Read Grebo, Northern Matiɔ̌n 27 Bible Online

Matiɔ̌n 27 - Grebo, Northern bible

Matiɔ̌n 27

¹È tà chnɛ̀ gbàlaa le ɛɛ kènta gbèii, Nyesoaa kpatòapoo fòe klee Jùwɛ nyoo bòlibo wùɛ pea ɛ ble ke u mǐaa Jùsu dbadbǎ nu.

²U pea Ɔ chěen sonwe le ǔ dǔa Ɔ mǒ ǔ kpalaě Ɔ klě Wlǔmɔ nyoo kòngmna nyefòɛ Pàlɛ̌te mɔ̀.

³È tà Jùdǎse sàlaěe Jùsu bo demǒ u bɛ̌a Lɔɔ kokǒ wun kɛn ɔ wɔ̌na nii, è wɔle beaě ɔ mǒ no keǒ dɛ ɔ nuaa mɔ̀ ɔ̌ jala sěbla kpěnʼe wlò tùo pùǒ de klě Nyesoaa kpatòapoo fòe klee Jùwɛ nyoo bòlibo mɔ̀.

⁴È kě ɔ dɛ̌a ɔ je, “Ě wlǎ tè keǒ Nyuà see dɛ nu bo diě Ɔ bo demǒ sà keǒ bu dbǎ Lɔ.” Kɛɛ kě u dɛ̌a Jùdǎse je u je, “Mɛ ä kɔɔn noǒ kɛě ɛ mɔ̀? Nè chɛ̀ɛ tèǒo kɛ̀.”

⁵Ii tè Jùdǎse dǔa wlěǒ mǒ ɔ̌ gblàla i le klě Nyesoaa kǎ fòɛ bo, è nɔ̀ǒ sɔnaǒ mǒ ɔ̌ mua ɔ̌ pea ɔɔ chɛ̀ dbǔ dɔ ɔ̌ kǒa.

⁶È kpatòapoo fòe dǔa wlěǒ mǒ, kě u dɛ̌a u je, “Ɛ moo äa tetě wlawlǎ keǒ bä po lě wlěà Nyesoaa kǎ fòɛɛ mǒ tèe dɛ wan. Mɛ̌oǒ joo nɛ̀ moo u tɔ̀n i jleě Tùonyugbee fònfno.”

⁷Ii tè u poaǒ win tàa do ǔ tɔ̀nʼa blǒ tìe jagbia mɔ nyu mɔ̀ nɛ̀ kɔn kɛn u tùiaǒ dakpě ble.

⁸Dɛǒ nɛ̀ kɔn tè blǒ tìeǒ u dɛɛ kekɛɛ ɛ Nymɔ Blǒ.

⁹Dɛǒ nɛ̀ nu Nyesoaa win ǐ jaěǒ ï Ɔ poa Ɔɔ wnɔsàɔ Jɛ̀lemaeǎ wan seela tǐ jleě ï dɛ̌a bòo ɛ̈ moo, “U dǔa sěbla kpěnʼe wlò tùo pù mǒ ï umo Ǐsòwɛ̌ kwɛɛn tbalaa keǒ Ɔ mɔ̀

¹⁰ǔ tɔ̀na i jagbia mɔ nyuu blǒ tìe je wòje ke Koɔn nua ɛ mǒo tmɔɔ̌a.” (Zech 11.12-13, Jer 32.6-9)

¹¹Dɛɛ doǒ nɛ̀ u kɛ̀naě wlòmo bo ǔ dǔa Jùsu mǒ ǔ kpalaě Ɔ Pàlɛ̌te jemǒ ɔ̈ mooa Wlǔmɔ nyoo kòngmna nyefòɛ, è ɔ gbɛ̀a Jùsu wan le ɔ je, “Deě Mò moo kɛ Jùwɛ nyoo Klɔ̀ba?” È Jùsu tùa ɔ kɛ̀ɛn Ɔ je, “Ii teěn nìǒ bòɔ.”

¹²È Nyesoaa kpatòapoo fòe klee Jùwɛ nyoo bòlibo boɛa Jùsu win fǒ měne ǔ pea Ɔ tè dlǒ le, kɛɛ Ɔɔ̌ boɔa wien.

¹³È Pàlɛ̌te gbɛ̀a Ɔ wan ɔ je, “Tè wùɛà u boɛǒ Mòo jleě měne Nè wɔ̌n kɛ lie?”

