Read Grebo, Northern Matiɔ̌n 21 Bible Online

Matiɔ̌n 21 - Grebo, Northern bible

Matiɔ̌n 21

¹Tà Jùsu klee Ɔɔ mɔ̀ cheěn nyo keaa Jlǔsnɛ diě le konwɛɛ̌ ně u nyniaǒo diěǒ u dɛɛ Bɛfèji kɛn ɛ̈ neaǒo togbeeǒ moo Ɔlè dlǒ, è Jùsu dboa Ɔɔ mɔ̀ cheěn nyoo sɔ̌n nya,

²kě Ɔ dɛ̌a u je Ɔ je, “A muě diěǒ neě amoo nya kɛn, bǎ keě bò dǐa pɛ, a mi jakǎsè klee ɔɔ jǔ jěba ï moaa bo. A jle i bo, a ja i Mǒ.

³Bɛ̌ nu nyu wùɛ bɔ̌ gbà a wan ɛ̈ moo, ‘Mɛ a niǐ kɛ i mǒ?’ è ba tmɔɔ̌ ɔ ɛ̈ moo, ‘Koɔnʼǒ jlɛ̌ li,’ è u miǒ a mɔ̀ mǒ sɔnma a miě i ja.”

⁴È dɛǒ nɛ̀ kpala tùɔn ɛ̈ di ɛɛ numa winʼǒ Nyesoa poa Lɔɔ wnɔsàɔ wan i mǐaǒ jaě le ɔ̈ dɛ̌a bòo,

⁵“Tmɔɔ̌ Jlǔsnɛ kwɛɛn bu tanʼǒ le, uu Klɔ̀ba diě le, Ɔ diiě klě ja tìe tǔn wlòmo, Ɔ nɛɛ jakǎsè kɛn, jakǎsèǒ nuu bòto.” (Is 62.11, Zech 9.9)

⁶È nùǒ mua ǔ nua dɛǒ Ɔ tmɔɔ̌a nuu.

⁷U jalaě jakǎsè klee ɔɔ bòtoǒ ǔ jloaǒ i dale kɛn ble Jùsu neaǒ daleǒ kɛn bo.

⁸Tà u keaa mi, è nyopò fòfoa jlea uu wlawlě snǔ mɔ̀ ble, tìe bɛ̌a snɛwɛɛ ǔ peɛna ɛ snǔ mɔ̀ ble.

⁹È diblɛ̌ǒ kɛnaě Ɔɔ nya klee tìeǒ nea Nɔɔ demǒ u pea plɔɔ bloo slɛ̀ le wòje ke Nyesoaa win dɛ̌ɛ, ǔ nia, “Hehejoo keǒ Dèběsee jlǔu Jǔ mɔ̀! Baea keǒ Ɔ mɔ̀ Ɔ̈ diiěe Koɔnʼɔ nynɛ̌ wlòmo! Baea keǒ Ja Tmɔ Nyesoa mɔ̀!” (Ps 118.25-26)

¹⁰Tà Jùsu keaa Jlǔsnɛ dǐa pɛ, è slɛ̀ fòfoa nɛ̀ u pea le ǔ jejɛ̌ɛaě jǐ měne. È dɛ fòfoa gbɛ̀a i wan u je, “Mɔǒo kɛ?”

¹¹È diblɛ̌ǒ ù tùia u kɛ̀ɛn u je, “Jùsu Ɔ̈ moo Nyesoaa Wnɔsàɔ Ɔ̈ sɔn něe Nǎsòwɛ̌ kɔn dǐa mǒ ɛ̈ neěe Jàlalǐi wakǎ kɛn Nɔ̀à diě!”

¹²È Jùsu mua lě Nyesoaa kǎ fòɛ bo Ɔ̌ jɛɛaě nyopò ü pleaa noǎ klee tìe tɔ̀nwɛaa noǎ u mǐaa chɔ̀no pie le Ɔ̌ piěaǒ uu wùɛǒ plomǒ. Ɔ chinchnǐia wlě mɔ̀ sìnsiɛɛ nyoo těblea mǒ klee hùngbei plo nyoo tukwlǐ.

¹³È kě Ɔ dɛ̌a u je Ɔ je, “Ɛ chleě le klě Nyesoaa win wlòmo ɛ̈ moo, Ɔɔ koǔ moo koǔà nyopò bu muě bobo u miě Ɔɔ mɔ̀ boɔ (Is 56.7), kɛɛ nɛ̀à a ni jlǐ nyoo bobo ne koǔ mǒ!”

