Read Dagara, Northern 1 Samɩɛl 8 Bible Online

1 Samɩɛl 8 - Dagara, Northern bible

1 Samɩɛl 8

¹A Samɩɛl na tɩ kor a, ʋ de nɩ a ʋ bidɛbr ƴãw bɛ ɩ a Ɩsɩrayɛl nɩbɛ ƴɛ̀r-dɩrbɛ[18].

²A ʋ bidɛb-dãw tɩ dɩ na kɛ́ Yowɛl, ɛ́ a ayi sob dɩ kɛ́ Aviya. Bɛɛr-Seva n'a bɛ tɩ ɩ a ƴɛ̀r-dɩrbɛ.

³Ɛcɛ a ʋ bidɛbr bɛ tɩ tu ʋ ɛ. A libie tɩ bɛ̀lɩ na nyɔw bɛ, bɛ dier a bome a nɩbɛ na kʋ̀rɛ bɛ a, ɛ́ mɩ́ dɩ a ƴɛ̀rʋ a bɛ tori ɛ.

⁴Alɛ n'a so a Ɩsɩrayɛl nɩbɛ nɩ-kore za tɩ ɓã taa wa páw a Samɩɛl a Arama,

⁵yel ʋ à ŋá: «Fʋ̃ʋ n'ɩ ŋan kor, ɛ́ a fʋ bidɛbr bɛ ɩrɛ mɛ̃ a fʋ̃ʋ a ɩ. A na ɩ à ŋá a, ƴɛrɛŋa a, kʋ̀ tɩ nãà ʋ mɩ̀ kaarɛ a tɩ zie, mɛ̃ a lɛ a na ɩrɛ a nɩ-bʋʋr-yoru za zie a.»

⁶A Samɩɛl suur tɩ sãwna bɛ na tɩ yel k'ʋʋ kʋ̀ bɛ nãà ʋ kaarɛ a bɛ zie a. Ʋ tɩ puor'ɩ a Sore.

⁷A Sore tɩ yel'ɩ a Samɩɛl: «Bɛr wõ a Ɩsɩrayɛl nɩbɛ, sàw a bɛ zɛlʋ. Bʋ̃ʋ n'ʋ vɛ̃, fʋ̃ʋ bɛ n'ʋ bɛ zawrɛ bɛrɛ ɩ, mãa n'ʋ. Bɛ bɛ cãà bɔbr k'ɩ̃ɩ dɩrɛ naalʋ a bɛ zu ɛ.

⁸À à ŋá bɛ na ɩrɛ a fʋ zie a dɩ̃a a, lɛ tɔr za n'a bɛ ɩ a ɩ̃ zie, a lɛn daar za ɩ̃ na tɛr bɛ yi n a Eziptɩ tẽw wa tɩ tɔ a dɩ̃a a. Bɛ zawrɛ mɛ̃ na bɛrɛ, ɛ́ puore ŋmɩn-yoru.

⁹Lɛ so, sàw a bɛ zɛlʋ, ɛcɛ taa vɛnɛ a bɛ kpãàfʋ ɛ: manɩ vla kʋ̀ bɛ, a lɛ a nãà na na kaarɛ a bɛ zie a, a lɛ ʋ na na dɩrɛ a naalʋ a bɛ zu a.»

¹⁰A Samɩɛl tɩ lɛb'a yel a Sore ƴɛ̀r-bie za kʋ̀ a Ɩsɩrayɛl nɩbɛ na tɩ zɛlɛ ʋ, k'ʋʋ kʋ̀ bɛ nãà a:

¹¹Ʋ tɩ yel bɛ na: «A nãà na na dɩrɛ naalʋ a nyɩ zu a, nyɩ nyɛ̃ a lɛ ʋ na na kaarɛ a nyɩ zie a: a nyɩ bidɛbr pʋɔ, ʋ na mɩ́ ír'ɩ bɛ mɩnɛ ƴãw bɛ ɩ sojarɩ, dãanɛ a ʋ zɛbr-torkori, ɛ́ ɩ a ʋ wi-zɔmnbɛ, ɛ́ bɛ mɩnɛ mɩ́ de ʋ niwn zɔrɛ, ɛ́ a ʋl mɩŋa torko zɔrɛ tuur.

