Read Dagara, Northern 1 Samɩɛl 9 Bible Online

1 Samɩɛl 9 - Dagara, Northern bible

1 Samɩɛl 9

¹A lɛn daar, a Bɛ̃zamɛ dɔwlʋ tẽw pʋɔ a, nɩr kãw tɩ be n be dɩ kɛ́ Kisɩ. Avɩɛl bidɛb tɩ n'ʋ, ɛ́ a Avɩɛl ɩ Serɔɔr bidɛb, a Serɔɔr ɩ Bekoratɩ bidɛb, a Bekoratɩ ɩ Afɩa bidɛb. Nũ-kpɛ̃w sob tɩ n'ʋ.

²A Kisɩ tɩ tɛr'ɩ bidɛb kãw ʋ dɩ kɛ́ Sawul. Dɛble na pɔ̀l a tɩ n'ʋ. A Ɩsɩrayɛl nɩbɛ pʋɔ a, nɩr bɛ tɩ pɔ̀l ta ʋ ɛ. Ʋ tɩ tɔl'ɩ zu a nɩbɛ za ƴãw.

³Bibir kãw, a Sawul sãà Kisɩ bòn-nyan tɩ bɔr'a. A Kisɩ tɩ yel'ɩ a ʋ bidɛb Sawul: «Tɛr a tõ-tõ-bie kãw nyɩ cen tɩ bɔ a bòn-nyan.»

⁴Bɛ tɩ cɔlɩ nɩ a Efarayim tan vuo, cɔlɩ a Salisa tẽw, ɛ́ bɛ nyɛ̃ a ɩ. Bɛ lɛb cɔlɩ a Salim, cãà bɛ nyɛ̃ bom ɛ, bɛ cãà cɔlɩ Bɛ̃zamɛ tẽw, a ɩ zawla.

⁵Bɛ na tɩ ta a Sufʋ tẽw vuo pʋɔ a, a Sawul tɩ yel'ɩ a tõ-tõ-bie na tɩ bɩɛlɛ ʋ a: «Ɩ tɩ lɛb kul. A ɩ̃ sãà nãà ɩrɛ na wa bɛr a bòn-nyan tɩɛrʋ, ɛ́ tɩɛrɛ a tɩ yele.»

⁶A tõ-tõ-bie tɩ yel ʋ na: «Naaŋmɩn nɩr kãw be n a tẽw ŋa na be a tɩ nidaa a pʋɔ, a ʋ yúor yi n yaga: ʋlɛ wa yel kɛ́ bom na ɩ na a, a bom ʋl mɩ́ ɩ na. Lɛ so, ɩ tɩ cen tɩ nyɛ̃ ʋ, a mɩnɛ kãw, ʋ na wul tɩ nɩ zie nɛ tɩ na na cãà tu bɔbr a tɩ bome a.»

⁷A Sawul tɩ yel'ɩ a tõ-tõ-bie: «Fʋ̃ʋ wa tɩ cen! Ɛcɛ bʋ̃ʋ n'ʋ tɩ tɛr na tɩ kʋ̀ a nɩr ŋa? Dipɛ̃ bɛ cãà be a tɩ kɔɩ pʋɔ ɛ, ɛ́ tɩ bɛ tɛr bom za na tɩ kʋ̀ a Naaŋmɩn nɩr ɛ. Bʋ̃ʋ n'ʋ tɩ tɛr?»

⁸A tõ-tõ-bie lɛb yel ʋ: «Ɩ̃ tɛr'ɩ libile a ka, ɩ̃ na tɩ kʋ̀ ʋ nɩ a Naaŋmɩn nɩr, ʋʋ wul tɩ a be tɩ na na tu a.»

