Read Grebo, Northern Mǎkè 4 Bible Online

Mǎkè 4 - Grebo, Northern bible

Mǎkè 4

¹Ɛ kɔna chnɛ̀ jlǒ waě tɛ̀ɛ mɔ̀ Jùsu tùngmaea nyopò teea de klě Jàlalǐi jbǒ wien, è diblɛ̌ wɛ̀a de ǔ tbɛɛa Ɔ dǐ, ii tè Ɔ bea lě blǎgbè chěnchaě wan klě ně kɛn Ɔ̌ nea bo, è diblɛ̌ wùɛǒ nù nynanaǒ kponkpǒ bo keǒ ně wien.

²Ɔ nia dǎtèkpe Ɔ̌ sèsɛɛa noǎ fòfoa kɛne. Klě Ɔɔ teea wlòmo kě Ɔ dɛ̌a u je Ɔ je,

³“A poǒ nɔkǔ jebo, ɛ kɔna jlǒ nu nyu tɔ̀ɔ nɔ̀ mua dodɔ̌ jɔ̌ gblàba klě chè mǒ.

⁴È tà ɔ keaa jɔ̌ǒ le gblɛ̀, ii tìe beaǒ fɛ snǔ mɔ̀ noe dia lě ǐ dia li.

⁵Ii tìe beaǒ seɛ̌ blǒ kɛn tà blǒ seaǒo fò, è tǐi doo tǐ jleě nìǒ kwinʼa. Mɛ̌oǒ joo nɛ̀ moo blǒǒ neaǒo ɛ chɛkɛ̌a mǒ no.

⁶Ii tè tà wɛn sàla lěe jleě ɛ sǐa ii mǒ bo, è nìǒ koklǒa. Dɛ ɛ nuaa nɛ̀ moo ii be sea blǒ wlò pa dɔ̌.

⁷È ii tìe beaě wiǎ slè. Tà i keaa kwin, è wiǎ nìǒ kwinʼa ke ǐ nynǎna i měne, ii tè i sea jɔ̌ to.

⁸Kɛɛ ɛ kɔna jɔ̌ tìi beaǒo kàan blǒ kɛn ï kunʼaa tɛɛ plě ï toaa jɔ̌ fòfoa, ii tìe nea jleě le jɔ̌ɔ wlò tùo pù pù, è tìe nea jleě le wlèe tanʼa tan, è ii tìe nea jleě le wlèe m̀m m̀m.”

⁹È kě Jùsu dɛ̌a u je Ɔ je, “Nyu wùɛ bɔ̈ kɔn nɔkǔ, è bɔ poǒ nɔkǔ jebo tɛɛ tɛɛ.”

¹⁰Tà tǐ gbeii sìnʼaa, è Jùsuu do Nɔ̀ neaǒ tà bo, è nyopòǒ ü wɔ̌naa dǎtèkpeǒ Ɔ poaa, u klee Ɔɔ mɔ̀ cheěn nyoo pù tùo sɔ̌nʼǒ u muaě Ɔ mɔ̀ ǔ gbɛ̀a Lɔ wan keǒ Bɔ sèsaea i kɛne.

¹¹È Ɔ tmɔɔ̌a nu Ɔ je, “Nyesoa nu ɛ ɛ̌ wɔ̀le ɛ keǒ ba jbo Ɔɔ win kwa konkɔnʼà ɛɛ tè le ɛ̈ wɛ̌ pnɔɔ je, kɛɛ keǒ umoǒ mɔ̀ Ɔ se ɛ pepě mǒ po. Ii tè nyopòà ü seě Ɔɔ win kwa konkɔn bobo ne nù Ě tmɛɛ̌ noǎ wùɛà klě dǎtèkpe wlòmo,

¹²dɛǒ nɛ̀ nu ɛ bǔ ke le tɛn, uǔ jě le plě bǔ po nɔkǔ bo, uǔ jbo tè le. Bǔ kee le jě plě bǔ kee tè le jbɛ, è u mii uu wlè bo bitǐba Nyesoa mǐi uu tè wlò le poo lo.” (Is 6.9-10)

¹³È Jùsu gbɛ̀a u wan Ɔ je, “Dǎtèkpaà aǎ jbo kɛ ɛ lee? Bǎ se ɛ le jbo, è ke a miǐ kɛ dǎtèkpe wùɛ le jbojbɛ numa?

¹⁴Jlǒ nu nyuǒ ɔ doɛ̌ Nyesoaa win.

