Read Dagara, Northern 1 Samɩɛl 27 Bible Online

1 Samɩɛl 27 - Dagara, Northern bible

1 Samɩɛl 27

¹A Daviir tɩ tɩɛr'ɩ ʋ pʋɔ yel à ŋá: «Bibir kãw, a Sawul na ɩrɛ na cãà wa kʋ m, alɛ sa k'ɩ̃ɩ zɔ cen a Filisɩtɛ̃ mɩnɛ tẽw. Lɛ n'a a Sawul na bɛr a ɩ̃ diwfʋ a Ɩsɩrayɛl tẽw za pʋɔ, lɛ n'a ɩ̃ na cɩ̃ɛ ʋ bɛ páw mɛ̃ ɩ.»

²Lɛ n'a a Daviir tɩ ìr, ʋlɛ nɩ nɩbɛ kɔbr ayʋɔb (600) na tɩ bɩɛlɛ ʋ a, cen a Gatɩ tẽw nãà Mawɔkɩ bidɛb, Akisɩ, zie.

³A Daviir nɩ a ʋ nɩbɛ tɩ zɩ̃ n a Gatɩ, a Akisɩ zie, ŋa za nɩ a ʋ yir nɩbɛ. A Daviir nɩ a ʋ pɔwbɛ ayi: Izireyɛl tẽw Ahinowam, nɩ Karmɛl tẽw Avigayil na ɩ a Naval pɔw-kʋɔr a.

⁴A Sawul na tɩ wõ k'aa Daviir zɔ na cen a Gatɩ tẽw a, ʋ tɩ bɛr'ɩ a ʋ diwfʋ.

⁵A Daviir tɩ yel'ɩ a Akisɩ à ŋá: «Fʋ̃ʋ wa de a ɩ̃ yele a, fʋ̃ʋ ɩ bɛ kʋ̀ m zie a kura pʋɔ ɩ̃ kpɩɛr. Bʋ̃ʋ ƴãw n'a ɩ̃ na lãw kpɩɛr'ɩ fʋ a nãà tẽ-kpɛ̃ɛ pʋɔ?»

⁶Daadaalɛ, a Akisɩ tɩ kʋ̀ ʋ nɩ Sɩkɩlagɩ. Alɛ so a Sɩkɩlagɩ ɩ a Zuda na-mɩnɛ sób wa tɩ tɔ a dɩ̃a.

⁷Yũon-been nɩ cuwr anaar'a a Daviir tɩ kpɛ a Filisɩtɛ̃ mɩnɛ tẽw.

⁸A Daviir tɩ yi n a Sɩkɩlagɩ, ɛ́ ʋlɛ nɩ a ʋ nɩbɛ do tɩ zɛb'ɩ a Gesuur tẽw dem, nɩ a Girzitɩ mɩnɛ bɩɩ a Amalesitɩ mɩnɛ, bʋ̃ʋ n'ʋ vɛ̃, a nɩ-bʋʋrɛ bɛ ŋa nɛbɛ tɩ kpɩɛr a tẽw a dãwdãw za, a Suur lowr tɩ tɔ n a Eziptɩ tẽw.

⁹A Daviir mɩ́ tɩ sãw nɩ a tẽw bɛr, ɛ́ kʋ a dɛbr nɩ a pɔwbɛ pàw pɛr. Ʋ mɩ́ tɩ tɛr'ɩ a píir nɩ a nĩi, a bòn nɩ a nyɔ̃wmɩ lãwnɩ a bʋ̃-suuri. Ʋ na mɩ́ tɩ lɛb wa a, ʋ mɩ́ tɩ cen nɩ a Akisɩ zie.

¹⁰A Akisɩ na mɩ́ tɩ sowri: «Ãa n'ʋ nyɩ zɛb'ɩ a dɩ̃a?» A Daviir mɩ́ tɩ sɔw ʋ na: «A Zuda tẽw saa-pɛrɩ́-dʋrʋ-lowr dem'a», bɩɩ: «Yeramelitɩ tẽw saa-pɛrɩ́-dʋrʋ-lowr dem'a», bɩɩ ʋ mɩ́ cãà na lɛb yel à ŋá: «Kenitɩ mɩnɛ tẽw saa-pɛrí-dʋrʋ-lowr dem'a.»[39]

¹¹A Daviir bɛ mɩ́ tɩ sàw bɛ tɛr nɩ-vʋʋra, dɛb bɩɩ pɔw, wa n a Gatɩ ɛ, ʋ mɩ́ tɩ tɩɛr'ɩ ʋ pʋɔ à ŋá: «Bɛ nãà ɩrɛ na wa yel a lɛ tɩ na ɩ a.» À ŋá n'a a Daviir tɩ ɩrɛ, a lɛn daar za ʋ na tɩ kpɛ a Filisɩtɛ̃ mɩnɛ tẽw a.

¹²Lɛ so a Akisɩ tɩ ƴãw a ʋ tɩɛrʋ yaga za a Daviir ƴãw, ʋ tɩ tɩɛrɛ nɩ ʋ pʋɔ à ŋá: «A Daviir ɩ n ɩb na bɛ vɩɛl towtow a, a ʋ nɩ-bʋʋrɛ Ɩsɩrayɛl zie, a na ɩ à ŋá a, ʋ na ɩ n a ɩ̃ tõ-tõ-bie kʋralɛ.»