⁹Lɛ n'a a Sawul tɩ yel: «A vɩɛl'a! Tɩ cen.» Bɛ tɩ cen nɩ a tẽw ʋl a Naaŋmɩn nɩr na tɩ be a. Bɛ tɩ tuor'ɩ pɔwsɩrali a sɔ́r zu bɛ cere kʋ̃ɔ 'wɔ̃wfʋ. Bɛ tɩ sowri bɛ na: «A yel-nyɛrɛ be n a ka a?» — A dãwdãw a Ɩsɩrayɛl tẽw a, bɛlɛ wa bɔbr kɛ́ bɛ sowri bãw bom a Naaŋmɩn zie a, bɛ mɩ́ tɩ yel'a: «Tɩ cen a yel-nyɛrɛ zie.» Sɩza n'a, a sob ʋl bɛ na bʋɔlɛ “naaŋmɩn-ƴɛ̀r-manɛ” a dɩ̃a a, bɛ tɩ bʋɔlɛ ʋ nɩ “yel-nyɛrɛ”. —

¹²A pɔwsɩrali tɩ sɔw bɛ na: «Ʋ̃ʋ, ƴɛrɛŋa n'a ʋ de niwn ta a nyɩ ƴãw. A tɩ maalʋ-zie bàwr bibir'ɩ a dɩ̃a, alɛ so ʋ wa a tɩ tẽw pʋɔ a dɩ̃a, nyɩ cen fɔ̃w,

¹³nyɩmɛ wa kpɩɛr a tẽw pʋɔ a, nyɩ na páw ʋ na, ʋʋ bãw do a maalʋ-zie a dɩb ƴãw. Ʋlɛ bɛ wa ta a, nɩr bɛ dɩrɛ ɩ, bʋ̃ʋ n'ʋ vɛ̃, ʋlɛ n'ʋ a fɛr k'ʋʋ maalɩ a bàwr nɛn. Al pùorí a, a nɩbɛ bɛ na bʋɔlɩ a pãa na tʋ̃ɔ́ dɩrɛ. Lɛ so, nyɩ cen a ƴɛrɛŋa, nyɩ na tɩ páw ʋ nɩ daadaalɛ.»

¹⁴Lɛ n'a bɛ tɩ cen a tẽw pʋɔ. Bɛ na tɩ kpɩɛr a tẽw pʋɔ a, a Samɩɛl na tɩ yire k'ʋʋ do a maalʋ-zie a tɩ tuori bɛ na.

¹⁵Zɩ̃ k'aa zãa daarɩ́ a, a Sore tɩ yel'ɩ a Sawul waa kʋ̀ a Samɩɛl à ŋá:

¹⁶«Bio à ŋá tɔ-won, ɩ̃ na tõ n Bɛ̃zamɛ tẽw nɩr kãw a fʋ zie. Fʋ na ka n nũu ƴãw ʋ, ʋ ɩ a ɩ̃ nɩ-bʋʋrɛ Ɩsɩrayɛl nɩ-kpɛ̃ɛ, k'ʋʋ faa a ɩ̃ nɩ-bʋʋrɛ a Filisɩtɛ̃ mɩnɛ nuru pʋɔ. Bʋ̃ʋ n'ʋ vɛ̃, ɩ̃ nyɛ̃ nɩ lɛ a na ŋmɛ̃ a ɩ̃ nɩ-bʋʋrɛ a, ɛ́ a bɛ cɛl ta m'a.»

¹⁷Lɛ n'a, a Samɩɛl na wa nyɛrɛ a Sawul lɛ pɛ a, a Sore tɩ yel ʋ na: «A nɩr ʋl ƴɛ̀rʋ ɩ̃ na ƴɛ̀r a fʋ zie a n'ɩ à ŋà. Ʋlɛ n'ʋ na kaarɛ a ɩ̃ nɩ-bʋʋrɛ zie.»

¹⁸A Sawul tɩ taw na ta a Samɩɛl zie a tẽw dɩ̃dɔrɩ́, ɛ́ yel ʋ: «Yãayãa n'a ɩ̃ zɛlɛ fʋ, wul mɛ̃ a yel-nyɛrɛ yir.»