¹⁴È dodɔ nyo klee bo klɔ̀ɔ nyo ü nea lěe Nyesoaa kǎ fòɛǒ bo nù diaě Ɔ mɔ̀ Ɔ̌ peana u.

¹⁵Kɛɛ tà Nyesoaa kpatòapoo fòe klee teteǎ tee nyo jěaa wlòlekaen noǎǒ Ɔ nuaa klee jlǔ panpěǒ ü neaěe Nyesoaa kǎ fòɛǒ bo ü peaa slɛ̀ le ü dɛ̌a bòo, “Hehejoo keǒ Dèběsee jlǔu Jǔ mɔ̀!” È nùǒ bea jlo měne.

¹⁶Ii tè kě u nia Jùsu wan gbògba u je, “Dɛǒ jlǔǒ u boɛ kɛɛ wɛ̀n ɛ nee?” È Ɔ tùa u kɛ̀ɛn Ɔ je, “Uuǔn, deě aǎ slè kɛ le klě Nyesoaa win wlòmo ɛ̈ moo, jlǔ panpě klee jijlǎi nù mi Ně nynɛ̌ le poba?” (Ps 8.3)

¹⁷È Nɔ̀ǒ sɔnaě Jlǔsnɛ dǐa mǒ Ɔ̈ muaě diěǒ moo Bɛtnè kɛn klě Ɔ sìnʼa lě tǒn jlǒ waěǒ.

¹⁸Kènta gbìi tà Jùsu keaa de mi klě Jlǔsnɛ, è sàno nia Ɔ no.

¹⁹Ii tè tà Ɔ jěaa bueě tuǒ keǒ snǔ wakǎ mǒ, Ɔ muaě ɛ mɔ̀ Ɔ̌ pɛ̀nʼa buo le Ɔ mǐa di, kɛɛ Ɔ seaě ɛ buo ja jɛɛ le ɛ̀ sìnʼǒ wɔ̀nfi sosǒo do. Tèǒ nì kɔn tè kě Ɔ dǎla bueě tuǒ je Ɔ je, “Tu buo seǎ kɛ̀ lɔɔ ja kun kpe!” È tǐi doo tǐ jleě tu nɛ̀ǒ chechɛ̌a.

²⁰Tà Ɔɔ mɔ̀ cheěn nyo jěaa dɛǒ, ì kaenʼa u le wlò ǔ gbàla Ɔ wan u je, “Mɛ kɔɔ̌n kɛ tè ɛ seě dɛ pɛ̀tu kpaa chɛ̀ kekǎ kekǎ tuà ɛ nuǔ bo chechɛ̌a?”

²¹È Ɔ tùia u kɛ̀ɛn Ɔ je, “Kàan tèà Ě tmɛɛ̌ amo, bɛ̌ nu bǎ kɔn tè wlò popoɛ bo kplɛ bɛ̌ slě a mǒ ne, a wɔ̀le je ba nu dɛɛ doǒ bueě tu mǒ no, è plě a wɔ̀le je ba tmɔɔ̌ togbeeà ɛ̈ moo, ‘Sɔn mǒ, kpaě dìe jbǒ mɔ̀,’ ɛ mǐ tùɔn kpa.

²²Dɛ wùɛ kɔn tè a mi Něe Gbeǐ wan gbàba klě tè wlò popoɛ mǒ, a mi ɛ jěba.”

²³Ɛmo waěe doǒ mɔ̀ tà Jùsu muaa de klě Nyesoaa kǎ fòɛ bo Ɔ muaa teeba, è Nyesoaa kpatòapoo fòe klee Jùwɛ nyoo bòlibo nù dia lě Ɔ mɔ̀ ü gbɛ̀a Ɔ wan u je, “Mɔ kɔɔ̌n kɛ kpě wlòmo nìiěe noǎà plě mɔ nyeě kɛ Mò kpě do taeǒ?”

²⁴È Ɔ tùia u kɛ̀ɛn Ɔ je, “Klekle Boǒ gbà a wan, bɛ̌ nu bǎ tùǔ kɛ̀ɛn plě Ě mǐ a wlòmo sèsae tà Ě sɛ̀ɛ kpěà Ě nii noǎ wùɛà.

²⁵È tà Jɔ̀ɔ̌n sɛ̀ɛ̌a kɛ ɔɔ kpě ɔ̌ peěa nyopò ně dlǒ le? Ɔ sɛ̀a kɛě i Nyesoa mɔ̀le? Deě ɔ sɛ̀aě i tùonyugbe mɔ̀?” È dɛǒ Ɔ gbàlaa wan nɛ̀ǒ u pepeaě měne klě uu chɛ̀ slè u je, “Bɛ̌ nu bä nu i sɔn lě mǒ Nyesoa mɔ̀, è Ɔ mi ä wan gbàba ɛ̈ moo, ‘Mɛ kɔɔ̌n tè aǎ poǒa Jɔ̀ɔ̌nʼɔ tè kàan tè?’

