Read Grebo, Northern Matiɔ̌n 2 Bible Online

Matiɔ̌n 2 - Grebo, Northern bible

Matiɔ̌n 2

¹Klě tǐǒ wlòmo Hɛwlǒ nɔ̀ mooa kòngmna nyefòɛ klě Jùdǐa wakǎ kɛn, Jùsu kɔɔnʼa lě Bɛ̀tlehɛ̌ɛn dǐa ɛ̈ neěe dakɔ̌ǒ u dɛɛ Jùdǎ nyo uu blǒ kɛn. Tà Jùsu kɔɔnʼaa, tɔ̀n kɔn nyo ü jii dɛ jɔtnèǒ neěe jɔ mǒ i sɛ̀nʼɛ nynɛ̌ nù sɔnaě wɛnʼɛ kwlǎ mǒ wǒla mǒ ü diaě dě fòɛǒ moo Jlǔsnɛ wlòmo, kě u dɛ̌a u je,

²“È tà Jijlǎeà Ɔ neě kɛ Ɔ̈ moo Jùwɛ nyoo Klɔ̀ba? Ä kɛ̀nʼě wɛnʼɛ kwlǎ mǒ wǒla mǒ bo ä jě Ɔɔ jɔtnàe, tèǒ nì kɔn tè ä diě ä mǐ Ɔɔ wɛ̀ sà.”

³Tà nyefòɛ Hɛwlǒ klee ɔɔ nyopò wùɛ ü nea lěe Jlǔsnɛ u wɔ̌naa tèǒ, è uu wlò je bo klɔ̀ba jajloǒ Bɔɔ̌ wɔ̀na Hɛwlǒ je, dɛǒ nɛ̀ niia u feanfeǒ.

⁴Tèǒ nì kɔn tè Hɛwlǒ dala Nyesoaa kpatòapoo fòe klee teteǎ tee nyo wùɛ ɔ̌ gbàla u wan ɔ je, “È tà u je Tentǎn Jǔà Ɔ miǐa kɛ kɔɔnma?”

⁵U tùa lɔ kɛ̀ɛn u je, “Klě Bɛ̀tlehɛ̌ɛn dǐa ɛ̈ neěe Jùdǐa wakǎ kɛn wòje keǒ Nyesoa nua lɛɛ Ɔɔ wnɔsàɔ wan popoɛ ɔ̈ chlěa lɛɛ seela tǐ jleě, è dɛ ɔ chlěaa nɛ̀à ɔ je,

⁶‘Bɛ̀tlehɛ̌ɛn diě ɛ̈ neěe Jùdǎ blǒ kɛn ɛɛ tè kma chɔɔ klě ɛɛ bǐì deě slè ï neɔɔ Jùdǎ blǒɔ kɛn. Klě ɛ kɛn klě Klɔ̀ba miǎě mǒ sɔnma Ɔ miǎě Ně nyopò Ǐsòwɛ̌ kwɛɛn tè mɔ̀ kɔn.’ ” (Mic 5.2)

⁷È Hɛwlǒ dala tɔ̀n kɔn nyoǒ klě je wɛ̌ tǔn wlòmo keǒ bɔ jboa ɛ le tǐ taeǒ jɔtnàeǒ ɛ beea lěe jɔ mǒ ɛ̈ di ɛɛ numa ɔ mǐa lɛ ji tǐ tae Jǔǒ Ɔ sìnʼaa kmɔ̌.

⁸È ɔ dboa lu klě Bɛ̀tlehɛ̌ɛn dǐa, kě ɔ dɛ̌a u je ɔ je, “A mu, a pɔ̀n Jǔǒ le doɛɛ doɛɛ. Bɛ̌ nu bǎ jě Ɔ, è ba diǐ wlòmo sèsae le tà Ɔ neǒo ɛ̈ di ɛɛ numa Ě mǐ mu Ě mǐ Ɔɔ wɛ̀ sà ke.”

⁹Tà ɔ dǎla bò uu je, è nùǒ mua. È jɔtnàeǒ u jěa lěe wɛnʼɛ kwlǎ mǒ wǒla mǒ, è nɛ̀ǒ nɛna u nya ɛ̈ nynanaǒ tàǒ Juplǔǒ Ɔ neaǒo bo.

¹⁰Tà u jěaa jɔtnàeǒ ɛ nynanaa bo, ùu wlè bloa chɔɔ, chǒn nia nu.

¹¹È nùǒ pala koǔ bo ǔ jěa Jijlǎeǒ Ɔ klee Ɔɔ naǎ Mɛwlě ǔ kɔla kwne bo keǒ Ɔ jemǒ ǔ sàla Ɔɔ wɛ̀. È nùǒ knana uu mǒ tèe gblɛ̀kin je le ǔ nyea Lɔ nyee noǎ, jà klò plě sonsnǒ noǎa ï kɔn tè kmaa chɔɔ u dɛɛ fnekèse klee maà.

¹²È tà u sɔnaǒo mǒ, klě tǒn jlǒ waěǒ wlòmo Nyesoa jǎla u dlǒ mɔ̀ klě jajie mǒ Ɔ̌ maěaě u chìjoɛɛ nɔkǔ mǒ bo ɛ̈ moo buǔ mia de klě Hɛwlǒ mɔ̀. Tèǒ nì kɔn tè u kpala deplee snǔ ǔ mua uu blětà.

