Read Grebo, Northern Lǔkù 7 Bible Online

Lǔkù 7 - Grebo, Northern bible

Lǔkù 7

¹Tà Jùsu wɔ̀laa noǎ wùɛǒ boɔboɔ mɔ̀ klě nyopòǒ mɔ̀, è Nɔ̀ǒ mua Kapanìa dǐa.

²È Wlǔmɔ nyoo tabɔ̀ɔ jǐgbàdiɔ ɔ̈ nea lěe nɔ̀ kɔn nyebajlo kmɛa, ɔ neaǒ kokǒ snǔ mɔ̀, ɔ mooa ɔɔ mǒ noɛɛ nyebajlo chɔɔ.

³Tà jǐgbàdiɔǒ ɔ wɔ̌naa Jùsuu nynɛ̌, ɔ dboa Jùwɛ nyoo bòliboo tìe bu mua Lɔ da Bɔ dia lě Ɔ miǎ ɔɔ nyebajloǒ pean.

⁴Tà u dia lěe Jùsu mɔ̀, u bɛ̀tea Ɔ le kàan wɛ̀, kě u dɛ̌a u je, “Jbɛjuà, ɛ blɛɛ ɛ je Bò sɛ̀ɛ ɔ mǒ.

⁵Mɛ̌oǒ joo nɛ̀ moo ɔ noɛɛ äa nyopò mǒ no plě ɔ̌ po Jùwɛ nyoo Nyesoa koǔ keǒ ä mɔ̀.”

⁶Ii tè Jùsu sɔna mǒ Ɔ̌ nana u de. Ɔ sea koǔ mɔ̀ tmɔɔ noo chɛ̀ è jǐgbàdiɔǒ ɔ̀ dboa ɔɔ nenawa klě Ɔ mɔ̀ ü ɔ poaa win wan ï dɛ̌a bòo ɛ̈ moo, “Koɔn, Bɔ̌ Dìe feanfeǒ tùtuɛ keǒ Bò diě ně koǔ bo. Mɛ̌oǒ joo nɛ̀ moo mǒà Ě seǒ je blɛɛ le keǒ Bò diě ně tà.

⁷Mǒà Ě slě ně chɛ̀ kàan dɛ mǒ jě ɛ̈ kɔn tè Ě miǒ Mòo jemǒ di. Kɛɛ boɔ wien sosǒ ně nyebajloǒ ɔɔ kwɛ̌ mi dɛ bɔ̌ba.

⁸Mǒà Ě neeě nyopò tùu kpě bobo plě tabɔ̀ neeɔɔ̌ bobo ke. Bo tmɔɔ̌ u nyuu do mu ɔ̀ mu nu, bo da do tɔ̀ɔ diě ɔ̀ diě le, bo tmɔɔ̌ ně nyebajlo nu dɛà ɔ̀ nu ɛ ne. Tèǒ nì kɔn tè Ě ji ɛle Bò boɔ wien ně nyebajloo dɛǒ ɛ mi dɛ bɔ̌ba.”

⁹Tà Jùsu wɔ̌naa winʼǒ, ì kaenʼa Ɔ le wlò, è Ɔ chèa diblɛ̌ǒ nɛa Ɔɔ de ja Ɔ je, “Ě tmɛɛ̌ ane, Ě sěɛlǎ ɛ nyu jě bɔ̈ kɔnʼɔ tè wlò popoɛ taeà klě tà wùɛ klee kělɔ Ǐsòwɛ̌ kwɛɛn slèe chɛ̀.”

¹⁰Tà nyopòǒ jǐgbàdiɔ dboaa u tbaeaa je klě ɔ mɔ̀, ù jɛɛaě nyebajloǒ ɔɔ kwɛ̌ bɔ̌a dɛ.

¹¹Tà dɛǒ ɛ sìǐnʼa bòo, Jùsu muaě diěǒ moo Neàa kɛn, Ɔɔ mɔ̀ cheěn nyo klee diblɛ̌ fòfoa nù nana Ɔ de.

¹²Tà Ɔ keaa diěǒ ɛɛ wlɔ̀ dɔwun le konwɛɛ̌ ne, è kokǒ kǔ nɔ̀ u sɛ̀aě dǐa u mia bo tùba. Ɔ nea do ɔ̌ sɔnaě ɔɔ naǎ tògba nynɔǒ wlòmo, è diblɛ̌ fòfoa sɔnaě dǐa mǒ ke ǔ nɛna nynɔǒ de.

¹³Tà Koɔn jěaa nynɔǒ, ɔ̀ɔ wɔle beaě Ɔ mǒ no, kě Ɔ dɛ̌a ɔ je Ɔ je, “Bɔ̌ fìnfiɛn.”

