Read Grebo, Northern Jɔ̀ɔ̌n 2 Bible Online

Jɔ̀ɔ̌n 2 - Grebo, Northern bible

Jɔ̀ɔ̌n 2

¹Chnɛ̀ jlǒ wěe sɔ̌n nì sìnʼa, è nyu tɔ̀ɔ nɔ̀ kɔn nynɔ dia tǐnma klě Jàlalǐi wakǎ kɛn klě diěǒ monoo Kenà kɛn. Jùsuu naǎ nea kɛn tùɔn.

²Ɛ u dala Jùsu klee Ɔɔ mɔ̀ cheěn nyo tǐnma de ngmnengmnɛ̌ǒ kɛn ke.

³Tà nmɔ wùɛ ɛ wɛ̀a lěe, Jùsuu naǎ tmɔɔ̌a Nɔ ɔ je, “Uu nmɔ wɛ̀ɛ le.”

⁴Kɛɛ Jùsu tùa ɔ kɛ̀ɛn Ɔ je, “Ně naǎ, nè si kɛǒ ɛɛ̌ mɔ̀le? Ɛ sěɛɛ̌ jè Ně tǐ ni.”

⁵È kě Ɔɔ naǎ dɛ̌a nyebajleǒ niaa blěpa nyoo konkwa je ɔ je, “Dɛ wùɛ Bɔ̌ tmɔɔ̌ amo a nu ɛ.”

⁶Ɛ kɔna jagbia fòee m̀mɔdo nì neaǒ ï kɔn dɛɛ do wɔ̀le je bɛ̈ kpaa dotǒ wěe hɔ̀ndlowɛɛ sɔ̌n ne wlèe sɔ̌n le (240). È Jùwɛ nyo kɔna Nyesoaa teteǎ keǒ uu noǎ klee uu chɛ̀ɛ de jlajla mɔ̀. Jagbiaǒ nì neaǒ bo keǒ ɛmo konkwaǒ mɔ̀.

⁷Tà tǐ gbei sìnʼaa, Jùsu tmɔɔ̌a nyebajleǒ Ɔ je, “A jieě jagbiaà ně je le.” Ii tè ǔ jiěa i ně je le kpankpa.

⁸È kě Ɔ dɛ̌a u je Ɔ je, “A tanàle, a dǔ ɛɛ tìe mǒ a kpaě ɛ nyuà de ngmnengmnɛ̌à ɛ neě kwete mǒ mɔ̀.” U kpalaě ɛ ɔ̀ mɔ̀.

⁹Nyebajleǒ u ji tà nmɔǒ ɛ sɔnaě mǒo no, kɛɛ nyuǒ de ngmnengmnɛ̌ǒ ɛ nea lěe kwete mǒ nɔ̀ sea ɛ ji, tèǒ nì kɔn tè tà ɔ tɛ̀na ɛmoo něǒ wan ɛ̈ǒ Jùsu ponpnɔaa nmɔ mǒ, è ɔ dala tǐnma mu nynɔɔ jbeǒ lo,

¹⁰kě ɔ dɛ̌a ɔ je, “Dɛ nyopò wùɛ ni pnɔɔ nɛ̀ moo klekle nmɔǒ monoo kàan nɛ̀ u kɛɛn nya, bo nyopò wùɛ bǔ nǎ nmɔ bǔ jǐ kwliǎ le plě ɛɛ dɛǒ kɔn tè see kma plě ǔ gbɛɛě ɛ demǒ, kɛɛ nènɛà dɛ monoo kàan nɛ̀ tù bo tǐ sìnsii měne plě è jɛɛ̌ kɛ̀ě ɛ!”

¹¹Dɛǒ nɛ̀ mooa klekle wlòlekaen dɛ Jùsu nua. È klě ɛmoǒ wlòmo Ɔ poa Ɔ chɛ̀ɛ tè jǐ boaboǎ pepě mǒ klě Jàlalǐi wakǎ kɛn klě diěǒ monoo Kenà kɛn. Dɛǒ nɛ̀ nua nɛ Ɔɔ mɔ̀ cheěn nyo poa Ɔɔ tè kàan tè.