¹²Ʋ na mɩ́ de nɩ bɛ mɩnɛ ƴãw bɛ ɩ sojarɩ túre nɩ-bɛrɛ, bɛ mɩnɛ ɩ sojarɩ lɩz'a ayi nɩ piir nɩ-bɛrɛ. Bɛ mɩnɛ na kʋɔr'ɩ a ʋ póru, ɛ́ dier a ʋ bome, bɛ mɩnɛ na maalɛ nɩ a ʋ zɛbr bome nɩ a ʋ zɛbr-torkori bome.

¹³Ʋ na mɩ́ de nɩ a nyɩ pɔwyaar bɛ maalɛ a ʋ kãá-nyuure, ɛ́ ɩrɛ a ʋ bʋ̃-dɩrɩ, ɛ́ maalɛ a ʋ dipɛ̃.

¹⁴Ʋ na mɩ́ de nɩ a nyɩ wɛ-vɩɛlɩ vɩɛlɩ zie, a nyɩ divɛ̃ tɩɩr po-vɩɛlɩ vɩɛlɩ zie, a nyɩ olivʋ tɩ-vɩɛlɩ vɩɛlɩ zie, ʋ na de a na kʋ̀ a ʋ tõ-tõ-biir.

¹⁵A nyɩ póru bome nɩ a nyɩ divɛ̃ tɩɩr póru bome ziir pie sob a, ʋ na de a na kʋ̀ a ʋ dɛ-vaɩ nɩ a ʋ tõ-tõ-biir.

¹⁶A nyɩ tõ-tõ-bi-dɛbr nɩ a tõ-tõ-bi-pɔwbɛ, a nyɩ pɔlbil-kpɛn kpɛn, ʋ na mɩ́ de bɛ na bɛlɛ nɩ a nyɩ bòn, ƴãw bɛ tone kʋ̀rɛ ʋ.

¹⁷Ʋ na mɩ́ de nɩ a nyɩ dʋn ziir pie sob tɛr, ɛ́ a nyɩɩm tɛɛ za a, nyɩ na mɩ́ lɩɛb'ɩ a ʋ gbãgbaar.

¹⁸A ʋlɩ bibir nɛ a, nyɩ na kone nɩ a nãà ŋa nyɩ na kaa ír a ƴãw, ɛcɛ a Sore kʋ̃ sɔw nyɩ ɛ.»

¹⁹Ɛcɛ a Ɩsɩrayɛl nɩbɛ bɛ tɩ bɛr wõ a Samɩɛl ƴɛ̀rʋ ɛ, ɛ́ yel: «A bɛ ɩ yel ɛ! Tɩ mɩ̀ na tɛr'ɩ nãà!

²⁰Ɛ́ tɩ mɩ̀ na ɩ na mɛ̃ a nɩ-bʋʋrɛ za a. A tɩ nãà na dɩrɛ nɩ tɩ nɩ a ƴɛ̀rʋ, ʋ na dier'ɩ a tɩ sojarɩ niwn, ɛ́ zɛbr a tɩ zɛbr.»

²¹A Samɩɛl tɩ bɛr'a wõ a Ɩsɩrayɛl nɩbɛ ƴɛ̀rʋ za, ɛ́ lɛb yel a za kʋ̀ a Sore.

²²Lɛ n'a a Sore tɩ yel a Samɩɛl: «Sàw a bɛ zɛlʋ, ɛ́ kʋ̀ bɛ a nãà.» Al pùorí, a Samɩɛl tɩ yel'ɩ a Ɩsɩrayɛl nɩbɛ: «Nyɩ lɛb kul, ŋa za a ʋ tẽw pʋɔ.»