a ɩ̃ ɩ, ɩ̃ tuli na bɛ dɩ vuo ɩ.»

²²A Daviir tɩ sɔw na: «A nãà kafin n'ɩ ŋan, soja kãw, ʋ gãw wa de.

²³A Sore, ʋ mɩ́ ya ŋa za man nɩ a lɛ a sob na ɩ a vla nɩ a ʋ pʋɔ za a. A Sore tɩ ƴãw fʋ nɩ a ɩ̃ nuru pʋɔ a dɩ̃a, ɛcɛ ɩ̃ zawr'a na zɛw nũu tɔ n fʋ, fʋ na ɩ a Sore nɩ-kabra a ƴãw.

²⁴A fʋ nyɔ-vʋʋrʋ na ɩ bʋ̃-sɩza a ɩ̃ zie a dɩ̃a a, a ɩ̃ nyɔ-vʋʋrʋ, ʋ mɩ̀ ɩ a lɛ a Sore zie, ʋʋ faa mɛ̃ kpɩɛrʋ za pʋɔ.»

²⁵A Sawul tɩ yel'ɩ a Daviir: «Ɩ̃ bie Daviir i, a Sore, ʋ maalɩ fʋ! Fʋ na tõ n tõ-bɛrɛ, ɛ́ fʋ na tʋ̃ɔ́ nɩ bom za ɩ vla, bʋnʋ bɛ ka be ɩ.» A Daviir tɩ tɔl'a cen, ɛ́ a Sawul lɛb kul.