Read Grebo, Northern Mǎkè 7 Bible Online

Mǎkè 7 - Grebo, Northern bible

Mǎkè 7

¹Chnɛ̀ jlǒ waě tɛ̀ɛ mɔ̀ Fɛlesǐi wǎn klee teteǎ tee nyoo tìe sɔna Jlǔsnɛ mǒ ǔ diaě Jùsu mɔ̀ ǔ tbɛɛa Ɔ dǐ.

²Nù jěa Ɔɔ mɔ̀ cheěn nyoo tìe ǔ sea kwete jla ǔ dia dɛ keǒ Fɛlesǐi wǎn je nyopò bu nuu plě u mǐi dɛ di.

³Fɛlesǐi wǎn klee Jùwɛ nyo tùu wùɛ u jlɛ kwete klě tǔn tɛ̀ɛ mǒ plě ǔ di dɛ. U ni ɛ keǒ bu tùǒ uu blětà noǎ bo ï uu bòlibo tee uu.

⁴Bɛ̌ nu bǔ sɔn lě noǎ plooa mǒ, plě uu nyu mǐ dɛ di, ɔ kɔn bɔ jla kwete klě tǔn tɛ̀ɛ wlòmo. È u kɔna teteǎ fòfoa u chěnʼaa bu tùaǒo bo wòje ïà monoo mǒ naě kài klee kpɔ̌kea klee ně wan tǎn tù kwijě plě klee kɛn bo pɛn gbàgbɔà u diiǒo dɛ kɛn ii de jlajla. I kɔna i blěe de jlajla dɔ̌ klě uu blětà dɛ wlòmo.

⁵Tèǒ nì kɔn tè Fɛlesǐi wǎn klee teteǎ tee nyo gbɛ̀a Jùsu wan u je, “Mɛ kɔɔ̌n tè Nè mɔ̀ cheěn nyoà uǔ tùǔ kɛǒ ämo bòliboo blětà teteǎ? Uu nyu bɔ̌ ke dɛ di ɔɔ̌ jla chìa keǒ teteǎ dǎa.”

⁶È Ɔ tùa u kɛ̀ɛn Ɔ je, “Amo ä jěè kɛn ä daà kàan chènyoà, ɛ wɛɛnʼaǒ le keǒ Aesaeǎ bɔ sàla wan keǒ a jleě mǒ bɔ dǎla bò ɛ̈ moo, ‘Nyopòà uu wun sosǒ nɛ̀ u ni ǔ tùiǒǒ bo, kɛɛ uu wlè tmɔɔ noǒ mɔ̀.

⁷U tee uu blětà teteǎ, ii tè uu wɛ̀ sèsa kěàǎ mɔ̀ ɛ se dɛ kɛn bo nyna.’ ” (Is 29.13)

⁸È Jùsu je, “Nyesoaa teteǎà Ɔ nye amoo nì a sɛ̀ǒ snǔ mɔ̀ ɛ̈ di ɛɛ numa a miǒ blětà teteǎ bo tù.

⁹A pɛ̀n le tɛɛ wakǎ ba nuu a miǒ Nyesoaa teteǎǒ Ɔ nye amoo snǔ mɔ̀ sà a miǒ aa chɛ̀ɛ blětà teteǎ bo tù!

¹⁰È ke a ni ɛ nunuɛ nɛ̀à, Nyesoa tmɔɔ̌a Mɔ̀sě Ɔ je, ‘Tùo nàǎ klee gbèǐ,’ (Ex 20.12, Deut 5.16) plě ‘Nyu wùɛ ɔ̈ miǒ ɔɔ naǎ klee gbeǐ win kukwǐ jleě mǒ boɔba, ba dbǎ lɔ.’ (Ex 21.17, Lev 20.9)

¹¹Kɛɛ kě aa blětà teteǎ dɛ̌ i je, dɛǒ aa nyu kɔnʼɔ bɔ sɛ̀ɛ ɔɔ naǎ klee gbeǐ mǒ kě bɔ dǎ u je ɛɛ tè ɛ̈ moo, ‘Kɔbàn’ ɛ̈ sɛ̀nʼɛ nynɛ̌, ‘Ě nye ɛ Nyesoa ɛ̌ wɛ̀ mɔ̀le,’

¹²è aǎ sɔɔn kɛ̀ǒ ɔ mɔ̀ mǒ ɔɔ̌ nuǒ ɔɔ naǎ klee gbeǐ dɛ jleě mǒ.

