Read Grebo, Northern Matiɔ̌n 18 Bible Online

Matiɔ̌n 18 - Grebo, Northern bible

Matiɔ̌n 18

¹È klě ɛmo tǐǒ wlòmo Jùsuu mɔ̀ cheěn nyo dia lě ǔ gbàla Ɔ wan u je, “Mɔ kɔɔ̌n kɛ tè kmaǎ chɔɔ dɔ̌ klě Nyesoaa win kwa konkɔn wlòmo?”

²È Jùsu dala jǔ gbe nɔ̀ Ɔ nynaeaǒ u jemǒ bo,

³è kě Ɔ dɛ̌a u je Ɔ je, “Tèe jleě nìà Ě tmɛɛ̌ amo, bɛ̌ nu bǎ se aa chɛ̀ɛ kmɔ̌ de sà, bɛ̌ se je wǒ keà jlǔ klɔkwlě, Nyesoa se a win kwa kɔnma mu.

⁴Kɛɛ nyuà ɔ̈ mi ɔɔ die ja tìeba wòje jǔà, nɔ̀ kɔn tè kma chɔɔ dɔ̌ klě Nyesoaa win kwa konkɔn wlòmo.

⁵È nyu wùɛ ɔ̈ mii jǔ gbeà kuun Něe nynɛ̌ wlò je jebo kmema wòje keà jǔà ɔɔ ka nee je, è Mǒǒ ɔ kmeě jebo.

⁶È nyu wùɛ ɔ̈ mii jlǔ klɔkwlěà ü po Něe tè kàan tè uu nyu numa ɔ miě tè wlawlǎ slè be, ɛ mi tɛɛ numa bu pe ɔ kèuseɔ fòɛ dɔ u miě ɔ jbǒo wulǒ mǒ tuǔn nu, ɛ̀ sìnʼǒ Nyesoa Bɔ maěǒ ɔɔ plɔ tu kɛn bo.

⁷Chlǒ keǒ kmɔ̌ mɔ̀ keǒ noǎ fòfoaà ï neɔ ɛɛ mɔ̀ ii tè mɔ̀ ï peěe tùonyopo tè wlawlǎ slè. Ɛ wɛɛnʼǒ le keǒ měne tèntɛn bɛ diě, kɛɛ chlǒ keǒ nyopòà mɔ̀ ü kɔn mǒ měne tèntɛnʼǒ ɛ diiěe.

⁸Tèǒ nì kɔn tè bɛ̌ nu nè kweta ɔ̀ɔ̌ bo bɛ̌ keè ni bò keě kpni kukwǐ slè be, bɛ̌ ɛ je mì ɛ kwa po. Ɛ mi tɛɛ numa nè kweta bɛ bɛ̌ je ɔ̀ɔ̌ nè bo bɛ bɛ̌ je bò nee ɛ kmɔ̌ miě jɔkɛn mu, ɛ̀ sìnʼǒ bò blě li Nyesoa Bɔ poěè kmɔ̌ sie na slè.

⁹È plě de bɛ̌ nu nè jleě bɛ̌ keè ni bò ke dɛ kukǔ ni, sàě ɛ dìe jǐ mǒ mì ɛ kwa po. Ɛ mi tɛɛ numa bò nae jleě gbàe mɔ̀le bò muě jɔkɛn, ɛ̀ sìnʼǒ bò kɔn jǐi sɔ̌n Nyesoa Bɔ poǎ lěè na slè.

¹⁰Nɛ̀ kɔn tè ba gbɛ̀ɛ le ɛ̈ di ɛɛ numa aǎ di jlǔ klɔkwlěà dlǒ le jǎ. Mɛ kɔɔ̌n tèǒ joo nɛ̀ moo, Ě tmɛɛ̌ ane, uu najiǒpò neě jɔkɛn keǒ Ně Gbeǐ jemǒ tǐ wùɛ mɔ̀, è u wɔ̀ě ɛle keǒ bu wǒ a le keǒ Ɔ jemǒ.”

¹¹È dɛ tɛ̀ɛ Jùsu boɛa uu je nɛ̀à Ɔ je, “Jbɛjuu Jǔà Ɔ diě keǒ Ɔ mǐ nyopòà gblà u kpni kukwǐ kɔnʼɔ win kwa.

¹²Mɛ aa nyu miǐ kɛ numa? Bɛ̌ nu bɔ̌ kɔn kɛ blǎ wlèe m̀m plě bo do bɔ̌ mǎ klě i slè, ɔ se kɛǒ blableǎa wlèe hɛ̀n tùo pù pù tùo siědoǒ keǒ togbei wlòmo siba mu i ke wan le di, ɔ se blablɛ̌ɛ doǒ mǎa le pɔ̀nma mu le?

