Read Grebo, Northern Matiɔ̌n 7 Bible Online

Matiɔ̌n 7 - Grebo, Northern bible

Matiɔ̌n 7

¹È kě Jùsu dɛ̌a u je de Ɔ je, “Aǎ jɛɛ nyopò tùu tè ɛ̈ di ɛɛ numa Nyesoa Ɔɔ̌ di a tè jɛɛ le ke.

²Ke kɔn doǒ a nii ǎ jɛɛ nyopò tùu tè, ɛɛ doǒ nɛ̀ Nyesoa miǒ jleě mǒ bo nynama ke Ɔ mǐ a tè jɛɛ le.

³Mɛ kɔɔ̌n kɛ tè wɔtae gbeǒ ɛ̈ neěe nyu tɔ̀ɔ jǐ mǒ nè jleě neǒoǒ ɛ mɔ̀, kɛɛ tu peǎnʼǒ ɛ̈ mǎǒ nè chɛ̀ɛ jleě kɛn bo nè jěeě lɛ?

⁴È tà tu peǎn mǎ kɛǒ nèe jleě kɛn bo, ke tae wɔ̀le je bò nuǔ nyuǒ deda ɛ̈ moo, ‘Diě boǒ sà lěè wɔtaeǒ jǐ mǒ’?

⁵Mòo ä jěè kɛn ä daà kàan chènyɔ Nyesoa nyu, nyane dɛ bò nuu nɛ̀ moo sàě dìe tu peǎnʼǒ jǐ mǒ, bò kee kɛ le jě tɛɛ plě mòo kɛ lě nyuǒ wɔtaeǒ jǐ mǒ sà.

⁶Aǎ sɛ̀ǒ ngmà je ne dɛà ɛ̈ kɔnʼǒo Nyesoa mɔ̀ aǎ nye ɛ gbùo plě aǎ tùnwiiǒ aa nèmnejɔ boche jemǒ, nɛ̀ bɛ̌ se bǐ wɔ̀ i kɛn nena mɔ̀ plě i mǐ a jajǎ de i mǐ a wan le keklǎe le.”

⁷È Jùsu kpɛɛa Ɔɔ win nya Ɔ je, “Bǎ gbàe Nyesoa dɛ wan, Ɔ mi ɛ a nyema. Bǎ pɔ̀nʼě Ɔ dɛ mɔ̀le, a mi ɛ jěba. Bǎ be Ɔ chnu je dɛɛ tè, Ɔ mi a je knama.

⁸Mɛ̌oǒ joo nɛ̀ moo nyu wùɛ ɔ̈ gbɛ̀ɛ lee Nyesoa dɛ wan Ɔ mi ɛ ɔ̀ nyema. Nyu wùɛ ɔ̈ pɛ̀nʼɛ dɛ le klě Ɔ mɔ̀ ɔ mi ɛ jěba. Nyu wùɛ ɔ̈ mii Nyesoa chnu je beba dɛɛ tè Ɔ mi ɔ je knama.

⁹Aa nyu tae ɔ̈ neě kɛɔ ä slèɔ ɔɔ jǔ bɔ̌ sòaǎ flɔ̌ɔ ɔ̈ duǐiǐ seɔ̌ mǒ ɔ̈ nyeě ɛ nɔ̀?

¹⁰Plě aa nyu tae ɔɔ jǔ bɔ̌ sòaǎ kɛ smìi ɔ̈ nyeě ɔ smɛ bɔ diǐ?

¹¹È bɛ̌ nu amoà monoo dɛ kukǔ nu nyo bǎ ji kàan dɛ tae ba nye aa jlǔ, bɛ̌ nu nyu bɔ̌ gbà aa Gbeǐǒ neěe jɔkɛn wan dɛɛ tè, Ɔ ji kàan dɛ Bɔ nye ɔɔ no ɛ̌ sìnʼǒ a mǒ.

¹²Dɛ tɛ̀ɛ neǒo nɛ̀ moo a nu nyopò tùu kàan dɛ mǒ ɛɛ doǒ a jlɛ̌ bu nu amoo mǒ. Ii wùɛǒ nì bǎ ke ni, è Nyesoaa teteǎà nìǒ a tùiǒ bo klee Ɔɔ wnɔsàɔpo.”

¹³È kě Jùsu dɛ̌a u je klě dǎtèkpa wlòmo Ɔ je, “Bǎ ke kmɔ̌ neneɛɛ snǔ le pɛ̀n, a paeǒ wlɔ̀ dɔwunʼǒ kenkěe mɔ̀le jleě. Mɛ̌oǒ joo nɛ̀ moo wlɔ̀ dɔwunʼǒ ɛ̈ miěe gbè sùela mǒ ɛ boǎ le mɔ̀ plě ɛɛ snǔǒ ɛɛ mɔ̀ nena se wan kma, nyopò fòfoa nù kpɛ ɛmo snǔǒ.

