Read Grebo, Northern Mǎkè 2 Bible Online

Mǎkè 2 - Grebo, Northern bible

Mǎkè 2

¹Tà wě gbei sìnʼaa, è Jùsu tbaea je klě Kapanìa dǐa. Tà nyopò wùɛ wɔ̌na ii ɛ̈ moo, “Jùsu diě leò,”

²è nyopò fòfoa wɛ̀a de, ii tè fɔ̌ seaě koǔǒ wlòmo ne plě kwɛɛaě snǔ fòɛ mɔ̀ bo bò jɛa wànwie nyopò jǐaǒ le, è Jùsu boɛa u Nyesoaa tè je.

³Dɛǒ nɛ̀ Ɔ kɛ̀nʼaě wlòmo bo, è nyopòo hɛ̀n nù jɛa lě bo klɔ̀ɔ jbɛju klě Ɔ mɔ̀.

⁴Kɛɛ nyopòo fòfo tè uǔ jěa fɔ̌ u mǐaǒ Ɔ mɔ̀ nyni. Tèǒ nì kɔn tè u jǎlaě koǔ dlǒ ǔ knana ɛɛ dlǒ wakǎ peǎn je. Wɔnʼǒ u sàlaa nɛ̀ kɔn jleě keǒ u tìeeaǒ bo klɔ̀ɔ jbɛjuǒ keǒ ɔɔ kɛn bo pɛn chèen kɛn keǒ tàǒ Jùsu mɛtɛɛaǒo je.

⁵Tà Jùsu jěa uu tè wlò popoɛ taeǒ, è kě ɔ dɛ̌a bo klɔ̀ɔ jbɛjuǒ je Ɔ je, “Ně jǔ, Ě poo nè kpni kukwǐi tè le wlò.”

⁶Tà teteǎ tee nyoo tìeǒ neaǒo ble u wɔ̌naa winʼǒ, è nìǒ u tùngmaea dlǒ mɔ̀le sìɛɛan u je,

⁷“Mɛ kɔɔ̌n tè Nyuà Ɔ niǐ kɛ bò boɔboɔ Ɔ̌ peě Nyesoa fla wan? Nyu tae wɔ̀le je bɔ̈ poo loǒ kɛ tùonyuu kpni kukwǐi tè wlò le? Ɛ̀ sìnʼǒ Nyesoaa do Nɔ̀ wɔ̀le ɛ!”

⁸È tǐi doo tǐ jleě Jùsu jia dɛ u sìɛnʼa dlǒ mɔ̀le le, kě Ɔ nia u wan gbògba Ɔ je, “Mɛ kɔɔ̌n tè a sìɛɛn neě kɛ dɛ taeǒ dlǒ mɔ̀le?

⁹Ii sɔ̌nʼà Bo jě dɛ tae se kɛ mǒo kma nyu bɔ boɔɔ bo klɔ̀ɔ jbɛjuà je bɛ̈ kpaa tùɔn? Deě Bo nu kɛ Ě poo nè kpni kukwǐi tè le wlòe? Deě Bo nu sɔn mǒ, dǔ nè chèenʼǒ mǒ nà?

¹⁰Ě jlɛ̌ ba ji ɛ ɛ̈ moo Jbɛjuu Jǔà Ɔ kɔn kpě keǒ Bɔ poo kpni kukwǐi tè wlò le kělɔ kmɔ̌ɔ mɔ̀.” Tèǒ nì kɔn tè Ɔ chèa bo klɔ̀ɔ jbɛjuǒ ja Ɔ je,

¹¹“Bo tmɔɔ̌ mò, dǔ jemǒ, kpa nè chèenʼǒ, muě koǔ bo!”

¹²È tǐi doo tǐ jleě è nɔ̀ǒ sɔna mǒ klùba ɔ̌ dǔa ɔɔ chèenʼǒ mǒ ɔ̌ pěaǒ plomǒ ɔ̌ nɛa keǒ nyopò wùɛǒ jemǒ, ì kàea uu wùɛǒ le wan ǔ pea Nyesoaa nynɛ̌ le, kě u dɛ̌a u je, “Ä sěɛlǎ dɛ taeà jě!”

¹³Tà ɛ sìnʼaa, è Jùsu mua de klě Jàlalǐi jbǒ wien, klě Ɔ kɛ̀naě bo, è nyopò fòfoa nù diaě Ɔ mɔ̀ Ɔ̌ teea lu.

¹⁴È tà Ɔ keaa jbǒǒ wien nɛ, Ɔ jěa jbɛju tɔ̀ɔ ɔ̈ mooaa Lifàe ɔ̈ mooaa Afiasèe jǔ ɔ̌ neaě wlě tɛ̌n koǔ bo, è Jùsu dala lɔ Ɔ je, “Naǎ de.” Tǐi doo tǐ jleě è nɔ̀ǒ sɔna mǒ ɔ̈ nana Ɔ de.

¹⁵Tà tǐ gbei sìnʼaa, u muaě Lifàee tà u mǐa dɛ di. Nyopò fòfoa nù nana Jùsu de, ii tè dlǒ wlě tɛ̌n nyo klee kpni kukwǐ nyo tùu klee Ɔɔ mɔ̀ na nyo nù klee Ɔ diiaǒ dɛ tàa do.

¹⁶Tà teteǎ tee nyoo tìe ü moo Fɛlesǐi wǎn u jěa uu klee Jùsu u diiaǒo dɛ tàa do, ù gbàla Jùsuu mɔ̀ cheěn nyo wan u je, “Mɛ kɔɔ̌n tè aa Tee Nyuà Ɔ klee nyopò kukwǐ taeà u dii liǐ kɛǒ dɛ tàa do?”