¹³Kàan tèà Ě tmɛɛ̌ amo, bɛ̌ nu bɔ̌ jě lɔ, chǒn kɔn bɛ jǐ ɔ je chɔɔ ɛ miǒ blǎ wlèe hɛ̀n tùo pù pù tùo siědoǒ see mǎ mǒ sìn.

¹⁴Dɛɛ doǒ nɛ̀ ɛ mono, aa Gbeǐ Nyesoaǒ neěe jɔkɛn Ɔ se jlǎ Ɔɔ nyopòà u nyuu doo chɛ̀ bɔ mǎ.”

¹⁵È dɛ tɛ̀ɛ Jùsu boɛaa de nɛ̀à Ɔ je, “Bɛ̌ nu bo nyu tɔ̀ɔ bɔ̌ wlǎǒò tè jemǒ, da lɔ keǒ wakǎ mǒ, aa sɔ̌n ba neǒ mì ɔ kenkan dɛǒ ɔ nuu ɛɛ tè tmɔɔ̌ no. Bɛ̌ nu bɔ̌ po nè win nɔkǔ jebo, è mò wa lɔ ɔ̈ sàě ɔ kenkan dɛǒ slè.

¹⁶Kɛɛ bɔ̌ se nè win nɔkǔ jebo po, è bò kpa nyuu do ɔ̀ɔ̌ tàii sɔ̌n ɛ̈ di ɛɛ numa aa sɔ̌nʼǒ ɔ̀ɔ̌ tanʼǒ a mǐ sàse tù a mǐ tèǒ ikòo kɛn poo lo wòje ke Nyesoaa win dɛ̌ɛ. (Deut 19.15)

¹⁷Bɛ̌ nu kaǒ bɔ̌ je bɔ̌ se uu win nɔkǔ jebo po, è bò dǔ tèǒ mǒ kpaě i Nyesoaa wǎn mɔ̀. È bɛ̌ nu bɔ̌ je bɔ̌ se u nɔkǔ jebo po, è ba nu ɔ keà a mii se kàan tè po nyo numa klee kpni kpɔnǐ dlǒ wlě tɛ̌n nyo, ɔ klee amo aǎ nɛɛ kɛ̀ǒ tàa do.

¹⁸Kàan tèà Ě tmɛɛ̌ amo, dɛ wùɛ a miǒo wun mɔ̀ sàba kělɔ kmɔ̌ɔ mɔ̀ nɛ̀ miǒ wun mɔ̀ sàeba klě jɔkɛn, è dɛ wùɛ a seǒo wun mɔ̀ sàba mu kělɔ kmɔ̌ɔ mɔ̀ nɛ̀ seǒ wun mɔ̀ sàeba mu klě jɔkɛn.

¹⁹È dɛ tɛ̀ɛ neǒo de Ě tmɛɛ̌ amoo nɛ̀ moo, bɛ̌ nu aa sɔ̌n bǎ poǒ wlè tàa do keǒ dɛɛ tè mɔ̀ kělɔ kmɔ̌ɔ mɔ̀, bǎ gbà Ně jɔkɛn Gbeǐ wan, Ɔ mi ɛ numa keǒ a mɔ̀.

²⁰Mɛ kɔɔ̌n tèǒ joo nɛ̀ moo tà wùɛ tàii sɔ̌n ɔ̀ɔ̌ tan miǒo le bòba keǒ Ně nynɛ̌ɛ tè mɔ̀, Ě miě u slè neema.”

²¹È Pitɛ̌ dia lě Jùsu mɔ̀ ɔ̌ gbàla Ɔ wan ɔ je, “Koɔn, bɛ̌ nu ně mamǔ bɔ̌ keǒǒ tè je měne wlɛ̌ tǐ wùɛ mɔ̀, à wě tìen tae boǒ poo loǒ kɛ ɔɔ tè wlò le? Kpɛɛ nyiɛta kɛ le?”

²²È Jùsu tùia lɔ kɛ̀ɛn Ɔ je, “Ɛ se bɛ moo wěe nyiɛta, kɛɛ bɛ moo wěe wlèe tan tùo pù ii kpɛɛ nyiɛta.

²³Dɛɛ doǒ nɛ̀ ɛ mono, Nyesoaa win kwa konkɔn wǒ je klɔ̀ba ɔ̈ jlɛ̌ bɔ̈ tɛ̌n ɔɔ tùgbe ï ɔɔ nyebajle blě ɔɔ kwa.