²⁶È bɛ̌ nu bä nu klě tùonyugbe mɔ̀ ɛ kɔn bɛ moo jǐlenymi dɛ fòɛ keǒ ä mɔ̀. Mɛ kɔɔ̌n tèǒ joo nɛ̀ moo nyu wùɛ nɔ̀ po Jɔ̀ɔ̌nʼɔ tè kàan tè ɛ̈ moo ɔ mooa Nyesoaa wnɔsàɔ.”

²⁷Tèǒ nì kɔn tè kě u dǎla Ɔ je u je, “Ä se ɛ ji.” È Jùsu tùa u kɛ̀ɛn ke Ɔ je, “Ně chɛ̀à Ě se a wlòmo sèsaeba mu nyu tae nye Mǒo kpěà Ě nii noǎ wùɛà.”

²⁸È kě Jùsu dɛ̌a kpatòapoo fòe klee bòliboǒ je de Ɔ je, “Mɛ aa dlǒ le sìɛnsiɛn wɔ̀le je bɛ sàǎ kɛ kwlǎ mǒ keǒ dɛà kɛn? Ɛ kɔna jbɛju tɔ̀ɔ ɔ̈ kɔnaa jbɛjujluu sɔ̌n. Chnɛ̀ jlǒ waě tɛ̀ɛ mɔ̀ ɔ mua lě nyane jǔǒ mɔ̀, kě ɔ dɛ̌a ɔ je ɔ je, ‘Ně jǔ, dǔ jemǒ, muě chè mǒ mì konkwa nu kekɛɛà.’

²⁹È ɔɔ jǔ tùa ɔ kɛ̀ɛn ɔ je, ‘Òooǒn, Ě slě muma mu.’ Kɛɛ ɔ neaǒ ne è wlò jɛɛa ɔ tè, è nɔ̀ǒ bɔɔ̌a demǒ ɔ̈ muaě chè mǒ ɔ̈ mua konkwa mɔ̀.

³⁰È jbɛjuǒ ɔ muaě ɔɔ sɔ̌n nonɔ jǔǒ mɔ̀ ɔ̌ tmɔɔ̌a nɔ bɔ muaě chè mǒ ɔ mǐa konkwa nu. È ɔ tmɔɔ̌a nɔ ɔ je, ‘Ně gbeǐ, Ě miě mumaò.’ Kɛɛ ɔ seaě mu.

³¹Jlǔu sɔ̌nʼǒ uu nyu tae nuǔ kɛ ɔɔ gbeǐi kɛn wɔɔn dɛ?” Ù tùia Ɔ kɛ̀ɛn u je, “Nyane nyuǒ nɔ̀ nu ɔɔ gbeǐi kɛn wɔɔn dɛ.” È kě Jùsu dɛ̌a u je Ɔ je, “Kàan tèà Ě tmɛɛ̌ amo, dɛɛ doǒ nɛ̀ ɛ mono, nyopòà a je ü moo kpni kpɔnǐ dlǒ wlě tɛ̌n nyo klee gblà po nyo nù miě a nya kɛnma klě jɔkɛn deplě slè.

³²Mɛ̌oǒ joo nɛ̀ moo Jɔ̀ɔ̌n dia lě ɔ mǐa a jebo siǐan tee le, è a sea ɔɔ tè kàan tè po, kɛɛ dlǒ wlě tɛ̌n nyo klee gblà po nyo nù poa ɔɔ tè kàan tè. È tà a kea luu jě u pea lɔɔ tè kàan tè, kaǒ a je a sea aa wlè bo bitǐ a sea ɔɔ tè kàan tè po.”

³³Jùsu kpɛɛa Ɔɔ win nya Ɔ je, “A po dǎtèkpa tɛ̀ɛà nɔkǔ jebo. Ɛ kɔna jbɛju tɔ̀ɔ ɔ̈ nuaa chè fòɛ plě ɔ̈ dɔ̌a ɛɛ nano kɛn. Ɔ sàla chèǒ seɛ̌ɛ ngmì je ɔ̌ blǔa bǐtìe klě seɔ̌ wlòmo ɛ̈ kɔn wan u mia lěe nano jɔ̌ǒ pnɔɔ̌ma plě ɔ̌ poa ja tmɔ koǔ keǒ chèǒ ɛɛ jǐ mɔ̀ tùtuɛ mɔ̀ ɔ̌ dǔa chèǒ mǒ ɔ̌ nyea ɛ jlě nu nyopò tùu u mǐa ɛ konkwa dlǒ mɔ̀ kpa dɛ bɛ̈ sɔnaě ɛ wlòmo u mǐa ɔ blěe nenɛ ɔ kɔnaǒo ɔ̀ nye, è nɔ̀ǒ muaě blǒ tɛ̀ɛ kɛn tǐnma.

