Read Grebo, Northern Lǔkù 9 Bible Online

Lǔkù 9 - Grebo, Northern bible

Lǔkù 9

¹È Jùsu dala Ɔɔ mɔ̀ cheěn nyoo pù tùo sɔ̌n keǒ tàa do Ɔ̌ nyea u kpě bu sàlaě nyopò kǔ sìsi ja le klee bu peana kweǎ.

²Ɔ̌ dboa u blě kɛne bu boɔa Nyesoaa win kwa konkɔn tè klee bu peana nyopò ü kmɛaa.

³È kě Ɔ dɛ̌a u je Ɔ je, “Balě kpɛ dɛ wùɛ bǎ ke topodìeǒ mǒ mi. Mɛ̌oǒ joo nɛ̀ moo nyopòǒ a mii mǒ sɛ̀ɛba nù mi dɛ wùɛ a sòɛ tàmo sàba. Alě kpɛ nae tu klee blɔ̌ klee didi dɛ klee wlě plě alě mɛ̌ wlawlǒǒ a pee wlawlǒ tɛ̀ɛ debo.

⁴Bɛ̌ nu bǎ paeě nyuu tà bɔ̌ kme a jebo klě ba neě bo ɛ mǐ ɛ kpa kpa a miě diěǒ wlòmo sɔn.

⁵Bɛ̌ nu diě kwɛɛnʼǒ bǔ se a jebo kme, è ba sà pǔpu be le a miě diěǒ wlòmo sɔn, nɛ̀ mi ɛ teeba ɛ̈ moo Nyesoaa plɔ se u kɛn bloo lo.”

⁶Ii tè Ɔɔ mɔ̀ cheěn nyo mua klìgbeǒ kɛn le ǔ pea Nyesoaa kàan tuposà ɛ̈ kwɛɛǒo Nyesoaa win kwa konkɔn tè jleě mǒ bo. Tà wùɛ u miaǒo u peana nyopò wùɛ.

⁷Tà Hɛwlǒ ɔ̈ moo Wlǔmɔ nyoo kòngmna nyefòɛ ɔ̈ kɔnaa Jàlalǐi wakǎ win kwa ɔ wɔ̌naa noǎ wùɛ ï kpɛaa tùɔn, è ɔɔ wlò sakaea měne jǐ. Mɛ kɔɔ̌n tèǒ joo nɛ̀ moo nyopò tùu tmɛɛ̌a nɔ ɛ̈ moo, “Ně Dlǒ Po Jɔ̀ɔ̌n kǒaa nɔ̀ǒ dǔa jemǒ.”

⁸Nyopò tùu je ɛ mooa Nyesoaa wnɔsàɔ Ilaejɔ̀ ɔ̌ dia de kělɔ kmɔ̌ mɔ̀ wòje keǒ Nyesoaa win je ɔ miaa numa. È nyopò tùu je ɛ mooa Nyesoaa wnɔsàɔpo tùu ü neaa kmɔ̌ seeaa tǐ jleě u nyuu do nɔ̀ǒ sɔnaě kǒla mǒ ɔ dia de.

⁹È Hɛwlǒ je, “Ě bɛ̌a Jɔ̀ɔ̌nʼɔ dlǒ je. È tà Nyuà Ɔ sɔɔ̌n kɛ mǒ Ɔ̌ niǐ noǎà ï kɔn tèà Ě wɛ̌nʼɛ?” Tà dɛǒ ɛ sìnʼaa, è Hɛwlǒo chɛ̀ pɛ̀nʼa Jùsu jejeɛ̌ le.

¹⁰Tà Nyesoaa tuposà kpa nyoǒ u tbaeaa je klě Jùsu mɔ̀, u tmɔɔ̌a Nɔ noǎ wùɛ u nuaa, è Ɔ dǔa u mǒ u klee Ɔɔ sɔ̌n sosǒ ǔ muaě diěǒ moo Bɛsedà kɛn.

