Read Grebo, Northern Mǎkè 6 Bible Online

Mǎkè 6 - Grebo, Northern bible

Mǎkè 6

¹Tà Jùsu klee Ɔɔ mɔ̀ cheěn nyo sɔna lěe koǔǒ bo mǒ, è nùǒ muaě Ɔɔ chɛ̀ɛ dǐa.

²È klě Nyesoaa defɛ chnɛ̀ jlǒ waě wlòmo Ɔ tùngmaea Nyesoaa win boɔboɔ klě uu Nyesoa koǔ bo, è nyopò fòfoa ü wɔ̌na Ɔɔ winʼǒ ì kàea u le wan, kě u dɛ̌a u je, “È tà Nyuà Ɔ sàǎ kɛ noǎà? È tɔ̀n do taeà nyee neě kɛ Lɔ? È ke tàe Ɔ niǐ kɛ wlòlekaen noǎ wùɛà nunuɛ?

³Deě ɛ se kɛ chamǔdɛ̀à le? Deě ɛ se kɛ Mɛwlěe Jǔà Ɔ̈ kɔn mamǔpò moo Jìmǐse klee Josì klee Jùdǎse klee Saemɔ̌ le? Deě ɛ se kɛ Ɔɔ mamǔ nynejlu u klee ämo ä seà tàa doà ne le?” Tèǒ nì kɔn tè u sàla Ɔ jleě mɔ̀.

⁴È kě Jùsu dɛ̌a u je Ɔ je, “Wnɔsàɔ kɔnʼǒ tùtuɛ klě tà wùɛ ɛ̀ sìnʼǒ klě ɔɔ chɛ̀ɛ blǒ wlòmo klee klě ɔɔ kmɔ̌ wǒ nyo slè klee klě ɔɔ koǔ bo kwɛɛn slè.”

⁵Ɔ sea lě wɔ̀ Bɔ nua wlòlekaen noǎ klě u slè, ɛ̀ sìnʼǒ mòngmɛ nyoo doǒ kmɛaa nù Ɔ poaǒ son fǒ mǒ bo Ɔ̌ peana nu.

⁶I kɛɛnʼa Ɔ wlò le keǒ uu se kàan tè popoɛ kɔnʼǒ mɔ̀. Ii tè Jùsu mua lě deěǒ kɛn ï tbɛɛaǒo tàǒ dǐ Ɔ̌ teea u Nyesoaa win.

⁷È Ɔ dala Ɔɔ mɔ̀ cheěn nyoo tài pù tùo sɔ̌n Ɔ̌ nyea u kpě keǒ bu mua blě kɛne u mǐa nyopò kǔ sìsi ja le sà. Ɔ nua uu sɔ̌nʼɔ sɔ̌n Ɔ̌ dboa lu.

⁸Jùsu tmɔɔ̌a u Ɔ je, “Bǎ ke mi aǎ kpɛ dɛ wùɛ keǒ aa blě kɛn nenaǒ mɔ̀, ɛ̀ sìnʼǒ nae tuu do. Aǎ kpɛ digbaǐ klee mǒ tèe kètekun klee wlě.

⁹Bǎ ke mi, a pe nyɔkòɛbě, kɛɛ aǎ kpɛ sɔ̌n nenɛ wlawlě.”

¹⁰È kě Ɔ dɛ̌a u je Ɔ je, “Bɛ̌ nu bǎ paeě nyuu tà, klě ba neě bo ɛ mǐ ɛ kpa kpa aa dakpǎǒ ɛ mǐ dlǒ chlɛ̀.

¹¹È bǎ nyniǒ tà, bɛ̌ nu bǔ se a jebo kme plě bǔ se aa win nɔkǔ jebo po, è ba sɔnʼǒ tàǒ mǒ. Bǎ ke mi a gbàpo aa be mǒ a sà pǔpu be le ɛ mǐ ɛ ù tee le ɛ̈ moo Nyesoaa plɔ se u kɛn bloo lo.”

¹²Ii tè ǔ bea blě kɛn ǔ boɛa Nyesoaa win keǒ nyopò bu bitǐa uu wlè bo.

¹³U sàlaě nyopò fòfoa kǔ sìsi ja le, è nyopò fòfoa ü kɔn noǎ kmɛaa nù u poa chnɔ̌ dlǒ ǔ peana u.

¹⁴Klě tǐǒ wlòmo noǎǒ Jùsu niaa tà ii tè gbɛ̀tɛɛa blě kɛne, è Wlǔmɔ nyoo kòngmna nyefòɛ Hɛwlǒ wɔ̌na ini. È kě nyopòo tìe dɛ̌a keǒ Jùsu jleě mǒ u je, “Ně Dlǒ Po Jɔ̀ɔ̌nʼǒ dǔ jemǒ ɔ̈ sɔn lě kǒla mǒ, nɛ̀ kɔn tèǒ Ɔ ni wlòlekaen noǎǒ.”