¹⁴Kɛɛ Ɔɔ̌ boɔa wien, ii tè ɛ kaenʼa Pàlɛ̌te wlò le chɔɔ.

¹⁵È klě jlǒ wùɛ wlòmo bǔ mu Dlǒ Mǒ Sìin Didi Dɛɛ de ngmnengmnɛ̌ kɛn, Pàlɛ̌te ni uu blětà dɛ ɔ̌ tɛ nyuu do bo klě nyopòà ɔ poo wùlo slè ɔ̈ u jlɛ̌ɛ.

¹⁶È klě tǐǒ wlòmo ɛ kɔna kpnii jǐlenymi jbɛju tɔ̀ɔ ü dɛɛa Balabɔ̀ nɔ̀ u poa wùlo.

¹⁷È tà diblɛ̌ wɛ̀aa de, è Pàlɛ̌te gbɛ̀a u wan ɔ je, “Mɔ a jlɛ̌ bo tɛɛ̌ kɛ bo klě tǐà wlòmo, Balabɔ̀ kɛ le, deě Jùsu Ɔ̈ u dɛɛ Nyesoaa Tentǎn Jǔ?”

¹⁸Tè kɔn tè ɔ gbàla imoo tèǒ wan nɛ̀ moo ɔ jia ɛle ɛ̈ moo u jalaě ɔ Jùsu mɔ̀ klě chea tǔn wlòmo, ii tè bɔ̌ kea ɛ jě ɔ̀ je Jùsu Nɔ̀ u miia jlǎba keǒ bɔ tɛa bo.

¹⁹Tà Pàlɛ̌te neěa jè lěe ɔɔ blilǐ tù kpǎta wlòmo bo ɔ fea luu bu tùa lɔɔ kɛ̀ɛn, è tuposà sɔnaě Pàlɛ̌tee nynɔ mɔ̀ mǒ kě ɛ dɛ̌a ɛ je, “Jbɛjuǒ Ɔ se tè wlǎ, nè ni Ɔ dɛ mǒ. Mɛ kɔɔ̌n tèǒ joo nɛ̀ moo tǒn jlǒ waěà ä sɔn lěe wlòmo Ě ja jajie kukǔ ɛ̈ pa mǒo wan le keǒ Ɔɔ tè mɔ̀.”

²⁰Klě ɛmoǒ wlòmo Nyesoaa kpatòapoo fòe klee Jùwɛ nyoo bòlibo nyenynɛ̌ɛa diblɛ̌ǒ u je a tmɔɔ̌ ɔ Balabɔ̀ nɔ̀ bɔ tɛ bo, è Jùsuǒ Nɔ̀ bɔ dbǎ!

²¹È Pàlɛ̌te blala bo de ɔ̌ gbàla u wan ɔ je, “U tàii sɔ̌nʼà mɔ a jlɛ̌ boǒ tɛɛ̌ kɛ bo keǒ a mɔ̀?” Ù tùa ɔ kɛ̀ɛn de u je, “Balabɔ̀!”

²²È ɔ gbàla u wan de ɔ je, “È mɛ a jlɛ̌ bo nuǔ kɛ Jùsu mǒ Ɔ̈à u dɛɛ Tentǎn Jǔ?” U tùa ɔ kɛ̀ɛn u je, “Kɔǒ Ɔ pète bɛ̌ tu jleě!”

²³Kɛɛ ɔ gbàla u wan de ɔ je, “Mɛ̌oǒ? Mɛ sɛje Ɔ nuǔ kɛ ɛ̈ monoǒ kenkan dɛ?” Kɛɛ u pnɛɛ̌aě jɔ mǒ chɔɔ u je, “Kɔǒ Ɔ pète bɛ̌ tu jleě!”

²⁴Tà Pàlɛ̌te jěa lɛɛ ɛ̈ moo ɔɔ win slě wɔ̀ bi sàlaǒ dɛ keǒ u jleě mǒ plě u tùngmaea jale jejǎea klě uu chɛ̀ slè, è ɔ dǔa ně mǒ ɔ̌ jlala kwete keǒ u jemǒ, kě ɔ dɛ̌a ɔ je, “Mǒà Ě se tè jɛɛa kɔn keǒ Jùsuu kokoɛ̌ mɔ̀, kɛɛ amo Ɔɔ tè jɛɛa neǒ dlǒ.”

²⁵È nyopò wùɛ tùia ɔ kɛ̀ɛn u je, “Ɔɔ tè jɛɛaa nymɔ bɛ neǒ ä dlǒ klee äa jlǔu jlǔu chɛ̀.”