¹⁴È Nɔ̀ǒ kèklaeaǒ kǔ gbàtiǒ gbàa Ɔ̌ gbèa i mɔ̀, è nyopòǒ blěa ii è nùǒ nynana bo, è kě Ɔ dɛ̌a Ɔ je, “Nyemò, Ě tmɛɛ̌ neè ne, dǔ jemǒ!”

¹⁵Tǐi doo tǐ jleě è nyemòǒ kǒaa è nɔ̀ǒ sɔna mǒ ɔ̈ nea bo ɔ̈ tùngmaea wien le boɔboɔ. È Jùsu dǔa lɔ mǒ Ɔ̌ nyea nɔɔ̀ naǎ.

¹⁶È nyopò wùɛǒ u pea fano ǔ pea Nyesoaa nynɛ̌ le u je, “Nyesoaa Wnɔsàɔ fòɛ Nɔ̀ neɔ ä slè!” È kě u dɛ̌a ke u je, “Nyesoaà diě Ɔ̈ mǐ Ɔɔ nyopò mǒ sɛ̀ɛ le!”

¹⁷Dɛǒ ɛ nua Jùsuu nynɛ̌ ɛ̌ gbɛ̀tɛɛa Jùdǐa wakǎǒ kɛn le klee blě tìiǒ tbɛɛaǒo dǐ.

¹⁸Ně Dlǒ Po Jɔ̀ɔ̌nʼɔ mɔ̀ cheěn nyo tmɛɛ̌a Jɔ̀ɔ̌n noǎ wùɛɛ tè ɛ̈ moo Jùsu duǐa kokǒ nyo je měne. È Jɔ̀ɔ̌n dala u tàii sɔ̌n

¹⁹ɔ̌ dboa lu klě Koɔn Jùsu mɔ̀ bu gbàla Ɔ wan ɛ̈ moo, “Deě Mò moo kɛ Nyesoaa Tentǎn Jǔ Ɔ peea lěe Bɔ dboaa Ɔ̈ mǐa ämoo gblà? Deě ɛ kɔn nyu tɔ̀ɔ bä pɔ̀ɔ̌n jèe snǔ mɔ̀le?”

²⁰Tà nyopòǒ u nynia lěe Jùsu mɔ̀, è kě u dɛ̌a Ɔ je u je, “Ně Dlǒ Po Jɔ̀ɔ̌nʼà dbo ämo kělɔɔ̀ mɔ̀ ɔ je bä gbàà wan ɛ̈ moo, ‘Deě Mò moo kɛ Nyesoaa Tentǎn Jǔ Ɔ peea lěe Bɔ dboaa Ɔ̈ mǐa ämoo gblà? Deě ɛ kɔn nyu tɔ̀ɔ bä pɔ̀ɔ̌n jèe snǔ mɔ̀le?’ ”

²¹È klě tǐi doǒ wlòmo Jùsu peana nyopò fòfoa ü kmɛaa ü kɔn tìe kweǎ nea lěe mǒ klee tìe tùu kǔ sìsi nea lěe ja, è nyopò tùu ü dɔaa Ɔ̌ knɛa uu jǐ.

²²È Jùsu tùa u kɛ̀ɛn Ɔ je, “A mu, a tmɔɔ̌ Jɔ̀ɔ̌n noǎ a wɔ̌nʼɔ klee a kpaǒo jleě mɔ̀ ii tè. Dodɔ nyo jě le plě bo klɔ̀ɔ nyo nɛ ne, è bale nyoo kweǎ wɛ̀ le, nyopòà sǔnʼu u wɛ̌n le klee kokǒ nyo duǐ měne je plě Nyesoaa win boɛɛ sònwɛ nyo je.

²³A tmɔɔ̌ ɔ, nyopòà ü see kplɛ kɔn keǒ nyu tae Ě monoo mɔ̀ ɛ moo ngmna keǒ u mɔ̀.”

²⁴Tà Jɔ̀ɔ̌nʼɔ nyopòǒ u muaa, è Jùsu gbàla diblɛ̌ǒ wan ɛ̈ kwɛɛaǒo Jɔ̀ɔ̌nʼɔ tè jleě mǒ bo Ɔ je, “Mɛ a muǔa kɛ lě kpatekpǎ blǒ kɛn a muǔa jěba? Ɛ mooa kɛ fèflɛ bɛ sèke kwlǎ wɔ̀nfi le nɛ̀ a mua jěba le?

²⁵È bɛ̌ sea ɛɛ tè, mɛ kɔɔ̌n tè a muǔa kɛ lě kpatekpǎ blǒǒ kɛn a muǔa jěba? Ɛ mooa kɛ nyu nea lě ɔ̈ pea kɛ jǐlenmɔ wlawlě měne nɔ̀ a mua jěba le? Nyopòà pànʼa u pe měne jǐlenmɔ wlawlě ǔ neě klɔ̀ba koǔ ja.

