Read Grebo, Northern Jɔ̀ɔ̌n 5 Bible Online

Jɔ̀ɔ̌n 5 - Grebo, Northern bible

Jɔ̀ɔ̌n 5

¹Tà ɛmo dɛǒ ɛ sìnʼaa, è Jùsu mua Jlǔsnɛ klě Jùwɛ nyoo digbaǐi de ngmnengmnɛ̌ kɛn.

²Klě pnèe wulǒ nea lě ɛ̈ kɔn wien u pooa lěe jokpɔ bleaa m̀m ï tbɛɛa ɛɛ dǐ, ɛɛ nynɛ̌ klě Hiblǔ win wlòmo ɛ moo Bɛtɛsèda ɛ̈ sɛ̀nʼɛ nynɛ̌ Wɔle Koǔ. Ɛ konwaěa wlɔ̀ dɔwunʼǒ le ɛ̈ u dɛɛ Blǎ Wlɔ̀ Dɔwun.

³Kmakma nyo fòfoa nù pɛnaě bleaǒ ngmɛ̀ɛ ble, u fea ně bɛ sèkea le. Dodɔ nyo klee kokɔ̌ nyo klee bo klɔ̀ɔ nyo uu wùɛǒ nù neaǒ ɛ wien.

⁴Ɛ kɔn tǐ ï Koɔn Nyesoaa najiǒpòi jɛ lěe ɔ̌ tɛkɛ̌ɛ něǒ le, è bɛ̌ nu bɔ̌ takǎ něǒ, nyuǒ mii klekle tùba ɔ̈ miěe pnèe wulǒǒ mɔ̀ beba nɔ̀ kɔn kwɛ̌ mi dɛ bɔ̌ba, kwɛ̌ɛ do tae bɛ jě bɛ tù.

⁵Ɛ kɔna nyuu do neaǒo něǒ wien ɔ̈ dǔaa kmakma mǒ klě jlěe wlò tùo pù pù tùo nnyɛɛ̀ wlòmo.

⁶Tà Jùsu jěa lɔɔ ɔ pɛnaa bo plě u tmɔɔ̌a Nɔɔ ɛ̈ moo, “Ɔ dǔa kmakma mǒ seelaò,” è Jùsu gbàla ɔ wan Ɔ je, “Jlɛ̀ kɛ nè kwɛ̌ bɛ bɔ̌ dɛ le?”

⁷Ɔ tùa Jùsu kɛ̀ɛn ɔ je, “Kunkunyɔ, Ě se mǒ sɛ̀ɛ nyu kɔn kěà tàà bɔ poě mǒo pnèe wulǒà mɔ̀. Bɛ̌ nu bo ně bɛ̌ takǎ le, bo jlɛ̌ bo beě, è nyu tɔ̀ɔ sìǐn nya ɔ̀ beě le.”

⁸Kě Jùsu dɛ̌a ɔ je Ɔ je, “Dǔ jemǒ, dǔ nè chèenʼǒ mǒ, mì na.”

⁹È tǐi doo tǐ jleě jbɛjuǒ ɔ̀ɔ kwɛ̌ nɛ̀ǒ bɔ̌a dɛ ɔ̌ dǔa ɔɔ chèenʼǒ mǒ ɔ̌ nana. Ɛmoǒ ɛ kpala tùɔn keǒ Nyesoaa de fɛ chnɛ̀ jlǒ waě mɔ̀.

¹⁰Ii tè kě Jùwɛ nyoo je si nyo dɛ̌a jbɛjuǒ Jùsu peanaa je u je, “Ɛ moo Nyesoaa de fɛ chnɛ̀ jlǒ waě, tèǒ nì kɔn tè ɛ moo tetě wlawlǎ keǒ bò di nè chèen blě.”

¹¹Kɛɛ ɔ tùa u kɛ̀ɛn ɔ je, “Nyuà pean mǒo Nɔ̀ tmɔɔ̌ mǒ ɛ̈ moo, ‘Dǔ nè chèen mǒ, mì na.’ ”

¹²Ù gbɛ̀a ɔ wan u je, “Mɔ tmɔɔ̌ nǒoǒ kɛ mò tèǒ?”

¹³Tà Jùsu nuaa fǒn Ɔ sɔna lěe diblɛ̌ǒ slè mǒ, nɛ̀ kɔn tè jbɛjuǒ ɔ sea Nyuǒ peana ɔɔ ji.

¹⁴Tà tǐ gbei sìnʼaa, è Jùsu jɛɛaě jbɛjuǒ klě Nyesoaa kǎ fòɛ bo, kě Ɔ dɛ̌a ɔ je Ɔ je, “Ke ɛ toon jleě mǒ bo klě tǐà wlòmo nè dɛ bɔ̌ɔ dɛ, nè nii kɛ̀ kpni kukwǐ, nɛ̀ bò se nu, tǐ tìi tà dɛ jakǎ miì jebo beeba.”

¹⁵È jbɛju nɔ̀ǒ dǔa jemǒ ɔ̌ mua ɔ̌ tmɔɔ̌a Jùwɛ nyoo je si nyo ɛ̈ moo Jùsu Nɔ̀ peana nɔ.