²⁶Pàlɛ̌te jlɛ̌ bɔ blooa nyopòǒ uu plɔ, ii tè kě ɔ nua Balabɔ̀ bo tetɛ keǒ u mɔ̀, è Jùsu Nɔ̀ ɔ sàla fǎe kɛn ɔ̌ nyea Ɔ tabɔ̀ bu muaǒ Ɔ pète bɛ̌ tu jleě kɔ.

²⁷È Pàlɛ̌tee tabɔ̀ wùɛ kpalaě Jùsu kòngmnaa kǎ fòɛɛ slè ǔ tbɛɛa Ɔ dǐ

²⁸ǔ sàla Ɔ wlawlě měne ǔ pea Ɔ manǐwlù wlawlǒ pɛ̀tu mǒ.

²⁹È u nua dɔwiǎ chùnɔɔ gbàkla nɛ̀ u tùa Ɔ dlǒ ǔ tùaě Ɔ tu kwete mǒ ǔ kwɛa Ɔ kwne jemǒ ble wòje keà u nii klɔ̀ba ǔ pea Ɔ pà kɛn, kě u dɛ̌a u je, “Hehejoo, Jùwɛ nyoo Klɔ̀ba!”

³⁰È u wnɛa Ɔ tontmɔ ǔ sàla Ɔ tuǒ kwa ǔ peeaǒ ɛ Ɔ̀ dlǒ le ǔ sèsɛɛa ɛ kwete měne.

³¹Tà u wɔ̀la Ɔɔ pà kɛn popoɛ mɔ̀, u sàla Ɔ wlawlǒǒ mǒ ǔ poa Lɔɔ chɛ̀ɛ wlawlǒ mǒ de, è Nɔ̀ǒ u kpala u mǐaǒ Ɔ pète bɛ̌ tu jlěe kɔ.

³²Tà u kea lěe diěǒ wlòmo sonwɛ u keaa mi, ù klee jbɛju tɔ̀ɔ ü dɛɛ Saemɔ̌ ɔ̈ sɔnaěe diěǒ moo Sawlinì mǒ nù mɔɔa ǔ kpaea ɔ kbě bɔ blěa pète bɛ̌ tuǒ keǒ Jùsu mɔ̀.

³³Tà u nyniaǒo tùɔnʼǒ u dɛɛ Kɔkɔ̀ta kɛn ɛ̈ sɛ̀nʼɛ nynɛ̌ Dlǒ Kankǒ Tùɔn kɛn,

³⁴keǒ u nyeeaǒ Jùsu nmɔ u chìseeaa wan nonǒ noǎa, kɛɛ tà Ɔ kɔla ɛɛ mɛ je sosǒ, Ɔ je Ɔ sea ɛ nǎ.

³⁵Tà u kɔlaǒ Ɔɔ pète bɛ̌ tuǒ jleě, è Ɔɔ daleǒ nì u pooa nòkpo kɛn ǔ ploa li.

³⁶Tà u wɔ̀laa dɛǒ mɔ̀, è nùǒ nea bo ǔ tùia Ɔ jǐ.

³⁷È keǒ Jùsu dlǒ mǒ keǒ pète bɛ̌ tuǒ kɛn u chlěa win be ïà u je ï mooa Ɔ tè jɛɛa, kě i dɛ̌a i je, “NYUÀ NƆ̀ MOO JÙSU Ɔ̈ MOO JÙWƐ NYOO KLƆ̀BA.”

³⁸È tàii sɔ̌n ü mooa dɛ kukǔ nu nyo nù u mǎna Jùsu kɛn bo u kɔlaǒ pète bɛ̌ ti jleě ke, do neea Lɔɔ dilǎ son mɔ̀, è do tɔ̀ɔ neea Lɔɔ gbàpe son mɔ̀.

³⁹Nyopò wùɛǒ nɛaa snǔǒ mɔ̀ ü sìinʼaǒo tàǒ bǔ kea Jùsu jě, u blɛa dlě je le ǔ tbɛa Ɔ je le ǔ pea Ɔ pà kɛn,

⁴⁰kě u dɛ̌a Ɔ je u je, “Ɛ̀nhɛɛ̀, dɛ̌ jè mia kɛ Nyesoaa kǎ fòɛ blǒ mǒ wlǎba mìa ɛ po klě chnɛ̀ jlǒ wěe tan wlòmoò, dɛ̌ Mòǒ jo? Gblà Dìe! Sɛje bɛ̌ nu Bò moo Nyesoaa Jǔ, è Bò sàě Dìe pète bɛ̌ tuǒ jleě!”