¹³È aa blětà noǎǒ ii bo tùtuɛ klee ii teea nì a ni ǎ sɛ̀ǒ Nyesoaa win snǔ mɔ̀. Dɛɛ doǒ nɛ̀ a ni blětà noǎ fòfoa tìi mǒ ǎ sɛ̀ǒ Nyesoaa win snǔ mɔ̀ ke.”

¹⁴È Jùsu dala diblɛ̌ǒ de, kě Ɔ dɛ̌a Ɔ je, “Nyu wùɛ bɔ poǒ nɔkǔ jebo ɔ mǐ tèà Ě boɛɛ le jbo.

¹⁵Ɛ se dɛà nyu dii ɛɛ̌ nu ɔ se sìnɛ wɛ̀ nyu mǒ klě Nyesoa jǐ kɛn, kɛɛ tèà sonwɛ lěe tùonyugbe wan mǒ nì ni ɔ ɔ̌ se sìnɛ wɛ̀.

¹⁶Nyu wùɛ bɔ̈ kɔn nɔkǔ, è bɔ poǒ nɔkǔ jebo tɛɛ tɛɛ.”

¹⁷Tà Jùsu sɔnaǒo diblɛ̌ǒ gbàa mǒ, Ɔ̀ muaě koǔ bo, è Ɔɔ mɔ̀ cheěn nyo diaě Ɔ mɔ̀ ǔ gbàla Ɔ wan keǒ dǎtèkpaǒ Ɔ poaa ɛɛ tè mɔ̀,

¹⁸è kě Ɔ dɛ̌a u je Ɔ je, “Deě aa chɛ̀à aǎ jbo kɛ tèà le ke? A se kɛ i ji ɛ̈ moo dɛà tùonyugbe dii ɛ slě wɔ̀ bɛ nu ɔ se sìnɛ wɛ̀ nyu mǒ klě Nyesoa jǐ kɛn le?

¹⁹Mɛ kɔɔ̌n tèǒ joo nɛ̀ moo ɛmo didi dɛǒ ɛɛ̌ muě tùonyugbe wlò jleě, kɛɛ ɛ miě ɔɔ wòba wlòmo plě ɛ̌ nymɛɛ ɔ mǒ ɔ̌ mi ɛ bo poba klě chònu.” È dɛ Jùsu boɛaa nɛ̀ moo Ɔ jěa lɛ ɛ̈ moo didi noǎ wùɛ wɛ̀a sìnɛ keǒ nyu bɔ di mɔ̀.

²⁰È Jùsu je, “Dɛà sonwɛ lěe tùonyugbee wlò jleě mǒ nɛ̀ ni ɔ se sìnɛ wɛ̀ nyu mǒ.

²¹Mɛ kɔɔ̌n tèǒ joo nɛ̀ moo klě tùonyugbee wlò jleě klě dɛ kukǔ dlǒ le sìɛnsiɛn klee gblà popoɛ klee jlijlɛ̌ klee mnùngma popoɛ

²²klee wlawle nunuɛ klee wnɔwnǔ klee kmɔ̌ kukǔ klee nyopò tùu kɛn jlijlɛ̌ klee jě nyu wùɛ bɔ kɔnʼɔ tǒn klee chea klee nyu je bɛtɛ̌ɛa klee de jaě sùsu plě klee slě dɛ wùɛ mɔ̀ kɔn klě i sonwɛě mǒ.

²³È noǎ kukwǐ wùɛà klě i sonwɛě tùonyugbee wlò jleě mǒ, nì ni ɔ se sìnɛ wɛ̀ nyo mǒ.”

²⁴È Jùsu sea jlǎ nyu bɔ jia lɛ Nyu tae Ɔ mooa, ii tè Ɔ muaě blěǒ kɛn ï tbɛɛaa diěǒ monoo Taè dǐ Ɔ̌ palaě koǔ tɛ̀ɛ bo. Kɛɛ Ɔɔ tè seaě wowɛ̌ wɔ̀.

²⁵Klě nynɔ tɔ̀ɔ nea lě ɔ̈ kɔn nynejuju kǔ sùsu nea lěe ja. Tà ɔ wɔɔ̌na bòo Jùsuu nynɛ̌ sosǒ, è nɔ̀ǒ dia lě ɔ̈ kɔaǒ Ɔ kwne jemǒ bo.

