Read Grebo, Northern Matiɔ̌n 6 Bible Online

Matiɔ̌n 6 - Grebo, Northern bible

Matiɔ̌n 6

¹È dɛ tɛ̀ɛ Jùsu boɛa uu je de nɛ̀à Ɔ je, “A tùě jǐ bo aa Nyesoa dɛɛ nunuɛ aǎ diǒ ɛ klɔ̀ jemǒ kpa keǒ bu mǐ aa nynɛ̌ le po tè. È bɛ̌ tù ɛ tè bǎ ke ɛ ni, è aa Gbeǐǒ neěe jɔkɛn Ɔ se snǒ sàe dɛ kɔnma mu keǒ a mɔ̀.

²Tèǒ nì kɔn tè bò ke sònwɛ nyu dɛ nyema mi, nè pe ɛɛ sàe wòje keǒ ä jěè kɛn ä daà kàan chènyɔ Nyesoa nyo nii klě Nyesoa keǐ bo ble le klee keǒ snǔ fòɛ wakǎ mǒ ɛ̈ di ɛɛ numa nyopò mǐ u bae le. Tèe jleěà Ě tmɛɛ̌ amo, u blěe snǒ sàe dɛ wùɛ u kɔnʼɔ nɛ̀ǒ.

³Kɛɛ bɛ̌ nu bò ke nè kàan dɛǒ ni, nè sonwɛǒ nyu wùɛ mɔ̀ mǒ ɔɔ̌ jiǒ ɛ dɛ kɛn

⁴ɛ̈ di ɛɛ numa nè nyee dɛǒ ɛ miě je wɛ̌ tǔn wlòmo ne mì ɛ ɔ̀ nye. È nè Gbeǐǒ neěe jɔkɛn Ɔ̈ jěe je wɛ̌ dɛǒ nùu, Ɔ miì snǒ sàba klě klɔ̀ slè.”

⁵È kě Jùsu dɛ̌a u je de Ɔ je, “Bɛ̌ nu bǎ klě Nyesoa mɔ̀ boɛ, aǎ wě je ä jěè kɛn ä daà kàan chènyɔ Nyesoa nyo bü klě Nyesoa mɔ̀ boɛ ü jlɛ̌ mǒ bü nyna lěe Nyesoa koǔ bo klee bü nynaǒ snǔ fòɛɛ kotoee mǒ bo ɛ̈ di ɛɛ numa nyopò mǐ u jě. Tèe jleě nìà Ě tmɛɛ̌ amo, u blěe snǒ sàe dɛ wùɛ u kɔnʼɔ nɛ̀ǒ.

⁶Kɛɛ bò keě Nyesoa mɔ̀ boɛ, paě nè blò mǒ, è bò poǒ chnu plě mìě nè jɔkɛn Gbeǐǒ mɔ̀ boɔ Ɔ̈ neǒ mòo wakǎ mǒ baǎ je nè do, è Ɔmoǒ Ɔ̈ wɛ̌n nèe je wɛ̌ tèǒ bòɛɛ, Nɔ̀ miì snǒ sàba klě klɔ̀ slè.

⁷Bɛ̌ nu bǎ klě aa Gbeǐ mɔ̀ boɛ, aǎ boɛ win ï see dɛ kɛn bo nyna, noǎǒ nì nyopò ü monoo se Nyesoa ji nyo u ni. Uu wlò je win fòfoaa le boɔboɔǒ nɛ̀ bǔ nu plě Nyesoa mǐ nuu win wɔ̌n.

⁸Aǎ ni dɛ ɛɛ̌ wě lu je. Mɛ̌oǒ joo nɛ̀ moo aa Gbeǐǒ neěe jɔkɛn plě a mǐ Ɔ wan gbà dɛɛ tè, Ɔ ji dɛǒ a sòɛɛ le.

⁹Tèǒ nì kɔn tè bǎ klě Nyesoa mɔ̀ boɛ, kě ba dǎ u je, ‘Äa Gbeǐ Nyesoa Mò neěe jɔkɛn, Nɛ bo nyopò bu nyeǒò tùtuɛ wòje Ngmà Je Ne Nyesoa.

¹⁰Nu Nè win kwa konkɔn bɛ kɔn äa kmɔ̌ neneɛ win kwa. È keǒ Nè kɛn wɔɔn dɛ ɛ nii klě jɔkɛn kě bɛ nu kělɔ kmɔ̌ mɔ̀.

