Read Grebo, Northern Lǔkù 13 Bible Online

Lǔkù 13 - Grebo, Northern bible

Lǔkù 13

¹È klě tǐǒ wlòmo ɛ kɔna nyopò tùu neaǒo nù tmɛɛ̌a Jùsu ke kòngmna nyefòɛ Pàlɛ̌te nuaa nyopòà sɔnaa Jàlalǐi wakǎ kɛn mǒ dbadbǎ tà u keaa Nyesoaa chɔ̀no pie.

²È Jùsu gbàla u wan Ɔ je, “Aa wlò je tà dɛǒ ɛ kpala kɛɛ tùɔn keǒ u mɔ̀ ɛ tee ɛ ɛ̈ moo uu kpni kukwǐ sìnʼaǒ Jàlalǐi nyopò tùuǒ mǒ no le?

³Ɛ se bò nu, kɛɛ Ě tmɛɛ̌ ane, bǎ se aa wlè bo bitǐ, aa wùɛà kě a mi kokoɛ̌ numa ke.

⁴È tàii pù tùo nnyɛɛ̀ǒ nea lěe Saloòn diě wlòmo ü ja tmɔ kǎ fòɛǒ nea lěe ɛ tòaea dlǒ ü kǒaa, aa wlò je ɛmo dɛǒ ɛ sɛ̀nʼa kɛ nynɛ̌ uu kpni kukwǐ sìnʼaǒ nyopò tùuǒ nea lěe Jlǔsnɛ mǒ no le?

⁵Ɛ se bò nu, kɛɛ Ě tmɛɛ̌ ane, bǎ se aa wlè bo bitǐ, aa wùɛà kě a mi kokoɛ̌ numa ke.”

⁶È dǎtèkpaà nɛ̀ Jùsu poa u je Ɔ je, “Ɛ kɔna jbɛju tɔ̀ɔ nɔ̀ dɔ̌a bueě tu klě ɔɔ bò mǒ. Tǐ wùɛ mɔ̀ ɔ miě bueěǒ ja ɔ̌ pɛ̀n buo le, kɛɛ ɔ sěɛlǎě ɛ buo ja jɛɛ le.

⁷Ii tè nyuǒ tùia lɔɔ bòǒ jǐ mɔ̀, kě ɔ dɛ̌a ɔ je, ‘Tanàle, klě jlěe tanʼà wlòmo ke Ě diěe Ě dii bui le pɔ̀nma kělɔ bueě tuɔ ja ně jɛɛɔ dɛ, ii tè dba lɛ. Mɛ kɔɔ̌n tè ɛ kènkae neě kɛ fɔ̌à kɛn ble putu mǒ?’

⁸È bò jǐ mɔ̀ tùɔ̌ tùa lɔ kɛ̀ɛn ɔ je, ‘Nyefòɛ, sɔnʼǒ ɛ mɔ̀ mǒ bɛ kun klě jlǒo doà wlòmo, Ě mi ɛ kwlǎ le sàba Ě mǐ ɛ wɔ̀te wɔ̀ɔn le po.

⁹Ɛɛ̌ wlɛ̀ǒ jlǒǒ miěe diba ɛɛ̌ toǎ. È bɛ̌ nu bɛ̌ seǎ to Ě miǎ ɛ dbaba.’ ”

¹⁰Ɛ kɔna Sɛ̌ɛ̀de waě tɛ̀ɛ mɔ̀ ɛ̈ moo Nyesoaa de fɛ chnɛ̀ jlǒ waě Jùsu teea nyopò klě Jùwɛ nyoo Nyesoa koǔ tɛ̀ɛ bo,

¹¹è klě nynɔ tɔ̀ɔ nea lě ɔ̈ kǔ sùsu kɔɔ̌a klě jleě pù tùo nnyɛɛ̀ wlòmo, ii tè ɛ nua nɔ ɔ̌ klǐa, ɔ seaě mǒ slɛɛ̌a wɔ̀.

¹²Tà Jùsu jěa lɔɔ, Ɔ dala ɔ bɔ diaǒ slè Ɔ je, “Nynɔ, wàn mǒ dbǐ, nè kwɛ̌ wɛ̀ le.”

¹³È Ɔ poaǒ ɔ son jleě mǒ bo, è tǐi doo tǐ jleě è nɔ̀ǒ slɛɛ̌a mǒ ɔ̈ pea Nyesoaa nynɛ̌ le.