²⁶Nynɔǒ ɔ mooa kuadakɔ̌ nynɔ, ɔ sɔna mǒ Finisà wakǎ kɛn ɛ̈ neěe Siwlìa blǒ kɛn, nɔ̀ bɛ̀tea Ɔ le keǒ Bɔ sàlaě ɔɔ nynejujuǒ kǔ sùsuǒ ja.

²⁷Kɛɛ kě Jùsu dɛ̌a nynɔǒ je Ɔ je, “Klekle dɛ nɛ̀ moo Bo nye Ně jlǔ Ǐsòwɛ̌ kwɛɛn didi dɛ. Ɛ seǒ le wɛɛn ne keǒ Bo dǔ Ně nyopò Ǐsòwɛ̌ kwɛɛnʼɛ didi dɛ mǒ Bo tuǔnʼǒ ɛ gbùo jemǒ ü moo kuodakwɛ̌.”

²⁸È nynɔǒ ɔ tùa Ɔ kɛ̀ɛn ɔ je, “Koɔn, kàan tè nìǒ bòɔ, kɛɛ gbùoǒ jěe i pɛnʼǒ ngmà fuo wɔ̀ɔn bo noǎǒ blee jlǔǒ kwa le ǐ di li.”

²⁹È kě Ɔ dɛ̌a nynɔǒ je Ɔ je, “Keǒ nù Mǒo kɛ̀ɛn tùtuɛ, ii tè muě koǔ bo, kǔ sùsuǒ ɛ sɔnʼě nè nynejuǒ ja mǒ no.”

³⁰Ii tè ɔ muaě koǔ bo ɔ̌ jɛɛaě ɔɔ jǔǒ kɛn bo pɛn gbàgbɔ kɛn ɔ̌ pɛna bo kǔ sùsuǒ ɛ̌ sɔnaě ɔ ja mǒ.

³¹È Jùsu sɔnaě Taè diěe wakěǒ kɛn mǒ Ɔ̌ bɛɛ̌a lě diěǒ monoo Saedɛ̀n wlòmo tìe klee Ɔ̌ bɛɛ̌a lě Dikaplà wakǎ wlòmo tìe Ɔ̌ mua lě Jàlalǐi jbǒ wien.

³²Klě nyopòo tìe jalaě Ɔ jbɛju tɔ̀ɔ mɔ̀ ɔ̈ sǔnʼaa plě ɔ̈ seaa wien boɔboɔ ji ǔ bɛ̀tea Lɔ Bɔ poaǒ ɔ son jleě mǒ bo Ɔ mǐa ɔ pean.

³³Ii tè Jùsu sàlaǒ jbɛjuǒ diblɛ̌ǒ slè Ɔ̌ kpaeaǒ ɔ wakǎ mǒ Ɔ̌ palaě ɔ chìajɔ nɔkǔ mǒ Ɔ̌ wnana tontmɔ chìa jleě Ɔ̌ kɔla i ɔ̀ mɛ je.

³⁴È Jùsu tanaě jɔkɛn le Ɔ̌ wlǎla fònfno bo, è kě Ɔ dɛ̌a jbɛjuǒ je Ɔ je, “Afaatà,” klě Ɔɔ blětà win wlòmo ɛ sɛ̀n nynɛ̌, “Wɔ̌n le, boɔ.”

³⁵È tǐi doo tǐ jleě è nɔ̀ǒ kɔn nɔkwǐ knana, è ɔɔ mɛɛ tùn nɛ̀ǒ jlea bo ɔ̌ boɛa wien le tɛɛ tɛɛ.

³⁶È Jùsu tmɔɔ̌a nyopòǒ neaǒo tùɔnʼǒ kɛn buǔ tmɛɛ̌a nyu wùɛ dɛǒ ɛɛ tè, kɛɛ ke Ɔ nia uu tmɔɔ̌a kě u nia imo tèǒ le gbɛ̀tɛɛa.

³⁷Wlòlekaen noǎǒ Ɔ niaa i kàea u bo wan chɔɔ dɔ̌, è kě u dɛ̌a u je, “Dɛ wùɛ Ɔ nii ɛ nmɔ le jǐ, nyopòà ü sǔnʼu u wɛ̌n le, è nyopòà see wien boɔboɔ ji u boɛ wien le!”