¹⁶Tèǒ nì kɔn tè u tùngmaea Jùsu le nunuɛ keǒ Bɔ nua dɛ taeǒ keǒ Nyesoaa de fɛ chnɛ̀ jlǒ waěǒ mɔ̀.

¹⁷Kɛɛ Jùsu tùa u kɛɛn Ɔ je, “Ně Gbeǐ Nyesoa ni konkwa tǐ wùɛ mɔ̀, ii tè dɛɛ doǒ nɛ̀ Ě ni ke.”

¹⁸Dɛǒ nɛ̀ nia Jùwɛ nyo wùɛ ǔ jlɛ̌ bu dbǎla Ɔ. Ɛ se Bɔ wlǎla Nyesoaa de fɛ waěe tetěe do, kɛɛ Ɔ dɛɛa Ɔɔ chɛ̀ Nyesoaa Jǔ ke. È klě ɛmo dɛǒ wlòmo Ɔ ni Ɔɔ chɛ̀ Ɔ klee Nyesoa Ǔ boɛɛ kɛn mǒ.

¹⁹È Jùsu tùia u kɛɛn Ɔ je, “Kàan tèà Ě tmɛɛ̌ amo, Nyesoaa Jǔà Ɔ slě wɔ̀ Ɔɔ do Bɔ nu dɛ keǒ Ɔɔ chɛ̀ mɔ̀, kɛɛ dɛ Ɔ jě Ɔɔ Gbeǐ nii nɛ̀ Ɔ ni sosǒ, ii tè Jǔà Ɔ ni dɛɛ teěnʼǒ ɛ̈ Ɔɔ Gbeǐ nii.

²⁰Gbeǐ noɛɛ Jǔà mǒ no Ɔ̌ tee Ɔ noǎ wùɛ Ɔ nii. Ɔ mi Ɔ noǎ fòe teeba i miǒ dɛà mǒ sìn i mǐ aa wùɛ wlòlekaen ne.

²¹Dɛɛ doǒ Gbeǐ nii Ɔ̌ duǐ kokǒ nyo jemǒ Ɔ̌ nye nuu kmɔ̌ sie fònfno, ɛɛ doǒ nɛ̀ Jǔà Ɔ ni Ɔ̌ nye nyu wùɛ kmɔ̌ sie fònfno ke ɔ̈ Ɔɔ wlò sàǒo.

²²È dɛ tɛ̀ɛ neǒo de nɛ̀ moo Gbeǐ ně tù nyu wùɛɛ blilǐ, kɛɛ blilǐ tùtuɛ wùɛ Ɔ poě ɛ Ɔɔ Jǔ kwete mǒ

²³ɛ̈ di ɛɛ numa nyu wùɛ miǒ Jǔà tù keǒ u nii ǔ tùiǒo Nyesoa Ɔ̈ monoo Gbeǐ. È nyu wùɛ ɔ̈ seǒo Jǔ tù, ɔ seǒ Gbeǐ tù ke Ɔ̈ dboo Jǔà.

²⁴Kàan tèà Ě tmɛɛ̌ amo, nyu wùɛ ɔ̈ pe Mǒo nɔkǔ jebo plě ɔ̈ poo Nyuà dbo Mǒo Ɔɔ tè kàan tè ɔ kɔn kmɔ̌ siee fònfno. Ɔmo nyuǒ ɔ seǎ blilǐ mɔ̀ tùtuɛ kɔnma mu, ɔ sɔn lě kmɔ̌ sie kǒla mǒ ɔ̌ kɔn kmɔ̌ sie fònfno.

²⁵Kàan tè Ě tmɛɛ̌ amo, tǐ diě le plě i nyni ni ɛ̌ wɛ̀ mɔ̀le, tà nyopòǒ se Mǒo ji u mi Něe win wɔ̌nma Ě mi nuu daba, uu nyopòǒ mi Mǒo nɔkǔ jebo poba u mi kmɔ̌ sie fònfno kɔnma.

²⁶Ke Ɔmo Gbeǐǒ Ɔ nuu Ɔ̌ moo kmɔ̌ sie fònfnoo Mǎ, kě Bɔ nu Ɔɔ Jǔà Bɔ moo fònfnoo Mǎ.

²⁷Ɔ nye Ɔ kpě ke keǒ Bɔ tù tùonyopoo blilǐ. Mɛ̌oǒ joo nɛ̀ moo Nɔ̀ moo Jbɛjuu Jǔ.

²⁸Biǐ kɛ̀ɛn a wlò le, tǐ diě le nyopò wùɛ ü neěe tnè bǐtìi wan u mǐ Jǔà Ɔɔ deda wɔ̌n

²⁹u miě tnè bǐtìi wan mǒ sɔn. Nyopòà nuu kàan dɛ bǔ dǔ jemǒ, u mi kmɔ̌ sie fònfno kɔnma, kɛɛ nyopòà nuu dɛ kukǔ bǔ dǔ jemǒ, Nyesoaa Jǔà Ɔ mi u tè jɛɛba.

