Read Grebo, Northern Jɔ̀ɔ̌n 20 Bible Online

Jɔ̀ɔ̌n 20 - Grebo, Northern bible

Jɔ̀ɔ̌n 20

¹Ɛ mooa Sɔ̌ndee kènta gbìi tà kwijlě ngmně neěa jè lěe plomǒ, Mɛwlě Mɛkɛniì diaě klě sɛklɛ bǐtìe wien ɔ̌ jěa seɔ̌ǒ ɛ̌ sɔnaǒ bǐtìe wien mǒ.

²Tèǒ nì kɔn tè ɔ kpala plùplɛ de klě Saemɔ̌ Pitɛ̌ mɔ̀ klee mɔ̀ cheěn nyu tɔ̀ɔ ɔ̈ Jùsu noɛɛaa mǒ ɔ̌ sèsaea u wlòmo ɔ je, “Nyopò tùu nù sàě Koɔn klě sɛklɛ bǐtìe wan! Tà u kpaǒ Ɔɔ ä seǒ ji!”

³Tèǒ nì kɔn tè Pitɛ̌ klee mɔ̀ cheěn nyuǒ u sɔnaě Jlǔsnɛ mǒ u muaě sɛklɛ bǐtìe wien.

⁴Uu sɔ̌n wùɛǒ u kpɛa plùplɛ, kɛɛ mɔ̀ cheěn nyuǒ nɔ̀ sìnʼa Pitɛ̌ nya ɔ̈ nyniaě sɛklɛ bǐtìe wien klekle.

⁵Ɔ slɔ̀ɔa dlǒ wɔ̀ɔn ɔ̌ tanaě bǐtìeǒ wan le ɔ̌ jěa daleǒ u finfiɛ̌ɛa Jùsu, kɛɛ ɔ seaě bǐtìeǒ wan pa.

⁶È Saemɔ̌ Pitɛ̌ ɔ̈ neaǒ ɔɔ demǒ è nɔ̀ǒ nyniaǒ. Ɔ nua fǒn ɔ̌ palaě bǐtìeǒ wan ɔ̌ jěa Ɔɔ dale u tùua Ɔɔ bo.

⁷È daloà u finfiɛ̌ɛa Ɔɔ dlǒ nɛ̀ pɛɛnʼa dɔ̌ bo,

⁸plě mɔ̀ cheěn nyuǒ ɔ̈ mooa klekle ɔ̈ nyniaǒo plě ɔ̌ keěa kɛ lě bǐtìeǒ wan pa ɔ̌ tanaě ɛ wlòmene plě ɔ̌ keěa kɛ i kàan tè po ɛ̈ moo Jùsu dǔa mǒ je.

⁹È u sěɛɛ̌a jè dɛǒ le jbe kaǒ ɛ̈ dɛ̌ bòo klě Nyesoaa win wlòmo ɛ̈ moo, Ɔ blɛɛ je Bɔ dǔa jemǒ Bɔ sɔnaě kǒla mǒ.

¹⁰Ii tè Ɔɔ mɔ̀ cheěn nyoǒ è nùǒ mua de klě u chɛ̀ɛ tà.

¹¹È klě dɛǒ wlòmo Mɛwlě nynanaǒ plomǒ bo klě sɛklɛ bǐtìeǒ wien ɔ̌ fìnʼa. È tà ɔ keaa fìn, ɔ slɔ̀ɔa dlǒ wɔ̀ɔn ɔ̌ chèaě sɛklɛ bǐtìe wan bo.

¹²È ɔ jěa najiǒpòo sɔ̌n ǔ poa wlawlě plǐ ǔ nea bo keǒ tàǒ Jùsuu kokǒ fǒ pɛnaǒo bo, do neea Ɔɔ dlǒ mɔ̀ bo, è do neea Ɔɔ be mɔ̀ bo.

¹³U gbàla Mɛwlě wan u je, “Nynɔ, mɛ kɔɔ̌n tè fìǐn kɛ?” È ɔ tùa u kɛ̀ɛn ɔ je, “U kpa ně Koɔn no, u sà Lɔɔ tàà le, tà u kpaǒ Ɔɔ Ě seǒ ji.”

¹⁴Tà ɔ wɔ̀laa tèǒ boɔboɔ mɔ̀, è nɔ̀ǒ chèa de ɔ̌ jěa Jùsu Ɔ̌ nynana bo, kɛɛ ɔ sea Ɔ jbo.

¹⁵È Jùsu gbɛ̀a ɔ wan Ɔ je, “Nynɔ, mɛ kɔɔ̌n tè fìǐn kɛ? Mɔ pɛ̀ɛ̌n kɛ le?” Mɛwlě jěa lɛ ɛ̈ moo ɛ mooa bòǒ ɛɛ konkɔn nyu Ɔ̌ boɛaě ɔ mɔ̀, ii tè kě ɔ dɛ̌a Ɔ je ɔ je, “Kunkunyɔ, bɛ̌ tù Mò Bò kpa Lɔ, è Bò sèsae leě wlòmo tàǒ kpàǒ Ɔɔ ɛ̈ di ɛɛ numa Ě mǐ Ɔ kpa.”

¹⁶È Jùsu dala ɔlo Ɔ je, “Mɛwlě!” È ɔ chèa Ɔ ja, è kě Mɛwlě dɛ̌a Ɔ je ɔ je, “Wlebonì!” ɛ̈ sɛ̀nʼɛ nynɛ̌ Tee Nyu klě Hiblǔ win wlòmo.