¹¹Tà diblɛ̌ jěa lɛɛ ɛ̈ moo tàě klě Ɔ muěò, è Nɔ̀ǒ u beaě demǒ u nana de. È tà Jùsu jěa luu, Ɔ̀ kmea u jebo Ɔ̌ tmɛɛ̌a u Nyesoaa win kwa konkɔn tè Ɔ̌ peana uu nyopòà ü sòɛaa peanpean.

¹²Tà wɛn blěaa pandlǒ, Ɔɔ mɔ̀ cheěn nyo diaě Ɔ mɔ̀, kě u dɛ̌a Ɔ je u je, “Tà ä neɔɔ dě tmɔɔ no, ii tè sɔnʼǒ nyopòà mɔ̀ mǒ bu mu klìgbe gbeià tbɛɛ ämoo dǐ kɛn le klee chèa měne u mǐ didi dɛ klee pɛna le pɔ̀n keǒ uu chɛ̀ mɔ̀.”

¹³Kɛɛ kě Ɔ dɛ̌a u je Ɔ je, “A nye u dɛ bu di.” Kɛɛ u je, “Ä kɔn flɔ̌ɔ kwlee m̀m klee smì klɔkwlěe sɔ̌n sosǒ, ɛ̀ sìnʼǒ bä mu bä tɔ̀n digbaǐ keǒ uu wùɛà mɔ̀.”

¹⁴È nyopòǒ neaa tùɔn kɛn u blɛɛa mɔ̀ jbɛjluu taslěwɛɛ m̀m. È kě Ɔ dɛ̌a Ɔɔ mɔ̀ cheěn nyo je Ɔ je, “A nu nyopòǒ bu ne ble, bu nee ɛ tàkpɛ̌ ble ɛ̈ blɛɛ lee wlèe sɔ̌n tùo pù mɔ̀ keǒ tàkpɔ̌ mɔ̀.”

¹⁵È u nua dɛǒ Ɔ boɔla uu je, nyopò wùɛ ǔ nea ble.

¹⁶È Jùsu dǔa flɔ̌ɔ kwlee m̀m klee smì klɔkwlěe sɔ̌nʼǒ mǒ Ɔ̌ wlǎla jǐ jɔ mǒ Ɔ̌ pea i ngmna mɔ̀ Ɔ̌ klǎla i wan le Ɔ̌ nyea i Ɔɔ mɔ̀ cheěn nyo ǔ plooa i nyopòǒ měne.

¹⁷Nyopò wùɛ ü neaa tùɔn kɛn u dia dɛ uu kwliǎ jǐa lě. È ɛɛ dɛǒ u seaea mɔ̀ cheěn nyo bòaa le ɛ jiěaě plɛǎa pù tùo sɔ̌n.

¹⁸Chnɛ̀ jlǒ waě tɛ̀ɛ mɔ̀ tà Jùsu kea lěe Nyesoa mɔ̀ boɛ, Ɔɔ mɔ̀ cheěn nyo nea kɛn tùɔn, è Ɔ gbàla u wan Ɔ je, “Mɛ diblɛ̌ wùɛà u je Ě monoǒ kɛ?”

¹⁹U tùa Lɔ kɛ̀ɛn u je, “Tìe je Mòo Ně Dlǒ Po Jɔ̀ɔ̌n, è tìe je Mòo Ilaejɔ̀, è tìe je Mòo Nyesoaa wnɔsàɔ tɔ̀ɔ ɔ̈ neaa kmɔ̌ seeaa tǐ jleě ɔ̈ sɔn lěe kǒla mǒ.”

²⁰È Ɔ gbàla u wan Ɔ je, “È aa chɛ̀à, mɔ a je Ě monoǒ kɛ?” È Pitɛ̌ tùa Lɔ kɛ̀ɛn ɔ je, “Mòà Mò moo Nyesoaa Tentǎn Jǔ.”

