Read Grebo, Northern Lǔkù 4 Bible Online

Lǔkù 4 - Grebo, Northern bible

Lǔkù 4

¹È Jùsu sɔnaě Jɔ̀ɔ̌dɛn wien mǒ Ngmà Je Ne Sùsu jǐa Lɔ je Ɛ̌ kpalaě Ɔ kpatekpǎ blǒ kɛn.

²Klě kǔ tɛ̀naě Ɔ měne klě chnɛ̀ jlǒ wěe wlèe sɔ̌n wlòmo. Jùsu sea dɛɛ̌dɛ̀ɛ chɛ̀ di klě tǐǒ wlòmo, ii tè tà chnɛ̀ jlǒ wěe wlèe sɔ̌nʼǒ i keaa dlǒ chlɛ̀, è sàno nia Ɔno chɔɔ.

³Ii tè kě kǔ dɛ̌a Ɔ je ɔ je, “Bɛ̌ nu sɛje Bò dae dìe Nyesoaa Jǔ, è Bò tmɔɔ̌ seɔ̌à bɛ ponpnɔɔ flɔ̌ɔ Mì di.”

⁴Kɛɛ Jùsu tùa ɔ kɛ̀ɛn Ɔ je, “Ɛ chleě le klě Nyesoaa win wlòmo i je, ‘Tùonyugbe bɔɔ̌ nee didi dɛɛ do kmɔ̌.’ ” (Deut 8.3)

⁵È kǔ dǔa Ɔ mǒ de ɔ̌ kpalaě Ɔ ja tmɔ tà ɔ̌ tea Lɔ kmɔ̌ɔ deplě wùɛɛ win kwa konkɔn je le klě jǐi kapǒa wlòmo.

⁶È kě kǔ dɛ̌a Ɔ je ɔ je, “Kmɔ̌ɔ kbě klee tè jǐ boaboǎ wùɛà mǒ i nyee ne, ii tè nyu wùɛ ně plɔ mii kɛn blooba nɔ̀ Ě mi i nyema.

⁷Tèǒ nì kɔn tè bɛ̌ nu Bò sà ně wɛ̀, ii wùɛà Ě mi niì nyema.”

⁸È Jùsu tùa lɔ kɛ̀ɛn Ɔ je, “Ɛ chleě le klě Nyesoaa win wlòmo ɛ̈ moo, ‘Ɔmo Koɔn Nyesoaa doǒ Nɔ̀ kɔn wɛ̀ nyu wùɛ bɔ sà plě Nɔ̀ bɔ neeě bobo.’ ” (Deut 6.13)

⁹È kǔ dǔa Ɔ mǒ ɔ̌ kpalaě Ɔ Jlǔsnɛ ɔ̌ jaěa lě Ɔ Nyesoaa kǎ fòɛ ɛ̈ tmɔaa ja chɔɔ ɛɛ kǎ gbèe mǒ, è kě kǔ dɛ̌a Ɔ je ɔ je, “Bɛ̌ nu sɛjesɛ Bò moo Nyesoaa Jǔ, wan nɔ koǔɔ dlǒ bè wɔ̀ɔn.

¹⁰Mɛ kɔɔ̌n tèǒ joo nɛ̀ moo ɛ chleě le klě Nyesoaa win wlòmo ɛ̈ moo, ‘Ɔ mi Ɔɔ najiǒpò dboba u mǐì jǐ mɔ̀ tù tɛɛ tɛɛ u mǐì nae ne,

¹¹u miěè jɔ mǒ saě lě ɛ̈ di ɛɛ numa Nè bo ně di seɔ̌ je gbèe chɛ̀.’ ” (Ps 91.11,12)

¹²È Jùsu tùa ɔ kɛ̀ɛn Ɔ je, “Nyesoaa win nì boɔ lɛ ke i je, ‘Nè tɛ̀nʼě nè Koɔn měne Ɔ̈ moo nèe Nyesoa.’ ” (Deut 6.16)

¹³Tà kǔ wɔ̀laě Ɔɔ měne tèntɛn wùɛǒ mɔ̀, è nɔ̀ǒ sɔnaǒ Jùsu mɔ̀ mǒ klě tǐ gbei wlòmo.