¹⁹A Samɩɛl tɩ sɔw nɩ a Sawul: «Mãa n'ɩ a yel-nyɛrɛ. De m niwn tɩ do a maalʋ-zie. A dɩ̃a a, mãa nɩ nyɩɩm n'a na lãw dɩ. Bio biɓaara a, mãa wa sɔw a fʋ sowru za a, ɩ̃ na bɛr fʋ na fʋ kul.

²⁰Alɛ wa cɛ a bòn-nyan na bɔr a daar za fʋ bɔbr a, fʋ̃ʋ bɛr tɩɛrʋ, bɛ nyɛ̃ a na. A na ɩ à ŋá a, ãa nɩ̃ɛ so a bʋ̃-sɩza za na be a Ɩsɩrayɛl tẽw a? Fʋ̃ʋ nɩ a fʋ sãà yir dem za bɛ nɛbɛ ɩ?»

²¹A Sawul tɩ sɔw na: «Bɛ̃zamɛ dɔwlʋ nɩr bɛ tʋ̃ɔ́ nɛ m ɛ? A dɔwlʋ ʋl na ɩ a pʋrɩ woro a Ɩsɩrayɛl dɔwlʋ za pʋɔ a a? Ɛ́ a ɩ̃ yir bɛ n'ɩ a pɛ-baara a Bɛ̃zamɛ dɔwlʋ yie pʋɔ ɛ? Ŋmɩŋmɩn za n'a fʋ ƴɛ̀rɛ à ŋá a ɩ̃ zie?»

²²A Samɩɛl tɩ tɛr'ɩ a Sawul nɩ a ʋ tõ-tõ-bie kpɛ n a dɩb dĩó, tɩ ƴãw bɛ zɩ̃ a nɩbɛ bɛ na bʋɔlɩ a nisɔw, nɩbɛ na tɩ vɩrɩ ta lɩzɛr'ɩ pie a.

²³A Samɩɛl tɩ yel'ɩ a bʋ̃-dɩ-ɩrɛ: «A nɛn ʋl ɩ̃ na tɩ yel kɛ́ fʋ ír bin a, de ʋ wa n.»

²⁴A bʋ̃-dɩ-ɩrɛ tɩ cen na tɩ ɓáw a pɛrɩ́ gbɛ́r lãwnɩ a pɛzʋkpʋr wa bin a Sawul niŋé. Lɛ n'a a Samɩɛl tɩ yel a Sawul: «A bàwr ŋa nɛnɛ n'ɩ à á ŋá ɩ̃ na tɩ ír bin fʋ a. Lãwnɩ a ɩ̃ nɩ-bʋɔlɩ dɩ.» À ŋá n'a a Sawul nɩ a Samɩɛl tɩ lãw dɩ a ʋlɩ bibir nɛ.

²⁵Al pùorí, bɛ tɩ yi n a maalʋ-zie siw a tẽw pʋɔ, a Samɩɛl tɩ do zɩ̃ gàrʋ́, ʋlɛ nɩ a Sawul lãw ƴɛ̀r.

²⁶A bio daarɩ́ biɓaara a, a Sawul nɩ a ʋ tõ-tõ-bie tɩ dãw nɩ nɩ íru. A zie na wa wɛlɛ a, a Samɩɛl tɩ bʋɔl'ɩ a Sawul a gàrʋ́ tɩ yel ʋ: «Nyɩ yi lo a sɔ́r, ɩ̃ na bɩɛlɩ fʋ na ta n sɔgɔ.» A Sawul tɩ yi na lo a sɔ́r, ʋlɛ nɩ a Samɩɛl, bɛ za ayi lãw cere.

²⁷Bɛ na tɩ ta a tẽw tʋr-bɔw ƴãw a, a Samɩɛl tɩ yel'ɩ a Sawul: «Yel a fʋ tõ-tõ-bie k'ʋʋ tɔl de tɩ niwn.» A tõ-tõ-bie tɔl de a niwn. A Samɩɛl lɛb yel: «Ɛ́ fʋ̃ʋ a, tɛw àr a ka a ƴɛrɛŋa, ɩ̃ ɩ fʋ bãw bom nɛ a Sore na yere a.»