Read Grebo, Northern Lǔkù 24 Bible Online

Lǔkù 24 - Grebo, Northern bible

Lǔkù 24

¹Ɛ nua Sɔ̌ndee kènta gbìi nynoǒ ǔ mua lě sɛklɛ bǐtìe wien ǔ kpalaě sonsnǒ noǎǒ u wɔ̀laa mɔ̀le.

²Tà u nyniaǒo, ù jěa seɔ̌ǒ u kaenʼaa sɛklɛ bǐtìeǒ je ɛ̌ sàeaǒ ɛ wien,

³kɛɛ tà u palaěe bǐtìeǒ wan, u sea Koɔn Jùsuu fǒǒ jě.

⁴Tà u nynanaǒo bǐtìeǒ wien bo feanfeǒ kea uu ni, è keà nyu kɛpǒo jǐ u jěa jbɛjluu sɔ̌n ü nynanaǒ uu wakǎ mǒ bo, uu daleà u peaa fǒ měne i plɛ̌a pɔpɔ wòje tɛ̀nʼɛ pepě.

⁵È kètekee bea u wan bo ǔ poa dlě wlò le keǒ blǒ mɔ̀. È tàii sɔ̌nʼǒ ù gbɛ̀a nynoǒ wan u je, “Mɛ kɔɔ̌n tè a pɛ̀ɛ̌n kɛ Nyuà nee kmɔ̌ le klě kokǒ nyo slè?

⁶Ɔ seà tùɔnʼà kɛn ne, Nyesoa dǔ Ɔ mǒ je. È bi beě aa wlòmo tà Ɔ nea lěe Jàlalǐi wakǎ kɛn Ɔ tmɔɔ̌a a le, kě Ɔ dǎla Ɔ je,

⁷‘Jbɛjuu Jǔà u kɔn bu poě Ɔ kpni kukwǐ nyo kwete mǒ, u miǒ Ɔ pète bɛ̌ tu jleě kɔ, kɛɛ klě chnɛ̀ jlǒ wěe tan nenɛ wlòmo Nyesoa miě Ɔ kǒla mǒ sàba.’ ”

⁸Ì beaě u mǒ wlò tèǒ Jùsu boɔa uu je.

⁹Ii tè u sɔnaě sɛklɛ bǐtìeǒ wien mǒ ǔ mua ǔ tmɔɔ̌a noǎ wùɛǒ Ɔɔ mɔ̀ cheěn nyoo pù tùo doǒ klee nyopò wùɛ u jěaa.

¹⁰Nynoǒ mua lěe nù moo Mɛwlě Mɛkɛniì klee Joanǎ klee Mɛwlě ɔ̈ mooa Jìmǐsee naǎ plě klee uu bǐì tùu nù tmɔɔ̌a Ɔɔ tuposà kpa nyo noǎ wùɛǒ.

¹¹Kɛɛ Ɔɔ tuposà kpa nyo jěa lɛ ɛ̈ moo tèǒ nynoǒ u boɔlaa tɔ̀n seaě i wlòmo ne, ii tè u sea uu win kàan tè po.

¹²Kɛɛ Pitɛ̌ dǔa jemǒ ɔ̌ kpalaě sɛklɛ bǐtìe wien plùplɛ. Tà ɔ wǒaǒo, ɔ teblea je bo, è ɔ jěa kǔu bo tù dalee do, ɔ sea kɛ̀ dɛ tɛ̀ɛ jě, è i kàea ɔ bo wan keǒ dɛǒ kpalaa tùɔn mɔ̀.

¹³Ɛmo chnɛ̀ jlǒ waěe doǒ mɔ̀ Jùsuu mɔ̀ na nyoo tài sɔ̌n nù sonwɛa Jlǔsnɛ mǒ ü mia diěǒ u dɛɛ Imɛɛ̀ kɛn. È ɛmo snǔ tìeǒ ɛ poa de bo keǒ Jlǔsnɛ mɔ̀.

¹⁴Tà u keaa snǔǒ mɔ̀ nɛ, tè uu sɔ̌nʼǒ u tmɛ̌a mǒo nì moo noǎ wùɛ ï kpalaa tùɔn keǒ Jùsu jleě mǒ.

¹⁵Tà u keaa tmɛ̌ u keaě ii měne pepeɛ le, è Jùsu Nɔ̀ǒ dia lě u klee Ɔ̀ naea snǔ mǒ.

¹⁶U jěa Ɔlo, kɛɛ Nyesoa nua nɛ uǔ jboa Lɔ.

¹⁷È Jùsu gbàla u wan Ɔ je, “Mi a boɛɛ̌ kɛ?” È nùǒ nynana bo u pea wɔle je le.

¹⁸È u nyuu do ɔ̈ mooa Kliòpa nɔ̀ gbàla Ɔ wan ɔ je, “Nè doà Mò moo kɛ nyu ɔ̈ neɔ Jlǔsnɛ ɔ̈ sěɛ kɛ noǎ wùɛà kpaa tùɔn klě mòngmɛ chnɛ̀ jlǒ wěà wlòmo ii tè wɛ̌n le?”