²⁶Ii tè mɛ kɔɔ̌n tè a muǔa kɛ lě kpatekpǎ blǒǒ kɛn? A mua kɛ Nyesoaa wnɔsàɔ jěba le? Kòo, Bo sèsae a wlòmo, Jɔ̀ɔ̌nʼǒ kɔn tè a mua lěe tàě ɔ se wnɔsàɔ sosǒ.

²⁷Ɔmoǒ nɔ̀ kɔn tè boɔɔa tà Nyesoa dɛ̌a bòo klě Ɔɔ Jǔ mɔ̀ ɛ̈ moo, ‘Ba po nɔkǔ bo, Mǒ Nyesoa Ě mi Ně tà dbo nyu klěè nya dboba ɔ miǎ nyopò mɔ̀le wɔ̀ keǒò mɔ̀.’ ” (Mal 3.1)

²⁸È Jùsu kpɛa win dlǒ mɔ̀ Ɔ je, “Ě tmɛɛ̌ ane, klě kmàe nynoo jlǔ slè nyu tɔ̀ɔ tè se kun i seǒ Jɔ̀ɔ̌nʼɔ tè mǒ sìn, kɛɛ nyuà ɔ̈ tìeǒ ɔɔ chɛ̀ keǒ Nyesoaa win kwa konkɔn mɔ̀ nɔ̀ kɔn tè kun ï sìnʼǒ Jɔ̀ɔ̌n mǒ.”

²⁹È nyopò wùɛ ü wɔ̌naa Jɔ̀ɔ̌n win, jà dlǒ wlě tɛ̌n nyo, u kmea Nyesoaa ble po dɛǒ bo ǔ sɔnaǒ Jɔ̀ɔ̌n mɔ̀ mǒ ɔ̌ poa u ně dlǒ.

³⁰Kɛɛ Fɛlesǐi wǎn klee teteǎ tee nyo seaǒ Jɔ̀ɔ̌n mɔ̀ mǒ sɔn ɔ sea u ně dlǒ po. Dɛǒ nɛ̀ u nua ǔ sàla Nyesoaa ble po dɛ jleě mɔ̀.

³¹È dɛ tɛ̀ɛ Jùsu boɛaa de nɛ̀à Ɔ je, “Nyopòà ne kekɛɛ kmɔ̌, mɛ Ě miǐ kɛ u je poba? Mɛ u wǒoǒ kɛ je?

³²U wǒ je keà jlǔ panpě ü neěe noǎ plooa mǒ bo ü dɛ uu bǐì le u dɛ̌ bòo, ‘Ä be plèi keǒ a mɔ̀, kɛɛ a sà i mǒ nɔkǔ aǎ jla ba je. Ä mu ä be kpǎn tùu bebe noǎ, kɛɛ a sàǒ ä jleě mɔ̀ a slě wɔ̀ ba be ä kɛn bä chìn sònwɛ.’

³³Dɛɛ doǒ nɛ̀ ɛ mono, tà Ně Dlǒ Po Jɔ̀ɔ̌n diěe, ɔ chìnʼa ɔ̌ sea nmɔ nǎ, kɛɛ a sàla ɔ mɔ̀ nɔkǔ, è a je ɔ kɔna kǔ sùsu neě ɔɔ ja.

³⁴È Tà Jbɛjuu Jǔà Ɔ diěe Ɔ di dɛ Ɔ̌ nǎ, è kě a dɛ̌a a je, ‘Nyuà tàa Ɔ kɔn knaknǒ Ɔ̌ moo nmɔ nǎ Nyu plě Ɔ̌ moo dlǒ wlě tɛ̌n nyo klee kpni kukwǐ nyo tùu mɔ̀nai.’

³⁵Kɛɛ Nyesoaa tɔ̀n winʼà i boɛ kàan tè ɛ̌ tee ɛ keǒ dɛ i nii klě nyopòo kmɔ̌ nenɛ mǒ.”

³⁶Chnɛ̀ jlǒ waě tɛ̀ɛ mɔ̀ Fɛlesǐi wǎnpòi pia Jùsu dɛ le, ii tè Jùsu muaě ɔɔ tà Ɔ̌ mua dɛ diba keǒ dɛ di fuo kɛn.

³⁷Ɛ kɔna gblà nynɔ tɔ̀ɔ nɔ̀ nea lě diěǒ wlòmo. Tà ɔ wɔ̌na nii ɛ̈ moo, “Jùsu di dɛ diba klě Fɛlesǐi wǎnpòii koǔ boò,” ɔ jalaě seɔ̌ sòtae ɛ̈ jǐaa sonsnǒ chnɔ̌ je.