⁴¹È dɛɛ doǒ nɛ̀ Nyesoaa kpatòapoo fòe klee teteǎ tee nyo klee Jùwɛ nyoo bòlibo nia ke ǔ pea Ɔ pà kɛn, kě u dedɛ̌ɛa je le,

⁴²“Ɔ gblɛ̀ nyopò tùu, kɛɛ Ɔ se Ɔɔ chɛ̀ gblàgbla wɔ̀! Bɛ̌ nu sɛjesɛ Bɔ̌ moo Ǐsòwɛ̌ kwɛɛn Klɔ̀ba, è Bɔ sàǒ Ɔɔ chɛ̀ pète bɛ̌ tuǒ jleě kèkeà ä mǐ Ɔɔ tè kàan tè po!

⁴³Ɔ kpae Nyesoa wlò plě Ɔ̌ je Ɔ̌ moo Nyesoaa Jǔ. Bɛ̌ nu Nyesoa Bɔ̌ ke Ɔ jlɛ̌, è Bɔ gblà Lɔ!”

⁴⁴È nyopòo chɛ̀ǒ ü klee Ɔɔ sɔ̌n u kɔaǒo pète bɛ̌ tiǒ jleě u bea nyopòǒ uu win kɛn ke ǔ pea Ɔ pà kɛn.

⁴⁵È keà nyu kɛpǒo jǐ, klě wɛnʼɛ blǒ mǒ wulee tǐ wlòmo, è blǒ wùɛ ɛ̀ bea kɛn kwijlě kpǎ fòɛ ɛ̌ kpala ɛ kpa ɛ̌ nua àwɛɛ tan nenɛ klě wanpno wlòmo.

⁴⁶Tǐà ɛ blɛɛaa àwɛɛ tan nenɛ mɔ̀, Jùsu pnaěaě jɔ mǒ Ɔ je, “Ilà, ilà lɛma sabatnè!” ɛ̈ sɛ̀nʼɛ nynɛ̌ “Ně Nyesoa, Ně Nyesoa, mɛ kɔɔ̌n tè sɛ̀ɛ̌ kɛ Mǒ jleě mɔ̀!” (Ps 22.1)

⁴⁷È nyopòo tìeǒ nynanaǒo tàǒ bo tà u wɔ̌naa winʼǒ, kě u dɛ̌a u je, “Nyesoaa Wnɔsàɔ Ilaejɔ̀ǒ Ɔ dɛ.”

⁴⁸È tǐi doo tǐ jleě uu nyuu do kpala plùplɛ ɔ̌ jalaě dlǒ pìnpni nì ɔ tùa tu jleě ɔ̌ nynǎnaě i weě ně mɔ̀ nɛ̀ ɔ tùaǒ Jùsu wien.

⁴⁹Kɛɛ nyopòo tìeǒ neaǒo kě u dɛ̌a u je, “A sɔnʼǒ Ɔ mɔ̀ mǒ ä mǐ ɛ jě bɛ̌ nu Ilaejɔ̀ bɔ̌ diě diba ɔ mǐ Ɔ gblà.”

⁵⁰È Jùsu pnaěaě jɔ mǒ de Ɔ̌ ngmnana fònfno.

⁵¹Klě tǐi doǒ wlòmo dalo kpoklǒ fòɛǒ nea lěe Nyesoaa kǎ fòɛ bo è nɛ̀ǒ klǎla wan sɔɔnʼě ɛɛ dlǒ mǒ bò diɔ bobo, ɛ nua peěnʼe sɔ̌n ɛ̈ tee ɛɛ ɛ̈ moo nyu wùɛɛ fɔ̌ kna je keǒ bɔ nyniǒ Nyesoa jemǒ ɛ̈ see Nyesoaa bodiɔpòo do. È blǒ sèkea le, seɛ̌ klɛ̌a wan le.

⁵²È sɛklɛ bǐtìi knana je le, Nyesoaa nyopò fòfoaà kǒaa uu tìe duǐa jeměne

⁵³ǔ sɔnaě uu sɛklɛ bǐtìiǒ wan měne. È tà Jùsu dǔaa jemǒ, è nùǒ mua lě ngmà je ne diěǒ moo Jlǔsnɛ wlòmo, nyopò fòfoa kpalaě u jleě mɔ̀.