¹⁴Kɛɛ Nyesoa koǔu je siɔ beea Jùsu jlo měne keǒ Bɔ dia nyu pean keǒ Nyesoaa de fɛ chnɛ̀ jlǒ waěǒ mɔ̀. Ii tè kě ɔ dɛ̌a nyopòǒ je ɔ je, “Ä kɔn wěe m̀mɔdo klě wǐki wlòmo nyu bɔ nunuu konkwa mǒ, nì kɔn mǒ ba diě a mǐ pean, kɛɛ ɛ̈ see Nyesoaa de fɛ waě mɔ̀.”

¹⁵È Koɔn tùia lɔ kɛ̀ɛn Ɔ je, “Amo ä jěè kɛn ä daà kàan chènyɔ nyopò nae nyoà, klě Nyesoaa de fɛ waě wlòmo a nyuu blǐ klee jakǎsè nenǎ to bɛ̌ ke ii dɛ ni, a sɛ̀ě ɛ blò wan ǎ kpɛě ɛ plomǒ ǎ nye ɛ ně.

¹⁶Kɛɛ nynɔà monoo Eblɛ̌hɛ̀moo jǔ ɔ̈à Setɛ̀n ɔ̈ moo kǔ sìsii klɔ̀ba poo dbǐ mǒ bo klě jlěe pù tùo nnyɛɛ̀ wlòmo nɔ̀ aǎ jlǎ ba sɛ̀ɛ mǒ. Ɔ se kɛ je blɛɛ le bɔ wan dbǐ mǒ keǒ Nyesoaa de fɛ waěà mɔ̀le?”

¹⁷È dɛǒ Ɔ boɔlaa ɛ poa Ɔɔ jlae nyo tònwe je, kɛɛ nyopò tùu wùɛǒ neaǒo uu plɛ bloa le keǒ wlòlekaen noǎ wùɛ Ɔ niaa mɔ̀.

¹⁸È Jùsu gbɛ̀a u wan Ɔ je, “Nyesoaa win kwa konkɔnʼà mɛ ɛ wǒoǒ kɛ je? Mɛ Bo poǒ kɛ ɛ je joo?

¹⁹Ɛ wǒ je mɔsà joɛ̌ɛ chěnchaě ɛ̈à nyu dǔ mǒo ɔ kpa lěe chè mǒ ɔ dɔ̌ɔ bɛ̈ kuun ɛ̈ nii tu fòɛ noe peeěe dlě ja.”

²⁰È kě Ɔ dɛ̌a Ɔ je, “Mɛ Bo poǒ kɛ Nyesoaa win kwa konkɔnʼà je de?

²¹Ɛ wǒ je keà nynɔ duǐ ǐsi chěnchaǐ gbei mǒ, ɔ peě ii flɔ̌ɔɔ pǔpu fòfoa slè, ɔ duduɛ lɛɛ ɛ̌ pɛ lɛɛ jǐ měne ɛ̌ ni ɛɛ ɛ̌ fìi.”

²²È tà Jùsu keaa Jlǔsnɛ dǐa mi, Ɔ̀ bɛɛ̌aě deě klee klìgbe tìi kɛn tìe Ɔ̌ teea u.

²³Klě deěǒ i dɛɛ do kɛn nyu tɔ̀ɔ gbàla Ɔ wan ɔ je, “Koɔn, mòngmɛ nyo sosǒ nù Nyesoa mi kɛ waba klě uu kpni kukwǐ slè le?” È Ɔ poa u dǎtèkpa je Ɔ je,

²⁴“Bo tmɔɔ̌ mò, bɛ̌ nu bo nyu bɔ̌ ke kmɔ̌ neneɛɛ snǔ le pɛ̀n, è bɔ poě kbě bɔ chenchean ɔ miǒ chnu chěnchaě jleě pae le. Mɛ kɔɔ̌n tèǒ joo nɛ̀ moo nyopò fòfoa mi ɛ mǒ tɛ̀nma keǒ bu paeǒ ɛ jleě, kɛɛ u slě ɛ wɔ̀ba mu.

²⁵È bɛ̌ nu Nyuǒ kɔnʼɔ koǔ Bɔ̌ sɔnʼǎ mǒ Bɔ̌ poǎǒ chnu, è a miǎǒ plomǒ ble nynama a mǐǎ bò dǎ ɛ̈ moo, ‘Ä bɛ̀teè le Koɔn, kna ä je!’ Kɛɛ Ɔ miǎ a kɛ̀ɛn tùba ɛ̈ moo, ‘Ě se a ji. Ě se tà a sɔn mǒo jii chɛ̀?’

