Read Grebo, Northern Jɔ̀ɔ̌n 1 Bible Online

Jɔ̀ɔ̌n 1 - Grebo, Northern bible

Jɔ̀ɔ̌n 1

¹Sɔɔnʼě kmɔ̌ɔ wlò tùla mǒ Nyuà u dɛɛ Win Ɔ nea kɛn tùɔn, Ɔ klee Nyesoa neaǒ tàa do, è Ɔ mooa Nyesoa.

³Noǎ wùɛ Nɔ̀ nua ni, è ɛ se dɛ kɔn Ɔ seaa nu.

⁴È Win Nɔ̀ moo kmɔ̌ sie fònfnoo Mǎ, è Fònfnoǒ Ɛ moo Pepě keǒ tùonyopo mɔ̀.

⁵Pepěǒ Ɛ fɛn ne klě kwijlě slè, è kwijlě sěɛ ɛ je chle.

⁶Ɛ kɔna jbɛju tɔ̀ɔ ɔ̈ kɔn nynɛ̌ mooaa Jɔ̀ɔ̌n ɔ̈ Nyesoa dboaa.

⁷Jɔ̀ɔ̌n dia lě ɛ̈ di ɛɛ numa ɔ mǐa Pepěǒ ɛɛ sàse dɛ nu keǒ nyopò mɔ̀, ɔ mǐa u kàan dɛ tmɔɔ̌ no ɛ̈ kwɛɛǒo Pepěǒ jleě mǒ bo ɛ̈ di ɛɛ numa nyu wùɛ mǐa Pepěǒ Ɛɛ tè kàan tè po.

⁸Ɔɔ chɛ̀ sea Pepěǒ, kɛɛ ɔ dia lě keǒ bɔ tmɔɔ̌a nyopò kàan tè keǒ Pepěǒ jleě mǒ.

⁹Ɛmo kàan Pepěǒ nɛ̀ moo Nyuà Ɔ̈ diɔɔ kmɔ̌ɔ mɔ̀ keǒ Bɔ̈ fɔɔnʼǒo nyopò wùɛ dlǒ.

¹⁰I moo kàan tè Nɔ̀ nua kmɔ̌à, kɛɛ tǐǒ jleě Ɔ dia lɔɔ kmɔ̌ɔ mɔ̀ kmɔ̌ɔ nyopò sea Ɔ le jbo.

¹¹Ɔ diiaě Ɔɔ chɛ̀ɛ nyopò slè, u sea Ɔ jebo kme.

¹²Kɛɛ nyopò wùɛ ü mi Ɔɔ jebo kmema plě ü mi Ɔɔ tè kàan tè poba, Ɔ mi u kpě nyema keǒ bu moo Nyesoaa jlǔ.

¹³Ɛ se keà äa naǎ klee gbeǐpò nii ǔ beǒ tàa do ǔ kɔn ämoo, kɛɛ Nyesoaa chɛ̀ Nɔ̀ nu ä Ɔɔ jlǔ mǒ.

¹⁴Win beaě tùonyu tǔn wlòmo Ɔ̌ nea nɔ ä slè klě tǐ gbei wlòmo. Tà Ɔ neěa jèɔ ämoo slè, ä jěa Ɔɔ tè jǐ boaboǎ ɛ̈ Ɔ kɔnaa wòje Ɔɔ Gbeǐ Nyesoaa Jǔu do. Ɔ kɔn Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ ä mɔ̀ plě Ɔ̌ tmɛɛ̌ ä kàan dɛ.

¹⁵Tà Jɔ̀ɔ̌n peaa sàe, ɔ boɛa kàan tè keǒ Ɔ jleě mǒ ɔ je, “Nyu kɔn tè Ě boɛa amoo je Nɔ̀à, tà Ě dɛ̌a bòo ɛ̈ moo, ‘Nyuǒ Ɔ̈ miěe diba Ɔ̈ neǒ mǒo demǒ Ɔɔ tè boǎ jǐ ǐ sìnʼǒ ně tè mǒ. Mɛ̌oǒ joo nɛ̀ moo Ɔ nea kmɔ̌ plě ǔ keě kɔn.’ ”

¹⁶Nyesoaa Jǔ noɛɛ äa wùɛ mǒ chɔɔ Ɔ̌ po ä ngmna mɔ̀, è Bɔ̌ po ä ngmna mɔ̀ bɛ̌ sìn, Ɔ̀ poě ɛɛ bě tɛ̀ɛ.

