Read Grebo, Northern Jɔ̀ɔ̌n 15 Bible Online

Jɔ̀ɔ̌n 15 - Grebo, Northern bible

Jɔ̀ɔ̌n 15

¹È kě Jùsu dɛ̌a Ɔ je, “Mǒà Ě wǒ je kàan Tu, è Ně Gbeǐ Nɔ̀ moo chèǒ ɛɛ Jǐ Mɔ̀ Tùɔ̌.

²Ɔ bɛ̌ ti beě wùɛǒ ïǐ too bui keǒǒ jleě mǒ, è beěǒ toee nì Ɔ snɛ̌ fǒ měne ɛ̈ di ɛɛ numa i mǐ bui fòfoa to.

³Amoà kmee winʼà Ě tmɔɔ̌ amoo bo a snǎě mɔ̀le ɛ̌ wɛ̀ mɔ̀le.

⁴A neǒǒ jleě mǒ ɛ̈ di ɛɛ numa Ě miǒ a jleě mǒ ne. Bo tu baě bɛ̌ seǒ ɛɛ naǎ jleě mǒ ne, ɛ slě wɔ̀ bɛ to buo keǒ ɛɛ chɛ̀ mɔ̀, dɛɛ doǒ nɛ̀ ɛ mono, a slě wɔ̀ ba nu Nyesoaa konkwa ɛ̀ sìnʼǒ bǎ neeɔɔ̌ mɔ̀ plě.

⁵Mǒà Mǒ tuǒ ɛ nynaǒ pènmo bo, è amo ɛɛ beǒ ï sɔɔnʼǒ ɛ jleě měne i nynaǒ pènmo bo. Nyu wùɛ ɔ̈ miǒ Mǒo jleě mǒ nema, Ě miǒ ɔ jleě mǒ nema, è ɔ miě ɛ wɔ̀ba keǒ bɔ nu noǎ fòfoa keǒ Nyesoa mɔ̀, kɛɛ Bo seǒ mǎ, aa do a slě wɔ̀ ba nu dɛ keǒ aa chɛ̀ mɔ̀.

⁶Nyu wùɛ ɔ̈ seǒ Mǒo jleě mǒ nema mu, Nyesoa mi ɔ kwa poba wòje tu baě ɛɛ̌ too, ɛ mǐ chechɛ̌, è imo beě taeǒ Ɔ mi i le bòba Ɔ̌ mǐ na tiɛ̌n Ɔ̌ mǐ i tǎn po.

⁷Bɛ̌ nu bǎ neǒǒ jleě mǒ bo plě noǎà Ě boɛɛ bǐ neě a mǒ bo, è bǎ gbà dɛ wùɛ a jlɛ̌ɛ wan, Nyesoa mi ɛ a nyema.

⁸Bɛ̌ nu bǎ ke noǎ fòfoa ni keǒ Nyesoa mɔ̀, è a nye Ně Gbeǐ tè jǐ boaboǎ plě a tee ɛ ɛ̈ moo a moo Ně mɔ̀ na nyo.

⁹Ě noɛɛ a mǒ no wòje keà Ně Gbeǐ nu Mǒo mǒ noɛɛa. A neě Ně mǒ noɛnoɛ mǒ bo.

¹⁰Bɛ̌ nu bǎ keǒ Ně teteǎà bo tùi, Ě mi a mǒ noɛɛma kaǒ, dɛɛ doǒ nɛ̀ ɛ mono, Ě tùiǒ Ně Gbeǐi teteǎ bo, ii tè Ɔ noɛɛ neě mǒ kaǒ.

¹¹Ě tmɛɛ̌ a noǎ wùɛà le ɛ̈ di ɛɛ numa chǒn mǐ a nu wòje keà chǒn ni Mǒo nunuɛ, è aa chǒn le nunuɛ mi a wun sìnma.

¹²È Ně tè Ě tmɛɛ̌ amoo nì moo keǒ Ě ni amoo mǒ noɛnoɛ kě ba nu měne nonoɛɛ.

¹³Mǒ noɛnoɛ fòɛ nyu wɔ̀ je bɔ kɔnʼɔ keǒ ɔɔ nenawa mɔ̀ nɛ̀ moo keǒ bɔ koǒǒ ɔɔ bǐìǒ pènmo.

¹⁴Bɛ̌ nu bǎ ke dɛà Ě tmɔɔ̌ amoo ni, è a moo Ně nenawa.