²¹È Ɔ tlikaeaě u chìjoɛɛ nɔkǔ mǒ buǔ tmɛɛ̌a nyu wùɛ ɛ̈ moo Ɔ mooa Nyesoaa Tentǎn Jǔ.

²²È kě Jùsu dɛ̌a Ɔ je, “Jbɛjuu Jǔà Ɔ kɔn Bɔ jě sònwɛ fòfoa. Jùwɛ nyoo bòlibo klee Nyesoaa kpatòapoo fòe klee teteǎ tee nyo mi Ɔ jleě mɔ̀ sàba u miǒ Ɔ pète bɛ̌ tu jleě kɔ. Kɛɛ bɛ̌ sìn, klě chnɛ̀ jlǒ wěe tan nenɛ wlòmo Nyesoa miěě kǒla mǒ sàba de Ě mǐ kmɔ̌ ne.”

²³È kě Jùsu dɛ̌a uu wùɛǒ je Ɔ je, “Bɛ̌ nu bo nyu bɔ̌ jlɛ̌ bɔ naǎ de, è ɔ kɔn bɔ poo ɔɔ chɛ̀ɛ fònfno kla kɛn ɔ mǐ ɔɔ sònwɛ jejeɛ̌ɛ pète bɛ̌ tu mǒ dǔ chnɛ̀ jlǒ waě wùɛ mɔ̀ ɔ miǐ de na.

²⁴È bɛ̌ nu nyu wùɛ ɔ̈ɔ̌ jlǎ bɔ na Mǒo de ɛ̈ di ɛɛ numa ɔɔ̌ di ɔɔ fònfno mǎ, ɔ mi kmɔ̌ sie fònfno mǎma, kɛɛ nyuà mi ɔɔ fònfno mǎma keǒ Ně tè mɔ̀, ɔ mi kmɔ̌ sie fònfno kɔnma.

²⁵Bɛ̌ nu kmɔ̌ wùɛà bo tùonyugbe bɔ̌ kɔn nɛ, kɛɛ bɔ̌ nymii ɔɔ chɛ̀ jǐ le, mɛ ɛ miǐ kɛǒ ɔ bo poba?

²⁶Nyu wùɛ ɔ̈ mi Mǒo tònwe mɔ̀ peeba klee Ně teeaà, tà Jbɛjuu Jǔà Ɔ mii de diba klě Ɔɔ tè jǐ boaboǎ klee Ɔɔ Gbeǐ Nyesoa klee ngmà je ne najiǒpòo tè jǐ boaboǎ wlòmo, Ɔ miǎ ɔɔ tònwe peba.

²⁷È tèe jleě nìà Ě tmɛɛ̌ amo, tà ä nynanàa bo ɛ kɔn nyopò tùu neàa ü see kǒba mu u miǎ Nyesoaa win kwa konkɔn jě.”

²⁸Ɛ blɛɛa mɔ̀ chnɛ̀ jlǒ wěe nnyɛɛ̀, nì sìnʼa tà Jùsu boɔlaa tèǒ, Ɔ̌ dǔa Pitɛ̌ klee Jɔ̀ɔ̌n klee Jìmǐse mǒ ǔ jǎlaě togbee dlǒ u mǐaě Nyesoa mɔ̀ boɔ.

²⁹Tà Ɔ kea lěe Nyesoa mɔ̀ boɛ, è Ɔɔ jigbà klee dale sàea le, ii plɛplɛ̌ fenfnɛ̌a jǐ wòje keà nyu jěe tɛ̀nʼɛ pepě.

³⁰È keà nyu kɛpǒo jǐ tàii sɔ̌n nù neaǒ ü sɔna lěe jɔkɛn mǒ ǔ boɛaě Ɔ mɔ̀, u mooa Mɔ̀sě klee Ilaejɔ̀.