¹⁷Nyesoa nyea ä teteǎ Ɔ jaeaěe Mɔ̀sě mǒ, kɛɛ Jùsu Tentǎn Jǔ jalaě Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ Ɔ̌ tmɔɔ̌a ä kàan tè keǒ Nyesoa jleě mǒ.

¹⁸Nyu wùɛ nɔ̀ sěɛlǎ Nyesoa jě, ɛ̀ sìnʼǒ Nyesoaa Jǔu do Ɔ̈ konwaě Ɔɔ Gbeǐ Nyesoa le Nɔ̀ tee Ɔ ämo.

¹⁹È tèà nì Jɔ̀ɔ̌n sèsaeaa Nyesoaa kpatòapoo klee uu mǒ sɛ̀ɛ nyo wlòmo ü kɔn lěe Lifàe dakɔ̌ slè ü sɔnaa Jlǔsnɛ mǒ Jùwɛ nyo dboaa bü muaa Jɔ̀ɔ̌n wan gbà nyu tae ɔ mooaa.

²⁰Ɔ sèsaea u wlòmo keǒ klɔ̀ slè nyu tae ɔ mooaa, ɔ sea sen tmɔ̌, kě ɔ dǎla ɔ je, “Ě se Nyesoaa Tentǎn Jǔ.”

²¹È u gbàla ɔ wan u je, “È mɔ mònoǒ kɛ de? Deě mòo kɛ Nyesoaa wnɔsàɔ Ilaejɔ̀?” Ɔ tùa u kɛ̀ɛn ɔ je, “Òooǒn, Ě se lɔ.” È u gbàla ɔ wan de u je, “Deě mòo Wnɔsàɔ Ɔ̈ kɔn tè u boɔlaa?” Ɔ̀ tùa u kɛ̀ɛn ɔ je, “Òooǒn.”

²²È demǒ bɔɔ̌ dɛ u gbàla lɔɔ wan nɛ̀à u je, “Mɔ mònoǒ kɛ? Ä jlɛ̌ bò tmɔɔ̌ ämo ke tae dɛ̀ɛ keǒ nè chɛ̀ɛ tè mɔ̀ ɛ̈ di ɛɛ numa bä mu de klě nyopòà dbo ämoo mɔ̀ ä mǐ u wlòmo sèsae le.”

²³È kě ɔ dɛ̌a ɔ je, “Wòje ke Nyesoaa wnɔsàɔ Aesaeǎ dɛ̌aa seela, Ě moo nyuà ɔ̈ miǎa sàe poba klě kpatekpǎ blǒ kɛn, kě Ě miǎ dǎba ɛ̈ moo, ‘A wɔ̀ aa chɛ̀ mɔ̀le keǒ Koɔn mɔ̀!’ ” (Is 40.3)

²⁴È nyopò tùuǒ Fɛlesǐi wǎn dboaa

²⁵ù gbɛ̀a ɔ wan u je, “Bɛ̌ nu bò se Nyesoaa Tentǎn Jǔ ɔ̀ɔ̌ Ilaejɔ̀ ɔ̀ɔ̌ Wnɔsàɔ, è mɛ kɔɔ̌n tè peě kɛ nyopò ně dlǒ de?”

²⁶Ɔ tùa u kɛ̀ɛn ɔ je, “Ě pe nyopò ně dlǒ sosǒ, kɛɛ ɛ kɔn Nyuu do Ɔ̈ nyna nɔ amoo slè bo Ɔ̈ kɔn tè a see ji,

²⁷Nɔ̀ neǒǒ demǒ Ɔ̈ diě. Mǒà Ě seǒ je blɛɛ lee chɛ̀ bo di Ɔɔ nyɔkòɛbě dbǐ kɛne wlà.”

²⁸Dɛà ɛ kpala tùɔn keǒ diěǒ moo Bɛtnè wɔ̀ɔn klě Jɔ̀ɔ̌dɛn ně demǒ, tà Jɔ̀ɔ̌n peeaě nyopò ně dlǒ le.