¹⁵Ně dae lee kɛ̀ a na wien po nyebajle. Mɛ̌oǒ joo nɛ̀ moo nyebajlo se dɛ ɔɔ chì kpa ämo nii ji. Ě dɛɛ a nenawa. Mɛ̌oǒ joo nɛ̀ moo noǎ wùɛ Ě wɔ̌nʼě Něe Gbeǐ mɔ̀ nì Ě po pepě mǒ keǒ amo.

¹⁶Ɛ se amo a seǒǒ sà, kɛɛ Mǒà Mǒ sàǒ amo plě Ɔ̈ tba amo keǒ ba mu a mǐ noǎ fòfoa le nu ï mii wlɛ̀ɛba. Ně Gbeǐ mi a dɛ wùɛ nyema ɛ̈ a mii wan gbàba klě Ně nynɛ̌ wlòmo.

¹⁷È doo de, Ě tmɛɛ̌ ane, ba nonoɛɛ měne!”

¹⁸Jùsu kpɛɛa Ɔɔ win nya Ɔ je, “Bɛ̌ nu kmɔ̌ɔ nyopò bǔ faen amo, è bi beě a wlò jleě ɛ̈ moo Mǒà Mǒ moo klekle Nyu u faen ne.

¹⁹Bɛ̌ nu bǎ kɔnʼɔ lě kmɔ̌ wlòmo, ɛ mii a mǒ noɛɛma wòje ɛɛ nyopò. Kɛɛ Ě po ɛ ble keǒ Boǒ sàě a kmɔ̌ wlòmo, tèǒ nì kɔn tè a slě kmɔ̌ wlòmo kɔn, dɛǒ nɛ̀ kɔn tè kmɔ̌ɔ nyopò faen amo.

²⁰Bi beě a wlò jleě, Ě tmɔɔ̌ noo amo no ɛ̈ moo kèii tè se jǐ boǎ i seǒ ɔɔ chì kpa ämo mǒ sìn. Dɛɛ doǒ nɛ̀ ɛ mono, bɛ̌ nu bǔ tè Ně tè mɔ̀, u mi aa tè mɔ̀ tèba ke. È bɛ̌ nu bǔ tùuǒ Ně tee win bo, è u miiǒ aa nini bo tùba ke.

²¹Nyuà dbo Mǒo u se Ɔ ji, tèǒ nì kɔn tè noǎ wùɛǒ nì u mi a mǒ numa keǒ Ně nynɛ̌ɛ tè mɔ̀.

²²Bɛ̌ nu Bo see lě di plě Bo see u Nyesoaa tuposà je po, è u see dɛ kukǔu tè jɛɛa kɔn. Kɛɛ ke ɛ toon jleě mǒ bo Ě diěe Ě tmɔɔ̌ uu, kanfinǎ seǒ uu dɛ kukǔ kɛn ne.

²³Nyu wùɛ ɔ̈ mi Mǒo faenma, ɔ faen Ně Gbeǐ le ke.

²⁴Bɛ̌ nu Bo see wlòlekaen noǎ wùɛà nu keǒ u mɔ̀ ïà nyu tɔ̀ɔ sěɛlǎa ni, è u see kpni kukwǐi tè jɛɛa kɔn. Kɛɛ baǎje bǔ jě Mǒ Bo ke i ni, kaǒ u faen Mǒ klee Ně Gbeǐ le.

²⁵Dɛǒ nɛ̀ kpɛ tùɔn ɛ̈ di ɛɛ numa dɛǒ ɛ̈ chleě lee klě uu teteǎ wlòmo ɛ miǒ jaě le ɛ̈ dɛ̌ bòo ɛ̈ moo, ‘U po wlò ǔ faen Mǒ putu mǒ.’ ” (Ps 35.19, 64.9)

²⁶È Jùsu je, “Wlò Wlòmo Ble Tùɔ̌ Ɔ̈ sonwɛě Něe Gbeǐ mɔ̀ mǒ Nɔ̀ moo Ngmà Je Ne Sùsu Ɛ̈ boɛɛ kàan tè. Ɛ miě Ně Gbeǐ mɔ̀ mǒ sɔnma Ě mǐ Ɛ dbo kělɔ a mɔ̀, è Nɛ̀ mi Ně tè kɛn le sèsaeba.

²⁷Sɔɔnʼě Ně konkwaa wlò tùla mǒ a klee Mǒo sɔ̌n ä dǔa nena mǒ no, tèǒ nì kɔn tè a mi aa bǐì wlòmo sèsaeba ke keǒ Ně tè mɔ̀.