¹⁴È Jùsu mua de klě Jàlalǐi wakǎ kɛn, è Ngmà Je Ne Sùsuu kbě nì jǐa Ɔ je. È Ɔɔ nynɛ̌ wɔ̀la wakě wùɛǒ dlǒ ï tbɛɛaǒo tàǒ dǐ.

¹⁵Ɔ teea nyopò klě Jùwɛ nyoo Nyesoa keǐ bo ble le uu wùɛ ǔ bɛɛa Lɔ.

¹⁶È Ɔ mua de klě Nǎsòwɛ̌ dǐa tà Ɔ kuunʼa lěe. È klě Sɛ̌ɛ̀de wlòmo ɛ̈ moo Nyesoaa de fɛ waě, Ɔ muaě Jùwɛ nyoo Nyesoa koǔ bo wòje ke Ɔ ni pnɔɔ Ɔ̌ nynana bo Ɔ mǐa Nyesoaa win slè.

¹⁷È chněedɛ̌ǒ Nyesoaa wnɔsàɔ Aesaeǎ chlěaa nɛ̀ chněenoǎ jǐ mɔ̀ tùɔ̌ nyea Nɔ. È tà Ɔ knana lɛɛ je, ɛɛ wakǎǒ dɛ̌a bòo nɛ̀ Ɔ jěa ɛ̈ moo,

¹⁸“Koɔnʼɔ Sùsu Nɛ̀ neěě ja. Mɛ̌oǒ joo nɛ̀ moo Nɔ̀ tba Mǒ keǒ Bo po Ɔɔ kàan tuposàà sònwɛ nyo je. Ɔ dboǒ lo Bo boɔɔ nyopòà nee kpe be le uu gblàgbla tè kɛn, Ɔ̌ dbo Mǒ Bo boɔɔ nyopòà kɔn jǐ dɔɔ uu le jě tè kɛn. È Ɔ̌ dbo Mǒ Boǒ gblà nyopòà u mɛɛ̌ǒo bo,

¹⁹plě keǒ Bo tmɔɔ̌ u ɛ̈ moo tǐ nyniǒ no keǒ Koɔn Bɔ gblà lu.” (Is 61.1-2)

²⁰È Jùsu kana chněedɛ̌ǒ je Ɔ̌ nyea ɛ nyuǒ nyea nɛ Ɔ̀ɔ de Ɔ̌ nea bo Ɔ mǐa u tee le. Nyopò wùɛ ü nea lěe Nyesoaa koǔǒ bo uu jǐ neaě Ɔ mɔ̀.

²¹È kě Ɔ dɛ̌a u je Ɔ je, “Kekɛɛà Nyesoaa winʼà a wɔ̌nʼɔ i jieě le.”

²²Wlòlekaen noǎǒ Ɔ boɛaa i kmeea nyopò wùɛ kɛn ǔ pooa Ɔ kòo kɛn, kě u dɛ̌a u je, “Deě ɛ se kɛ Jòsɛ̌foo Jbɛjujuà le?”

²³È kě Ɔ dɛ̌a u je Ɔ je, “Tǐ tìi tà a miǐ ninɔ̌à je poba ɛ̈ moo, ‘Dɛjǐɔ pean Dìe’ plě a mǐ bò dǎ ɛ̈ moo, ‘Ä wɛ̌n noǎ fòfoa ï nùu klě Kapanìa dǐa, nu ii doà ke kělɔ Nè chɛ̀ɛ dǐa.’ ”

²⁴È kě Jùsu dɛ̌a de Ɔ je, “I moo kàan tè ɛ̈ moo Nyesoaa wnɔsàɔ wùɛ seǒ bo tùtuɛ kɔn klě ɔɔ chɛ̀ɛ dǐa.

