Read Grebo, Northern Jɔ̀ɔ̌n 21 Bible Online

Jɔ̀ɔ̌n 21 - Grebo, Northern bible

Jɔ̀ɔ̌n 21

¹Tà ɛ kpalaǒo tǐ gbei nya, è Jùsu woǒa Ɔɔ mɔ̀ cheěn nyo je de klě jbǒǒ u dɛɛ Tabawlìa wien ɛ̈ u dɛɛ Jàlalǐi jbǒ ke. È ke ɛ nuaa tùɔn kpokpala,

²chnɛ̀ jlǒ waě tɛ̀ɛ mɔ̀ Saemɔ̌ Pitɛ̌ klee Tɔmɔ̌se ɔ̈ u dɛɛ Slìpoi plě Nataniɔ̌ ɔ̈ kɔn lěe diěǒ moo Kenà kɛn ɛ̈ neěe Jàlalǐi wakǎ kɛn klee Sɛbɛ̀dii jlǔ klee Ɔɔ mɔ̀ cheěn nyoo sɔ̌n tùu nù beaǒ tàa do.

³È kě Saemɔ̌ Pitɛ̌ dɛ̌a ɔɔ bǐì je ɔ je, “Ě mi pǎba.” È u tmɔɔ̌a nɔ u je, “Ä miì de nama.” Ii tè uu wùɛ u dǔa jemǒ ǔ beaě blǎgbè chěnchaě wan ǔ muaě ně kɛn ǔ mua pǎba, u pǎla tǒn jlǒ waě gblèe mɔ̀, kɛɛ u sea dɛ jě.

⁴Tà chnɛ̀ gbàlaa le ɛɛ kènta, è Jùsu Nɔ̀ǒ nynanaǒ kponkpǒ bo, kɛɛ uǔ jboa Lɔ.

⁵È Jùsu pnaěaě jɔ mǒ Ɔ̌ gbɛ̀a u wan Ɔ je, “Ně mɔ̀niapo ale, a sěɛ kɛ dɛ jě le?” U tùa Ɔ kɛ̀ɛn u je, “Dɛɛ̌dɛ̀ɛ wùɛ nɛ̀ ä sěɛ jě.”

⁶È kě Ɔ dɛ̌a u je Ɔ je, “A dǔ tataǒ mǒ, a po ɛ ně mǒ klě blǎgbèǒ ɛɛ dilǎ wakǎ mɔ̀ a mi smì kmema!” Ii tè u nua dɛǒ Ɔ tmɔɔ̌a nuu, è tataǒ ɛ kmea smì fòfoa, u seaě ɛ chlìchlɛ wɔ̀ɔ chɛ̀.

⁷È Jùsuu mɔ̀ cheěn nyuà Ɔ noɛɛ mǒo, kě ɔ dɛ̌a Pitɛ̌ je ɔ je, “Äa Koɔnʼǒ tàǒ!” Pitɛ̌ poa gblàgblo, ii tè tà ɔ wɔ̌na nii ɛ̈ moo Koɔnʼǒ, è nɔ̀ǒ dǔa ɔɔ wlawlǒ pɛ̀tuǒ mǒ ɔ̌ gbàla ɛ ɔ̌ ngmnàeaě ně mɔ̀ ɔ̌ dlua ɔ̌ muaě kponkpǒ.

⁸Ɔɔ mɔ̀ cheěn nyo tùuǒ u nana Pitɛ̌ de klě blǎgbè wan ǔ chlìa tataǒ ɛ̈ jǐaa smì je le. U sea kponkpǒ mɔ̀ tmɔɔ no, ɛ blɛɛa mɔ̀ patě wlèe sɔ̌n tùo pù.

⁹Tà u nynia lěe kponkpǒ, u jěa wnewne nàkne fonfɔn smì klee flɔ̌ɔ pɛnaě i jleě ble.

¹⁰È kě Jùsu dɛ̌a u je Ɔ je, “Smìà a kmee a jaě ii tìe.”

¹¹Ii tè Saemɔ̌ Pitɛ̌ jǎlaě blǎgbè wan ɔ̌ chlìa tataǒ ɔ̌ jalaɔ ɛ kponkpǒ. Smì fòe wlèe nyiɛta tùo pù pù tùo tan (153) nì neaě tataǒ wlòmo. Smì fòfoa nì u kmea, kɛɛ tataǒ ɛ sea bɛ̌.

¹²È kě Jùsu dɛ̌a u je Ɔ je, “A diě a mǐ dɛ di.” È Ɔɔ mɔ̀ cheěn nyoo nyuu doo chɛ̀ nɔ̀ sea Ɔ wan gbà ɛ̈ moo, “È ke Nèě kɛ nynɛ̌?” Mɛ̌oǒ joo nɛ̀ moo u jia Ɔlo ɛ̈ moo Nɔ̀ mooa uu Koɔn.

¹³È Jùsu dǔa flɔ̌ɔ mǒ Ɔ̌ nyea nɛ ù, è dɛɛ doǒ nɛ̀ Ɔ nua smìǒ mǒ ke.

¹⁴Tà Nyesoa dǔaa Jùsu jemǒ Ɔ sɔna lěe kǒla mǒ, dɛǒ nɛ̀ mooa ɛɛ wěe tan nenɛ keǒ Bɔ woǒa Ɔɔ mɔ̀ cheěn nyo je.