²⁴Tà ɔ tùngmaea ɔɔ noǎǒ je ble gblègblɛ, è ɔɔ nyopò jalaě jbɛju tɔ̀ɔ ɔ̈ blěa ɔɔ wlě blɛ̌ fòfoa kwa.

²⁵Kɛɛ jbɛjuǒ ɔ sea wlě taeǒ blě ɔ mǐa i ɔ̀ nye. Ii tè klɔ̀baǒ ɔ tmɔɔ̌a ɔɔ nyopò keǒ bu ploa ɔ klee ɔɔ nynɔ klee jlǔ plě klee dɛ wùɛ ɔ kɔnaa ɛ̈ di ɛɛ numa tùgbaǒ ɛ mǐa sàe le.

²⁶Ii tè ɔ kɔla kwne bo keǒ klɔ̀baǒ jemǒ ɔ̌ bɛ̀tea lɔ ɔ je, ‘Chì kpa ämo, Ě bɛ̀teè le, kɔn wlò dbadbǎ keàǎ mɔ̀, Ě mi nè wlě wùɛǒ le pɔ̀nma Ě mǐ niì nye!’

²⁷Tà ɔɔ chì kpa ämo jěa lɛɛ, ɔ̀ɔ wɔle beaě ɔ mǒ no, ii tè ɔ sàlaǒ tùgba wùɛǒ ɔ blěaa ɛɛ tè wun mɔ̀ ɔ̌ sàlaǒ ɔ wun mɔ̀ ɔ̌ mua.

²⁸Kɛɛ tǐi doo tǐ jleě tà ɔ pěaǒo plomǒ, ɔ̀ jěa ɔɔ bě nyebajlo tɔ̀ɔ ɔ̈ blěa ɔɔ mòngmɛ wlě kwa. È nɔ̀ǒ ɔ jǎla mǒ ɔ kmeaǒ dbo bo ɔ je, ‘Sà tùgbaà blè mǒo kwa kèkeà!’

²⁹Tèǒ nì kɔn tè ɔɔ běǒ ɔ kɔla kwne bo keǒ ɔ jemǒ ɔ̌ bɛ̀tea lɔ ɔ je, ‘Ě bɛ̀teè le, kɔn wlò dbadbǎ keàǎ mɔ̀, Ě mi nè wlejoɛ̌ɛǒ tàmo sàba Ě mǐ ɛɛ̀ nye.’

³⁰Kɛɛ ɔɔ̌ jlǎ bɔ poa ɔɔ běǒ ɔɔ win nɔkǔ jebo ɔ̌ dǔa ɔ mǒ ɔ̌ poaě ɔ wùlo klě bɔ pooa lě kɛn ɔ mǐa tùgbaǒ sà.

³¹È tà nyebajle tùu jěaa kpni taeǒ ɔ nua ɔɔ běǒ mǒ, ɛ poaě u wɔle dlǒ wlòmo chɔɔ, ii tè u mua uu chì kpa ämoǒ tmɔɔ̌ma keǒ dɛǒ ɔ nua ɔɔ běǒ mǒ ɛɛ tè mɔ̀.

³²Tà uu chì kpa ämo wɔ̌naa tèǒ, ɔ dala nyebajloǒ de, kě ɔ dɛ̌a ɔ je ɔ je, ‘Mò kpnii jǐlenymi nyebajloà! Bàteě le, nɛ̀ kɔn tè Ě poo nè tè wlò le keǒ noǎ wùɛ blè mǒo kwa mɔ̀.

³³Sèe kɛ lě wɔ̀ keà Ě nuu Ě jbo mòo wɔle je bò jboo kɛ bèǒ wɔle je ke le?’

³⁴Ii tè ɔɔ chì kpa ämo bea jlo měne chɔɔ keǒ ɔ mɔ̀ ɔ̌ tmɔɔ̌a nyopò bu kmea nɔ ke bu poa ɔ wùlo bu paea ɔ dɛ wan le ɛ mǐa ɛ kpa kpa wlě wùɛǒ ɔ blěa lɔɔ̀ kwa ɔ mǐa i sà.”

³⁵È kě Jùsu dɛ̌a Ɔ je, “Bɛ̌ nu baǎ poo aa mamǔpòo tè wlò le kpǎkpǎ, dɛɛ doǒ nɛ̀ Ně Gbeǐǒ neěe jɔkɛn Ɔ mi a mǒ numa.”