²⁵È Ě jlɛ̌ Bo wa wèe Bo nye a konwě, tǐǒ jleě Nyesoaa wnɔsàɔ Ilaejɔ̀ neaa kmɔ̌ nǔ sea dba klě jlěe tan ne bɔ̀tie le wlòmo, dodopà beaě blǒ wùɛǒ wlòmo, è ɛ kɔna Jùwɛ nyo fòfoa ü mooa koti nyno ü nea lěe Ǐsòwɛ̌ kɔn blǒǒ wlòmo.

²⁶Kɛɛ Nyesoa sea Ilaejɔ̀ dbo keǒ bɔ sɛ̀ɛa Jùwɛ nyoo kotia nyno wùɛǒ měne, kɛɛ ɔ sɛ̀ɛa mǒ kuadakɔ̌ koti nynɔǒ nea lěe Sawlità klě Saedɛ̀n wakǎ kɛn.

²⁷Tǐǒ jleě Nyesoaa wnɔsàɔ Ilaesɔ̀ neaa kmɔ̌ ɛ kɔna Jùwɛ nyoo bale kwɛ̌ nyo fòfoa ke ü nea lěe Ǐsòwɛ̌ kɔn blǒ kɛn, ɔ sea u nyuu doo chɛ̀ pean, kɛɛ ɔ peana kuadakɔ̌ jbɛjuǒ mooa Nemǎ ɔ̈ sɔnaa Siwlìa blǒ kɛn mǒ.”

²⁸Tà Jùwɛ nyo wùɛǒ nea lěe Nyesoa koǔǒ bo u wɔ̌naa tèǒ, ù bea měne jlo chɔɔ. Mɛ̌oǒ joo nɛ̀ moo dɛ u sìɛnʼaa dlǒ mɔ̀le nɛ̀ moo u je uu do nù Nyesoa kɔnaǒ mɔ̀.

²⁹Ii tè u tbala Ɔ kwete kɛn ǔ poaě Ɔ chònu ǔ kpalaě Ɔ togbeeǒ u tǐnʼaǒo dlǒ ɛɛ blǒ wlawlǒ nɔkǔ ɛ̈ di ɛɛ numa u mǐaě Ɔ blǒ wlawlǒǒ wan tuǔn nu.

³⁰Kɛɛ Jùsu bɛɛ̌aě uu wùɛǒ slè tìe è Nɔ̀ǒ mua.

³¹È Jùsu tèea je Ɔ̌ mua de klě Kapanìa dǐa klě Jàlalǐi wakǎ kɛn. Klě Nyesoaa de fɛ chnɛ̀ jlǒ waě tɛ̀ɛ wlòmo Ɔ teea nyopò klě Jùwɛ nyoo Nyesoa koǔ bo.

³²Ɔɔ teea kaenʼa u le wlò. Mɛ̌oǒ joo nɛ̀ moo Ɔɔ boɔboɔ neaě kpě wlòmo.

³³Ɛ kɔna nyu tɔ̀ɔ ɔ̈ nea lěe Nyesoa koǔǒ bo kǔ sùsu nea lěe ja, ɔ pnɛ̌a dɛ jleě le ke ɔ nuaě ɛɛ wòwɔ,

³⁴kě ɔ dɛ̌a ɔ je, “Ǎ! Mɛ jlɛ̀ Bò nuǔ kɛ ä mǒ Jùsu Ɔ̈ kɔn lěe Nǎsòwɛ̌? Dì kɛ lě Bò mì ä gbè sùe le? Ä ji Nyu tae mònoo no, Mò moo Ngmà Je Ne Nyuà Nyesoa dboo!”

³⁵È Jùsu tmɛɛ̌a nɛ Ɔ je, “Po kpee, sɔnʼě jbɛjuǒ ja mǒ!” È kǔ sùsuǒ ɛ poa jbɛjuǒ wɔ̀ɔn keǒ u jemǒ, è nɛ̀ǒ mua, ɛ sea ɔ dɛ tba.