¹⁹È Ɔ gbàla u wan Ɔ je, “È ke ɛ neě kɛ nynɛ̌?” U tùa Lɔ kɛ̀ɛn u je, “Noǎà kpaa tùɔn keǒ Jùsu jleě mǒ Ɔ̈ kɔn lěe Nǎsòwɛ̌ dǐa nìà ä boɛ. Ɔ mooa kpě kɛne Nyesoaa Wnɔsàɔ plě Ɔ̌ po ɛ pepě mǒ keǒ Ɔɔ noǎ Ɔ nuu mɔ̀ keǒ Nyesoa jemǒ klee keǒ nyopò wùɛ jemǒ.

²⁰Plě ɛ se ii wùɛ, ämo Jùwɛ nyoo Nyesoaa kpatòapoo fòe klee je si nyo dǔ Ɔ mǒ ǔ poě Ɔ Wlǔmɔ nyoo kòngmna kwete mǒ ǔ bɛ̌a Ɔ kokǒ wun kɛn ǔ kɔǒ Ɔ pète bɛ̌ tu jleě.

²¹Äa wlò je kunkuɛn wùɛ nɛ̀ moo Ɔ dia lě Ɔ mǐa Ǐsòwɛ̌ kwɛɛn gblà klě Wlǔmɔ nyo kwete mǒ. È plě Ɔ̌ kǒ, ɛmo dɛà ɛ kpalaa tùɔn kpa ɔɔ chnɛ̀ jlǒ wěe tan nenɛà.

²²Nyno tùu ü neɔ ämoo slè nù kènta gbìi ü muě sɛklɛ bǐtìe wien, è u boɔ dɛ ɛ̈ kɛɛn ämoo wlò le ɛ̈ moo

²³u se Ɔɔ kokǒ fǒ jě. Ii tè u di de ǔ tmɔɔ̌ma ämo ɛ̈ moo u jě Nyesoaa najiǒpò klě slèe wlòmo ü tmɔɔ̌ uu ɛ̈ moo Jùsu ne kmɔ̌.

²⁴È äa jbɛjluu tìe kpaě sɛklɛ bǐtìe wan plùplɛ ǔ jě dɛɛ teěnʼǒ kɔn tè nynoǒ u tmɔɔ̌ ämoo, kɛɛ u se Jùsu jě.”

²⁵È kě Jùsu dɛ̌a u je Ɔ je, “Aa plɔ kǒ lo plě aa wlè jakǎ, nɛ̀ kɔn tè aǎ po noǎ wùɛǒ kɔn tè Nyesoaa wnɔsàɔpo boɔlaa seela tǐ jleě ii tè kàan tè.

²⁶A je ɛ se kɛǒ je blɛɛ le keǒ Nyesoaa Tentǎn Jǔ Bɔ jě sònwɛ taeǒ plě Ɔ miǎě Ɔɔ tè jǐ boaboǎ wlòmo bee?”

²⁷È Ɔ tùngmaea u wlòmo sèsaea dɛǒ Mɔ̀sěe chněenoǎ boɛaa kɛn Ɔ̌ mua mu mu Ɔ̌ jɛɛa Nyesoaa wnɔsàɔpoo chněenoǎ dɛ i boɔaa kɛn ï sèsaeaa noǎ wùɛ ï miaa tùɔn kpaba keǒ Ɔ jleě mǒ kɛn le.

²⁸Tà u nynia lěe diěǒ kɔn kɛn u mia lěe, è Jùsu nia dɛ wòje keà nyu mii sìnma.

²⁹Kɛɛ Ɔɔ mɔ̀ na nyoo sɔ̌nʼǒ u tmɔɔ̌a Nɔ u je, “Tǐ sìn ni, pɛnʼà ä mɔ̀.” Ii tè Ɔ̌ mua lě uu koǔ bo.

³⁰Tà u klee Ɔ muaǒo di fuo kɛn, Ɔ dǔa flɔ̌ɔ tìe mǒ Ɔ̌ poa ɛ ngmna mɔ̀ Ɔ̌ bɛ̌a ɛ je le Ɔ̌ nyea nɛ nu.

³¹È nùǒ kɔn jǐ bɛ̌a ǔ jboa Lɔ, tǐi doo tǐ jleě è Nɔ̀ǒ fǎna keǒ u slè.

³²È kě u dedɛ̌ɛa je le u je, “Äa plɔ blo lo chɔɔ tà Ɔ boɛɛ lě ämoo mɔ̀ keǒ snǔ mɔ̀ Ɔ̈ sèsɛɛ lee Nyesoaa win kɛn le keǒ ä mɔ̀!”

³³Tǐi doo tǐ jleě è nùǒ tbaea je ü mua Jlǔsnɛ klě u jɛɛaě Ɔɔ mɔ̀ cheěn nyoo pù tùo doǒ klee nyopò tùu ǔ bòa le.

³⁴È kě mɔ̀ cheěn nyoo pù tùo doǒ u dɛ̌a tàii sɔ̌nʼǒ je u je, “I moo kàan tè äa Koɔn dǔ mǒ je Ɔ woǒa Saemɔ̌ je!”