³⁸È ɔ nynanaǒ Jùsuu be wakǎ mǒ bo ɔ̌ fìnʼa. Ɔɔ meǒ nì ɔ nia ɔ̌ jlɛa Jùsu be le, è ɔɔ moamoa dlǒ nɛ̀ ɔ nia ɔ̌ snɛ̌a Ɔɔ be le, è ɔ̌ nyoěa Ɔɔ beǒ ɔ̌ dǔa chnɔ̌ǒ mǒ nɛ̀ ɔ chniǐaǒ Ɔ̀ɔ be kɛn le.

³⁹Tà Fɛlesǐi wǎnpòiǒ dalaa Jùsu dɛ diba ɔ jěaa dɛǒ, è kě ɔ dɛ̌a klě ɔɔ chɛ̀ wlò jleě ɔ je, “Bɛ̌ nu Nyuà sɛje Bɔ̌ monoo Nyesoaa Wnɔsàɔ Ɔ mii ɛ jiba nyu tae nynɔà ɔ monoo ɔ̌ toe Ɔɔ le, ɔ moo gblà nynɔ.”

⁴⁰È kě Jùsu dɛ̌a ɔ je Ɔ je, “Saemɔ̌, Ě kɔn tè Bo tmɔɔ̌ mòo.” È ɔ tùa Jùsu kɛ̀ɛn ɔ je, “Tmɔɔ̌ mǒ ně Tee Nyu.” È Jùsu tùa lɔ kɛ̀ɛn Ɔ je,

⁴¹“Ɛ kɔna jbɛjluu sɔ̌n ü blěaa jbɛju tɔ̀ɔ wlejoɛ̌ɛ kwa. Ɔ nyea do hɔ̀ndlowɛɛ m̀m, è ɔ nyea do tɔ̀ɔ pɛ̌inʼi pù tùo sɔ̌nʼɔ sǐli pù.

⁴²Uu sɔ̌nʼǒ u sea wlejoɛ̌ɛ sàla kɔn u mǐa jbɛjuǒ nye. Ii tè ɔ sàlaě u wun mɔ̀ ɔ je, ‘Wlejoɛ̌ɛǒ ɛɛ tè bi wɛ̀.’ Tèǒ nì kɔn tè Ě jlɛ̌ bò tmɔɔ̌ Mǒ, uu sɔ̌nʼǒ mɔ kɔn mǒ noɛnoɛ miǐ kɛǒ le sìnma keǒ jbɛjuǒ mɔ̀?”

⁴³È Saemɔ̌ tùa Ɔ kɛ̀ɛn ɔ je, “Ně wlò je nyuǒ blě ɔɔ wlejoɛ̌ɛ fòfoa kwa nɔ̀ kɔn mǒ noɛnoɛ miě le sìnma.” È kě Jùsu dɛ̌a Ɔ je, “I teěn nìǒ bòɔ.”

⁴⁴È Ɔ bitǐa bo Ɔ̌ chèa nynɔǒ ja, kě Ɔ dɛ̌a Saemɔ̌ je Ɔ je, “Jè kɛ nynɔà nee? Tà Ě diɔ nèe koǔɔ bo, sèě ně nye keǒ Boǒ jla be le, kɛɛ nynɔà ɔɔ chɛ̀ɛ me nì ɔ nu ɔ̌ jlaǎ be le ɔ̌ nu ɔɔ chɛ̀ɛ moamoa dlǒ ɔ̌ snǎǎ be le.

⁴⁵Tà Ě kee koǔ bo pɛ sè Ně wun nyǒ, kɛɛ Ě paa koǔ bo papa nynɔà ɔ sěɛ Ně be nyonyoɛ̌ gbɛ̌.

⁴⁶Sèě Ɔlè chnɔ̌ dlǒ le pne, kɛɛ nɔ̀ pneě sonsnǒ chnɔ̌ be le.

⁴⁷È Bo tmɔɔ̌ mò, nynɔà ɔɔ mǒ noɛnoɛ fòɛà ɛ tee ɛle ɛ̈ moo ɔɔ kpni kukwǐ fòfoaǒ ii tè poo le wlò, kɛɛ nyopòà ü kɔn kpni kukwǐi noǎ gbeii tè poo loo wlò le uu mǒ noɛnoɛ chɛɛ̌n mǒ no.”

⁴⁸È kě Jùsu dɛ̌a nynɔǒ je Ɔ je, “Nè kpni kukwǐi tè poo le wlò.”

⁴⁹È nyopòǒ klee Ɔɔ sɔ̌n diaa dɛ, è nùǒ tùngmaea wan le gbògbaea u je, “È ke Nyu taeà Ɔ ka neě kɛ je Ɔ̌ pee lee kpni kukwǐi tè wlò lee chɛ̀?”

⁵⁰È kě Jùsu dɛ̌a nynɔǒ je Ɔ je, “Nè tè wlò popoɛǒ kɔ̀nʼɔ klěě mǒ nɛ̀ gblà mò, ii tè mu, kpa plɔɔ bloblɛ.”