Read Grebo, Northern Lǔkù 21 Bible Online

Lǔkù 21 - Grebo, Northern bible

Lǔkù 21

¹Ɛ kɔna chnɛ̀ jlǒ waě tɛ̀ɛ mɔ̀ Jùsu neaě Nyesoaa kǎ fòɛ bo Ɔ̌ jěa pònpan nyo ǔ jɛaě wlě le klě Nyesoaa mǒ tee blɔ̀kun wan.

²Ɔ jěa sònwɛ koti nynɔ ke ɔ̈ poaěe wlejɔ̌ɔ gbeii sɔ̌n.

³È kě Jùsu dɛ̌a Ɔɔ mɔ̀ cheěn nyo je Ɔ je, “Kàan tèà Ě tmɛɛ̌ amo, sònwɛ koti nynɔǒ nɔ̀ poě wlě fòfoa kělɔ mǒ tèe blɔ̀kunʼà wan ɛ̌ sìnʼǒ uu wùɛǒ mǒ.

⁴Mɛ̌oǒ joo nɛ̀ moo pònpan nyoǒ u poě uu wlěe tìe, kɛɛ nynɔà ɔ blěe wlejoɛ̌ɛ wùɛ ɔ kɔnʼɔ ɔ̌ neɔ kmɔ̌ɔ mɔ̀ nɛ̀ ɔ poě.”

⁵Tà dɛǒ ɛ sìnʼaa, è kě Jùsuu mɔ̀ cheěn nyoo tìe dɛ̌a Ɔ je u je, “Nyesoaa kǎ fòɛà u nuua ɛ jǐlenmɔ seɛ̌ plě klee noǎ tìi nyopò tùu nyeea Nyesoa.” Kɛɛ kě Jùsu dɛ̌a u je Ɔ je,

⁶“Ɛ kɔn tǐ miǎ lěe diba, seɛ̌à a jěe ii wùɛà i miǎ blǒ mǒ wlɛ̀ba, seɔ̌ɔ do seǎǒ ɛɛ bě dlǒ siba mu.”

⁷È u gbàla Ɔ wan u je, “Tee Nyu, à tǐ tae ɛmo dɛǒ ɛ miǎa kɛ tùɔn kpaeba plě mɛ miǎa kɛɛ ämo teeba ɛ̈ moo ɛ konwaě le bɛ kpa tùɔn?”

⁸Ɔ̀ tùa u kɛ̀ɛn Ɔ je, “Ba tù aa chɛ̀ jǐ mɔ̀ nyu tɔ̀ɔ ně di a mǒ boo lo. Mɛ̌oǒ joo nɛ̀ moo nyopò fòfoa nù miǎě Ně nynɛ̌ wlòmo diiba, kě u miǎ dǎba ɛ̈ moo, ‘Mǒà mǒ moo Nyesoaa Tentǎn Jǔ, demǒ bɔɔ̌ tǐ nìà,’ kɛɛ aǎ nɛ u de.

⁹Bɛ̌ nu bǎ ke toe klee nyopòà uu tè wɛ̌n ü wɛ̀ɛn nee kàan dɛ kɛn keǒ bɛ diě blǒ wlòmo, è balě pe fano. Noǎǒ nì kɔn bi kpa tùɔn klekle, kɛɛ è tǐ sěɛɛ̌aǒ jèǒ nyni keǒ kmɔ̌à ɛɛ dlǒ chlɛ̀chlɛ mɔ̀.”

¹⁰È kě Ɔ dɛ̌a de Ɔ je, “Dakwɛ̌ miǎ mɔ̀ wònwɔɔma, deplě miǎ mɔ̀ wònwɔɔ no.

¹¹Blǒ bɛ sèke sèke bɛ beě bo ii noǎ fòe nì miǎ tùɔn kpaba klě tà wùɛ, è dodopà klee jǐlenymi kweǎ miǎ kmɔ̌à kɛn bo wlɛ̀ba. Wan bo kàe dɔ̌ noǎa klee mǒ bo kètee noǎ miǎě jɔ měne sɔnma.

