Read Grebo, Northern Jɔ̀ɔ̌n 7 Bible Online

Jɔ̀ɔ̌n 7 - Grebo, Northern bible

Jɔ̀ɔ̌n 7

¹Tà dɛǒ ɛ sìnʼaa, è Jàlalǐi wakǎǒ nɛ̀ Jùsu nɛa kɛn le, è Jùwɛ nyoo nyefòapoǒ nea lěe Jùdǐa wakǎ kɛn u pɛ̀na fɔ̌ le u mǐa Ɔ dbǎ, ii tè Ɔɔ̌ jlǎ Bɔ mua kɛ̀ lě ɛmo wakǎǒ kɛn.

²Tà tǐ mǎnaa jebo keǒ Jùwɛ nyo bu nea lě blea ngmɛ̀ɛ ɛɛ de ngmnengmnɛ̌ mɔ̀,

³è kě Jùsuu mamǔ jbɛjlu dɛ̌ Ɔ je u je, “Kɔ̀n Bò sɔn nɔ wakǎɔ kɛn mǒ Bò muě klě Jùdǐa wakǎ kɛn ɛ̈ di ɛɛ numa Nè mɔ̀ na nyo mǐ wlòlekaen noǎǒ nìi jě.

⁴Nyu wùɛ ɔ̈ jlɛ̌ ɔɔ nynɛ̌ bɛ jǎa, ɔɔ̌ nu noǎ klě je wɛ̌ tǔn wlòmo. Ke ɛ toon jleě mǒ bo È nii imo wlòlekaen noǎà, sɔnʼǒ kmɔ̌ ne tùonyopo mɔ̀ mǒ u mǐì ji.”

⁵Ɔɔ mamǔpò boɛa imo tèǒ lo sosǒ, nɛ̀ se bu poa Ɔɔ tè kàan tèe chɛ̀.

⁶Ii tè kě Jùsu dɛ̌a u je Ɔ je, “Ɛ sěɛɛ̌ jè tǐ ni keǒ Mǒà Boǒ mu, kɛɛ keǒ a mɔ̀ ɛ nu tɛɛ tǐ ba jě ba kpa.

⁷Kmɔ̌ɔ nyopò slě wɔ̀ bu faen amo, kɛɛ Ě tmɛɛ̌ u kaǒ ɛ̈ moo noǎǒ u nii i moo kukǔ, nɛ̀ kɔn tè u faen Mǒ.

⁸A kɛn nya a mu digbaǐi de ngmnengmnɛ̌ǒ kɛn, Mǒà Ě seě jè muma mu, ɛ seɛ̌ tǐ ni keǒ Mǒà Boǒ mu.”

⁹Tà Ɔ dǎla bòo, è Ɔ sìnʼaě Jàlalǐi wakǎ kɛn tǐ gbei.

¹⁰Tà Ɔɔ mamǔpò muaa digbaǐi de ngmnengmnɛ̌ǒ kɛn klě Jlǔsnɛ, plě Ɔ̌ nana u de ke. Kɛɛ Ɔ muuaě je wɛ̌ tǔn wlòmo nyu wùɛ sea Ɔɔ tè ji.

¹¹È klě ɛmo de ngmnengmnɛ̌ǒ kɛn Jùwɛ nyoo nyefòapo pɛ̀na Ɔ le ǔ gbɛ̀a nyopò wan le u je, “È tà Jùsu neě kɛ?”

¹²È sɔ̌noka, nyopò fòfoa neaě diblɛ̌ǒ slè ü boɛa Ɔɔ tè, kě uu tìe dɛ̌a u je, “Jùsu moo kàan Nyuò,” kɛɛ uu tìe tùu je, “Òooǒn, Ɔ moo nyopò mǒ boo Nyu.”

¹³Kɛɛ ke ɛ tonʼaa jleě mǒ bo ǔ peaa Jùwɛ nyoo nyefòapoo fano, nɛ̀ kɔn tè u nyuu doo chɛ̀ nɔ̀ seaǒ klɔ̀ slè di bɔ̈ boɔa dɛ keǒ Jùsu jleě mǒ.

¹⁴Tà de ngmnengmnɛ̌ǒ ɛ wuleeaa kɛn mǒ, è Jùsu Nɔ̀ǒ muaě Nyesoaa kǎ fòɛ bo Ɔ̈ teea nyopò.