³⁵È Ɔɔ mɔ̀ na nyoo sɔ̌nʼǒ sɔnaa Imɛɛ̀ mǒ ù tmɔɔ̌a u ke dɛ kpalaa tùɔn keǒ snǔ mɔ̀ plě tà Ɔ bɛ̌aa flɔ̌ɔ je ke u nua Lɔɔ jbojbɛ.

³⁶Tà Jùsuu mɔ̀ cheěn nyo kea lěe tèǒ měne pepe le, è keà nyu kapǒo jǐ, Jùsu Nɔ̀ǒ nynana bo klě u slè, kě Ɔ dɛ̌a u je Ɔ je, “Ně bo wnawna keǒ a mɔ̀.”

³⁷È nùǒ kètea ü pea fano. Mɛ̌oǒ joo nɛ̀ moo uu wlò je sùsuǒ u jěa.

³⁸Ii tè kě Ɔ nia u wan gbògba Ɔ je, “Mɛ kɔɔ̌n tè fano niǐ kɛ amo? Plě mɛ kɔɔ̌n tè a peě kɛ kplɛ keǒ Ně jemǒ dǔ tè mɔ̀?

³⁹A tan nɔɔ̌ kwete měne, a tanʼɔ Ně be kɛne, a jě kponkpaǐi wɛnʼà. Ně chɛ̀ mǒà, a tǒǒ le a mǐ ɛ ji. Sùsu se fǒ kɔn plě ɛ se kbǎ kɔn wòje keà a ni Mǒo jejeɛ̌.”

⁴⁰Tà Ɔ dǎla bòo, Ɔ tea u be je Ɔ̌ tea u sonwe je.

⁴¹Tà i kɛɛnʼa uu wlò le plě chǒn jǐa uu je, nɛ̀ kɔn tè uǔ poǒa jè Ɔɔ tè kàan tè. Ii tè Ɔ gbàla u wan Ɔ je, “A kɔn kɛ didi dɛ ɛ̈ neàa nyu bɔ dii le?”

⁴²È u nyea Ɔ smìi peǎn u piaa,

⁴³è u keaǒ Ɔ mɔ̀le tɛn Ɔ̌ dia lɛ.

⁴⁴È kě Ɔ dɛ̌a u je Ɔ je, “Tà a klee Mǒ ä nɛɛ̌a jèe, noǎ wùɛ kɔn tè Ě tmɛɛ̌a amoo nìà kpa tùɔn ï kɔn tè Mɔ̀sě klee Nyesoaa wnɔsàɔpo chlěaa klee ï Dèběsee Bleble Chněedɛ̌ boɔaa keǒǒ jleě mǒ, ii wùɛ nìà jaěǒ teěn.”

⁴⁵È Ɔ nua nu ǔ jboa Nyesoaa win le.

⁴⁶È kě Ɔ dɛ̌a u je Ɔ je, “Ɛ chleěa le klě Nyesoaa win wlòmo ɛ̈ moo, ‘Nyesoaa Tentǎn Jǔ kɔn Bɔ jě sònwɛ Ɔ mǐ kǒ, è bɛ̌ sìn, klě chnɛ̀ jlǒ wěe tan nenɛ wlòmo Ɔ miǎě kǒla mǒ sɔnma Ɔ miǎ jemǒ dǔ.’

⁴⁷È kě imo winʼǒ i dɛ̌a ke ɛ̈ moo, ‘Ba boɔ Jùsuu tè dakɔ̌ wùɛ je, ba tmɔɔ̌ u bu bitǐ uu wlè bo, Nyesoa mǐ uu kpni kukwǐi tè wlò le poo lo.’ Ɛmo dɛǒ klě Jlǔsnɛ klě bǎ tùuě ɛ wlò.

⁴⁸A sèsae nyopò wùɛ wlòmo keǒ noǎà ii tè mɔ̀.

⁴⁹Ě mi a Ngmà Je Ne Sùsu mɔ̀ dboba Ɛ̈ Ně Gbeǐ peeěe Bɔ dboo kělɔ a mɔ̀. Ii tè klě ba neě Jlǔsnɛ bo a mǐ Ɛ kɛn mǒ fo, ɛ mǐ ɛ kpa kpa kpěǒ miěe jɔkɛn mǒ sɔnma i mǐ a je jǐ.”

⁵⁰È Jùsu kpalaǒ u Bɛtnè diě wakǎ mǒ, Ɔ dǔa Ɔɔ sonwe jemǒ Ɔ̌ poa u ngmna mɔ̀.

⁵¹Tà Ɔ kea uu ngmnaǒ mɔ̀ pe, è Nɔ̀ǒ Nyesoa dǔa jemǒ Ɔ kpala jɔkɛn

⁵²ǔ sàla Ɔɔ wɛ̀, è nùǒ mua de klě Jlǔsnɛ dǐa. Uu plɔ wɔ̌na bloblo tè chɔɔ.

⁵³U sìnʼaě tǐ fòfoa klě Nyesoaa kǎ fòɛ bo ǔ pea Nyesoaa nynɛ̌ le.