¹¹Nye ä didi dɛ ɛ̈ ä jlɛ̌ɛ keǒ chnɛ̀ jlǒ waěà mɔ̀.

¹²Poo ä dɛ kukǔ ä nii ɛɛ tè wlò le wòje keǒ ä nii nyu bɔ̌ nu ämoo dɛ kukǔ mǒ ä pee ɔɔ tè wlò le.

¹³È Nè kpɛě ä měne tèntɛn slè, kɛɛ gblàě ä dɛ kukǔ slè. Mɛ̌oǒ joo nɛ̀ moo Mòà Mò moo Klɔ̀ba Ɔ̈ kɔn win kwa klě kpě klee tè jǐ boaboǎ wlòmo tǐ wùɛ mɔ̀, kě bɛ ne.’ ”

¹⁴È Jùsu kpɛɛa Ɔɔ win nya Ɔ je, “Bɛ̌ nu bǎ poo nyopò tùu tè wlò le üà nuu dɛ kukǔ keǒ a jleě mǒ, è aa Gbeǐǒ neěe jɔkɛn Ɔ mi aa tè wlò le pooba ke.

¹⁵Kɛɛ bǎ se ɛ kɛn wɔɔn no keǒ ba poo nyopò tùu tè wlò le, è aa Gbeǐǒ neěe jɔkɛn Ɔ se aa tè wlò le pooba mu ke.”

¹⁶È kě Jùsu dɛ̌a de Ɔ je, “Bɛ̌ nu bǎ ke chìn keǒ Nyesoa mɔ̀ boɔboɔ mɔ̀, aǎ ni ɛ wòje keǒ ä jěè kɛn ä daà kàan chènyɔ Nyesoa nyo ni ɛɛ ǔ pee wɔle je le ǔ tee ɛɛ klě klɔ̀ slè nyopò ji ɛɛ ɛ̈ moo u chìn ni ɛ̈ di ɛɛ numa u mǐ u bae le. Ě tmɛɛ̌ ane, u blěe snǒ sàe dɛ u kɔnʼɔ nɛ̀ǒ.

¹⁷Kɛɛ bɛ̌ nu bò ke chìn, nè pe ɛ je le. Pnè mì chnɔ̌ gbee jleě po

¹⁸ɛ̈ di ɛɛ numa nyu wùɛ ně di ɛ ji ɛ̈ moo chìn ni, ɛ̀ sìnʼǒ nè Gbeǐi doǒ neěe jɔkɛn. È Ɔɔ doǒ Ɔ̈ jěe dɛǒ nìi klě je wɛ̌ tǔn mǒ Nɔ̀ miì snǒ sàba klě klɔ̀ slè.”

¹⁹È kě Jùsu dɛ̌a u je Ɔ je, “Aa mǒ tèe dɛ aǎ tùi ɛ lɔ kělɔ kmɔ̌ɔ mɔ̀ bo, tàà chèaween klee bɔ̀gbe bɛ̌ lɔɔ noǎ je le, tàà jlǐ nyo wɛ lɔɔ keǐ ǔ jlǐi.

²⁰Kɛɛ dɛɛ do ba nuu nɛ̀à, aa mǒ tèe dɛǒ klě ba tùě ɛ jɔkɛn bo, tàà bɔ̀gbe iǐ bɛ̌ lěe noǎ je le plě chèaween iǐ nymiiěe noǎ jǐ le, tàà jlǐ nyo uǔ muěe uǔ waa keǐ uǔ jlǐi.

²¹È tè kɔn tè Ě boɛ amoo tèà je nɛ̀ moo tàà nè mǒ tèe dɛ neǒo keǒ nè wlò wùɛ pɛnʼǒ bo.”

²²È Jùsu kpɛɛa Ɔɔ win nya Ɔ je, “Jleě nɛ̀ moo fǒà ɛɛ nǎpe, ii tè bɛ̌ nu nè jleě bɛɛ̌ kma, è kɔ̀n bò jě le tɛɛ.

²³Kɛɛ bɛ̌ nu nè jleě bɛ̌ ke kmɛ, è slè wɔ̀ bò jě le tɛɛ, kwijlě sosǒ kɔn bɛ jiěè jǐ měne. Ii tè dɛɛ doǒ nɛ̀ ɛ mono, nè sùsuǒ ɛ̈ neě mòo mǒ bo kwijlě bɛ̌ jiě ɛ měne, è nè wlò wùɛǒ ɛ kɔn bɛ jǐ dɛ kukǔ kɛne.”