¹⁵È tìe tùu je, “Ɔ moo Ilaejɔ̀.” È u bǐì tùu je, “Ɔ moo Nyesoaa wnɔsàɔ tɔ̀ɔ wòje wnɔsàɔpo ü neaa kmɔ̌ seela tǐ jleě u nyuu do.”

¹⁶Tà Hɛwlǒ wɔ̌na nii, è kě ɔ dɛ̌a ɔ je, “Ně Dlǒ Po Jɔ̀ɔ̌nʼà Ě bɛ̌aa dlǒ je nɔ̀ǒ dǔ jemǒ de ɔ̈ ne kmɔ̌!”

¹⁷Tè kɔn tè Hɛwlǒ sìɛnʼaa dɛǒ dlǒ mɔ̀le nɛ̀ moo tǐ muaa sìnma ɔɔ chɛ̀ nɔ̀ dboa nyopò bu kmea Jɔ̀ɔ̌n, ɔ̌ pea ɔ chěen sonwe le ɔ̌ poa ɔ wùlo. Ɔ nua nɛ keǒ ɔɔ mamǔ Felɔ̌ɔ nynɔ Hɛwlodìaa tè mɔ̀ ɔ̈ ɔmo Hɛwlǒǒ ɔ kɔnaa.

¹⁸È dɛ Jɔ̀ɔ̌n tmɛɛ̌aa Hɛwlǒ kaǒ nɛ̀ moo ɛ sea tetě keǒ bɔ kɔna ɔɔ mamǔu nynɔ.

¹⁹Tèǒ nì kɔn tè Hɛwlodìa kɔna wlò kukǔ keǒ Jɔ̀ɔ̌n jleě mǒ ɔ̌ pɛ̀na ɔɔ dbadbǎ le, kɛɛ ɔ seaě ɛ wɔ̀.

²⁰Dɛ ɛ nuaa nɛ̀ moo Hɛwlǒ jia ɛle ɛ̈ moo Jɔ̀ɔ̌n mooa ngmà je ne jebo siǐn nyu, ii tè ɔ pea ɔɔ fano ɔ̌ tùia ɔ jǐ mɔ̀ tɛɛ. Klě tǐ fòfoa wlòmo Hɛwlǒ pea Jɔ̀ɔ̌nʼɔ win nɔkǔ jebo, kàan tè imo winʼǒ i tùia ɔ kèjle, kaǒ ɔ noɛɛa mǒ bɔ poa ɔɔ win nɔkǔ jebo.

²¹Ɛ kpala ɛ kpa Hɛwlodìa jěa fɔ̌. Klě klɔ̀ba Hɛwlǒo kɔɔn chnɛ̀ jlǒ waě wlòmo, ɔ pia digbaǐ keǒ ɔɔ kòngmna nyefòe mɔ̀ klee tabɔ̀ɔ je si nyo plě klee selǐjlu ü nea lěe Jàlalǐi wakǎ kɛn.

²²Klě digbaǐ dila mǒǒ Hɛwlodìaa nynejuju nɔ̀ jea keǒ Hɛwlǒ klee ɔɔ nyopòǒ ɔ dalaa le jemǒ ɛ̌ blooa uu plɔ chɔɔ. Ii tè kě Hɛwlǒ dɛ̌a nynejuǒ je ɔ je, “Tmɔɔ̌ mǒ dɛ wùɛ bò ke jlɛ̌ Ě mi ɛɛ̀ nyema.”

²³Ɔ poa ɔɔ chɛ̀ win kɛn le keǒ ɔ mɔ̀ ɔ je, “Dɛ wùɛ mii jlǎba kělɔɔ̌ mɔ̀ Ě mi ɛɛ̀ nyema, bɛ̌ tù ně blǒa ɛɛ wakǎ peǎnʼa chɛ̀.”

²⁴Ii tè nynejuǒ ɔ mua ɔɔ naǎ wan gbàba ɔ je, “Mɛ jlɛ̀ bo sòaǎ kɛ?” Ɔɔ naǎ tùa ɔ kɛ̀ɛn ɔ je, “Ně Dlǒ Po Jɔ̀ɔ̌nʼɔ dlǒ nɛ̀ bɔ nye mò.”

²⁵Tǐi doo tǐ jleě ɔ kpala plùplɛ de klě klɔ̀ba mɔ̀ ɔ̌ tmɔɔ̌a nɔ ɛ̈ moo, “Ě jlɛ̌ bò nyeě Ně Dlǒ Po Jɔ̀ɔ̌nʼɔ dlǒ klě chɛ̀chɛɛ wan kèkeà.”