⁵⁴È tà Wlǔmɔ nyoo tabɔ̀ klee uu jǐgbàdiɔ ü tùiaa Jùsu jǐ mɔ̀ u jěaa blǒo de sèkea klee noǎ wùɛ ï kpalaa tùɔn, è kètekee bea u bo wan, kě u dɛ̌a u je, “I moo kàan tè Nyuà Ɔ moo Nyesoaa Jǔ!”

⁵⁵Ɛ kɔna nyno fòfoa ü sɔnaa Jàlalǐi wakǎ kɛn mǒ ü sɛ̀ɛa pnɔɔ Jùsu měne, nù nynanaě nya bo ü jěa Lɔ.

⁵⁶Klě nynoǒ slè klě Mɛwlě Mɛkɛniì nea lě klee Mɛwlě ɔ̈ monoo Jìmǐse klee Jòsɛ̌foo naǎ plě Sɛbɛ̀dii jlǔu naǎ.

⁵⁷Klě wìtikaǒ wlòmo pònpan jbɛju tɔ̀ɔ ɔ̈ monoo Jòsɛ̌fo ɔ̈ sɔn lěe diěǒ moo Alamatià kɛn mǒ ɔ̈ mooaa Jùsuu mɔ̀ na nyu ke,

⁵⁸nɔ̀ mua lě Pàlɛ̌te mɔ̀ ɔ̈ sòala Jùsuu kokǒ fǒ, è Pàlɛ̌te nyea nyopòǒ kpě keǒ bu nyea Nɔ ɔ̀.

⁵⁹È Jòsɛ̌fo dǔa Ɔɔ kokǒ fǒǒ mǒ ɔ̌ finfiɛ̌ɛa ɛ jǐlenmɔ dalo,

⁶⁰è Nɔ̀ǒ ɔ dǔa mǒ ɔ kpalaě ɔɔ chɛ̀ɛ sɛklɛ bǐtìe jajlo wan ɛ̈à ɔ nua ɔɔ nyopò u blǔaa klě seɔ̌ wlòmo keǒ ɔɔ chɛ̀ mɔ̀. U gblìseea seɔ̌ fòɛ měne ǔ kana bǐtìeǒ je, è nùǒ mua.

⁶¹È Mɛwlě Mɛkɛniì klee Mɛwlě tɔ̀ɔ nù siaǒ ɛmo sɛklɛ bǐtìeǒ wien ǔ nea bo klě ɛɛ snǔ wakǎ tɛ̀ɛ mɔ̀.

⁶²Tà chnɛ̀ tɛ̀ɛ gbàlaa le, ɛ mooa Sɛ̌ɛ̀de ɛ̈ moo Nyesoaa defɛ chnɛ̀ jlǒ. Klě chnɛ̀ jlǒ waěǒ wlòmo Nyesoaa kpatòapoo fòe klee Fɛlesǐi wǎn muaě Pàlɛ̌te mɔ̀,

⁶³è kě u dɛ̌a u je, “Chì kpa ämo, i beě ä mǒ wlò tǐà jleě sen le tmɔ̌ Nyuà Ɔ neěa jèe kmɔ̌, winʼà nì Ɔ boɛa ɛ̈ moo Bɔ̌ kǒa klě chnɛ̀ jlǒ wěe tan nenɛ wlòmo Nyesoa miǎě Ɔ kǒla mǒ sàba Ɔ miǎ kmɔ̌ ne.

⁶⁴Tèǒ nì kɔn tè tmɔɔ̌ nè tabɔ̀ bu tù sɛklɛ bǐtìeǒ jbooa u mǐ ɛ jǐ mɔ̀ tù klě chnɛ̀ jlǒ wěe tan wlòmo, nɛ̀ bɛ̌ se nu Ɔɔ mɔ̀ cheěn nyo kɔn bu diě u mǐ Ɔɔ blǒ fǒǒ jlǐ, u mǐ nyopò tmɔɔ̌ no ɛ̈ moo, ‘Ɔ dǔ mǒ je.’ È senʼǒ i miǒ le sìnma i miǒ ii nyane noǎǒ Ɔ tmɛ̌aa mǒ sìn.”

⁶⁵Ii tè Pàlɛ̌te tmɔɔ̌a nu ɔ je, “A kpa tabɔ̀ a mǐ sɛklɛ bǐtìeǒ jǐ mɔ̀ tù ke ɛ nuě ɛɛ wòwɔ.”

⁶⁶Kě u nua mumuɛ ǔ tùa bǐtìeǒ jbooa plě ǔ tùaǒ tabɔ̀ bo.