¹²Plě imo noǎ wùɛǒ i miǎ tùɔn kpa, nyopò miǎ a kmema u miǎ aa tè mɔ̀ tè. U miǎě a Nyesoa keǐi nyefòapo mɔ̀ kpaba u miǎ a tè mɔ̀ tù, u miǎ a wùlo le po plě u miǎǒ a klɔ̀bapoo klee blǒo je si nyo jemǒ kpa keǒ tà a nɛ Mǒo de ɛɛ tè mɔ̀.

¹³Dɛǒ nɛ̀ kɔn bɛ moo aa fɔ̌ keǒ ba sà Ně tè mɔ̀ keǒ umo nyopòǒ jemǒ.

¹⁴Ii tè bǔ kpa lě a tè tùla mǒ, è bi beě a wlòmo bo kèjle bɛɛ̌ ni amo keǒ ke a mi aa chɛ̀ɛ tè kɛn boɔɔa numa.

¹⁵Mɛ kɔɔ̌n tèǒ joo nɛ̀ moo klě tǐi doǒ wlòmo Ě miǎ a tɔ̀n klee win wan poba ba boɔlǎa ï aa jlae nyo slě wɔ̀ bu sàǒo snǔ mɔ̀ plě bu chnɛ̀ mǒo.

¹⁶Aa chɛ̀ɛ naǎpò klee gbeǐpò klee aa mamǔ jbɛjlu klee aa kmɔ̌ wǒ nyo klee aa bǐì nù miǎě a bo demǒ sàba plě u miǎ aa tìe dbǎa chɛ̀.

¹⁷Nyopò wùɛ mi a faenma keǒ ba po Ně tè kàan tè.

¹⁸Kɛɛ aa dujoɛ̌ɛ doo chɛ̀ se mǎma mu.

¹⁹Bɛ̌ nu bǎ nyna bo kpankpa klě aa tè wlò popoɛ mǒ, a mi kmɔ̌ sie fònfno kɔnma.”

²⁰È kě Jùsu dɛ̌a u je Ɔ je, “Bɛ̌ nu bǎ jěǎ tabɔ̀ bǔ tbɛɛǎ Jlǔsnɛ dǐ, è a miǎ ɛ jiba ɛ̈ moo ɛ mi gbè sùeba pase.

²¹È nyopòǒ neěe Jùdǐa wakǎ kɛn bu kpa plùplɛ klě togbei dlǒ u mǐ wa. Nyopòǒ neěe Jlǔsnɛ wlòmo bu sɔnʼě mǒ, è nyopòǒ tbɛɛ ɛɛ dǐ buǔ miě ɛ wlòmo.

²²Mɛ̌oǒ joo nɛ̀ moo dɛǒ nɛ̀ mooǎ chnɛ̀ jlǒ waě keǒ Nyesoa Bɔ maěǒ Jùwɛ nyoo plɔ tu kɛn bo. È klě ɛ wlòmo dɛǒ Nyesoaa win je ɛ̈ miǎ tùɔn kpaba ɛ miǎǒ jaěba.

²³Klě tǐǒ wlòmo ɛ miǎ jǐlenymi dɛ tùba keǒ nynoà miǎa kwliǎ měne nema klee nynoà miǎa jlǔ nyǎma mɔ̀! U seǎě ɛ wɔ̀ba mu keǒ bu plùǎ. Ɛ miǎ wlèe wɔ̀ɔn bebeɛ fòɛ mooma keǒ nyopòà neɔɔ blǒɔ wlòmo mɔ̀. Nyesoa miǎǒ umo dakɔ̌ǒ uu plɔ tu kɛn bo maěma.

²⁴U miǎ uu tìe dbǎba klě to kɛn, è uu tìe miǎ kèdɛ̌ mǒ kpaeba klě blě wùɛ kɛne. È kuodakwɛ̌ miǎ amo Jlǔsnɛ nyo bo dlǒ bo tùba ɛ miǎ ɛ kpa kpa uu tǐ miǎǒ le wɛ̀.”

²⁵Jùsu kpɛɛa win nya Ɔ je, “Wan bo kàe noǎa nì miǎ tùɔn kpaba keǒ wɛn klee sòbae klee jɔtnè jleě mǒ. Dakwɛ̌ wùɛà neɔɔ kmɔ̌ɔ mɔ̀ fano miǎ u numa. Mɛ̌oǒ joo nɛ̀ moo u seǎ tà u miǎǒo jbodoěe klukwlɛ je plùua kɔnma mu.