²⁶Tà Hɛwlǒ wɔ̌naa tèǒ, ɔ̀ɔ wlò bea wɔ̀ɔn chɔɔ, kɛɛ ke ɛ toon jleě mǒ bo ɔ̌ poa ɔɔ chɛ̀ win kɛne keǒ nyopò slè nɛ̀ kɔn tè ɔ sea jlǎ bɔ sàla win de.

²⁷Ii tè tǐi doo tǐ jleě ɔ nyea ɔɔ tabɔ̀ snǒ bu mua bu jalaě Jɔ̀ɔ̌nʼɔ dlǒ. Ii tè ǔ mua klě wùlo ǔ bɛ̌a ɔ dlǒ je

²⁸ǔ jalaě ɛ klě chɛ̀chɛɛ wan ǔ nyea nɛ nynejuǒ ɔ̌ kpala lɛ klě ɔɔ naǎ mɔ̀.

²⁹Tà Jɔ̀ɔ̌nʼɔ mɔ̀ cheěn nyo wɔ̌naa dɛǒ kpalaa tùɔn, u mua ǔ dǔa ɔɔ kokǒ fǒǒ mǒ ǔ tùa ɛ bo klě sɛklɛ bǐtìe wan.

³⁰Tà Jùsuu tuposà kpa nyoà Ɔ dboaa Nyesoaa win boɔba u tbaeaa je, u jɛɛa Lɔ kɛn ǔ tmɔɔ̌a Nɔ noǎ wùɛ u nuaa klee ke u nuaa nyopò teea.

³¹È nyopò fòfoa keaě di tìe kea mi, ɛɛ̌ nyea Ɔ klee Ɔɔ mɔ̀ cheěn nyo fɔ̌ u mǐa dɛ dii chɛ̀. Tèǒ nì kɔn tè kě Ɔ dɛ̌a Ɔɔ mɔ̀ cheěn nyo je Ɔ je, “A diě bä muě tàà dě poěe kpee ä mǐ fɛ doɛ.”

³²Ii tè kě u nuaě blǎgbè chěnchaě wan bebeɛ ǔ miaě tàà dě poa lěe kpee uu do.

³³Kɛɛ nyopò fòfoa jěa ulu tà u keaa mi, è u jboa ulu. Ii tè ǔ sonwɛa deěǒ kɛn měne ǔ kpɛa plùplɛ klě u nya.

³⁴È tà Jùsu sɔna lěe blǎgbèǒ wan mǒ, Ɔ̀ jěa diblɛ̌ fòfoa, u wǒa je blableǎ ï seaa nae nyu kɔn. Ii tè uu wɔle beaě Ɔ mǒ no Ɔ̌ tùngmaea u noǎ fòfoa teea.

³⁵Tà tǐ keaa sìn, è Ɔɔ mɔ̀ cheěn nyo diaě Ɔ mɔ̀, kě u dɛ̌a u je, “Tà ä neɔɔ dě tmɔɔ no, è plě tǐ sìn ni ɛ̌ wɛ̀ mɔ̀le.

³⁶Dbo nyopòà bu mu klìgbe gbei klee deěà ï tbɛɛ ämoo dǐ kɛn le u mǐ digbaǐ tɔ̀n keǒ uu chɛ̀ mɔ̀ u mǐ di.”

³⁷Kɛɛ Ɔ tùa u kɛ̀ɛn Ɔ je, “U se kɔn u mǐ mu, a nye u dɛ bu di.” È kě u dɛ̌a Ɔ je u je, “Deě jlɛ̀ bä mu kɛ ä mǐ wlě fòfoaa flɔ̌ɔ tɔ̀n ä mǐ u nye u mǐ die?”

³⁸È kě Jùsu dɛ̌a u je Ɔ je, “A mu a mǐ flɔ̌ɔ kwle tìen tae a kɔnʼɔ jě.” È tà u jěa lii, kě u dɛ̌a Ɔ je u je, “Flɔ̌ɔ kwlee m̀m klee smìi sɔ̌n nì ä kɔn.”

³⁹È Ɔ tmɔɔ̌a u bu tmɔɔ̌a nyopòǒ bu neea ɛ tàkpɛ̌ ble keǒ nenanyɔ kɛn.

⁴⁰Kě u nua ɛ tàkpɛ̌ ble neea, bo wlèe m̀m bǔ neǒ tà, è wlèe sɔ̌n tùo pù nù neǒ tà.

⁴¹È Jùsu dǔa flɔ̌ɔ kwlee m̀m klee smìi sɔ̌nʼǒ mǒ Ɔ̌ wlǎla jǐ jɔ mǒ Ɔ̌ poa i ngmna mɔ̀ Ɔ̌ klǎla i wan le Ɔ̌ nyea i Ɔɔ mɔ̀ cheěn nyo ǔ plooa i nyopòǒ měne. È Ɔ klǎla smìi sɔ̌nʼǒ wan le Ɔ̌ plooa i ù měne ke.

