Read Grebo, Northern Mǎkè 11 Bible Online

Mǎkè 11 - Grebo, Northern bible

Mǎkè 11

¹È tà u keaa Jlǔsnɛ mi u konwaěaa deěe sɔ̌nʼǒ moo Bɛfèji klee Bɛtnè le ï neaǒo togbeeǒ moo Ɔlè dlǒ, è Jùsu dboa Ɔɔ mɔ̀ cheěn nyoo sɔ̌n,

²kě Ɔ dǎla u je Ɔ je, “A muě diěǒ neě amoo nya kɛn. Bǎ keě bò dǐa pɛ sosǒ, a mi jakǎsè jěba ɔ̈ moaa bo nyu sěɛlǎa kɛn nɛɛ ne, a jle ɔ bo, a ja ɔ Mǒ.

³Bɛ̌ nu nyu wùɛ bɔ̌ gbà a wan ɛ̈ moo, ‘Mɛ a niǐ kɛ ɔ mǒ?’ A tmɔɔ̌ ɔ ɛ̈ moo, ‘Koɔnʼǒ jlɛ̌ lɔ, ɛ seǒ wlɛ̀ba mu Ɔ mǐ ɔ de dbo.’ ”

⁴È nùǒ mua klě diěǒ kɛn ǔ jěa jakǎsèǒ keǒ blɛblě mɔ̀ ɔ̌ moana bo keǒ koǔu wànwie. Tà u kea lɔɔ bo jle,

⁵è nyopò tùu nynanaǒo tàǒ bo nù gbàla u wan u je, “Mɛ kɔɔ̌n tè a jleě kɛ jakǎsèǒ bo?”

⁶È u tmɔɔ̌a u winʼǒ Jùsu poa uu wan, è nùǒ u sàla wun le.

⁷È u jalaě jakǎsèǒ klě Jùsu mɔ̀ ǔ jloaǒ uu wlawlě keǒ ɔ kɛn Jùsu jǎlaǒ ɔ kɛn.

⁸È tà Ɔ tùngmaea ɔɔ kɛn naea, nyopò fòfoa jlea uu wlawlě snǔ mɔ̀ ble, tìe tùu bɛ̌a snɛwɛi klě chèa mǒ nì u peana snǔ mɔ̀ ble.

⁹È nyopòǒ ü kɛna lě Ɔɔ nya klee nyopòǒ ü nea Lɔɔ demǒ nùǒ pnɛ̌a dɛ jleě le wòje ke Nyesoaa win dɛ̌ɛ u je, “Hehejoo! Baea keǒ Ɔ mɔ̀ Ɔ̈ diiěe Koɔnʼɔ nynɛ̌ wlòmo!

¹⁰Baea keǒ Nyuà mɔ̀ Ɔ̈ diiěe äa gbeǐ Dèběsee jlǔu jlǔ slè Ɔ̈ diěe Ɔ̈ mǐ ämoo win kwa kɔn! Hehejoo keǒ Ja Tmɔ Nyesoa mɔ̀!” (Ps 118.25-26)

¹¹È Ɔ pala Jlǔsnɛ dǐa klě Nyesoaa kǎ fòɛ bo Ɔ̌ jěa noǎ wùɛ ï nea lěe. Kɛɛ tà tǐ sìnʼaa, tèǒ nì kɔn tè Ɔ klee Ɔɔ mɔ̀ cheěn nyo mua de klě Bɛtnè dǐa.

¹²Tà chnɛ̀ tɛ̀ɛ gbàlaa le u kea lěe Bɛtnè dǐa mǒ sonwɛ, è sàno nia Jùsu lu.

¹³Tà Ɔ jeěa lěe bueě tu nya ɛ̈ kplɔɔ̌aa wɔ̀nfi dlǒ, Ɔ̀ muaě ɛ mɔ̀ Ɔ mǐa ɛ jě bɛ̌ nu bɛ̌ nea buo ja, kɛɛ ɛ sěɛɛ̌la jè buǒo toto tǐ ni. Ii tè tà Ɔ nyniaǒ ɛɛ gbàa, Ɔ sea buo jě, ɛ̀ sìnʼaǒ wɔ̀nfi sosǒ.

¹⁴È kě Ɔ dɛ̌a tuǒ je Ɔ je, “Nyu wùɛ nɔ̀ seǎa kɛ̀ nè buo di kpe!” È tèǒ Ɔ boɔlaa Ɔɔ mɔ̀ cheěn nyo wɔ̌na i ni.

¹⁵Tà u palaa Jlǔsnɛ dǐa, Jùsu mua lě Nyesoaa kǎ fòɛ bo Ɔ̌ jɛɛaě nyopò ü pleaa noǎ klee tìe tɔ̀nwɛaa noǎ u mǐaa chɔ̀no piee le Ɔ̌ tùngmaeaǒ uu wùɛǒ ploměne piepiɛ̌. Ɔ chinchnǐia wlě mɔ̀ sìnsiɛɛ nyoo těblea mǒ klee hùngbei plo nyoo tukwlǐ.

¹⁶È Ɔ seaǒ nyu wùɛ mɔ̀ mǒ sɔn ɔ sea ploplo noǎ le nae ne klě Nyesoaa kǎ fòɛǒ bo.

¹⁷Ɔ teea nyopòǒ Ɔ je, “Ɛ se kɛ chleě le klě Nyesoaa win wlòmo ɛ̈ moo Ɔɔ koǔ moo koǔà dakwɛ̌ wùɛ bu muě bobo u miě Ɔɔ mɔ̀ boɔ le, (Is 56.7) kɛɛ nɛ̀à a ni jlǐ nyoo bobo ne koǔ mǒ.”