¹⁴Kɛɛ wlɔ̀ dɔwunʼǒ ɛ̈ miěe kmɔ̌ siee fònfnoo mɔ̀ ɛ kenkě le mɔ̀ plě ɛɛ snǔu mɔ̀ nena kma wan, mòngmɛ nyo sosǒ nù jě ɛmo snǔǒ.”

¹⁵È kě Jùsu dɛ̌a u je de Ɔ je, “A gbɛ̀ɛ sen le tmɔ̌ wnɔsàɔpo ü diě amoo mɔ̀ ü pee blakoɔ̌ kɛn, kɛɛ ü blěe chì wlò.

¹⁶È dɛ a mi nuu jbooba nɛ̀ moo uu nunu noǎ. Nyu wɔ̀le je bɔ mu kɛ lě chì klǒkwnaě tu ja bɔ chɛ̌n klèbobo loe? Deě nyu wɔ̀le je bɔ muě klě nena gbàku ja bɔ sà lě nyɛkɛ̌ɛ buo loe?

¹⁷Ɛ se bò nu, kàan tu toe kàan bui, è tu kukǔ toe bui kukwǐ.

¹⁸Kàan tu slě wɔ̀ bɛ to bui kukwǐ, dɛɛ doǒ nɛ̀ ɛ mono, tu kukǔ slě wɔ̀ bɛ to kàan buo.

¹⁹Ii tè tuà ɛ̈ see kàan buo toba mu ɛ mi dbaeba ɛ mǐ tǎn poo lo.

²⁰Dɛɛ doǒ nɛ̀ ɛ mono, nyopòà monoo sen le tmɔ̌ wnɔsàɔpo dɛ a mi u jiiba nɛ̀ moo uu boɔboɔ win klee uu nunu noǎ.”

²¹È kě Jùsu dɛ̌a u je Ɔ je, “Ɛ se nyopò wùɛà ü dɛɛ Mǒo Koɔn, Koɔn u seě Ně win kwa konkɔn bobo nema mu, ɛ̀ sìnʼǒ nyopòo doà ü ni Něe Gbeǐǒ neěe jɔkɛn Ɔɔ kɛn wɔɔn dɛ.

²²Klě blilǐ tù chnɛ̀ jlǒ waěǒ wlòmo kě nyopò fòfoa miǎǎ je dǎba, ‘Koɔn, Koɔn, deě ɛ sea kɛ ämo äǎ sàla wan klě Nè nynɛ̌ wlòmo, äǎ sàlaě kǔ sìsi nyopò ja le klě Nè nynɛ̌ wlòmo plě äǎ nua wlòlekaen noǎ fòfoa klě Nè nynɛ̌ wlòmo le?’

²³Kɛɛ Ě mǐǎ u tmɔɔ̌ma ɛ̈ moo, ‘Amo dɛ kukǔ nu nyoà, Ě se a ji, a sɔnʼǒǒ jemǒ!’ ”

²⁴È Jùsu kpɛɛa Ɔɔ win nya Ɔ je, “Nyu wùɛ ɔ̈ wɛ̌nʼɛ tèà Ě boɛɛ ɔ̈ mi nii le numa ɔ wǒ je tɔ̀n kɔn nyu ɔ̈ poa ɔɔ koǔ keǒ seɛ̌ nyakě blǒ kɛn.

²⁵Tà nǔ dbalaa, neǎ jǐa plě pìpia dia le keǒ koǔǒ jleě mǒ, kɛɛ ɛ sea wɔ̀ɔn be. Mɛ̌oǒ joo nɛ̀ moo ɛɛ kǎngmàǒ ɛ neaǒ seɛ̌ kɛn.

²⁶Kɛɛ nyu wùɛà ɔ̈ wɛ̌nʼɛ tèà Ě boɛɛ plě ɔ̈ se lii le numa mu ɔ wǒ je plɔɔ kokǒ nyu ɔ̈ poa ɔɔ koǔ keǒ mǐsiɔ̌ blǒ kɛn.

²⁷Tà nǔ dbalaa, neǎ jǐa plě pìpia dia le keǒ koǔǒ jleě mǒ, è nɛ̀ǒ bea wɔ̀ɔn ɛ̈ sùea gbè kpǎkpǎ.”

²⁸Tà Jùsu wɔ̀laa tè wùɛǒ boɔboɔ mɔ̀, è diblɛ̌ wùɛ ü neaǒo i kaenʼa u le wlò.

²⁹Mɛ̌oǒ joo nɛ̀ moo Ɔ teea lu wòje keà nyuu chɛ̀ blěe noǎa kpě, Ɔɔ̌ teea lu wòje keǒ uu teteǎ tee nyoo ka neaa je.