¹²Tà ɛmo dɛǒ ɛ sìnʼaa, Ɔ klee Ɔɔ naǎ klee Ɔɔ mamǔpò klee Ɔɔ mɔ̀ cheěn nyo u tèea je ǔ muaě diěǒ moo Kapanìa kɛn klě u sìnʼaě mòngmɛ chnɛ̀ jlǒ wě.

¹³Tà tǐ konwaěaa le keǒ Jùwɛ nyoo Dlǒ Mǒ Sìin Didi Dɛɛ de ngmnengmnɛ̌ mɔ̀, Jùsu jaěa je Ɔ̌ muaě Jlǔsnɛ

¹⁴klě Nyesoaa kǎ fòɛ bo. Klě Ɔ jɛɛaě nyopò ǔ plea bliǎ klee blableǎ klee hùngbei keǒ chɔ̀noo pipiɛ mɔ̀, è nyopò tùu neaǒ wlěe těble jebo ü sìnsiɛɛa wlě mɔ̀ u mǐa chɔ̀no noǎ tɔ̀n.

¹⁵Ii tè Ɔ nua dbǔu fǎe Ɔ̌ piěaǒ u Nyesoaa kǎ fòɛǒ bo, jà bliǎ klee blableǎ. È Ɔ gbɛ̀tɛɛa wlě mɔ̀ sìnsiɛɛ nyoo wlěǒ le Ɔ̌ chinchnǐia uu těblea mǒ.

¹⁶È Ɔ tmɔɔ̌a nyopòǒ pleaa hùngbei Ɔ je, “A sàɔ hùngbeià kělɔ koǔɔ bo! A bɔ̌ Ně Gbeǐi koǔà noǎ bobo ploo koǔ mǒ nunuɛ!”

¹⁷È i beaě Ɔɔ mɔ̀ cheěn nyo mǒ wlò ɛ̈ moo ɛ chleěa le klě Nyesoaa win wlòmo keǒ Jùsu jleě mǒ ɛ̈ moo, “Nyesoa, Nè koǔà ɛɛ mǒ noɛnoɛ siɛn leě wlò jleě le wòje keà na.” (Ps 69.9)

¹⁸È Jùwɛ nyoo je si nyo chèa Lɔ ja u je, “Mɛ nìǐ kɛ ɛ̈ te leě ɛ ämo ɛ̈ moo kɔ̀n kpě keǒ Bò nu noǎà?”

¹⁹Jùsu tùa u kɛ̀ɛn Ɔ je, “Bǎ nymii kǎ fòɛà jǐ le, Ě mi ɛ poba klě chnɛ̀ jlǒ wěe tan wlòmo de.”

²⁰È u gbɛ̀a Ɔ wan u je, “Kǎ fòɛà ä po kɛɛ klě jlě wlèe sɔ̌n tùo m̀mɔdo wlòmo nɛ̀à mì kɛ poba klě chnɛ̀ jlǒ wěe tan wlòmo le?”

²¹Kɛɛ kǎ fòɛǒ kɔn tè Ɔ boɛɛaa kɛn nɛ̀ moo Ɔɔ fǒ.

²²Tèǒ nì kɔn tè tà Nyesoa dǔaa Jùsu jemǒ Ɔ sɔna lěe kǒla mǒ, è i beaě Ɔɔ mɔ̀ cheěn nyo mǒ wlò ɛ̈ moo Ɔ boɔa tèà le, ii tè uu Nyesoa winʼi tè kàan tè popoɛ klee tè wùɛ Ɔ boɔa uu je i beea le kɛn.

²³Tà Jùsu nea lěe Jlǔsnɛ klě Dlǒ Mǒ Sìin Didi Dɛɛ de ngmně tǐ wlòmo, nyopò fòfoa jěa wlòlekaen noǎ Ɔ niaa ne ǔ poa Ɔɔ tè kàan tè.

²⁴Kɛɛ Jùsu sea u wlò je kuun nu. Mɛ kɔɔ̌ tèǒ joo nɛ̀ moo Ɔ jia nyopò tae uu wùɛ u mooa ne.

²⁵Ɔ jia dɛ neaě uu wlè jleě le, ii tè ɛ sea nyu bɔ tmɔɔ̌a Nɔ uu tè.