⁴²Nyopò wùɛǒ ü neaǒo tùɔnʼǒ kɛn u dia dɛ uu kwliǎ jǐaě le.

⁴³È flɔ̌ɔ klee smìi dɛǒ u seaea ï Ɔɔ mɔ̀ cheěn nyo tɛ̌naa le i jiěaě plɛǎa pù tùo sɔ̌n.

⁴⁴È jbɛjluǒ ü diaa digbaǐǒ u nua taslěwɛɛ m̀m.

⁴⁵Tà dɛǒ ɛ sìǐnʼa bòo, Jùsu tmɔɔ̌a Ɔɔ mɔ̀ cheěn nyo Ɔ je, “Ba beě blǎgbè wan a kɛn leě nya Bo ke diblɛ̌à ja gbɛ̀, a muě klě něǒ ɛɛ wakǎ tɛ̀ɛǒ mɔ̀ klě diěǒ monoo Bɛsedà kɛn.”

⁴⁶Tà Ɔ dboaa diblɛ̌ǒ de, è Nɔ̀ǒ jǎlaě togbee dlǒ Ɔ̌ boɛaě Nyesoa mɔ̀.

⁴⁷Tà wìtie wɔ̀laa, è blǎgbèǒ ɛ̀ nea lě jbǒo slè, è Ɔɔ do Nɔ̀ nea lě kponkpǒ

⁴⁸Ɔ̌ jěa u pìpia klee jbodoě tɛkɛ̌a u le, ii tè dɛ pɛa u wan le keǒ blǎgbèe bliblɛ mɔ̀. È keǒ tǒn dbǎ doɛ klee chnɛ̀ wlawle pǎnpe Jùsu Nɔ̀ǒ nɛa ně kɛn Ɔ̈ diaě u mɔ̀. Tà Ɔ jlɛ̌ Bɔ sìnʼa uu nyeě jleě,

⁴⁹ù jěa Lɔ Ɔ̌ nɛa ně kɛn, ù je ɛ mooa sùsu, ii tè è nùǒ pea tùe le.

⁵⁰Mɛ̌oǒ joo nɛ̀ moo tà uu wùɛ u jěa Lɔɔ, è kètekee bea u wan bo. È tǐi doo tǐ jleě kě Ɔ dɛ̌a u je Ɔ je, “A wàen kɛn bo, a bɔ̌ fano pepeɛ, Mǒà!”

⁵¹È Nɔ̀ǒ jǎlaě u mɔ̀ blǎgbè wan, è pìpia nɛ̀ǒ poa kpee, è uu wùɛǒ ì kaenʼa u le wlò kpǎkpǎ.

⁵²Ke ɛ tonʼaa jleě mǒ bo ǔ seaa wlòlekaen dɛǒ Ɔ nuaa keǒ flɔ̌ɔ jleě mǒ le jbo, u seaě ɛ wɔ̀ u mǐa ke Ɔ nuaa pìpia kpee wan popoɛ měne jboo chɛ̀, kɛɛ uu dlě kana le je.

⁵³Tà Jùsu klee Ɔɔ mɔ̀ cheěn nyo bɛ̌aa jbǒǒ tìe, ù nynia lě diěǒ monoo Kɛnislà kɛn keǒ u moanaǒ blǎgbèǒ bo.

⁵⁴Tà u sɔɔ̌na bò lěe blǎgbèǒ wlòmo, è nyopòǒ neaǒo tàǒ ù jboa Jùsu lo.

⁵⁵Ii tè ǔ kpɛa plùplɛ ǔ nɛa wakǎ wùɛǒ kɛn le ǔ kpɛa Ɔɔ nynɛ̌ nya. Tà wùɛ bǔ wɔɔ̌nʼa Ɔɔ nynɛ̌, u kpɛaě Ɔ kmakma nyo wùɛ mɔ̀ ü u bleěaǒ uu kɛn bo pɛn gbàgbɛ kɛn.

⁵⁶Tǐ wùɛ mɔ̀ Bɔ̌ muaě klìgbe klee deěǒ kɛn plě klě chèa mǒ, nyopò kpɛaě Ɔ kmakma nyo mɔ̀ klě noǎ plooa mǒ ǔ bɛ̀tea Ɔ le keǒ Bɔ sɔnaǒ kmakma nyopòǒ mɔ̀ mǒ bu tǒa Ɔɔ wlawlǒo ngmnǎ le sosǒ. È nyu wùɛ ɔ̈ toěa Lɔɔ le, ɔɔ kwɛ̌ bɔ̌a dɛ.