¹⁵Nyesoaa win i gblɛ̀ le klě tùonyopo slè ü wǒo je jɔ̌ǒ ï beǒo fɛ snǔ mɔ̀. Tǐi doo tǐ jleě bǔ wɔ̌n winʼǒ, è Setɛ̀n ɔ̈ moo kǔ sìsii klɔ̀ba ɔ̀ diě le ɔ̀ sà lě i ù nɔkǔ měne kpǎkpǎ.

¹⁶È jɔ̌ǒ beaǒo seɛ̌ blǒ kɛn nì nynaǒ pènmo bo nyopòà ü wɔ̌nʼɔ winʼà, tǐi doo tǐ jleě ii chǒn beě u wlè jleě ǔ kme i bo.

¹⁷Kɛɛ uu tè wlò popoɛ chɛɛ̌n mǒ no, nɛ̀ kɔn tè ɛ se dɛ pɛ̀tu kpa è nìǒ wɛ̀ bo. Ii tè tà tǐ jakě muěe diba klee měne tèntɛn keǒ u mɔ̀ keǒ bu po winʼǒ kàan tè, tǐi doo tǐ jleě è nùǒ muu de.

¹⁸È kaǒ nyopò tùu neǒ ü wǒo je jɔ̌ǒ ï beěe wiǎ slè. Bǔ po nɔkǔ bo u wɛ̌n Nyesoaa winʼǒ no,

¹⁹kɛɛ kmɔ̌ɔ kàan noǎa feanfeǒ sɛ̀ uu wlò kǔ mǒ plě pònpan gbee u mǒ klee noǎ tìi u jlɛ̌ɛ, bǐ diě bǐ sàě u winʼǒ měne ì seǒ u dɛ bo po.

²⁰È ɛ kɔn nyopò tùu neǒo ü wǒo je jɔ̌ǒ ï beǒo kàan blǒ kɛn, bǔ wɔ̌n ni, u pe ii tè kàan tè ǔ nee i kmɔ̌, nù wǒ je jɔ̌ǒ ï toee wlò tùo pù pù klee wlèe tanʼa tan klee wlèe m̀m m̀m.”

²¹È dǎtèkpa tɛ̀ɛ Jùsu poa uu je de nɛ̀à Ɔ je, “À nyu tae bɛɛ leěa kɛ nǎpe plě ɔ chlìǐa ɛ plɛ̌ dlǒ ɔ̀ɔ̌ ɔ pae leěaě ɛ kɛn bo pɛn gbàgbɔ bobo? Ɔ se kɛǒ ɛ kǎ slè bo tùba mu ɛ mǐ nyopò wùɛ pepě nye le?

²²Dɛɛ doǒ nɛ̀ ɛ mono, noǎ wùɛ ï kwɛɛǒo Nyesoaa win kwa konkɔn jleě mǒ bo ï wɛ̌ pnɔɔ je Nyesoa mi i pepě mǒ poba, è je wɛ̌ noǎa wùɛ u mǐ i ji.

²³Nyu wùɛ bɔ̈ kɔn nɔkǔ, è bɔ poǒ nɔkǔ jebo tɛɛ tɛɛ.”

²⁴È kě Ɔ dɛ̌a u je de Ɔ je, “Noǎ wùɛà a wɛ̌nʼɛ Ě boɛ amoo je ba nae i wlò kɛne. Win wùɛà Ě boɛ amoo je ke a miě ii aa kmɔ̌ neneɛ wlòmo popoɛ numa kě Nyesoa mi a ngmna mɔ̀le popoɛ numa plě Ɔ mǐ a ngmna fòfoa mɔ̀ po.

²⁵Nyuà mii tè le jbojbɛ kɔnma keǒ Nyesoaa win kwa konkɔn jleě mǒ, Nyesoa mi ɔ ngmna mɔ̀ poba Ɔ mǐ ɔ de jbojbɛ fòfoa nye, kɛɛ nyuǒ se ɛɛ tè le jbojbɛ kɔn, tè le jbojbɛ chěnchaěe gbee chɛ̀ǒ ɔ kɔnʼɔ Nyesoa mi ɛ ɔ̀ kwa sàba.”

²⁶È dɛ tɛ̀ɛ Jùsu boɛa uu je de nɛ̀à Ɔ je, “Nyesoaa win kwa konkɔn wǒ je keà nyu miěe chè mǒ ɔ mii kou dɔ̌ba.

²⁷Dɛǒ ɔ nii tǒn wɔ̀ mu dǐa pɛ̀n bo, chnɛ̀ gbà le mù konkwa mɔ̀ klě mòngmɛ wěǒ wlòmo, è kouǒ nɛ̀ǒ kwin, kɛɛ ɔɔ̌ jiǒ ɛ dɛ kɛn ke ɛ nii kunkuɛn.