¹³Tà tɔ̀n kɔn nyo mua uu blě, Koɔn Nyesoaa najiǒpòi nɔ̀ jǎla Jòsɛ̌fo dlǒ mɔ̀ klě jajie mǒ ɔ je, “Dǔ jemǒ, nu jǐ měne, kpa Jijlǎeà Ɔ klee Ɔɔ naǎ klě Ǐjɛ̀te blǒ kɛn. Klě bò neě bo ɛ mǐ ɛ kpa kpa Ě mǐǎà tmɔɔ̌ no dɛ bò nuu. Mɛ̌oǒ joo nɛ̀ moo Hɛwlǒ mi ɛ mǒ tɛ̀nma keǒ bɔ dbǎ Jijlǎeà.”

¹⁴Ii tè klě tǒn jlǒ waěǒ wlòmo Jòsɛ̌fo dǔa jemǒ ɔ̌ kpala Jijlǎeǒ Ɔ klee Ɔɔ naǎ Ǐjɛ̀te.

¹⁵Tà u nynia lěe Ǐjɛ̀te, klě u neaě ne ne Hɛwlǒ kǒa, ii tè dɛǒ Nyesoa poa Ɔɔ wnɔsàɔ wan seela tǐ jleě ɛ̌ jaěaǒ, kě ɔ dɛ̌a ɔ je, “Ě miǎ Ně Jǔà daba keǒ Bɔ sɔnaě Ǐjɛ̀te blǒ kɛn mǒ.” (Hos 11.1)

¹⁶Tà Jòsɛ̌fo kpala luu Ǐjɛ̀te, klě tǐi doǒ wlòmo è Hɛwlǒ jěa lɛ ɛ̈ moo tɔ̀n kɔn nyo poa ɔ le boboɛ. Tèǒ nì kɔn tè ɔ bea jlo měne ɔ̌ dboa tabɔ̀ bu dbǎla jbɛjujlu wùɛ sɔɔnʼǒ jlěe sɔ̌n mɔ̀ mǒ bò diɔ bobo ü nea lěe Bɛ̀tlehɛ̌ɛn klee deě wùɛǒ tbɛɛa lɛɛ dǐ. Mɛ kɔɔ̌n tèǒ joo nɛ̀ moo jɔtnàeǒ ɛ blěe klekle jejeɛ̌ tɔ̀n kɔn nyo jěa lɛɛ sɔɔnʼaǒ mǒ bò jɛa tǐǒ ɛ nua jlěe sɔ̌n.

¹⁷Dɛǒ nɛ̀ kpala tùɔn ɛ̈ di ɛɛ numa winʼǒ Nyesoa poa Ɔɔ wnɔsàɔ Jɛ̀lemaeǎ wan seela tǐ jleě ǐ jaěaǒ, ɔ je,

¹⁸“Ě wɔ̌n jǐlenymi fìɛn fòɛ ɛ̈ kwlii klě diěǒ moo Wlimà kɛn. Wlichɔ̌ɔ jlǔ kǒa, ii tè ɔ fìnʼa uu tè, ɔ sea kèka ji.” (Jer 31.15)

¹⁹Tà Hɛwlǒ kǒaa, è Koɔn Nyesoaa najiǒpòi nɔ̀ jǎla Jòsɛ̌fo dlǒ mɔ̀ klě jajie mǒ klě Ǐjɛ̀te

²⁰ɔ je, “Nyopòà ü jlɛ̌ bü dbǎlaa Jǔà u kǒ lo. Ii tè dǔ jemǒ, kpa Jijlǎeà Ɔ klee Ɔɔ naǎ, a mu de klě Ǐsòwɛ̌ blǒ kɛn.”

²¹Tèǒ nì kɔn tè Jòsɛ̌fo dǔa jemǒ ɔ̌ kpala Jǔǒ Ɔ klee Ɔɔ naǎ de klě Ǐsòwɛ̌ blǒ kɛn.

²²Kɛɛ tà Jòsɛ̌fo wɔ̌na nii ɛ̈ moo Achèlɔ nɔ̀ beǒ ɔɔ gbeǐ Hɛwlǒ pènmo ɔ̈ kɔn Jùdǐa wakǎ win kwaò, dɛǒ nɛ̀ pea ɔ fano mǒ keǒ bɔ tǐnʼa lě. Tà ɛ tùu Nyesoa wala ɔ wlò je klě jajie mǒ, nɛ̀ kɔn tè ɔ mua lě blǒǒ ɛɛ wakǎ tɛ̀ɛ u dɛɛ Jàlalǐi wakǎ kɛn

²³ɔ̌ tǐnʼa lě diěǒ u dɛɛ Nǎsòwɛ̌ kɛn ɛ̈ di ɛɛ numa winʼǒ Nyesoa poa Ɔɔ wnɔsàɔpo wan seela tǐ jleě i mǐaǒ jaě le ï dɛ̌a bòo, “U miǎ Nɔ Nǎsòwɛ̌ Nyu daeba.”