³¹Uu fěe plɛplɛ̌ sìnʼaǒ le dɔ̌ keǒ nyu bɔ chèaě u mɔ̀ bo. Nù boɛaě Jùsu mɔ̀ ɛ̈ kwɛɛaǒo ke tǐ nuaa mɔ̀ konwakonwǎ keǒ Bɔ jiěa lěe Nyesoaa kɛn wɔɔn dɛ ɛ̈ mooa Ɔɔ kokoɛ̌ klě Jlǔsnɛ.

³²Pitɛ̌ klee ɔɔ bǐìǒ u bea mǒ momnɔ. È tà u wlěa lěe, ù jěa Jùsu Ɔ̌ wnea pɔpɔ klee tàii sɔ̌nʼǒ ǔ nynanaǒ Jùsu gbàa bo.

³³Tà tàii sɔ̌nʼǒ u sonwɛaǒ Ɔɔ gbàa mǒ, è kě Pitɛ̌ dɛ̌a Jùsu je ɔ je, “Chì Kpa Ämo, ɛ nu tɛɛ ä neà tùɔnʼà kɛn. Sɔnʼǒ ä mɔ̀ mǒ bä po bleaa tan, do keǒò mɔ̀, do keǒ Mɔ̀sě mɔ̀, è do keǒ Ilaejɔ̀ mɔ̀.” Pitɛ̌ sea dɛ ɔ boɛaa ji.

³⁴Tà winʼǒ i kɛ̀naě Pitɛ̌ wan bo, è nukpǎ nɛ̀ chlìa u dlǒ. Tà u neaěe nukpǎǒ slè, ù pea fano.

³⁵È Nyesoaa win sɔnaě nukpǎǒ wlòmo, kě I dɛ̌a I je, “Ně Jǔ Ně wlò sàǒo Nɔ̀à, a po Ɔɔ win nɔkǔ jebo!”

³⁶Tà Winʼǒ I poaa kpee, è Jùsuu do sosǒ nɔ̀ u jěa. È Ɔɔ mɔ̀ cheěn nyo nua kpee, klě tǐǒ wlòmo noǎ wùɛ u jěaa klee u wɔ̌naa u sea ii tè nyu wùɛ tmɔɔ̌ no.

³⁷Tà chnɛ̀ tɛ̀ɛ gbàlaa le Jùsu klee Ɔɔ mɔ̀ cheěn nyoo tanʼǒ u sonwɛa lěe togbee dlǒ mǒ, è diblɛ̌ fòfoa dia Ɔ nya bɛ̌ba.

³⁸È jbɛju tɔ̀ɔ neaě diblɛ̌ǒ slè nɔ̀ pnɛ̌a le ɔ je, “Tee Nyu, Ě bɛ̀teè le, tanʼǒ ně jǔà mɔ̀le, ně jǔu do sosǒ Ě kɔnʼɔ nɔ̀à.

³⁹Klě tǐ fòfoa wlòmo kǔ sùsuǒ ɛ kme ɔ ɛ̌ ni ɔ ɔ̌ pe tùe le ɛ̌ tɛkɛ̌ ɔ le, fenfeɔ plǔ diiǒ ɔ wien, ɛɛ̌ jlǎ bɛ tɛ ɔ bo. Ɛ dbɛ̌ ɔ loà.

⁴⁰Ě bàte Nè mɔ̀ cheěn nyoà le keǒ bu sàě ɔ kǔ sùsuà ja, kɛɛ u slě ɛ nunuɛ wɔ̀.”

⁴¹È kě Jùsu dɛ̌a Ɔɔ mɔ̀ cheěn nyo je Ɔ je, “Tùonyopoà ne kekɛɛ kmɔ̌ u se tè wlò popoɛ kɔn plě dɛ kukǔ nɛ̀ jiě u měne! È tǐ tae Bo sìǐn kɛɔ a slè plě a mǐǐ kàan tè popoɛ kɔn plě wlò dbadbǎà Ě kɔnʼɔ ke bɛ toǒn kɛ jleě mǒ bo keǒ a mɔ̀?” È kě Ɔ dɛ̌a jbɛjuǒ je Ɔ je, “Jaǎ nè jǔǒ.”