²⁸Ɛmo kouǒ blǒǒ nɛ̀ ni ɛ ɛ̌ kwin. Klekle ɛɛ kpantu nɛ̀ kwin ɛ̈ tmɛ ja plě ɛ̌ kmɛ̀ɛ ne ɛ̌ wlɛ jɔ̌ dlǒ bo.

²⁹È dɛ bɛɛ̌ěe demǒ nɛ̀ moo kouǒ bɛ̌ flò, ɛ̀ɛ bebɛ̌ tǐ nyniǒ no, ii tè jbɛjuǒ ɔ duǐ faka mǒ ɔ̌ bɛ̌ lɛ.”

³⁰È kě Jùsu dɛ̌a u je de Ɔ je, “Nyesoaa win kwa konkɔnʼà mɛ ä miǐ kɛ ɛ je poba plě dǎtèkpa tae ä miǐ kɛ numa ä mǐiǐ ɛɛ tè nyopò le jboo lo?

³¹Ɛ wǒ je mɔsà joɛ̌ɛ ɛ̈ chɛɛ̌n mǒo klě ɛɛ bǐì ti jɔ̌ slè, ɛ̈ nyu duǐ mǒo ɔ doɛ̌ɛ.

³²Kɛɛ bɛ̌ nu bò dɔ̌ lɛ, ɛ kwin ɛ̌ sìnʼǒ dǎgbà wùɛ mǒ ɛ̌ tùiǒ dlǒ pòpotua, è klě ɛɛ ti baě slè noe wɔ̀le je bi pooě dlě klě ɛɛ peplǎi mǒ.”

³³Jùsu nia dǎtèkpe fòfoa tìi wòje ii klekle noǎǒ Ɔ̌ tmɛɛ̌a u Nyesoaa win, ke u wɔ̀le je bu nua nii nɔkǔ jebo popoɛ kě Ɔ nia u tmɔɔ̌a.

³⁴Ɛ sea dɛ wùɛ kɔn Bɔ boɔla uu je Bɔ seaa dǎtèkpa po, è bɛ̌ nu Ɔ klee Ɔɔ mɔ̀ cheěn nyo bǔ kpleǒ je plě Ɔ̌ sèsɛɛ leě kɛ u wlòmo dɛ dǎtèkpe wùɛǒ i sɛ̀nʼɛ nynɛ̌.

³⁵È klě chnɛ̀ jlǒ waěe doǒ wlòmo, tà ɛ keaa wìtika ni, kě Jùsu dɛ̌a Ɔɔ mɔ̀ cheěn nyo je Ɔ je, “A nɛ bä bɛ̌ jbǒà tìe bä muuě ɛɛ wakǎ tɛ̀ɛǒ mɔ̀.”

³⁶Ii tè Ɔɔ mɔ̀ cheěn nyo beaě Ɔ mɔ̀ blǎgbè chěnchaěǒ wan ǔ siaǒ diblɛ̌ǒ tàǒ, è mòngmɛ blǎgbèa neaǒ tàǒ ï nana u de ke.

³⁷Tà u keaa jbǒǒ tìe bɛ̌, è kpě kɛn ne pìpia tɛlaě bo klee jbodoě ǐ beaě blǎgbèǒ wan le, i dukwlalaě ɛ jieěa.

³⁸È Jùsu pɛna bo klě blǎgbèǒ ɛɛ demǒ dɛ wan Ɔ̌ poaǒ dlǒ tuklǒ kɛn bo Ɔ̌ mɛa. Ii tè Ɔɔ mɔ̀ cheěn nyo sàla Ɔ momnɔ mǒ, kě u dɛ̌a u je, “Tee Nyu, sè kɛě äa kokoɛ̌ɛ tè mɔ̀ kɔn le?!”

³⁹Ii tè Ɔ nynana bo Ɔ̌ tmɔɔ̌a pìpia klee jbodoěǒ Ɔ je, “Ba po kpee!” È tǐi doo tǐ jleě pìpia klee jbodoě nìǒ tbala bo.

⁴⁰È Ɔ gbàla u wan Ɔ je, “Mɛ kɔɔ̌n tè a peě kɛ fano? Deě kaǒ a sěɛ kɛ tè wlò popoɛ kwɛn?”

⁴¹È tà kètekee bea uu wan bo, kě u dɛ̌a klě uu chɛ̀ slè u je, “À Nyu taeà kɛ, jbodoě klee pìpia tùiǒ Ɔɔ win boo chɛ̀!”