¹⁵Ɔɔ teeaǒ ɛ kaenʼa Jùwɛ nyoo nyefòapo le wlò. È kě u dɛ̌a u je, “Nyuà Ɔ̈ see chěn, è ke ɛ nuǔ kɛ plě Ɔ̌ nuǔ bò le jijiɛ?”

¹⁶Ɔ tùa u kɛ̀ɛn Ɔ je, “Dɛà Ě tee lee, ɛ seɔ Ně chɛ̀ mɔ̀ mǒ sɔn, kɛɛ ɛ sonwɛě mǒ Nyuà mɔ̀ Ɔ̈ dbo Mǒo.

¹⁷Nyu wùɛ ɔ̈ jlɛ̌ bɔ̈ nu Ɔɔ kɛn wɔɔn dɛ, ɔ ji ɛle ɛ̈ moo dɛà Ě tee lee ɛ sonwɛě mǒ Nyesoa mɔ̀, ɛ seɔ Ně chɛ̀ mɔ̀ mǒ sɔn.

¹⁸Ii tè bɛ̌ nu nyu wùɛ bɔ̌ ke dɛ boɛ ɛ̈ sonwɛě ɔɔ chɛ̀ɛ dlǒ wlòmo, ɔ ni ɛ keǒ bɔ pɔ̀n ɔɔ chɛ̀ɛ tè jǐ boaboǎ le. Kɛɛ bɛ̌ nu nyu wùɛ bɔ̌ ke dɛ boɛ bɛ̌ nye nyuà dbo ɔɔ tè jǐ boaboǎ, è ɔ moo sèn bo mǎ nyu, kenkan dɛ slě ɔ mǒ ne.

¹⁹Mɔ̀sě sea kɛ a Nyesoaa teteǎ nye le? Kɛɛ a nyuu doo chɛ̀ nɔ̀ seǒ teteǎǒ bo tù. È mɛ kɔɔ̌n kɛ tè a pɛ̀n Něe dbadbǎ le keǒ Bo nu dɛà a je ɛ̈ monoo Mɔ̀sěe teteǎ wlawlǎ?”

²⁰È diblɛ̌ tùia Ɔ kɛ̀ɛn u je, “Kǔ sùsuǒ neěè ja. Mɔ pɛ̀ɛ̌n kɛ Nè dbadbǎ le?”

²¹Jùsu tùa u kɛ̀ɛn Ɔ je, “Ě nu wlòlekaen dɛ keǒ Nyesoaa de fɛ chnɛ̀ jlǒ waě mɔ̀, è ɛ pe aa wùɛ mǒ jlo keǒ Bo mǐ ɛ nu keǒ waěǒ mɔ̀.

²²Kɛɛ Mɔ̀sě nyea a Nyesoaa tetě keǒ ba bɛ̌a aa jbɛjujlu foeǐ, sɛjesɛ ɛ sea Mɔ̀sě ɔ sea ɛ wlò tù, ɛmoǒ ɛ sɔɔnʼě ɔɔ gbeǐpòo tǐ jleě mǒ. Ii tè bɛ̌ nu bɛ̌ nua de fɛ waěe chɛ̀ǒ ɛ̈ monoo wěe nnyɛɛ̀ nenɛ mɔ̀, aa nyuu jbɛjuju bɔ̌ kɔɔn no, a bɛ̌a ɔɔ foeě ǎ nia konkwa keǒ waěǒ mɔ̀.

²³Bɛ̌ nu bǎ ke aa jbɛjujlu foeǐ bɛ̌ keǒ de fɛ waě mɔ̀ ɛ̈ di ɛɛ numa aǎ dia Nyesoaa tetě wlǎ keǒ ɛmoǒ kɛn, è a wlǎla tetěǒ lo keǒ ba nua konkwa keǒ waěǒ mɔ̀. È bɛ̌ nu Bo pean nyu keǒ de fɛ waěǒ mɔ̀, è mɛ kɔɔ̌n tè a beě kɛ jlo měne keǒǒ mɔ̀?

²⁴A bɔ̌ jě dɛ sosǒ ba boɔǒ ɛ tè fǒ mǒ nunuɛ, aa tùtu tè bi slɛɛ̌ mǒ.”

²⁵È nyopòà kɔna lěe Jlǔsnɛ kě u dɛ̌a u je, “Deě ɛ se kɛ Jùsuà nyefòapo pɛ̀ɛn le keǒ bu dbǎa?