¹⁷È Jùsu je, “Nè gbèě mɔ̀. Mɛ̌oǒ joo nɛ̀ moo Ě sěɛɛ̌ jè de mi klě Ně Gbeǐ mɔ̀, kɛɛ mu mì Ně mɔ̀ cheěn nyo wlòmo sèsae le, Ě mi ni klě a klee Ně Gbeǐ mɔ̀ Ɔ̈à moo a klee Mǒ äa Nyesoa ke.”

¹⁸Ii tè Mɛwlě Mɛkɛniì mua ɔ̌ tmɔɔ̌a Ɔɔ mɔ̀ cheěn nyo ɛ̈ moo ɔ jěa Koɔn no plě klee tè Ɔ poa lɔɔ wan bɔ tmɔɔ̌a nuu.

¹⁹Klě ɛmo Sɔ̌nde waěǒ ɛɛ wìtika wlòmo Ɔɔ mɔ̀ cheěn nyo bòa le klě blòo do wlòmo ǔ poaǒ chnia le ǔ gbàla li. Mɛ̌oǒ joo nɛ̀ moo u pea Jùwɛ nyoo nyefòapoo fano. È Jùsu wǒaě u slè Ɔ̌ nynana bo, kě Ɔ dɛ̌a Ɔ je, “Ně bo wnawna keǒ a mɔ̀!”

²⁰Tà Ɔ boɔlaa dɛǒ, è nùǒ Ɔ tea kponkpaǐi pě je ï neaě Ɔɔ kwete mǒ klee dǐi pǎ ɛ̈ neaǒ Ɔɔ wakǎ mǒ. Tà Ɔɔ mɔ̀ cheěn nyo jěa Ɔɔ, uu plɔ bloa le chɔɔ.

²¹È kě Jùsu dɛ̌a de Ɔ je, “Ně bo wnawna keǒ a mɔ̀. Klě tǐà wlòmo Ě dbe ale wòje keǒ Ně Gbeǐ nuu Ɔ̌ dbo Mǒo.”

²²Tà Ɔ wɔ̀laa tèǒ boɔboɔ mɔ̀, è Ɔ wlǎla u fònfno kɛn, kě Ɔ dɛ̌a Ɔ je, “A kme Ngmà Je Ne Sùsu bo.

²³Bɛ̌ nu bǎ poo nyopòo kpni kukwǐi tè wlò le, è Nyesoa poo uu tè le wlò ke. Kɛɛ bɛ̌ nu bǎ se nyopòo kpni kukwǐi tè wlò le poo lo, è Nyesoa se uu tè wlò le poo lo ke.”

²⁴Tà Jùsu dia lěe, Tɔmɔ̌se ɔ̈ moo mɔ̀ cheěn nyoo pù tùo sɔ̌nʼǒ u nyuu do u dɛɛ Slìpoi ɔ seaǒ ne.

²⁵Tèǒ nì kɔn tè tà ɔɔ bǐì mɔ̀ cheěn nyo tmɛɛ̌a nɔɔ ɛ̈ moo “Ä jě Koɔn noò!” è kě ɔ dɛ̌a u je ɔ je, “Ě se i kàan tè po, ɛ̀ sìnʼǒ kponkpaǐi pěǒ neě Ɔɔ kwete mǒ bo jě li, bo tǒ i le plě klee bo tǒ dǐi pǎǒ neǒ Ɔɔ wakǎ mǒ le plě.”

²⁶Tà wǐki waěe do sìnʼaa, è Ɔɔ mɔ̀ cheěn nyo bòa le de klě koǔǒ bo, Tɔmɔ̌se neaě u slè le. U poaǒ chnia le ǔ gbàla i. È Jùsu wǒaě u slè Ɔ̌ nynana bo, kě Ɔ dɛ̌a Ɔ je, “Ně bo wnawna keǒ a mɔ̀.”

²⁷È kě Ɔ dɛ̌a Tɔmɔ̌se je Ɔ je, “Poà nè chìajɔ kělɔɔ̌ kwete mǒ mì Ně kweteǒ jě, è mǎǒ nè kweta keàǎ wakǎ mǒ bo, bɔ̌ kplɛ popoɛ plě po i kàan tè Ě moo kmɔ̌ ne Nyu.”

²⁸È kě Tɔmɔ̌se dɛ̌a Ɔ je ɔ je, “Ně Koɔn! Ně Nyesoa!”

²⁹È kě Jùsu nia ɔ wan gbògba Ɔ je, “Tà jè kɛ Mǒo nɛ̀ kɔn tè pò Ně tè kàan tè le? Ngmna keǒ nyopòà mɔ̀ ü se Mǒo jě ü po Něe tè kàan tè!”

³⁰Jùsu nua wlòlekaen noǎ fòfoa tìi keǒ Ɔɔ mɔ̀ cheěn nyo jemǒ ï u see kɛ̀ɛ chlě kělɔ chněedɛ̌ɔ wlòmo.

³¹Wlòlekaen noǎà nì chleě le kělɔ chněedɛ̌ɔ wlòmo ɛ̈ di ɛɛ numa a mǐ Jùsuu tè kàan tè po ɛ̈ moo Nɔ̀ moo Nyesoaa Tentǎn Jǔ plě Ɔ̈ moo Nyesoaa Jǔ, è klě Ɔɔ nynɛ̌ɛ kàan tè popoɛǒ wlòmo a mi kmɔ̌ sie fònfno kɔnma.