³⁴Tà nano chɛ̌n tǐ nyniaǒo, ɔ dboa ɔɔ nyebajle klě u mɔ̀ ɛ̈ di ɛɛ numa ɔ blěe wakǎ ɔ kɔnaa klě u mɔ̀ u mia lɛ ɔ̀ nye.

³⁵Kɛɛ u kmea ɔɔ nyebajleǒ ǔ bea u nyuu do, ù dbǎla u nyuu do, è do tɔ̀ɔ nɔ̀ u beea seɛ̌ ɔ̈ kǒa.

³⁶È chè kɔn nyuǒ ɔ̀ dboa nyebajle tùu de ü fòaa ü sìnʼaǒo nyane nyoǒ mǒ, kɛɛ dɛɛ doǒ nɛ̀ u nua u mǒ de.

³⁷È demǒ bɔɔ̌ dɛ ɔ nua kɛ̀ɛ nɛ̀ moo ɔ dboa ɔɔ jbɛjuju klě u mɔ̀ ɔ je, ‘Bɛ̌ nu bǔ jě ně jǔà u miǒ ɔ tùba.’

³⁸Kɛɛ tà jlě nu nyoǒ u jěa ɔɔ jǔǒ, è kě u dɛ̌a u je, ‘A jè jǔ miǎ noǎ wùɛ win kwa kɔnma nɔ̀ǒ diě, a diě bä dbǎ lɔ ɛ̈ di ɛɛ numa ɔɔ konkɔn noǎà ä mǐ i je chlì.’

³⁹Ii tè u kmea nɔ ǔ sàlaǒ ɔ chè kɛn ǔ dbǎla ɔ.

⁴⁰Bɛ̌ nu bo chè kɔn nyuǒ bɔ̌ di kɛ lě, mɛ aa wlò je ɔ miǐ jlě nu nyoǒ mǒ numa?”

⁴¹U tùa Ɔ kɛ̀ɛn u je, “Ɔ mi wlòo jǐlenymi nyopòǒ dbǎba, ɔ mǐ ɔɔ chèǒ mǒ dǔ ɔ mǐ ɛ jlě nu nyo tùu nye üà bo nano chɛ̌n tǐ bǐ nyniǒo ü miǒ ɔ blěe wakǎ sàba u mǐ ɛ ɔ̀ɔ nye.”

⁴²È Jùsu tùa u kɛ̀ɛn Ɔ je, “Aǎ slè kɛ lɛ klě Nyesoaa win wlòmo le? Kě i dɛ̌ i je, ‘Tiblěà kǎ poɔ bɛtɛ̌ɛ lee je nɛ̀ kɔn tè kma klě demǒ bɔɔ̌ tǐ wlòmo. Ɛ moo Nyesoaa chɛ̀ɛ nunu dɛ, è ɛ moo wan le mae dɛ keǒ ä mɔ̀.’ ” (Ps 118.22-23)

⁴³È Jùsu je, “Tèǒ nì kɔn tè Ě tmɛɛ̌ amo, Nyesoa mi amo Jùwɛ nyo win kwa konkɔn bɔ̌ba, kɛɛ Ɔ mi kuodakwɛ̌ win kwa kɔnma ü mi Ɔɔ konkwa numa.

⁴⁴Nyuà ɔ̈ mii wɔ̀ɔn beba keǒ Tiblěǒ kɛn Ɛ mi ɔ le waeba, è nyuà ɔ̈ Tiblěǒ Ɛ mii kɛn beba Ɛ mi ɔ le changmnaema.”

⁴⁵Tà Nyesoaa kpatòapoo fòe klee Fɛlesǐi wǎn wɔ̌naa Ɔɔ dǎtèkpeǒ, ù jboa ili ɛ̈ moo nù Ɔ sɛ̀nʼa nynɛ̌.

⁴⁶Tèǒ nì kɔn tè u jlɛ̌ bu kmea Nɔ, kɛɛ u pea diblɛ̌ɛ fano. Mɛ̌oǒ joo nɛ̀ moo diblɛ̌ǒ u poa Jùsuu tè kàan tè ɛ̈ moo Ɔ mooa Nyesoaa Wnɔsàɔ.