³⁰Ně nu dɛ keǒ Ně chɛ̀ mɔ̀. Ě tùi blilǐ sosǒ dɛ Ě wɔ̌nʼɔ Ně Gbeǐ tmɔɔ̌ Mǒo Boǒ tùu. È Ně tɛ̀n ɛ mǒ keǒ Boǒ nu dɛ ɛ̈à Ě jlɛ̌ɛ, kɛɛ dɛà Nyuà dbo Mǒo Ɔ jlɛ̌ɛ, tèǒ nì kɔn tè Ně tè tùtuɛ slɛɛ̌ mǒ no.”

³¹È Jùsu kpɛɛa win nya Ɔ je, “Bɛ̌ nu Ně do Boǒ ke Ně chɛ̀ɛ sàse dɛ ni, è ɛ se kàan tùba mu.

³²Kɛɛ Ně Gbeǐ Nɔ̀ sɛ̀ɛ̌ tè mɔ̀, è Ě ji ɛle ɛ̈ moo Ɔɔ tè mɔ̀ sèsa kěàǎ mɔ̀ ɛ moo kàan tè.

³³A dboa nyopò klě Ně Dlǒ Po Jɔ̀ɔ̌n mɔ̀, è ɔ sèsaea a kàan tè wlòmo keǒǒ jleě mǒ.

³⁴Sɛje Ě se ɛ sòa keǒ bo tùonyugbe bɔ sàǎ tè mɔ̀ wòje keǒ Jɔ̀ɔ̌nʼɔ ka nee je, kɛɛ Ě boɛ ili sosǒ ɛ̈ di ɛɛ numa a mǐ wa klě aa kpni kukwǐ slè.

³⁵Jɔ̀ɔ̌n wǒa je keà wnewne nǎpe ɛ̈ wnee, è klě tǐ gbei wlòmo aa wùɛ aa plɛ bloa le keǒ ɔɔ pepě mɔ̀.

³⁶Kɛɛ konkwe fòeà Ně Gbeǐ nye Mǒo Bo nuu nì moo sàse fòɛ keǒǒ mɔ̀ ɛ̌ sìnʼǒ Jɔ̀ɔ̌n mǒ. Wlòlekaen noǎà Ě nii nì tee ɛ ɛ̈ moo Ně Gbeǐ Nɔ̀ dbo Mǒ.

³⁷È Ně Gbeǐà dbo Mǒo Ɔɔ chɛ̀ Ɔ moo Sàse keǒǒ mɔ̀. A sěɛlǎ Ɔɔ win wɛ̌n plě a sěɛlǎ Ɔɔ jigbà jě.

³⁸Ɔɔ winʼà a seǒ i bo tù. Mɛ̌oǒ joo nɛ̀ moo a se Nyuà Ɔ dboo Ɔɔ tè kàan tè po.

³⁹A jě lɛ ɛ̈ moo klě Nyesoaa win chencheɛ̌n wlòmo klě a kɔɔnʼě kmɔ̌ sie fònfno, ii tè a chěn ni, è imo winʼi chɛ̀ǒ nì moo sàse keǒǒ mɔ̀.

⁴⁰Kɛɛ aǎ jlǎ ba diɔɔ̌ mɔ̀ a mǐ kmɔ̌ siee fònfno kɔn.

⁴¹Ɛ se tùonyopo uǔ bae Mǒ.

⁴²È dɛ tɛ̀ɛ neǒo de nɛ̀ moo Ě ji ɛle ɛ̈ moo a se Nyesoa mǒ noɛɛ ne.

⁴³Ě diě kělɔ a mɔ̀ klě Ně Gbeǐi nynɛ̌ wlòmo, kɛɛ a seě jebo kme. Kɛɛ bɛ̌ nu bo nyu tɔ̀ɔ bɔ̌ diě klě ɔɔ chɛ̀ɛ nynɛ̌ wlòmo, è a kme ɔ bo je.

⁴⁴Aa sosǒ a pepee nyneǎ le, kɛɛ aǎ tɛ̀n ɛ mǒo chɛ̀ keǒ ba jě nynɛ̌ le popoɛ klě Nyesoa mɔ̀, è ke a miǐ kɛ Ně tè kàan tè popoɛ numa?

⁴⁵Aǎ jě lɛ ɛ̈ moo Ě mi a tè jɛɛba klě Ně Gbeǐ mɔ̀. Mɔ̀sěà a kɔn lěe wlò je kunkuɛn mǒ nɔ̀ mi a tè jɛɛba.

⁴⁶Bɛ̌ nu sɛjesɛ bǎ poo Mɔ̀sěe tè kàan tè, è a mii Ně tè kàan tè poba ke. Mɛ̌oǒ joo nɛ̀ moo Mǒà Mǒ kɔn tè ɔ chlěa.

⁴⁷Kɛɛ ke ɛ toon jleě mǒ bo ǎ see dɛǒ ɔ chlěaa ɛɛ tè kàan tè po, è ke a miǐ kɛ dɛà Ě boɛ ɛɛ tè kàan tè popoɛ numa?”