⁴²Tà jǔǒ ɔ keaě Ɔɔ mɔ̀ mi, è kǔ sùsuǒ ɛ poa ɔ wɔ̀ɔn ɛ̌ takǎea ɔ le, kɛɛ Jùsu tmɔɔ̌a sùsuǒ bɛ sɔnaě ɔ ja mǒ, ɔ̀ɔ kwɛ̌ nɛ̀ǒ bɔ̌a dɛ, Jùsu sàlaǒ ɔ Ɔ̌ nyea nɔ ɔ̀ɔ gbeǐ.

⁴³Tà nyopò wùɛ u jěaa dɛǒ, ɛ̀ kàea u bo wan keǒ Nyesoaa wlòlekaen kpěǒ mɔ̀. Tà i kaenʼaa nyopò wùɛ wlò le keǒ noǎ wùɛ Jùsu niaa mɔ̀, è kě Ɔ dǎla Ɔɔ mɔ̀ cheěn nyo je Ɔ je,

⁴⁴“A po nɔkǔ bo tɛɛ tɛɛ keǒ dɛà Ě tmɛɛ̌ amoo mɔ̀. Jbɛjuu Jǔà Ɔ miě bo demǒ sàeba Ɔ miě nyopò kwete mǒ poo lo.”

⁴⁵Kɛɛ Ɔɔ mɔ̀ cheěn nyo sea dɛ Ɔ sɛ̀nʼaa nynɛ̌ ji. Mɛ̌oǒ joo nɛ̀ moo Nyesoa wɛɛ̌a lɛ u jǐ kɛn. Dɛǒ nɛ̀ nua nɛ uǔ jboa dɛǒ Ɔ sɛ̀nʼaa nynɛ̌ le plě u pea fano keǒ bu gbàla ɔ wan.

⁴⁶È Jùsuu mɔ̀ cheěn nyo tùngmaea chɛtlǐia klě uu chɛ̀ slè keǒ uu nyu tae kɔn tè kmanaa chɔɔ dɔ̌ mɔ̀.

⁴⁷Ɔ jia dɛ u sìɛnʼaa dlǒ mɔ̀le ne, ii tè Ɔ dǔa jǔ gbe mǒ nɔ̀ Ɔ nynaeaǒ Ɔɔ chɛ̀ wakǎ mǒ bo,

⁴⁸è kě Ɔ dɛ̌a u je Ɔ je, “Nyu wùɛ ɔ̈ mii jǔ gbeà kuun Mǒo wlò je jebo kmema wòje keà jǔà ɔɔ ka nee je, è Ně chɛ̀à ɔ kmeě jebo. È nyu wùɛ ɔ̈ mi Mǒo jebo kmema, è Nyuà dbo Mǒo Nɔ̀ǒ ɔ kmeě jebo. Klě a slè nyuà tìeǒ ɔɔ chɛ̀ ja nɔ̀ kɔn tè kma chɔɔ klě Nyesoa jǐ kɛn.”

⁴⁹È kě Jɔ̀ɔ̌n dɛ̌a Jùsu je ɔ je, “Chì Kpa Ämo, ä jě nyu tɔ̀ɔ ɔ̌ sɛ̀ lě nyopò kǔ sìsi ja le ɔ̌ ni Nè nynɛ̌ plě ɔɔ̌ na ä mɔ̀, ii tè ä kan ɔ je.”

⁵⁰Kɛɛ kě Ɔ dǎla Jɔ̀ɔ̌n je Ɔ je, “Nyu wùɛ ɔ̈ɔ̌ wɔ̀n amoo je ɔ neeě aa wakǎ kɛn, ii tè aǎ kɛn ɔ je.”