²⁴È kě Jùsu dɛ̌a u je de Ɔ je, “Nyuu do slě wɔ̀ bɔ neeě chì kpa ämopòo sɔ̌n bobo. Ɔ mi do faenma ɔ mǐ do mǒ noɛɛ ne plě ɔ miǒ do tùtuɛ nyema ɔ miǒ doo tè le sàe le. Dɛɛ doǒ nɛ̀ ɛ mono, a slě wɔ̀ ba neě Nyesoa bobo plě ba neě kmɔ̌ɔ noǎ bobo.

²⁵Tèǒ nì kɔn tè Ě tmɛɛ̌ amo, aǎ tùi aa chɛ̀ kèjle keǒ dɛ a mii diba klee dɛ a mii nǎma klee dɛ a mii mǒ peba ii tè mɔ̀. Aa fònfnoo tè se kɛ kma ɛ seǒ didi dɛ mǒ sìn le? Plě fǒo tè se kɛ kma ɛ seǒ dale mǒ sìn le?

²⁶Ba tanʼě noeǒ ï neěe jɔ mǒ mɔ̀le. Iǐ dɔ̌ dɛ plě iǐ chɛ̌n dɛ bi tùu bo klě wùlo, kɛɛ aa Gbeǐǒ neěe jɔkɛn Ɔ sɛ̀ didi dɛ tàmo keǒ i mɔ̀ kaǒ. Aa tè se kɛ kma chɔɔ i seǒ noe mǒ sìn le?

²⁷È aa nyu tae wɔ̀le je kokoɛ̌ɛ kèjle bɛ keě kɛ ni bɔ̈ poǒo waěe do keǒ ɔɔ kmɔ̌ neneɛ dlǒ mǒ?

²⁸È mɛ kɔɔ̌n tè kèjle niǐ kɛ amo keǒ dalee tè mɔ̀? Ba tanʼǒ keǒ tichɛble nii kunkuɛn mɔ̀le klě kwlǎ dlǒ, iǐ nu konkwa plě i se ii chɛ̀ dba.

²⁹Kɛɛ Ě tmɛɛ̌ ane, kàan tè Klɔ̀ba Sanemɔ̌ pàna ne, kɛɛ kaǒ ɔɔ dalee jǐ le nmɔnmɔ sea tichɛbleǒ ii jǐ le nmɔnmɔ kɛn jɛɛ le.

³⁰Bɛ̌ nu bo Nyesoa Bɔ̌ ke bò kwlǎ kpnekpnɛ̌ ni ɛ̈ neěe fle mǒ ɛ̈à kɔn blěe chnɛ̀ jlǒ waě nee do ɛ̈ mi kàan kǒba, è aa wlè je Ɔ se kɛě aa tè mɔ̀ kɔn le? Aa tè wlò popoɛ chɛɛ̌n mǒ no!

³¹Tèǒ nì kɔn tè aǎ gbɛ̀ aa chɛ̀ wan le ɛ̈ moo, ‘Mɛ ä miǐ kɛ diba? Mɛ ä miǐ kɛ nǎma? Mɛ ä miǐ kɛ mǒ peba?’

³²Dɛǒ nɛ̀ nyopòà moo se kàan tè po nyo u ni. È dɛ tɛ̀ɛ mǎǒo de nɛ̀ moo aa Gbeǐǒ neěe jɔkɛn Ɔ ji ɛle noǎ wùɛ a sòɛɛ.

³³Ii tè klekle dɛ ba nuu nɛ̀ moo ba paeě aa die Nyesoa bobo, a mǐ dɛ wùɛ Ɔ jlɛ̌ ba nuu nu. È dɛ wùɛ a mii sòaba Ɔ mi ɛ tàmo sàba keǒ a mɔ̀.

³⁴Tèǒ nì kɔn tè kàn noǎa kèjle bɛɛ̌ ni amo. Mɛ̌oǒ joo nɛ̀ moo ɛmo waěǒ ɛ mi ɛɛ chɛ̀ɛ tɔ̀n poba. Sɔ̌noka, a kɔn noǎ fòfoa ba sìɛn něe dlǒ mɔ̀le klě chnɛ̀ jlǒ waě wùɛ wlòmo, aǎ diǒ kàn noǎa tè bo mǎ ke.”