³⁶È nyopò wùɛǒ ù bea mǒ fano, kě u dedɛ̌ɛa je le u je, “À win taeà kɛ ï neě bò wan? Jbɛjuà Ɔ kɔn kpě keǒ Bɔ tmɔɔ̌ kǔ sìsi bi sɔnʼě nyu ja mǒ ǐ tùiǒ Ɔ bo!”

³⁷È Ɔɔ nynɛ̌ wɔ̀la wakě wùɛǒ tbɛɛaǒo tàǒ dǐ dlǒ.

³⁸Tà Jùsu sɔna lěe Nyesoaa koǔǒ bo mǒ, Ɔ mua lě Saemɔ̌ɔ tà klě Ɔ jɛɛaě Saemɔ̌ɔ nynenaǎ ɔ̈ fèflɛ bea lěe fǒ mǒ ǔ tmɔɔ̌a Jùsu nynɔǒ ɔɔ tè keǒ Bɔ sɛ̀ɛa ɔ mǒ.

³⁹È Ɔ mua Ɔ̌ funʼaǒ nynɔǒ dlǒ mǒ bo Ɔ̌ tmɔɔ̌a fèflɛǒ neaě ɔɔ fǒ mǒ bɛ bɛ̌a klě ɔ ja. È nɛ̀ǒ bɛ̌a klě ɔ ja. È tǐi doo tǐ jleě nynɔ nɔ̀ǒ dǔa jemǒ ɔ̌ kpɛaǒ nyopòǒ didi dɛ jemǒ.

⁴⁰Tà wɛn keaa pɛ, Nyesoaa de fɛ chnɛ̀ jlǒà nyu ně nunuu konkwa mǒ ɛ sìnʼaa, nyopò wùɛ jɛaě uu nenawa ü kmɛaa plě nyopò tùu kweǎa doědoe niaa klě Jùsu mɔ̀ Ɔ̌ peaǒ u son jleě mǒ bo Ɔ̌ peana u do do.

⁴¹Tà Ɔ keaa dɛǒ ni, è kǔ sìsi fòfoa sonwɛaě nyopò ja měne ǐ pnɛ̌a dɛ jleě le i je, “Mòà Mò moo Nyesoaa Jǔ!” Kɛɛ Ɔ tmɛɛ̌a ni bi poa kpee bi bɔ̌a Ɔɔ tè kɛne sèsaea. Mɛ kɔɔ̌n tèǒ joo nɛ̀ moo i jia ɛle ɛ̈ moo Nɔ̀ moo Nyesoaa Tentǎn Jǔ.

⁴²Tà chnɛ̀ tɛ̀ɛ gbàlaa le ɛɛ kènta, Jùsu dǔa jemǒ Ɔ̌ mua lě tàa dě poa lěe kpee Ɔɔ do Ɔ̌ boɛaě Nyesoa mɔ̀. È diblɛ̌ pɔ̀na Ɔ le pɔ̀n pɔ̀n ǔ jěa Lɔ. È tà u jěa Lɔɔ, u memɛ̌ɛa kɛ̀ Ɔ de ble Ɔɔ̌ diaě u slè mǒ sɔn.

⁴³Kɛɛ kě Ɔ dɛ̌a u je Ɔ je, “Ě kɔn Bo muě deě tìiǒ kɛn ke Ě mǐ u Nyesoaa kàan tuposàà je po ɛ̈ kwɛɛǒo Nyesoaa win kwa konkɔn jleě mǒ bo. Tèà nì kɔn tè Nyesoa dbo Mǒ.”

⁴⁴Ii tè Ɔ̌ boɛa Nyesoaa win klě Jùwɛ nyoo Nyesoa keǐ bo ble le klě Jùdǐa wakǎ kɛn.