⁵¹Tà tǐ konwaěaa le keǒ Nyesoa Bɔ kpalaa Jùsu jɔkɛn, è Jùsu poa ɛ ble Bɔ mua Jlǔsnɛ Ɔ̌ tùngmaea mumuɛ.

⁵²Ɔ dboa nyopò nya bu mua lě Sìmɛ̌lia nyoo dǐa u mǐa noǎ mɔ̀le wɔ̀ keǒ Ɔ mɔ̀.

⁵³Kɛɛ Ɔ mia Jlǔsnɛ, tèǒ nì kɔn tè nyopòǒ nea lěe klìgbaǒ kɛn u sea Ɔ jebo kme.

⁵⁴Tà Ɔɔ mɔ̀ cheěn nyoo sɔ̌nʼǒ moo Jìmǐse klee Jɔ̀ɔ̌n u jěaa dɛǒ, è kě u dɛ̌a u je, “Koɔn, jlɛ̀ bä po kɛě win jɔkɛn bo na bɛ sɔnʼě mǒ ɛ mǐ nyopòà gbè sùe wòje dɛɛ doà Ilaejɔ̀ nuaa seela tǐ le?”

⁵⁵Kɛɛ Ɔ bitǐa bo Ɔ̌ pnaěa u jǐ mǒ Ɔ je, “Nyesoaa Sùsuà a kɔnʼǒo mɔ̀ a se Ɛɛ kmɔ̌ ji.

⁵⁶Jbɛjuu Jǔà Ɔ slě di Ɔ mǐ tùonyopoo fònfno gbè sùe, kɛɛ keǒ Bɔ mǐ uu fònfno gblà.” È nùǒ muaě diě tɛ̀ɛ kɛn.

⁵⁷È tà Jùsu klee Ɔɔ mɔ̀ cheěn nyo keaa snǔǒ mɔ̀ nɛ, è kě nyu tɔ̀ɔ dɛ̌a Jùsu je ɔ je, “Ě miì de nama tà wùɛ mìi muma.”

⁵⁸È Jùsu tɛ̀na ɔ mǒ Ɔ mǐa ɛ jě bɛ̌ nu bɔ̌ sɛ̀nʼa dɛ nynɛ̌, kě Ɔ dɛ̌a Ɔ je, “Totǒgbea kɔn bǐtìi i tǐnʼěe wan plě noeà neěe jɔ mǒ i kɔn dlě, kɛɛ Jbɛjuu Jǔà Ɔ se pɛna kɔn.”

⁵⁹È kě Jùsu dɛ̌a nyu tɔ̀ɔ je Ɔ je, “Naǎ de.” Kɛɛ kě nyuǒ ɔ dɛ̌a Ɔ je ɔ je, “Ně Koɔn, nyane dɛ nɛ̀ moo sɔnʼǒǒ mɔ̀ mǒ bo mu ně gbeǐ bo tù.”

⁶⁰Kɛɛ kě Jùsu dɛ̌a ɔ je Ɔ je, “Nɛ bo nyopòǒ kokǒ kmɔ̌ neě ja bu tù uu kokǒ nyo bo, kɛɛ mu mò Nyesoaa win kwa konkɔn tè boɔ.”

⁶¹È kě nyu tɔ̀ɔ dɛ̌a Lɔ je ɔ je, “Ně Koɔn, Ě miì de nama, kɛɛ nyane dɛ nɛ̀ moo sɔnʼǒǒ mɔ̀ mǒ bo mu ně tùgba wlu kpa.”

⁶²Jùsu tùa lɔ kɛ̀ɛn Ɔ je, “Nyu wùɛ ɔ̈ po Něe tè kàan tè plě ɔ̈ jlɛ̌ bɔ̈ muu de klě ɔɔ kmɔ̌ kukǔ dakǎǒ ɔ neaa mɔ̀, ɔ seǒ je blɛɛ le bo Nyesoa Bɔ kɔn ɔ win kwa.”