²⁶A jè Nɔ̀ǒ nynaǒ pepě mǒ bo Ɔ boɛ, kɛɛ u se tè wùɛ boɔ klě Ɔ mɔ̀. Deě sɛjesɛ uu dlě jě kɛ lɛ ɛ̈ moo Nɔ̀ moo Nyesoaa Tentǎn Jǔ le?

²⁷Sɛjesɛ Nyesoaa Tentǎn Jǔ Bɔ̌ diě nyu wùɛ se tà Ɔ sɔnʼě mǒo ji, kɛɛ ä ji tà Nyuà Ɔ sɔnʼě mǒo no.”

²⁸Tèǒ nì kɔn tè tà Jùsu keaa tee le klě Nyesoaa kǎ fòɛ bo Ɔ pnǎna dɛ jleě Ɔ je, “Sɛjesɛ a ji kɛɛ̌ lee, plě a ji kɛ tà Ě sɔn mǒo noe? Ně chɛ̀ sea ɛ ble po keǒ Bo diaɔ kmɔ̌ɔ mɔ̀. Sɛje Nyuà dbo Mǒo Ɔ ne kmɔ̌, kɛɛ a se Ɔ ji.

²⁹Klě Ɔ mɔ̀ Ě sɔnʼě mǒ, Nɔ̀ dbo Mǒ, ii tè Ě ji Ɔlo.”

³⁰Tà u wɔ̌na imoo tèǒ, u jlɛ̌ bu kmea Nɔ, kɛɛ ɛ sěɛɛ̌la jè tǐ ni keǒ bu kmea Nɔ, ii tè nyu wùɛ nɔ̀ sea Ɔ le tǒ.

³¹Nyopò fòfoa poa Ɔɔ tè kàan tè klě diblɛ̌ǒ slè, kě u dɛ̌a u je, “Bɛ̌ nu bo Nyesoaa Tentǎn Jǔà Bɔ̌ diě, Ɔ mi kɛ wlòlekaen noǎ fòfoa numa ɛ miǒ Jbɛjuà mǒ sìn le? È Jbɛjuà Nɔ̀ kɔn Bɔ moo Tentǎn Jǔ.”

³²Tà Fɛlesǐi wǎn wɔ̌naa tèǒ nyopòǒ ü boɛaa keǒ Jùsu jleě mǒ, è u klee kpatòapoo fòe dboa nyopò bu kmea Nɔ.

³³Tèǒ nì kɔn tè kě Jùsu dɛ̌a u je Ɔ je, “Tǐ konwakonwǎi gbei sosǒ nì Ě mià a mɔ̀ sìnma, è Mǒǒ mu de klě Nyuà dbo Mǒo mɔ̀.

³⁴A miǐ le pɔ̀nma, kɛɛ a seě jěba mu. Mɛ̌oǒ joo nɛ̀ moo tùɔnʼà Ě miěe kɛn a slě wɔ̀ ba muě.”

³⁵È kě Jùwɛ nyoo nyefòapo nia wan le gbògbaea u je, “È tà Ɔ wɛ̀ɛ kɛ mɔ̀le Bɔ muǔ ä seě Lɔ jěba mu? Deě Ɔ mi kɛ lě kuodakwɛ̌ɛ deě fòe kɛn muma tà äa nyopòo tìe neěe Ɔ mǐ kɛ Nyesoaa win tee lee?

³⁶Mɛ sɛjesɛ Ɔ sɛ̀ɛ̌n kɛ nynɛ̌ Ɔ̌ dɛ̌ɛɛ̌ bo ɛ̈ moo ä mi Ɔ le pɔ̀nma, kɛɛ ä se Ɔ jěba mu, plě tà Ɔ miěe ä slě wɔ̀ ä miě mu?”

³⁷Tà demǒ bɔɔ̌ chnɛ̀ jlǒ waěǒ ɛ̈ kɔn tè kmanaa chɔɔ keǒ ɛmo jalǎǒ mɔ̀ ɛ wǒaǒo, Jùsu nynana bo klě Nyesoaa kǎ fòɛ bo Ɔ̌ jɛɛ̌aě win Ɔ̌ boɛa Nyesoaa tè Ɔ je, “Bɛ̌ nu nyu wùɛ bo nenǎ to bɛ̌ ke ni, bɔ diɔɔ̌ mɔ̀ ɔ mǐ nǎ.