²⁹Tà chnɛ̀ tɛ̀ɛ gbàlaa le, Jɔ̀ɔ̌n jěa Jùsu Ɔ̌ diaě ɔ mɔ̀, è kě ɔ dɛ̌a ɔ je, “A chèǒ bo, Nyesoaa Blajǔ Ɔ wɔ̀ɔ mɔ̀le keǒ chɔ̀no mɔ̀ keǒ kmɔ̌ɔ nyopòo kpni kukwǐi tè mɔ̀ Nɔ̀à.

³⁰Nyu kɔn tè Ě boɛa amoo je Nɔ̀à, tà Ě dɛ̌a bòo ɛ̈ moo, ‘Nyuǒ Ɔ̈ miěe diba Ɔ̈ neǒ mǒo demǒ Ɔɔ tè boǎ jǐ ǐ sìnʼǒ ně tè mǒ. Mɛ̌oǒ joo nɛ̀ moo Ɔ nea kmɔ̌ plě ǔ keaǎ kɔn.’

³¹Ně chɛ̀à Ě sea nyu tae ɛ tùaa ji, kɛɛ Ě diě Ě pe nyopò ně dlǒ le ɛ̈ di ɛɛ numa Ě mǐ Ɔ Ǐsòwɛ̌ kwɛɛn kwlǎ mǒ sàe le.”

³²È Jɔ̀ɔ̌n sèsɛɛa Jùsuu tè kɛn le klě nyopòǒ mɔ̀, kě ɔ dɛ̌a ɔ je, “Ě jěa Ngmà Je Ne Sùsu Ɛ̈ nea lěe plabaee tǔn wlòmo Ɛ̌ sɔnaě jɔkɛn mǒ Ɛ̌ tèea lě Jùsu ja.

³³Ě seea Lɔ jboba mu, ɛ̀ sìnʼǒ Nyesoaà dbo mǒo keǒ bo poo nyopò ně dlǒ Nɔ̀ tmɔɔ̌a mǒ ɛ̈ moo, ‘Nyuǒ mìi jěba Ngmà Je Ne Sùsu miě ja tèeba Nɔ̀ moo Nyu Ɔ̈ miěe nyopò Ngmà Je Ne Sùsu ja poba.’

³⁴Ě jě ɛle ɛ̌ kpa tùɔn, nɛ̀ kɔn tè Ě tmɛɛ̌ amo ɛ̈ moo Jùsu Nɔ̀ moo Nyesoaa Jǔ.”

³⁵Tà chnɛ̀ tɛ̀ɛ gbàlaa le, Jɔ̀ɔ̌n klee ɔɔ mɔ̀ cheěn nyoo tàii sɔ̌n nynanaǒ tùɔnʼɔ doǒ kɛn bo,

³⁶è Jùsu sìinʼaǒ u gbàa. Tà Jɔ̀ɔ̌n jěaa Jùsu, è kě ɔ dɛ̌a ɔ je, “A jè Blajǔ Nyesoa nyee nee keǒ chɔ̀no piepiɛ mɔ̀ Nɔ̀à.”

³⁷Tà Jɔ̀ɔ̌nʼɔ mɔ̀ cheěn nyoo sɔ̌nʼǒ u wɔ̌naa dɛǒ ɔ boɔlaa, ù nana Jùsu de.

³⁸È Jùsu dawlǎla bo Ɔ̌ jěa lu ǔ nɛa Ɔ de, Ɔ̀ gbàla u wan Ɔ je, “Mɛ a pɛ̀ɛ̌n kɛ le?” Ù tùa Lɔ kɛ̀ɛn u je, “Wlabàe, È tà tìǐn kɛ?” Wlabàe sɛ̀n nynɛ̌ Tee Nyu.

³⁹Ɔ tùa u kɛ̀ɛn Ɔ je, “A diě a miǒ jě.” Ii tè ǔ mua ǔ jěa tà Ɔ neaǒo. Ɛ mooa klě wìtika wlòmo, è u neaǒ Ɔ gbàa ne ne wɛn ɛ̌ pala.

⁴⁰Tàii sɔ̌nʼǒ wɔ̌naa dɛǒ Jɔ̀ɔ̌n boɔaa ü nanaa Jùsu de u nyuu do mooa Andlǔ ɔ̈ mooa Saemɔ̌ Pitɛ̌ɛ mamǔ jbɛju.