¹⁵Tà u wɔ̀laa dɛ didiɛ mɔ̀, è kě Jùsu nia Saemɔ̌ Pitɛ̌ wan gbògba Ɔ je, “Saemɔ̌, Jɔ̀ɔ̌nʼɔ jǔ, nòɛɛ kɛɛ̌ mǒ no ɛ̌ sìnʼǒ nè nenawaà mǒe?” È Pitɛ̌ tùa Ɔ kɛ̀ɛn ɔ je, “Uuǔn Koɔn, Nè chɛ̀ ji ɛle Ě noɛɛ neè mǒ no.” È kě Jùsu dɛ̌a ɔ je Ɔ je, “Tù Ně mɔ̀ na nyo jǐ mɔ̀ wòje keà nyu tùii blajlǔ jǐ mɔ̀.”

¹⁶È Jùsu bɔɔ̌a demǒ Ɔ̌ gbàla ɔ wan sɔ̌n nenɛ tà Ɔ je, “Saemɔ̌, Jɔ̀ɔ̌nʼɔ jǔ, sɛjesɛ nòɛɛ kɛɛ̌ mǒ noe?” È Pitɛ̌ tùa Ɔ kɛ̀ɛn ɔ je, “Uuǔn Koɔn, Nè chɛ̀ ji ɛle Ě noɛɛ neè mǒ no.” È kě Jùsu dǎla ɔ je Ɔ je, “Tù Ně mɔ̀ na nyo jǐ mɔ̀ wòje keà nyu tùii blableǎ jǐ mɔ̀.”

¹⁷È klě wěe tan nenɛ wlòmo Jùsu gbàla Pitɛ̌ wan Ɔ je, “Saemɔ̌, Jɔ̀ɔ̌nʼɔ jǔ, noɛɛ kɛɛ̌ mǒ noe?” È wɔle beaě Pitɛ̌ mǒ no. Mɛ̌oǒ joo nɛ̀ moo wěe tan nì Jùsu wɛ̀a Ɔ̌ gbàla ɔ wan bɛ̌ nu bɔ̌ noɛɛa Ɔ mǒ. Ii tè kě Pitɛ̌ nia Ɔ kɛ̀ɛn tùtuɛ ɔ je, “Koɔn, Mò ji noǎ wùɛ měne, jì ɛle ɛ̈ moo Ě noɛɛ neè mǒ no.” È kě Ɔ dǎla ɔ je Ɔ je, “Tù Ně mɔ̀ na nyo jǐ mɔ̀ wòje keà nyu tùii blableǎ jǐ mɔ̀.

¹⁸Kàan tèà Ě tmɛɛ̌ mò, tǐǒ jleě mòoa nyemò, pèa nè chɛ̀ wlawlě měne, è miaě tàà jlɛ̀ bò mua lěe, kɛɛ bɛ̌ nu bò wɛ̀ le, è pnɛ̀ nè sonwe mǒ, nyu tɔ̀ɔ ɔ̌ pìn i ble ɔ̌ kpɛ mò klě tàà nè jlǎ bò muě.”

¹⁹Dɛǒ nɛ̀ Jùsu boɔla ɛ̈ mǐa ke Pitɛ̌ miaa kokoɛ̌ numa keǒ pète bɛ̌ tu jleě bò měne po ɛ̈ miaa Nyesoa tè jǐ boaboǎ nyema. Tà Ɔ wɔ̀laa tèǒ boɔboɔ mɔ̀, Ɔ̀ tmɔɔ̌a Pitɛ̌ Ɔ je, “Naǎ de.”

²⁰È Pitɛ̌ bitǐa bo ɔ̌ jěa mɔ̀ cheěn nyuà Jùsu noɛɛ mǒo ɔ̌ nɛa u de. Ɔɔ doà tǐǒ jleě u diaa Dlǒ Mǒ Sìin Didi Dɛ ɔ̈ poaǒo Jùsu dlǒ wulee bo ɔ̈ gbàla Ɔɔ wan ɛ̈ moo, “Koɔn, mɔ miǐ kɛě Mò bo demǒ sàba?” (Jn 13.25)

²¹Tà Pitɛ̌ jěa lɔɔ, è ɔ gbàla Jùsu wan ɔ je, “Koɔn, è ke ɔmoǒ ɔ miǐ kɛ kokoɛ̌ numa ke?”

²²È Jùsu tùa ɔ kɛ̀ɛn Ɔ je, “Bɛ̌ nu Bo dǎa bò ɛ̈ moo Ě jlɛ̌ bɔ ne kmɔ̌ ne ne Ě mǐ de diò, mɛ kɔ̀ɔn noǒ kɛɛ̌ ɛ mɔ̀? Kɛɛ mòà naǎ de.”

²³Imo winʼǒ nì u tontnooaa je le klě Tentǎn Jǔu wǎn slè ɛ̈ moo, “Jùsuu mɔ̀ cheěn nyuǒ ɔ se kǒba mu.” Kɛɛ Jùsu sea bò dǎ ɛ̈ moo ɔ se kǒba mu, kě Ɔ dǎla Ɔ je, “Bɛ̌ nu bo dǎa bò ɛ̈ moo Ě jlɛ̌ bɔ ne kmɔ̌ ne ne Ě mǐ de diò, mɛ kɔ̀ɔn noǒ kɛɛ̌ ɛ mɔ̀?”

²⁴Ɔɔ mɔ̀ cheěn nyuǒ nɔ̀ moo nyu ɔ̈ tmɛɛ̌ a noǎ wùɛà plě ɔ̈ chlě li. È ä ji ɛle ɛ̈ moo Jùsuu tè moo kàan tè.

²⁵Jùsu nua noǎ fòfoa tìi. È bɛ̌ nu bǔ chlěe ii wùɛ, Ě ji ɛle kmɔ̌ wùɛà ɛ see tà kɔnma mu u mii imoo chněenoǎǒ bo tùba.