³⁸È ke Nyesoaa win ni nii boɔboɔ ɛ̈ moo, ‘Nyopò wùɛ ü mi Něe tè kàan tè poba u mi kmɔ̌ siee fònfno kɔnma wòje neǎ.’ ”

³⁹È dɛ Ɔ boɛɛaa kɛn nɛ̀ moo Nyesoaa Sùsu Ɛ̈ kɔn tǐ konwaěa le keǒ nyopòà mia Lɔɔ tè kàan tè poba mɔ̀ u miaa kɔnma. Klě tǐǒ wlòmo nyu wùɛ nɔ̀ Nyesoa sěɛɛ̌a jè Ɛmo Sùsuǒ nye. Mɛ̌oǒ joo nɛ̀ moo Ɔ sěɛɛ̌a jè Jùsuu tè jǐ boɛ̌ le.

⁴⁰Tà nyopòo tìe ü nea lěe diblɛ̌ǒ slè u wɔ̌naa tèǒ Ɔ boɔlaa, è kě u dɛ̌a u je, “Nyuà Ɔ kɔn Bɔ moo Nyesoaa Wnɔsàɔ Ɔ̈à kɔna lěe didiɛ.”

⁴¹È kě uu tìe tùu dɛ̌a u je, “Nɔ̀ moo Tentǎn Jǔ Ɔ̈ Nyesoa peea lěe Bɔ dboaa Ɔ̈ mǐa ämoo gblà.” È tìe tùu je, “Ke tae Nyesoaa Tentǎn Jǔ wɔ̀le je Bɔ nuǔ kɛě Jàlalǐi wakǎ kɛn mǒ sonsɔn?

⁴²Kě Nyesoaa win dɛ̌ ɛ̈ moo Nyesoaa Tentǎn Jǔ miǎě klɔ̀ba Dèběsee tùgba slè diiba u miǎ Ɔ kɔnma klě diěǒ moo Bɛ̀tlehɛ̌ɛn kɛn ɛ̈ neěe Jùdǐa wakǎ kɛn klě tàà Dèběse nea lěe.”

⁴³Ii tè klě diblɛ̌ǒ slè ɛ plooa ɛ wakě keǒ Jùsu jleě mǒ.

⁴⁴Nyopòo tìe jlɛ̌ bu kmea Nɔ, kɛɛ nyu wùɛ nɔ̀ sea Ɔ le tǒ.

⁴⁵Tà nyopòǒ kpatòapoo fòe klee Fɛlesǐi wǎn dboaa u muaa de, è u gbàla u wan u je, “Mɛ kɔɔ̌n tè a seěe Jùsu ja de?”

⁴⁶È u tùa u kɛ̀ɛn u je, “Ä sěɛlǎ nyu jě bɔ nu bò boɔboɔ!”

⁴⁷È Fɛlesǐi wǎn gbɛ̀a u wan de u je, “Deě Ɔ boo kɛ ale ke le?

⁴⁸Dɛ̌ɛ̀ Fɛlesǐi wǎn klee Jùwɛ nyoo nyefòapo tùu ü neěe u se Ɔɔ tè kàan tè poò?

⁴⁹Diblɛ̌ɛ doǒ nù po Ɔɔ tè kàan tè sosǒ, dɛ nu ɛɛ nɛ̀ moo u se Nyesoaa teteǎ ji plě ɛ moo chlǒ Nyesoa po ɛ ù mɔ̀.”

⁵⁰È umo Jùwɛ nyoo nyefòɛ tɔ̀ɔ ɔ̈ kɔn nynɛ̌ mooa Nɛkɔdǐma ɔ̈ muaěe Jùsu mɔ̀ tǐ tìi tà, nɔ̀ gbàla u wan ɔ je,

⁵¹“Bɛ̌ nu bä se kɛ Nyu nɔkǔ jebo po plě bä se dɛǒ Ɔ nii le jbo, ä wɔ̀le je bä jɛɛ kɛ Ɔ tè keǒ äa teteǎ mɔ̀ le?”

⁵²U tùa ɔ kɛ̀ɛn u je, “Dɛmo sè kɛ Jàlalǐi mǒ sɔnʼò? Nè chɛ̀ chèě Nyesoaa win wlòmo bo mì ɛ jěba ɛ̈ moo Nyesoaa Wnɔsàɔǒ Ɔ slě Jàlalǐi mǒ sɔnma mu!”

⁵³È uu wùɛ nùǒ mua deě kɛn le.