¹⁸Teteǎ tee nyo klee Nyesoaa kpatòapoo fòe pea Jùsuu fano. Mɛ̌oǒ joo nɛ̀ moo Ɔɔ noǎǒ Ɔ teea ii tè kàea nyopò wùɛ bo wan. Tèǒ nì kɔn tè tà u wɔ̌na imoo tèǒ, u pɛ̀na fɔ̌ le u mǐa Ɔ dbǎ.

¹⁹Tà wìtie wɔ̀laa, è Jùsu klee Ɔɔ mɔ̀ cheěn nyo sɔnaě diěǒ wlòmo no.

²⁰Tà chnɛ̀ tɛ̀ɛ gbàlaa le u keaa je tbɛɛ le u miaa Jlǔsnɛ, è bueě tuu doǒ ù jěa ɛle ɛ̌ chechɛ̌a, sɔɔnʼě ɛɛ dlǒ mɔ̀ mǒ bò jɛ ɛɛ be.

²¹È dɛǒ kpatěe tùɔn ì beaě Pitɛ̌ mǒ wlò, kě ɔ dɛ̌a ɔ je, “Tee Nyu, tanàle, bueě tuà potěe chlǒ mɔ̀ ɛ chechɛ̌ le!”

²²È Jùsu tùa u kɛ̀ɛn Ɔ je, “Kàan tèà Ě tmɛɛ̌ amo, bɛ̌ nu bǎ kɔn tè wlò popoɛ klě Nyesoa mǒ,

²³è aa nyu wùɛ bɔ̌ tmɔɔ̌ togbeeà ɛ̈ moo, ‘Sɔn mǒ, kpaě dìe jbǒ mɔ̀,’ bɔ̌ se kplɛ kɔn bɔ̌ po dɛǒ ɔ boɔɔ ɛɛ tè kàan tè, Nyesoa mi ɛ numa dɛǒ ɔ boɔɔ ɛ mǐ tùɔn kpa.

²⁴Tèǒ nì kɔn tè Ě tmɛɛ̌ amo, bɛ̌ nu bǎ boɔě Nyesoa mɔ̀ bǎ gbà Ɔ wan dɛɛ tè plě bǎ po i kàan tè, a mi ɛ jěba.

²⁵È bǎ nyna bo bǎ klě Nyesoa mɔ̀ boɛ plě bǎ kɔnʼě nyu wùɛ wlò jleě, a poo nyuǒ ɔɔ tè wlò le ɛ̈ di ɛɛ numa aa Gbeǐǒ neěe jɔkɛn Ɔ mǐ aa tè wlò le poo lo ke.

²⁶Bɛ̌ nu bǎ se nyopò tùu tè wlò le poo lo ü wlǎǒ amoo jemǒ, è aa Gbeǐǒ neěe jɔkɛn Ɔ se aa tè wlò le pooba mu ke.”

²⁷È u pala dǐa de klě Jlǔsnɛ. Tà Jùsu kea lěe Nyesoaa kǎ fòɛǒ bo ble nɛ, è Nyesoaa kpatòapoo fòe klee teteǎ tee nyo klee Jùwɛ nyoo bòlibo nù diaě Ɔ mɔ̀.

²⁸È u gbàla Ɔ wan u je, “Mɔ kɔɔ̌n kɛ kpě wlòmo nìiěe noǎà plě mɔ nyeě kɛ Mò kpě do taeǒ È niǐ ni?”

²⁹È kě Ɔ dɛ̌a u je Ɔ je, “Klekle Boǒ gbà a wan, bɛ̌ nu bǎ tùǔ kɛ̀ɛn plě Ě mǐ a wlòmo sèsae le tà Ě sɛ̀ɛ kpěà Ě nii noǎ wùɛà.

³⁰A tmɔɔ̌ Mǒ, tà Ně Dlǒ Po Jɔ̀ɔ̌n sɛ̀ɛ̌a kɛ ɔɔ kpě ɔ̌ peěa nyopò ně dlǒ le? Ɔ sɛ̀a kɛě i Nyesoa mɔ̀le? Deě ɔ sɛ̀aě i tùonyugbe mɔ̀?”

³¹È dɛǒ Ɔ gbàla uu wan nɛ̀ u pepeaě měne u je, “Bɛ̌ nu bä nu wiěn i sɔnʼě mǒ Nyesoa mɔ̀, è Ɔ mi ä wan gbàba ɛ̈ moo, ‘Mɛ kɔɔ̌n tè aǎ poǒa Jɔ̀ɔ̌n tè kàan tè?’

³²Kɛɛ ä slě wɔ̀ bä nu wiěn, ‘Ɔ sàlaě i tùonyugbe mɔ̀.’ ” È tè kɔn tè u dɛ̌a bòǒ nɛ̀ moo u pea nyopòǒ uu fano. Mɛ̌oǒ joo nɛ̀ moo nyopòǒ u poa Jɔ̀ɔ̌nʼɔ tè kàan tè ɛ̈ moo ɔ mooa Nyesoaa wnɔsàɔ.

³³Ii tè u tùa Lɔ kɛ̀ɛn u je, “Ä se ɛ ji.” È Ɔ tùa u kɛ̀ɛn Ɔ je, “Ně chɛ̀à Ě se a wlòmo sèsaeba mu nyu tae nye Mǒo kpěà Ě nii noǎ wùɛà.”