⁴¹Tà dɛǒ ɛ sìǐnʼa bòo sosǒ, Andlǔ mua ɔ̌ jěa ɔɔ mamǔ Saemɔ̌ ɔ̌ tmɔɔ̌a nɔ ɔ je, “Ä jě Masaeǎ!” Masaeǎ ɛ sɛ̀n nynɛ̌ Nyesoaa Tentǎn Jǔ.

⁴²È Andlǔ kpalaě Saemɔ̌ klě Jùsu mɔ̀. Tà Jùsu jěaa Saemɔ̌, è kě Ɔ dɛ̌a Ɔ je, “Mòà mò moo Saemɔ̌ ɔ̈ moo Jɔ̀ɔ̌nʼɔ jǔ. Nè nynɛ̌ kɔn bɛ moo Sifà.” Sifà ɛ moo Pitɛ̌ klě Kwlǐki win wlòmo ɛ̈ sɛ̀nʼɛ nynɛ̌ Seɔ̌.

⁴³Tà chnɛ̀ tɛ̀ɛ gbàlaa le, Jùsu poa ɛ ble Bɔ mua Jàlalǐi wakǎ kɛn. È tà Ɔ wɛ̀aa mɔ̀ Ɔ mǐaa mu, Ɔ̀ jěa Felɔ̌, è kě Ɔ dɛ̌a Ɔ je, “Naǎ de.”

⁴⁴Felɔ̌ sɔnaě mǒ diěǒ moo Bɛsedà kɛn, ɛmo diěe doǒ nɛ̀ kɔn kɛn Andlǔ klee Pitɛ̌ kɔn lě.

⁴⁵È Felɔ̌ mua ɔ̌ jěa Nataniɔ̌ ɔ̌ tmɔɔ̌a nɔ ɔ je, “Ä jě Nyuà Ɔ̈ kɔn tè Mɔ̀sě chlěaa klě Nyesoaa teteǎ wlòmo plě Ɔ̈ kɔn tè Nyesoaa wnɔsàɔpo chleě lee kɛn ke! Ɔ moo Jùsu, Jòsɛ̌foo Jǔ, Ɔ̈ kɔn lěe Nǎsòwɛ̌ dǐa!”

⁴⁶Nataniɔ̌ gbɛ̀a ɔ wan ɔ je, “Jè Nǎsòwɛ̌ kɛ le? Ě ji ɛle kàan dɛ slě wɔ̀ bɛ sɔnʼě ɛmo diěǒ wlòmo.” È Felɔ̌ tùa ɔ kɛ̀ɛn ɔ je, “Diě mì Ɔ jě.”

⁴⁷Tà Jùsu jěaa Nataniɔ̌ ɔ keaě Ɔɔ mɔ̀ di, è tèà nì Ɔ boɛaǒ ɔ jleě mǒ Ɔ je, “Kàan Ǐsòwɛ̌ kwɛin ɔ̈à mǒ booa slě mǒ ne, jè nɔ̀ǒ diě.”

⁴⁸Nataniɔ̌ gbɛ̀a Ɔ wan ɔ je, “È tà jii liǐ kɛ mǒ?” Jùsu tùa lɔ kɛ̀ɛn Ɔ je, “Plě Felɔ̌ mǐì da, Ě jěè le keǒ bueě tu bobo.”

⁴⁹È kě Nataniɔ̌ dɛ̌a Ɔ je ɔ je, “Tee Nyu, Mòà Mò moo Nyesoaa Jǔ plě Mò moo Ǐsòwɛ̌ kwɛɛn Klɔ̀ba!”

⁵⁰Jùsu gbàla ɔ wan Ɔ je, “Tà Ě nu kɛ wiěn Ě jěè le keǒ bueě tu boboò nɛ̀ kɔn tè pò Ně tè kàan tè le? Mì noǎ fòe jěba i miǒ dɛà kpaa tùɔn mǒ sìn.”

⁵¹È kě Jùsu dɛ̌a Nataniɔ̌ je Ɔ je, “Kàan tè nìà Ě tmɛɛ̌ mò, mì jɔkɛn jěba ɛ mǐ je kna, mì Nyesoaa najiǒpò jě u mǐ jaě jɔkɛn tè nu keǒ Jbɛjuu Jǔà dlǒ mǒ.”