²⁶È kě a miǎ dǎba ɛ̈ moo, ‘Ä klee Mò ä diiaǒ dɛ tàa do ä nɛ̌a plě È teea klě äa dǐa.’

²⁷È kě Ɔ miǎ a je dǎba de ɛ̈ moo, ‘Ě se a ji, è tà a sɔɔ̌n kɛ mǒ. A sɔnʼǒǒ jemǒ, amo dɛ kukǔ nu nyoà!’

²⁸Bǎ jěǎ Eblɛ̌hɛ̀mo klee Aesěè klee Jèkɔ̌po klee Nyesoaa wnɔsàɔpo wùɛ klě jɔkɛn deplě slè, a miǎ wɔle fìɛn fìnma a miǎ nyě di. Mɛ̌oǒ joo nɛ̀ moo Nyesoa miǎǒ a plomǒ poba.

²⁹È nyopò miǎě togbea blě kɛn mǒ sɔnma, tìe miǎě batle blě kɛn mǒ sɔn, tìe miǎě wɛnʼɛ kwlǎ mǒ wǒla mǒ sɔn plě tìe miǎě wɛnʼɛ pala mǒ sɔn u mǐǎ uu kɛn bo ne noǎ kɛn ble ne keǒ Nyesoaa deplě de ngmnengmnɛ̌ɛ digbaǐ mɔ̀.

³⁰È nyopòà monoo demǒ bɔɔ̌ nyo nù miǎě nya nema, è nyopòà monoo nyane nyo nù miǎě demǒ bɔɔ̌ba.”

³¹È klě tǐǒ wlòmo Fɛlesǐi wǎnʼa tìe diaě Jùsu mɔ̀, kě u dɛ̌a Ɔ je u je, “Blɛ̀ɛ je Bò sɔnʼà tùɔnʼà kɛn mǒ kèkeà Bò muě tà tɔ̀ɔ. Mɛ̌oǒ joo nɛ̀ moo kòngmna nyefòɛ Hɛwlǒ jlɛ̌ bɔ dbǎ Mò.”

³²Ɔ tùa lu kɛ̀ɛn Ɔ je, “A mu a tmɔɔ̌ kplakplǒ nyuǒ ɛ̈ moo kekɛɛà Ě miě nyopò kǔ sìsi ja le sàba, Ě mǐ uu kweǎ pean, dɛɛ doǒ nɛ̀ Ě mi kàn numa. È chnɛ̀ɛa Ně konkwa miǎ mɔ̀ wɛ̀ba.

³³È dɛ bɛ jě bɛ kpa tùɔn, Ě sòɛ Bo be snǔ mɔ̀ kekɛɛ Ě mǐ kàn na Ě mǐǎ na chnɛ̀ɛa. Mɛ kɔɔ̌n tèǒ joo nɛ̀ moo ɛ seǒ le wɛɛn ne nyuà monoo Nyesoaa wnɔsàɔ bu dbaěě ɔ tà tɔ̀ɔ, ɛ̀ sìnʼǒ klě Jlǔsnɛ diǎa do.

³⁴Jlǔsnɛ nyo ane, Jlǔsnɛ nyo ane, amoà dbɛ̌ɛ Nyesoaa wnɔsàɔpo plě ü dbɛɛ̌ lěe nyopòà Nyesoa dboɔ amoo mɔ̀ seɛ̌, klě tǐ fòfoa wlòmo Ě jlɛ̌ Boǒ bòo a le kělɔ Ně chɛ̀ mɔ̀ wòje keǒ soǎn naǎ nii ɔ̌ gbè ɔɔ jlǔ le klě ɔ chɛ̀ɛ kpakpea bobo, kɛɛ aǎ nyeě fɔ̌!

³⁵A tanàle, a Nyesoaa kǎ fòɛǒ ɛ miǎ kǎflà mooma plě Ě tmɛɛ̌ ane, a see kɛɛ̌ jejeɛ̌ kɔn de ɛ mǐ ɛ kpa kpa tǐǒ i miǎǒ nyni ï kɔn mǒ a miǎ bòo dǎba ɛ̈ moo, ‘Baea keǒ Nyuǒ mɔ̀ Ɔ̈ diiěe Koɔn Nyesoaa nynɛ̌ wlòmo!’ ” (Ps 118.26)