²⁶Bǔ keǎ dɛ mii tùɔn kpaba kělɔ kmɔ̌ɔ mɔ̀ kɛn mǒ fe, fano sosǒ miǎ nyopò dbǎba. È noǎǒ kɔnʼɔ kpě klě jɔ mǒ i miǎ tùɔn měne wǒba.

²⁷È nyopò wùɛ miǎ Jbɛjuu Jǔà jěba Ɔ miǎě nukpě kɛn dii li klee klě Ɔɔ kpě fòe klee tè jǐ boaboǎ wlòmo keǒ Nyesoaa win dɛ̌ɛ. (Dan 7.13)

²⁸Bɛ̌ nu noǎ wùɛǒ bǐ keǎ tùɔn kpokpa wlò le tùi, è ba nyna bo klě mɔ̀le wɛ̀ tǔn wlòmo plě klee klě wlò je kuuan mǒ. Mɛ kɔɔ̌n tèǒ joo nɛ̀ moo aa wowa dɛ konwaě le.”

²⁹È dǎtèkpaà nɛ̀ Jùsu poa u je Ɔ je, “A chèǒ bueě tu mɔ̀ bo ɔ̀ɔ̌ dodɔ̌ tu tɛ̀ɛ.

³⁰Bɛ̌ nu bǐ keǒ ii wɔ̀nfi le tùi, aa chɛ̀ a jě ɛ plě ǎ ji ɛ ɛ̈ moo jlǒpàa tǐ nyniǒ no.

³¹Dɛɛ doǒ nɛ̀ ɛ mono, bɛ̌ nu bǎ jěǎ noǎ wùɛǒ bǐ keǎ tùɔn kpɛ, è ba ji ɛ ɛ̈ moo Nyesoaa win kwa konkɔnʼà ɛɛ tǐ konwaě le.

³²È Ě tmɛɛ̌ ane de, kmɔ̌à ɛ se bo wɛ̀ba mu ɛ mǐ ɛ kpa kpa noǎ wùɛà Ě tmɛɛ̌ amoo i miǎ tùɔn kpa.

³³Jɔ klee blǒà i miǎ bo wɛ̀ba, kɛɛ Ně winʼà i seǎ bo wɛ̀ba mu kpe.”

³⁴È kě Jùsu dɛ̌a u je Ɔ je, “Ba tù aa chɛ̀ jǐ mɔ̀, aa kmɔ̌ neneɛ wùɛ bɛɛ̌ moo digbaǐ didiɛ klee nmɔ nenǎ plě kmɔ̌ɔ konkɔn noǎ ii kèjle bɛɛ̌ ni amo. Noǎǒ nì bǎ kɛ̀nʼě nunuɛ wlòmo bo, è Nyesoaa blilǐ tù chnɛ̀ jlǒ waě miǎ a mǒ kèenma

³⁵keà nmi see tutuu tè ji ɛ kme ɔɔ. Ɛ miǎ tùonyopo wùɛ ü neɔɔ kmɔ̌ mɔ̀ kmema.

³⁶Tèǒ nì kɔn tè tǐ pɛpɛ mɔ̀ ba tù aa de nu kmɔ̌ jǐ mɔ̀, ba bàte Nyesoa Ɔ mǐ a kbě nye noǎ wùɛǒ bǐ keǎ tùɔn kpɛ a miǎ i jebo kwli, plě klee Jbɛjuu Jǔà Bɔ̌ keǎ blilǐ tùi, a miǎ kbě kɔn ba nynanǎ Ɔ jebo.”

³⁷Chnɛ̀ jlǒ waě wùɛ mɔ̀ Jùsu mia lě Nyesoaa kǎ fòɛ bo Ɔ̌ teea nyopò, è bo tǒn bɛ̌ wɔ̀, Ɔ sonwɛě dǐa mǒ Ɔ̌ miě togbeeǒ moo Ɔlè dlǒ klě Ɔ sìnʼě tǒn jlǒ waěǒ.

³⁸Kènta gbìi nyopò wùɛ bǔ sɔn měne u miě Nyesoaa kǎ fòɛ bo ǔ pe Ɔɔ win nɔkǔ jebo.