¹⁷Tà Ɔ wɔ̌naa tèǒ, Ɔ̀ tùa u kɛ̀ɛn Ɔ je, “Nyopòà üǔ kmaa u se dɛjǐɔ sòa, kɛɛ nyopòà kmɛɛ nù sòɛ dɛjǐɔ. Ě seɔ kmɔ̌ɔ mɔ̀ di keǒ Bo da jebo siǐn nyo u mǐ uu wlè bo bitǐ, kɛɛ Ě diě keǒ Bo da kpni kukwǐ nyo u mǐ uu wlè bo bitǐ.”

¹⁸Chnɛ̀ jlǒ waě tɛ̀ɛ mɔ̀ Ně Dlǒ Po Jɔ̀ɔ̌nʼɔ mɔ̀ cheěn nyo klee Fɛlesǐi wǎn nù chìnʼa, ii tè nyopò tùu dia Jùsu chlǎba u je, “Mɛ kɔɔ̌n kɛ tè Ně Dlǒ Po Jɔ̀ɔ̌nʼɔ mɔ̀ cheěn nyo klee Fɛlesǐi wǎnʼa mɔ̀ cheěn nyo u keě kɛ chìn plě Nè mɔ̀ na nyoà uǔ chìǐn?”

¹⁹Ɔ tùa u kɛ̀ɛn Ɔ je, “Tǐnma mu nynɔɔ jbee mɔ̀niapo wɔ̀le je bu kɛ̀n kɛɛ̌ uu de ngmnengmnɛ̌ wlòmo bo bu chìn nie? A ji ɛle ɛ slě ɛ wɔ̀. Tà u klee ɔ neě jèǒ tàa do, ɛ slě wɔ̀ bu chìn.

²⁰Kɛɛ ɛ kɔn tǐ miěe diba tǐnma mu nynɔɔ jbeǒ ɔ mǐǎě u slè sàe le plě u miǎa kɛ wɔle le nu u miǎ chìn klě chnɛ̀ jlǒ waěǒ wlòmo.

²¹Nyu wùɛ nɔ̀ slě wɔ̀ bɔ̈ dǔ dalo jajlo mǒ bɔ̈ paě ɛ dalo dakǎà wòo. Bɛ̌ nu bɔ̌ nu ɛ, tǐǒ jleě ɔ mii daloǒ jlaba, dajajloǒ bɛ̌ mu chlìba, è daloǒ ɛɛ klaklǎ miě wan le boǎba.

²²Dɛɛ doǒ kě ɛɛ ka ne je, nyu wùɛ nɔ̀ slě wɔ̀ bɔ̈ dǔ nmɔ jajlo mǒ ɛ̈à plǐi bɔ̈ poě ɛ tapɛ̌ gbà wan. Bɛ̌ nu bɔ̌ nu ɛ, bo nmɔ jajloǒ bɛ̌ muě ɛ blěe funfǔ jaba, ɛ mi tapɛ̌ gbàǒ waba, è tapɛ̌ǒ ɛ klee nmɔǒ i mi gbè sùeba. Dɛǒ nɛ̀ kɔn tè nyopò peě nmɔ jajlo klě tapɛ̌ jajlo wan ɛ̈ di ɛɛ numa ii sɔ̌nʼǒ i mǐ tɛɛ nu.”

²³Nyesoaa defɛ chnɛ̀ jlǒ waě tɛ̀ɛ mɔ̀ Jùsu klee Ɔɔ mɔ̀ cheěn nyo sìinʼa lě chèa mǒ. È tà u keaa chèaǒ mǒ nɛ, è Ɔɔ mɔ̀ cheěn nyo tùngmaea jɔ̌ noǎa jleě le kpnakpna ǔ dia li.

²⁴È tà Fɛlesǐi wǎn jěaa dɛǒ, kě u dɛ̌a Ɔ je u je, “Tanʼǒ Nè mɔ̀ cheěn nyo mɔ̀le, u ni konkwa ɛ̈ u see je blɛɛ le bu nuu keǒ Nyesoaa defɛ chnɛ̀ jlǒ waěà mɔ̀.”

²⁵Kɛɛ Jùsu tùa u kɛ̀ɛn Ɔ je, “A sěɛlǎ kɛ ɛ slè klě Nyesoaa win wlòmo dɛǒ klɔ̀ba Dèběse nuaa seeaa tǐ jleě tà sàno nia nɔɔ klee ɔɔ nyopò u sòɛaa dɛ u mǐaa di le?

²⁶Ɔ muaě Nyesoaa koǔ bo klě Abiatà mɔ̀ ɔ̈ mooa Nyesoaa bodiɔ ɔ̌ dǔa ngmà je ne flɔ̌ɔǒ mǒ ɔ̌ dia lɛ ɔ̌ nyea ɔɔ nyopò ke ǔ dia, ɛ̈à nyu wùɛ see je blɛɛ le bɔ dii ɛ̀ sìnʼǒ Nyesoaa kpatòapoo do.”

²⁷È kě Jùsu dɛ̌a u je Ɔ je, “Dɛɛ doǒ nɛ̀ ɛ mono, Nyesoaa defɛ chnɛ̀ jlǒ waěà Ɔ nua nɛ ɛ mǐaǒ tùonyugbe dɛ bo po, tùonyugbe sea nuu nu keǒ ɔ mǐaǒ waěǒ dɛ bo po.

²⁸Tèǒ nì kɔn tè Mǒ Jbɛjuu Jǔà Mǒ kɔn Nyesoaa defɛ chnɛ̀ jlǒ waěǒ win kwa.”